رواية سحر عيونها كاملة

تذكير بمساهمة فاتح الموضوع :

السـلام عليكم ورحمة الله وبركاته


قصـتي الأولى أتمنى أنها تنال إعجابكم لــلأخت (سحر عيونها)
شوي في بدايتها غرابـه ، لأنها ما راح تحتوي على تعريف بالشخصيـات ، ولكـن التعريـف راح تعرفونه من خلال متابعتكم لـ مجريات القصـه


سحـر عيـونها ، من هنـا تبـدأ







[ الجزء الأول ]




سحر : قــــول والله ؟
راشد : يـه .. قلت لج والله ! ..
سحر : بعد أهلــي أنــت .. أنا من زمان أقول ماكو أحد مثل أخوي ..
راشد : أيه .. سوي نفسج طيبه وحبوبه ..
سحر بدلع : أفــا .. أنا مو طيبه ..
راشد : لا تتدلعين علي لا ..........
قطعهم صوت جوال راشد ..
راشد : حيـا الله بـو عزوز .. وينك يالقاطع
مشعل : وعليكم السلام ..
راشد : ههههه يازعم تحرج مع وجهك ؟ ..
مشعل : أنت حد يطلعك ؟ أنت لازم تقعد بالبيت تعفن وما أحد يسوي فيك عمل خير ..
راشد : أفــا .. أفــا .. أمس كنا الحبايب واليوم ابد مو قرايب ، كني قلت شعر ؟
مشعل : بلا كلام فاضي وأجهز 10 دقايق وانا عند باب بيتكم ..
راشد : وين بتاخذنا اليوم ؟
سحر تأشر له أنه ما يروح
مشعل : ما ادري باخذك وبنروح لحمود الاماراتي
راشد : خلاص .. عشر دقايق وانا جاهز
مشعل : اوكي حبيب القلب لا تبطي ..
راشد : ابشـر .. فمان الله
سكر راشد الجوال و وقفت له سحر متخصره : وين اللي بيأكلني اليوم من مطعم لا صار ولا بيصير ؟
راشد : ههه أقول سحوور
سحر بحاجب مرفوع : خير ؟
راشد : خليها يوم ثاني .. والله مشعل صار لي شهر ما أدري عنه ..
سحر : وأنا شكو بمشعل أو أمه ؟ .. لا تسوي لي فيها اذا وعد أخلف .. ترى والله ما أحللك ! ..
راشد : هــي أنتي .. لا تهدديني مع ويهج .. اليوم ما عشيتج بكره اعشيج .. والمطاعم بتطير يعني ؟ ..
سحر : أنت احد يصدقك بشي ؟ .. أقول روح لمشعل لا تجرح مشاعره
راشد : هه سخيفه
سحر : انت اسخف
دخلت أم راشد المجلس : شفيكم ؟
راشد : ما فينا شي .. أقول يمه أنا بطلع تبين شي ؟
أم راشد : لا يمه سلامتك .. حط بالك على روحك ..
سحر : والله كل يوم نروح المدرسه ونرجع لا حطي بالج على روحج ولا هم يحزنون ..
راشد طلع لسانه مثل اليهال : حررررررررره
سحر : تعال قول لي سولفي عن صديقاتج
راشد : من حلاتهم عاد ؟ .. كلهم مثلج
سحر : ارجـــوك .. ربعك اللي كل واحد توم كروز ..
راشد : ما اضيع وقتي مع الـ .........
سحر بصوت عالي تكلم أمها : شفتـــــــــــــي ؟ بعيونج شفتي .. يسبني .. وانتي ساكته ..
أم راشد : وجعتوا راسي من الصبح بصوتكم
راشد باس راس امه : مع السلامه يمه
ام راشد : في حفظ الله
طلع راشد من البيت وبقت ام راشد و سحر
ام راشد : غرفتج أبوي راح يرتبها ؟ ..
سحر واهي تقرض اظافرها : وي يا حلاته جدي بيطلع من القبر ؟
ام راشد : تستخفين بدمج ؟
سحر : بعد عمري انتي يمه .. والله هلكانه .. يكفي اليوم الغدى علي
ام راشد : لااا اللي يسمع يقول طابخه هامور .. مو كأن صحن عدس
سحر : حلفي مو حلو ؟
ام راشد : ما قلت مو حلو .. بس صحن عدس يعني ما يتعب !
سحر : لأنج ما تعرفين تسوين فـ تقولين ما يتعب
ام راشد : ما أدري منو اللي علمج تسوينه يعني ؟
سحر : خخخ .. انزين يمه بصعد داري ..
دخلت عليهم رفا بإيدها كاس الكوفي : هااي
سحر : وكل يوم ابوي يشتري كوفي على حسابج ؟
رفا : تدفعين من جيبج ؟
سحر : لا بس .. ذبحتينا بريحته ما أحبه ..
ام راشد : الا اليوم طالعه من الغرفه ؟
رفا : ما تبوني برجع ترى ما عندي مانع
سحر : لا عيوني بتقعدين هنا .. الا قولي لي اليوم ما عندج أحد بالمستشفى مات ؟
رفا : قص بلسانج .. عبالج مثلج بنت الثانويه ؟ .. أنا جامعيه عيوني
سحر : شوي شوي لا يسيح نصج .. من حلاتهم الجامعيات يعني ؟
رفا : مو أحسن من البنات اللي يلبسون مريول وكل يوم عندهم واجبات ..
سحر : طيــري زيـن
رفا : ما عندي اجنحه ..
سحر : هه بااايخه
رفا : أحترمي اللي أكبر منج
سحر : يا كــرهج لما تقولينها
رفا قعدت عند امها : طيب واقفه وين رايحه ؟
سحر : السوبر ماركت .. جايه معاي ؟
رفا : خفيفه .. وين بتروحين ؟
سحر : يعني وين .. باروح غرفتي
رفا : شو بتسوين ؟
سحر : بسج أسئله عاد .. بتكلم بالتلفون
رفا : وليش ما تتكلمين هنا ؟
سحر: لأن شوفي ( تأشر على أمها ) بدأت سهرتها مع قناة الجزيره .. الصوت لآخر الدنيا وين أتكلم
رفا : طيب خلاص بروح معاج
سحر : شكو ؟
رفا : كيفي

----------


----------

محمد : مشعل .. يا اخي شغل شي قاعدين جي
مشعل : ما عندي شي اشغله
محمد : أنا عندي شريط يديد
مشعل : ما ابي اسمع اغاني
محمد : ليش ؟
مشعل : مالي نفس ارقص زين ؟
محمد : لا صدق صدق ..
مشعل : الهدوء حلو .. وبعدين كل واحد واهو يغني تحس انه بيموت .. يبه خلنا منهم
راشد : أوقف مشعل وقف هنا .. بانزل آخذ لأختي عشا .. واعدتها اليوم اني باخذها للمطعم وما قدرت
مشعل : أووكي .. وقفنا .. أنزل
طلع راشد من السياره وبقى مشعل ومحمد يتكلمون
محمد : الا شحال حمود ؟ ..
مشعل : حمود أمس مثل حمود اليوم وبكره
محمد : خيبه .. للحين مثل قبل بس سفر ؟
مشعل : ايه
محمد : ما نشوفه يسير الامارات ؟
مشعل : والله كل يومين هو بالامارات ..
محمد : واذا هناك ليش ما يقول لي ..
مشعل : يقول انك بخيل وما تضيفه
محمد : أونه بخيل !
مشعل : ههههه اتغشمر .. بس ماله خلق
محمد : لا قول له اكرام الضيف واجب ..
مشعل : رقمه عندك كلمه ..

-------

سحر : أوكي سارة أنا اخليج الحين لأن رفا ذبحتني حاطه اذنها عند السماعه
سارة : ههههه سلمي عليها حييييل
رفا تصارخ : الله يسلمني
سارة : ههه والله خبلة اختج هاذي
سحر : خخ ما عليج منها .. يلا نتلاقى بالمدرسه ..
سارة: أوكي مع السلامه
سحر : الله يسلمج ..

سكرت التلفون ومسكت رفا من اذنها : ليش قاطه اذنج عندنا ؟
رفا : تركي اذني واحترمي اللي اكبر منج
سحر : أووف ذبحتيني أكبر منج وأكبر منج يه ؟
رفا : عيوني فرق بينا 7 سنيييين .. أحترميني
سحر : شنو هالنظريه السخيفه ؟ .. واكبر مني بـ 7 سنين .. مو يمكن انتي يالكبيره يالمتعلمه ما تفهمين اشياء وايد انا افهمها .. وبالله عليج باين ان انتي الكبيره ؟ .. العمر مو متى انولدتي وكم صار لج من انولدتي .. ولا تحسبين كل صغير سن صغير عقل وتفكير وفهم .. الانسان يعرف عمره بقدر ما شاف من الدنيا ..
تشوفين صغير عمره 10 سنين يفهم أكثر من اللي عمره 20 .. ليش ؟ .. لأن شاف من الدنيا اشياء اكبر من اللي شافها بو 20 سنه ..
رفا : خلصتي الفلسفه ؟
سحر : رجاءً لا تستخفين بكلامي .. هذا ومسويه نفسج جامعية ؟
رفا : سمعيني عيوني ماني فاضيه لكلامج السخيف
سحر : أقول برى غرفتي يلا برى ، أنا الغبيه اللي قاعده أكلم اشكالج
رفا : قطـــع ، على آخر عمرها رفــا الدكتورة تكلم هالمستوى من الناس
سحر : أقول قلب ، عرض اكتافج لو سمحتي
طلعت رفا من الغرفه وراحت سحر للتلفون تتصل على راشد

محمد : مشعلوو النقال يرن شوف منو
مشعل : لا ما أبي
محمد : قلت لك رد
مشعل : لحظة ، كاتب سحر ، الأخ ساحر ؟
أصبر أصبر

سحر : ألوو
مشعل : هلا
سحر : السلام عليكم
مشعل : وعليكم السلام
سحر : راشد؟!
مشعل : لا مو راشد
سحر : أوكي السموحه ، يلا مع السلامه
مشعل : لا لا .. لحظة ، أنا صديقه ، هو ناسي النقال بالسياره ، رايح يشتري عشا لكم ، تبين أقول له شي
سحر : والله ؟ .. رايح يشتري فديته أخوي الطيب
مشعل قعد يضحك على هبال سحر
أنحرجت : سوري ..
مشعل : لا عادي ، تبين أقول له شي
سحر : لا بس قول له إذا يبيني أسوي له عشا خله يدق علي ، وإذا ما يبي بالطقاق ، عساه ما أكل إن شاء الله أصلا راح يوفر عليـنــ .. [ وعت لنفسها ] ، أأأأ .. أقصد خله يدق وبس
مشعل : تامرين الشيخه
سحر : مشكـور ، يلا مع السلامه
مشعل : الله يحفظج
سكرت التلفون سحر و وجها يتقلب ألـوانه ، أنحـرجت حيـل

محمد يمثل : آخ قلبي ، ذبحتني ، أسرتني ، من أول ألو سكنت قلبي
مشعل : جب يلا جب
محمد : ههههههه يحليلك ، إلا شفيك تتكلم وكأنك بتموت؟
مشعل : من هذا اللي اسمه راشد ، كل هذا عشا
دخل راشد السيارة ..
راشد : تأخرت عليكم ؟
مشعل : لا ما تأخرت ، بس لو كنت نايم داخل أحسن ترى
راشد : حبيب قلبي أنت
محمد : رشود في وحده دقت عليك
مشعل : شفت أسم سحر ، قلت يمكن تتعامل مع سحره وأحنا ما ندري طلعوا البيت ، وتقول لك أختك دق عليها إذا تبي عشا
محمد : وتقول لك إذا ما تبي .....
يقطعه مشعل : ههه ما عليك منه بيقعد يألف ، أقول دق عليها ، وإذا بتسوي لك عشا أعزمنا معاك
راشد : خخخ أوكي

راشد : ألوو
سحر : هلا
راشد : ها سحوور يقولون تبين تسوين لنا عشا
سحر : أيه ما تبي ؟ .. أوكي مع السلامه
راشد : هيي أنتي هيي ، ما قلت ما أبي
سحر : خلصني شتبي ؟
راشد : أووف نفس خايسه
سحر : بعـد ؟! ، تسبني ؟ .. بشوف منو يسوي لك
راشد : أممم العشا اللي جبته آكله بروحي ؟
سحر : أففففف ، أنزين شتبي ..
راشد : أمي تعرف اللي اكله ، بس شوفي زيدي الأكل معاي اثنين
سحر : نعم ؟ نعم ؟ لا يبه ماني مسويه زياده
راشد برجا : سحــــــــــــــر
سحر : أنــزين ، متى بتوصل ؟
راشد : مدري بعد ساعتين يمكن
سحر : أوكي ، مع السلامه
راشد : الله يسلمج

مشعل : هااا لنا مكان ؟
راشد : أفــا عليك بس

سحر بتأفأف : أوووووه أنا شكو باصدقائه يعني ؟ .. والدتهم وناسيتهم ؟
رفا : هههههاي ما أحد قال لج سوي نفسج طيبه
سحر : وأنتي من وين طلعتي ، اليوم شفيج قاعده مغثه على كبدي ؟
رفا : خخخ وشسوي ؟ .. اليوم إجازه
سحر : أف إجازة وسحـر تتعذب
رفا : يحصل لج أني أقعد معاج يالخبله ؟
سحر : رفا ساعديني بالعشا بلييز
رفا : أناا شكو ، طبخي أنتي وبعدين شوفي أنتي قدمي العشا يمكن واحد منهم ما عنده نظر ويخطبج
سحر : جـــــــــــــــــــــــــــــب ، والله ما تستحين
رفا : قومي زين صرتي 17 يلا خلصينا
سحر : وأنتي 24 ، ليش مو أنتي اللي تخلصينا ؟
رفا : تبيني أنـــا آخذ أي أحد ؟
سحر : قطــع غرور مدري على شو ، من حلاتج عاد ؟
رفا : أحلى منج يا أم عيون
سحر : حلااتها عيني كبيــره تهبـل ، مو مثلج تقولين يابانيه ، أقوول ماما ، أنتي فاتحه عينج ولا مسكرتها
رفا : ثقيله ما تضحكين
سحر : أقول وخري بروح المطبخ

------------


------------

هيـام : كلمتي ثقيله الدم ؟
ساره : لا عاد ، مدري ليش ما تحبينها ، والله إنها طيبه
هيام : جد والله ؟ .. أي طيبه الله يهديج بس أهي لاعبه بعقلج ، أقول سكريها سيرتها مالي نفس أرجع ، قومي بنغير جو
ساره : وين نغير ؟
هيام : يعني وين ، نبي نطلع
سارة : الله ، الحيــــن !
هيام : ايه الحين شفيها ؟
ساره : لا بس الوقت متأخر
هيام : أووه لا تسوين فيها متأخر ، يلا ترى حدي متضايقه
سارة : أوكي بس أخبـر أمي
هيام : يا الله على دجاجه أمها

--------------

لولوة : ماااي ماذر ، مااي ماذر
أم فيصل : تكلمي عدل أنتي
لولوة : واي يمه ؟
أم فيصل : أقول مستانسه على عمرج بكلمتين الأنجليزي اللي تعرفينهم
لولوة : تحبطون الواحد أنتو ، أنزين بروح حق سحر
فيصل : سحر يطيحج بفراشج قولي آمين
أم فيصل : يـــه شكو تدعي على بنتي ؟
فيصل : رشود قايل لي قول لها ما تجي
لولوة : بس سحر كل تقول لي تعالي
فيصل : مو يالخبله تجاملج
لولوة : يـــه أنت شكو هاا شكو ؟ .. كيفي كيفي
فيصل : بقص لسان بنتج
لولوة: يمه يمه خوفتني ، أقول اقلب وجهك
أم فيصل : حبيبتي إذا رحتي عطي سحر فستانج أهي تعرف تخيط
فيصل : منو قال بوديها أصلا عشان تعطيها الفستان
لولوة : لا أبوس أيدك أبي أروح معاك
أم فيصل : أبوك بيوصلها ، أنت أقعد
لولوة تطلع لسانها : وييييييييييييو
فيصل : باكفخها
أم فيصل : أعووذ بالله منكم !
-----------------
راشد : درب .. درب
سحر : رفووي تعالي المطبخ وصلوا ..
راشد : حيااكم شباب
محمد : اللــه ، عندكم بلاي ستيشن أبا ألعب
مشعل يدوس على رجله : هههه [ بهمس ] أثقل لا تفشلنا
راشد : خخخ يعني في شي جديد ، خلص عشا وأقعد على كيفك ألعب
محمد : وأحنا شايفين عشا
راشد : ههههههه حبيبي انت ، أصبر الحين بجيبه ، مع إني قايل لهالخبله تحطه ، بس أصبر شوي
طلع راشد من الصاله وبقى مشعل ومحمد .. والباب كان مفتوح شوي
محمد : مشعلووو ، شووف في صوت بنت الظاهر هاي اللي رمستها
مشعل : نزل عينك بط فيها
محمد : يــه ليش ؟
مشعل : أنت ما تستحي ؟
محمد : ليش ؟
مشعل : ترضاها على أختك يالحيوان؟
محمد : وأنت ليش معصب جي؟
مشعل : بعد أنت تقهرني

-----------
راشد : وين العصير ؟
سحر : وين عشاي ؟
راشد : العشا بالصاله ، بس قولي لي وين العصير
سحر بإبتسامه : ما ســويت
راشد : ومستانسه على عمرج ؟
سحر : أنت ما قلت لي !
راشد : أفففففف الله يعين اللي بياخذج
سحر : تقصد يا هناه
راشد : لا تطولينها يلا روحي سوي لنا عصير برتقال
سحر : أففففف أنزين

------------

راشد : حيا الله الربع
مشعل : الله يحييك
محمد : اللـــــــــــــه ، شكله روعه ، أقول مو حاطين لنا فيه شي ؟
راشد : لا بس بالصحن اللي على طرف حاطين شويه هيروين عن خاطركم ، تستخف بدمك حضرتك
مشعل : ما عليك منه ، حيـاك معانا ، تراك من أهل البيت
راشد : والله ؟ مشكورين ما تقصرون
محمد : أقول سكر الباب ما اباهم يشوفوني وأنا اكل
مشعل : هههههه صدقني بتلوع جبدك وما بتاكل شي إذا شفته

-------------
سحر : أفففف
رفا : شفيج ؟
سحر : شفيني يعني ، حابسينا بالمطبخ تبيني أرقص ؟
رفا : ومنو قال لج قعدي بالمطبخ ، صعدي دارج
سحر : والصحون تغسلينهم أنتي ؟
رفا : لا عيوني ، أنا بروح أنا بكره عندي دوام
سحر : روحي
رفا : سلمي لي على الشباب وإذا في واحد حلو قولي لي
سحر : والله قليله أدب
رفا : من حلاتهم عاد ، بالله باخذ ناس جذي
سحر : وهو أنتي تدرين منو اللي داخل ؟
رفا : منو
سحــر بهمس : ولد العبد الله
رفا : حلللللللللللللللللللفي
سحر : والله
رفا : ولد العبد الله في بيتنــا !! ، ياااااااي ، أقول سحور ، لما يطلع يمكن تطيح صورته أخذيها وعطيني ، يقولون عنــه يدووخ ، يطيير ، يذبح ، يعذب
سحر : رجاء لا تتغزلين فيه
رفا : ريلج وأنا ما أدري
سحر : جبي زين

---------------


مشعل : آآآآخ تسلم الأيادي أما الأكل شي غير طبيعي
راشد : بالهنــا
مشعل : حموود أنا باطلع باخذ شي من السياره وراجع
راشد + حمود : أوكي
طلع مشعل من الصاله وفتح الباب إلا يشوف أيد لولوة على الباب
لولوة : يمــــــه منو أنــت !!
مشعل : أنا مشعل
لولوة : ما قلت شنو أسمك ، قلت منو أنت
مشعل : صديق رشوود
لولوة : أهــا ، طيب من شكلك كأنك ماخذ راحتك في بيتهم ، عشان جذي ناد لي سحر
مشعل : شتبين فيها ؟
لولوة : أبيهـا تخيط فستاني
مشعل : وأهي تشتغل عندج مثلا ؟
سحر وأهي ورى مشعل : لولوة حبيبتي عطيني الفستان
مشعل أنحرج منها ألتفت عشان يبي يروح الصاله ، إلا إيده لمست صحن العدس اللي كان بإيـد سحر وطاح على رجلها
سحر بصوت خفيف : آآآآآآآآآآآآآي
لولوة : سحـــــر
مشعل ما عرف شنو يسوي : أختي ؟ .. تعورتي
سحر بعيون مسكره : لا ما فيني ،، آآآخ
مشعل : لا جد قولي لي ، أخذج المستشفى ؟ .. شكلج متعوره حيل
سحر : ما يحتاج ،، ما فيني شي
لولوة : الولد خايف عليج ، روحي معاه
سحر شافت لولوة بعيون حاقده : قلت ما صار لـ ،، [ تصاارخ ] أآآآآآآآآآآآآآآ
مشعل : سحـــــــــر
سحر ولولوة سكتوا
حاول يغير الموقف فراح ينادي راشد : رشووووووود
راشد سمع صوته يصارخ ركض له : خير شفيك ؟ .. سحر شفيج طايحه على الأرض
مشعل : كنت أنا أبي ......
سحر تقطعه : كنت ابي اعطي لولوة صحن العدس وطاح من أيدي
راشد : أشوف ريلج وين تعورتي
سحر بعيونها تأشر
حس فيها مشعل : أقول راشد ، أنا بروح الوقت تأخر
راشد : لا وين تروح مشعل خلك هنا
مشعل : لا بروح ، نزورك مره ثانيه إن شاء الله
سحر بصوت ناعم : بتـروح وأنا تعبت وأنا أسوي لكم حلويات ؟
راشد : ايه يبه ماكو طلعه إلا لما تذوق حلويات أختي
مشعل : بس ...
راشد : لا بس ولا شي ، أدخل داخل ، انا بحمل سحر إلى غرفتها وراجع لكم ، بس قول لمحمد ترى الصحون ما ينأكلون


---------------


---------------
مشعل : وأنت للحين تاكل ؟
محمد : أكلهم حلو
مشعل : الحمد لله والشكر ، أقول حمود ما نبي نطول عندهم
محمد : ليش ؟
مشعل : شوف الساعه ، وبعدين بكره مدارس
محمد : وإذا مدارس شو نسوي ؟ راشد مو بالمدرسه
مشعل : أفهــم يا غبي ، خواته بالمدرسه
محمد : ونحن يالسين بحظن خواته يعني ؟
مشعل : أفففف ، خلصنا يلا
------------------
[ يوم جديد ]
في المدرسه
سحر : أفففففف تعباانه أبي أنام
روح : ليش سهرانه يا حظي ؟
سحر : مو لأن كان عندنا ضيوف
روح : إلا تعالي شفيها رجلج ؟
سحر : ما فيها شي بس صحن العدس طاح علي
روح : أهاا ، أنزين جم واحد أهم ؟
سحر : أمم ولد العبد الله و الثانــ ،،،،
روح مسكت إيد سحر : هااااااااااااااااا ، ولد العبد الله في بيتكم
سحر بغرور : ايه ، شفيها يعني
روح سحبت سحر من ملابسها : سحوور شفتيه ؟ فيس تو فيس ؟ ..
سحر : لأ
روح : مينوونه أنتي ؟
سحر : يمه ليش شسويت ؟
روح : في وحده ولد العبد الله يكون في بيتهم وما تشوفه ولا تتأمل جماله
سحر : عبالج انا مثلكم ما أستحي على وجهي ؟
روح : سحوور هذا عذااب ، حتى لو تموتين حيـا ، جدامه ما تقدرين تشيلين عينج من عليه
سحر : الحمد لله والشكر ، أقول قومي راح تبدي الحصه ، إلا على طاري الحصه وين سارو ، العاده أشوفها عند الباب واقفه لي ؟
روح : شفتها مع هذيج المعفنه هيام
سحر : شنو معفنه أنتي ما تعرفين تتكلمين ؟
روح : تقهرررررني والله تقهررررني حركاتها مأساه
سحر : بسج حش في العالم ، تشوفين أبله تسنيم الحين تتوعد فينا ..
روح : يمه خوفتني عاد !!

-------------------



مشعل : حموود
محمد : ....
مشعل : حمووود
محمد : ....
مشعل : حمود و وجع إن شاء الله
محمد : أففف شتبا ؟
مشعل : أف فشله
محمد : شو فشله ؟
مشعل : طيحت الصحن على رجل سحر
محمد : سحر ؟
مشعل : أخت راشد
محمد : صارت سحر حرف ؟ ، وبعدين أنت اللي طيحته والله ما تستحي
مشعل : مو قلت لك ، والله فشله
محمد : عادي ابويه إلا ما تعرفها
مشعل : شكلها وأهي تتألم عذاب
محمد : مشعلووو ، البنت متغطيه أنت شدراك ؟
مشعل : ها ؟ لا بس لما طاحت ، اللي ......... ، وبعدين أنت شكو ؟
محمد : هااا ليكون حبيتها من أول صحن عدس
مشعل : هههههههههه ، لو أحد سمعك بيقول لك تقول نكته ، بالله مشعــل على آخر عمره يحب ؟ .. يا أخي خليناه لكم ..
محمد : و زوجتك ما راح تحبها ؟
مشعل : أمممم مدري بفكر ، والله إذا طلعت سنعه وتسمع الكلام .. نغصب نفسنا ونحبها
محمد : ما أقول إلا الله يعين اللي بتاخذك
مشعل : تقصد هنيالها
محمد : أنزين خلصني ، أنا وراي شغل
مشعل : له له له ، لا ينط لك عرج بس ، أي شغل يرحم والديك بروحك بطالي ؟
محمد : بطالي ؟ .. والله أبوك عنده شركه كبيره وأنت بعد بطالي
مشعل : والله لأني أدرس ، وهو ما يبيني أدرس وأشتغل ، عشان ما يأثر علي
محمد : يرحم أمك بس ، إلا ما قلت لي وين راشد ؟
مشعل : مدري فيه ، أصبر بس أنا اوريك فيه ، هذا وأنا قايل له تعال لي

--------------------

[ الجزء الثامن عشر / الفصل الثاني ]



روح بلعت ريقها : سحـر .. قطّـــــــاع طرق !
ناظرتها بخوف .. لا تقـولين ! .. الا هذا .. الا هذا .. وقفت تشـوف وش صـاير .. روح للحينها مصدومه .. مسكت ايد سحر وقعّدتهـا .. قالت وهي للحين فاتحه عينها من هول الشـيء

روح بخوف : سحــر .. كذبت عليـج .. !!
تنهــدت وضربتها على كتفهــا : سخيفه و بايخه وثقيله وكل ما يُقابله من كلمات
روح : شسوي ملل .. بس جد مدري صوت ايش برى ..
سكتت سحـر .. صوت الباب ينفتــح ألتفت تناظر روح بقلب يدق بقـوّه : سحر في أحــد نــزل !! .. في أحــد نـزل .. واي قلبـي .. لا يكون أخـوي .. آخ عليـك يا راشـد ليش نـــــااااازل
روح : أبييييـه .. تخيلــي يكون مشعـل !! .. وااي .. لا يصير فيه شي .. بعـدين ماكو أحد بالعايله عدل ..
سحر حاطه ايدها على قلبها : آآه راشـد
روح حاطه ايدها على قلبها : آآه مشعل


~


{ بـرى البـاص / 13 : 12 صبـاحاً )


مشعل : والله ياخوي سامحني كل الباصات مليـانه .. ما عندي مكان لـ زيـاده .. بس هذا الباص فيه كم كرسي فاضي ما يكفيكم كلكم !! .. عشـان كذا .. أعذرني بس راح اخذ الحريم معاي .. لأنهم ما يتحملون التعب و راح أحاول أخذهم كلهـم .. أما باقي الشباب فـ السموحه الشيخ و حقك علينا
.... : ولو عـزيز و غالي و جزاك الله خير ..
مشعل : راح أكلّـمهم لأجل يجوون يساعدونـكم .. والله يساعدكم .. خلكم معاي على أتصال
.... : ما تقصـر .. ولد أصـول ..
مشعل : تسلم يالغالي .. بس خبّرهـم يركبـون من الباب الخلفي ..


ركب مشعـل الباص لأجل يخبرهـم أن في ناس زيـاده .. بالأول قدّم الستـاره قدّام .. و الكراسي الفاضيه ملاهـم .. عشـان يوسـع للي ورى ..

الميكرفون :
الله يخليكم حريم بس تغطـوا شـوي ..


ركـب قبل ما يركبون الحريم من الباص الثـاني .. وسّـع لهـم مكـان وطلـع .. بقـت حرمه كبيره بالسن واقفه مالها مكان .. راحت سحـر عند عبـد الرحمن و سحبته من شعره من مكـانه ..
سحر بابتسـامه : حياج يمه ..
فتح عينـه : وشـــــو حيـــاج .. تسحبني من شعري و تقعّـد هذي .. شتبيــن مكااااني
سحبته وراها و قالت : ما عليـج يمه .. بس مسكين عنده انفصـام بالشخصيه .. تفضـلي ..
أم رياض : جزاك الله خير يا بنتي
سحر : و أنتم كذلك ..

مشـت عنها و هي ماسكه ايد عبد الرحمن .. جلست مكانها .. وقعدّته بحظنها بعـد " جهـد كبيـر " .. ناظرته مع شكله المعتـرض
سحر تنهـدت : المطلوب منك إنك تبقـى هنا لحد ما تقطـع أنفاسي .. لأن الحرمه ما عندها مكان .. و قدام ما أحد راح يعطيـك وجه .. طيب ؟
عبد الرحمن : لا مو طيب .. وش هالظلم ؟ .. الحين أنا أجلس هنا ما عندي مكـان .. و قدّام رشـود مرتاح !!
فزّت روح من مكانها : اييييه تكفـــى عبد الرحمن روح عنـده غثـّه .. بليز بليز بليز
عبد الرحمن : على فكره .. أهو قايل لي إن إنتي مغثه
سحر : عبـد الرحمــن .. شـوف .. أنا بكفخـك .. و أنت رجّـع .. طيب ؟ .. لأني مو قادره أتحمل وزنـك
عبد الرحمن يتخصّـر : على فكره .. محد قالج سوّي نفسـج طيبه
روح : أففف ملل !!

ظهــر المصبـاح على راس سحر وتذكرت اللي كانت جايبتـه معاها .. طلّعـت دفتر صغير من شنطتها وفتحتـه
سحر : هذا فيه ماضيج بخلص منه وبعطيه راشد
فتحت عينها : ماضي شنــــــــــو ؟؟؟

عطتها اياه تشـوف أول ورقـه .. مكتـوب فيها

بسم من جعلني صديقتكِ

تحيه عطره وبعد ..
إلى صديقتي سحر العزيزه ..
كيف حالكِ ؟
أنا أحبك جدا جدا .. و أتمنى لك الفوز و أكل الموز
والنجاح وأكل التفاح ..
و الكتابه بقلم الرصاص من أجلِ ترك النحاس
وان تكون بخير في ظل والديك الكرام الاعزاء
وسلّمي على أخوانك جميعا
وسوف أزوركِ في بيتكِ لكنك لا ترضين بذلك
فهل ترضين الان ان آتي إليك حتى نعيش وقت ممتع وسعيد
أتمنى من كل قلبي أن تقبلي
وتسلّـم عليك معلمه الرياضه وتقـول لماذا انت غائبه

وشكرا
المخلصه : روح


سحر : تترجاني عشان تجي بيتنا هههههههههه
لفّـت روح وجهها عنها : ما يضحك
سحر : هههههههه الا يضحك بس قولي متفشله ..


أنا أحبكِ كثيرا يا سحر
لكنك لا تريني كثير اثناء الحصص
هل أنا قبيحه ؟
أنا لم أفعل لك شيئا ابدا ابدا
و أنت فتاة جميله جدا جدا لكنك لا تحبيني
و أنا أحزن كثيرا
فهل يمكنك أن ترسلي لي رساله ؟


سحر : ههههههههه .. مطنشه فيها وللحين عندها أمل
سحبت روح الدفتر : أوووه سحــر بس عــاااد ..
حست سحر بأحد يمسح على شعرها .. ألتفت شافت امها تبتسـم لها و تشـد شعرها أكثـر وتسحبه بقـوّه
سحر وهي تمسك ايد امها : آآآخ يمــه شوي شوي
أم راشد : يمه حياتي سحر بتقصـرين صوتج ولا أمسـح بشعرج الأرض ؟
روح : ههههههههه كفـــوو خالتــــي
أم راشد : سكري حلقج بارك الله فيج
سحر : واااااااك .. فشلوها


الميكرفـون :
استـــراحه .. اللي يبي ينـزل يتفضل

روح مسكت ايد سحر : سحوور تكفين لا تنزلين .. أخاف
سحر وقفت : روحي زيــــن .. خلصتي أكلي .. وللحين باقي وقت طويل لحد ما نوصل

نزلـوا كلهم من الباص .. كل واحـد وجهه منفّـخ من النوم .. و البعض منهم ما نزل .. راحـت روح و سحر و أمهـم و عبد الرحمن تجـاه راشد اللي كان يأشـر لهم ..

أم راشد : شتبي ؟
راشد : طراق
رفعـت أم راشـد إيدها و هـي توخر شنطتهـا : لحظـه
مسك ايدهـا وهو فاتح عينه : لالالا .. أمـزح معـاج يمه !!
روح : يعني كذّاب ؟ .. من صفـات المنافق إنه اذا حدّث كذب .. و المنافق في الدرك الأسفل من النار .. و أنا مو مستعده أبقـى مع واحد منـافق .. عن أذنكـم
سحر : ههههههه والله طالبتـــــــــــي
راشد بحاجب مرفوع : خفيفه مره
روح : أنت أخف
راشد : تكلّمي عدل
روح : أحترم نفسك
راشد : حسنّي ألفاظج
روح : أعرف من تكلـم
راشد : أستحي على قدرج
روح : أكـل .....
عبد الرحمن : على فكره .. ما تعرفون تسبون
راشد : شكـراً .. المهـم كم تبون فلـوس عشـان تشتـرون ..
روح : لالا .. لا تطلّـع فلوس وايد .. عطني 10 دينـار بس ..
ناظرها باستغـراب و ضحـك .. شسالفه ؟؟؟ : ههههههه توّج متهاوشه معاي !!
روح : بســـررعه البنـات راحـو !! ..
راشد : طيـب .. بعطيـج مع إنج ما تستاهلين
سحر ناظرته على جنب : [ لينفق ذو سعه من سعته ومن قدر عليه رزقه فلينفق مما اتاه الله ] .. لا تخاف ما سويت شي عظيـم .. يعني غصبا عنك ..
روح : والله كنت برد كذا .. بس المشكله مو حافظه الآيه
سحر : لا تخافين .. أدري فيج الفاتحه و الناس و الاخلاص للصـلاه !!
راشد : ليش شنو يقولون غيرهم ؟
روح : ههههههههههه
عبد الرحمن : على فكره .. أنا حافظ سورة الكوثر
سحر : لا حول ولا قوة الا بالله .. ياربي .. الحيـن أنا الإنسـانه المثقفـه مقابله هالأشكال ؟
أم راشد : عــــدال يمـه لا يسيـح نصـج
سحر : هههههههه
روح : لا جـد والله .. سحر تعـذيب !! .. أذكـر لما كان يدخل وقت الصلاه بالمدرسـه .. بعـدها إذا علينـا رياضه .. شي طبيعـي أن أهي الوحيـده اللي تلعـب .. البـاقي كلهـم منسدحين .. يعني عـادي يخلص وقت الصـلاه وتبـدأ الحصه و هي للحين تصلي فينـا .. وتطنييييش محتـرم للمدرسـه ! .. واذا بالبيت كفـايه انها تقـرأ لنا بكل ركعـه سـوره وش طولهـا .. فـوق هذا ما نسمـع ولا شـي .. تقـول حرف وتبجـي سـاعه .. و بعـدها تقـول النص الثاني من الحـرف وتبجي سـاعتين .. والبنـات ما يبـون إشـاره بعـد !! .. و يكملـونها بجي ! .. و وقفي يا روح و أبجي معاهم ..
راشد : أيــــــوا سحـــــر
روح : وشو أيـوا ؟ .. استغفر الله لا تقرى سورة ق و لا تـوصل إلـى [ لقد كنت في غفلة من هذا ] .. مرّه وقفنـا 10 دقـايق بالتمـام .. التمـام وهي تبي تقـراها مو قادره .. لـ لـ .. لـ .. ـقـ .. ق .. ق .. ققق .. ققق .. و وسطهـم تشـاهق ! .. طبعاً بحكم ألتزامنا أجمعين .. فـ مو عارفين التكملـه .. يعني حسبناها مو عارفه تكمل .. و لازم أحـد يرد عليهـا .. وتجيهـا سـاره على بالها جالسه تقرى علينا موسوعه علميه جان تقـول لها لقلق ههههههههه
راشد : هههههههه استغفـــر الله
حط إيده على كتفه : الناس رجعوا الباص و أنتو للحين تسولفون ؟
راشد : شسوي ياخوك .. ماخذ لي وحده وايد تقرق ما تسكت !
مشعل : والله هي اللي مبتليه فيك .. هذا شكل ؟
فتــح عينه : شفيــه هـذا الحيـن !!
مشعل : هههههه ما عليـك متسبب و الوالد زافني فـ جاي أتعنتر عليك .. المهم يـلا خلصوا نبي نوصل بسـرعه

شافوا البنـات بقـاله صغيره كانت موجوده قرب المسجد الموجود .. دخلوها عشـان يشترون لهم ماي و أشياء تسد جوعهم لحد ما يوصولون ..

سحر : عندكم توت ؟
ناظرها بإستغراب وعلى وجهه علامات استفهام .. توت ؟ : لا أختي هنا مو خضّـار !
مريم : طيب إشتري عصير توت
ألتفت لها : استغفر الله .. طعمــه لا حول ولا قوه !
رفا : و أنتي ماعطتها وجه بعد ؟ ..
سحر : سكتي بس سكتي .. لاقينها طايحه من الكرسي .. شدعوه .. فيل نايم ؟
رفا : الحين شكو الفيل ؟ .. ترى أنا رفا مو عبد الرحمن !
رفعـت سـاره بطـل مشـروب غازي : لو سمحت هذا خمر ؟
فتحـوا عينهـم .. شفيـها هذي ؟ .. ناقصين فضايح هنا بعد .. ولا مسويه نفسها مُهذبه تقـول لو سمحت ! .. سحبت شروق البطل منها ودخلته بالثـلاجه .. ألتفت لـ البايع وهي تتبسـم : ههه ههه هي شوي خفيفه دم كذا ..
سحر : أوووف .. ما يسـوى علينـا تسبحـت اليوم الصبـح ..
سحبت روح ايد سحر جنبها توريهـا : يااااي شـوفي سحور بشتــــريه لـ راشـد ..
ناظرتها .. كل هذا طيب ومحبه ؟ : مُجردُ علكـه .. !
روح : لأ .. صبري بوريج المفعـول .. مريــــــــــم
مريم : هلا ؟
روح ابتسـمت : أخـذي وعطي لمياء معاج
مريم : أوكي حبيبتـي [ سحبــت واحد ] آآآآآآآوووج .. رووووح و وجــــع زفــوووت
روح : شفتي شلون المُجرد علكه ؟
ضحكت سحر على الفكره : والله عجيييب .. أبي واحـد
روح : ليش ؟
سحر تخصّــــرت لها : راشـد مو أحسـن من مشعل
رفا : هههههههه تكفـوون أبي واحـد لـ فيصل
شـروق : أبي معاكم
أم راشد : عطوني أنا بعد
عبد الرحمن : على فكره .. راح تتسطرين
العمّه سعيده : شنو هذا .. عطونا معاكم
شروق باستفهام : ليش تبينه عمتي ؟
العمّه سعيده : بوديه صوغه لـ شريفه ..
همست لميـاء بإذن سحر : ضبطي العلاقات معاها أحسن لج .. شكلها مو سهله
سحر بهمس : لا تخافين تحبني حسب معرفتي
روح : في 3 أشكـال .. أختارو اللي تبـون .. في مثلي و في على قلوب و في قلم
رفا : أنا باخذ مثلج ..
شروق : وأنا القلوب
سحر : أنا ابي القلم
لمياء : خلصــتوا ؟ .. ترى الكل ركب الباص ماكو أحد هنا !!
رفا : لا بـس خلصنـا ..


كلهـم دفعـوا وطلعـوا .. بقـت سحر آخر وحـده لأنها ما كانت شاريه شي .. فـ راحت تاخذ لها عصـاير ..
مدّت إيدها تعطـي اللي يبيـع الفلـوس .. بكل برود من وراها سحـب من ايدها الفلوس .. و بدّلهم بفلوس من عنـده
أخذ الأغراض من عند البـايع وطلع .. شفيه هذا ؟ .. أحد قاله إنهم أغراضه مثلا ؟ .. طلعـت وراه وناظرته كأنها تقـول " شتبي ؟ " .. عطـاها الكيـس ..
و قال بنبـره استفزازيه : أي فلـس تملكينـه يعنـي لـي .. فاهمـه ؟
ناظرته بإستغـراب ! .. تنتظـر منه يضحـك أو يعلن إنه كان يمـزح .. وش هالأسـلوب ؟ .. هذا مشعل ؟ .. ويكملنـي أنا ؟ .. شسالفه ؟ .. نسـى نفسه ولا نسـى إنه بفتـرة خطبه ؟ ..
عقّـدت حواجبها وقالت : لأ
ابتسـم : مو لازم تفهمين .. أهـم شي قدرت اخذهم بروحي
تنهـدت وقالت : بترجعهـم
مشعل : أممم .. مابي منهـم شي .. أخذيهـم ..
تقدّم شـوي .. دخلهم بهدوء داخل شنطتها المفتـوحه .. ابتسـم في وجهها ببرود .. ردّت على ابتسـامته بنظرات ناريـه .. لفّـت عنه ومشـت تجـاه الباص ..

وقف ينـاظرها وهي تمشـي .. قال بداخله " ما عنـدي طريقـه غيرهـا .. منتي براضيه تاخذين مني فلوس " ..


تقرّبــت وهي تنـاديه بصـوت ناعـم قريب من الهمـس ..
روح : راشــد ..
راشد : ها؟
مدّت له : خـذ لك واحـد
ناظرها بصدمــه .. هذي روح ؟ .. لا مو روح !! .. مو معقوله !! .. وش السالفه ؟ .. هي طيبه زايده ولا مريضه ؟ .. ضحـك ضحكـه عريضـه بانت من خـلالها أسنـانه ..
قال وهو يسحب : مشكوره حـ ..... آآآآآآآوووووج
روح : ههههههههههه العفـــوو
مســكها من ايدينهـا بقـوّه وقال : لمسيـــه
فتحـت عينها بصدمه : لالالا .. آخـر مره صدقنـي آخر مـره
راشد يقوّي أكثـر : قلت لـج لمسيـــه .. ما راح أتـركج
قالت وهي تحاول توخر إيدهـا أكثـر و تترجـا بطريقه طفـوليه : بس بس بس .. والله حرام عليـك راح يألمنـي ترى ..
ناظر شكلهـا .. تنهّـد و تركها : آخـر مره ؟
أبتعـدت وقالت وهي تمرر ايدها على سـاعدها اللي كان ماسكه .. قالت بإغاظه : لآآآآآ ..
ناظرهـا .. صـج مُخلفـة وعــد .. !!

صـرخ يـوسف وهو عند باب الباص ينـاديهـم : راشــــد يا فـــااضي أنـــت .. خلصنــــــاا بســـرعه ..

ركبـوا كلهـم الباص .. مشعـل يشيل همهـا .. فكّـرت شـلون أزعلها .. الحين شلون أراضيها ؟؟ .. أفف .. لو تتركين عنج هالعناد يا سحر ..
رجعـت الأضـواء تسكـرت .. و رجع الهـدوء للبـاص .. يبي طريقـه ! .. مو لاقي شي يقدر يسـويه .. أتصـل على أمـه شـاف نقالها مغلق .. لقـاها حجّـه .. أرسل لـ سحر مسـج .. كاتب فيه " سحر قولي لأمي تفتح نقالها " ..
ناظرت شـاشه الجوال .. رفعت حاجب .. من صجه هذا ؟ .. وبكل بساطه يعني ؟ .. حيــــــل واثــق .. خيولي زين
تركت الجوال .. ولا ردت ولا كلّمت أمـه بعد .. مسكـت شعر عبد الرحمن تحسب كم قمله فيه عن الملل .. لأنها مو قادره تفتح كتاب بحكم وجوده بحضنها ..
أنتظــر ربع سـاعه ! .. مرّت ! ..يتصل على أمه .. جوالها للحين مغلق .. دز مسـج ثاني لـ سحر كاتب فيه
" يا زين التطنيش بس .. ليش ما تردين .. شفيج ؟ .. زعلانه ؟ "

ردت عليـه بـ
" ( الذين ينفقون في السراء والضراء و الكاظمين الغيظ والعافين عن الناس والله يحب المحسنين ) .. ليش أزعل ؟ .. الموضوع كله مو هامني : ) .. واذا برد أو لأ .. الشي راجع لي .. هذي أصابعـي و هذا [ جوالي ] ولا نسيـت إن كل شي تملكـه لــي .. فاهم ؟ " ..

أبتسـم لأسـلوبها .. و رد عليها " لأ " ..

سحر " مو لازم تفهم "


تركـت الجوال .. وهي تعدّل نومـة عبد الرحمن عليها عشـان تقـدر تنـام ..


لينـــــدمـنّ فـرقَ شعـركَ إلـى أخمـصِ قدميــكَ
ما حِسـبتَ نفسـك ؟ ..
أم نسيـــتَ إنــي سحـرٌ إبنــةُ السيــفِ المسلــول علـى أيـادٍ آذتني أو كلمـاتٌ آرقتني ..
ســل عنـــي ضحـايا المتنافسـون .. ما برحـوا خلف السِتـارِ يختبؤون !

لا تغرنّــك نعـومةُ الصـوتِ أو غنـجَ المشيـةِ أو حتـى بيـاضُ الأصـابعِ ..
أنـا عِنـدَ الكرامـةِ شعلـةُ إنتقـامٌ ما النعــومةُ لهـا بـ مُطفِئـه ..


/

{ قلــمٌ مِشعلــي / 25 : 1 صبـاحا )


أنــأى بعـزّكِ عنـد الدنيـا خيـالاً مُشـرّدا ..
يُـلاطِفُ في هوامـسِ الغـرامِ القوافيـا ..
لكِ العشـقُ منـي وافِيـا ما تعذبــت ركـائبُ توقٌ تسهـر الليـاليا ..
تهيميـــن في لحنـي فأرتجــلُ الرؤى .. رقيقـيةً والليــل يٌنصــتُ أنـاشيدا ..
تُصاحبنـي غيمـاتكِ .. سِـواءَ الصِبـا بـات فِيّ ..

دُنِســت أراضٍ عنهـا ما رضيــتِ .. و طُهـرت ما إن لهـا بَسِمـتِ ..
أعذري البجاحــةِ فينـي ..

ما عَلِمـتُ لـ ذلكَ من سبيـلا !




ناظرت الجهه الثانـيه .. شـافت أم ريـاض ! .. مو قادره تنـام .. دققت فيها أكثر .. باين عليها ترجف !! .. بردانه !! .. خـذت البطانيه اللي كانت عليهـا و راحت قربهـا .. قـالت بصـوت خفيف : خالتي .. تفضلي .. الجو بـارد عليج
رفعت بصرها : و أنتي ؟ .. منتي بردانه ؟
ابتسمـت لها : لأ خالتي [ واتبعتهـا بـ " استغفر الله " بقلبها ] ..
أم رياض : جزاك ربي الجنه يا بنتي
سحر : أجمعين إن شاء الله

رجعـت مكانهـا .. سنـدت راسهـا بـ مخـده .. الجو يبـرد ! .. ما عنـدها شي .. ضمّـت عبد الرحمن أكثـر لها عشـان تحس بالدفـا .. طّوقـته بإيدينها وسندت راسه عليها .. حطّت السمـاعات بأذنها .. وعلـى هدوء صـوت العجمـي .. نامـــت ..


~


{ الفنـدق / 17 : 10 صبـاحاً )


روح : يااااي .. ما اصــــدق .. وصلنـــا .. وصلنـــا !! ..
مريم : أثقلي ..
تقدّم مشعل ناحيتهـم و عطـى أمّـه 3 مفاتيـح ..
مشعل : يمـه .. هذول 3 غرف قرب بعض .. غرفـه لج أنتي و أم راشد و أم فيصل .. والغرفه الثاني لـ سحر و روح و شروق .. و الثالثه لـ مريم و ساره و رفا و لمياء
مريم : و ليه بالله حنّا 4 حاشرينا بغرفه وحـده ؟
روح : كيفنـا .. سكتي
أم مشعل : و أنتم يمه ؟
مشعل : احنا بالطابق اللي تحتكـم .. أنا و راشد و فيصل بغرفه .. و أبوي و بو فيصل و بو يوسف و يوسف بغرفه ..
أم مشعل : طيب ليش كذا حاشدينا مع بعض .. الغرفه واسعه ؟
مشعل : ايه ايه يمه الغرف واسعه ما عليكم ..

بدون أي كلمـه بإبتسـامه أخذت المفتـاح من أم مشعـل .. و عمـداً .. مرّت قدّامه .. دخلـوا غرفهـم .. أول شي سوّته إنها أنسـدحت على السرير على طول .. كفـايه الرجل اللي أنكسرت بسبب أخوها !
حطّـوا أغراضهـم .. و مرّوا على البنـات و نـزلوا يعتمـرون .. كل وحده مسكـت إيد الثـانيه بقوّه عشـان ما يضيعـون .. الشكــل رهيـــــب .. سـواد الكعبـه بهـر عيونهـم ..

سحر " اللهـم أعفو عني فإني المُذنبه .. اللهم أهـدني وأجعلني كبيرةُ في عين غيري صغيرةً في عين نفسي "
شروق " اللهم أجعل ذريتي ذريةً صالحه .. و وفقني و إياهم للخير "
لمياء " اللهم زدني جمالاً و حُسنـا "
ساره " اللهم أجعلني خيراً في أعيـنِ الناس .. و أرزقني ريحاً طيبه "
روح " اللهم أغفر لوالدي و أرحمهم برحمتـك "
مشعل " اللهم وفقنـي و إياها .. و أغفر لي ما عنهُ سهيـت "
العمّه سعيده " اللهم خذ ثأري ممن عاداني "

بدؤوا بالطـواف حول الكعبـه .. و صـوت شهقـات سحر و مريم مسمـوعه .. خلصـوا 7 طوفـات ..ناظرت سحر الملتـزم .. !
قالت بصرامه : بـروح
لمياء تعلّي صوتها عشان ينسمع : ويـــن تروحيـن ؟؟ .. ما تقدرين زحمـــــه
مشـت عنها : بروح ..
وقفـــوا كلهـم بجهه وحـده ينتظروها .. مهي بصاحيه ! .. أحد يروح مع كل هذي الزحمه ؟ .. إنتحـار ! .. أنتظروها مـده طويـله .. شـافوها من بعيـد .. والعبايه طايحـه و الحال لله .. سحبوها من بين النـاس ..
مريم : أبشـري ؟ .. وصلتي ؟
قالت وهي تتنهـد بقـوّه وتاخذ نفس : لأ .. سطروني
روح : هههههههههههههههه
أم راشـد لمحـت راشـد وهـو رايح يصلي ورى مقام ابراهيم .. نادتـه عشـان يقرّب منهـم
سحر : فرصتنــا !!
سحبت ايد روح و راحوا عنـده .. يناظرونه بتودد ومجامله ..
راشد : خلصتوا طواف ؟
روح وهي ترمـش وبصـوت ناعــم : راشِـِـِـد ..
راشد : ها؟
سحر : يا أغلــــــى أخو بالدنيــــــا
راشد : عطوني من الآخر
روح مسكت ايدينها ببعضهـم و قالت برجا : بليـــــز .. نبي نروح الملتـزم
راشد : طيب روحوا .. أحد ماسككم ؟ .. اذا علي أنا .. ترى ما عندي مانع
روح ابتسمـت : أدري .. بس ما نوّصل له ! .. طولنا ما يساعد !
ابتسـم أكثر لها : مو مشكلتي
سحر : خلصنا عاد .. عطيناك وجه .. ترضـى نتزاحم مع الرجال هناك ؟؟ .. هاا ؟؟
راشد : أففف .. يلا أمشـوا .. ابتليـــت فيكم ! ..

ناظروا بعض بـ إنتصـار .. مسكوا بعـض و توجهوا للملتـزم .. وهـم يناظرون البنات ويغيظونهـم

لمياء بإحباط : لو متزوجته كنت الحين رايحه معاهم .. بدل هالأبو اللي مدري وينه !


سحر : يلا راشـد عفيه .. أرفعني
راشد : طيب لحظه .. أول شي روح
فتحت عينها : وشــو روح !! .. أنا أختـك
ما رد عليهـا .. سـمّ بالله و رفــع روح و هو يحملهـا بـ تنفـس عميـق .. حسّـت نفسها بتطيـح .. واقفـه تصـرخ بس .. قال بصـوت عالي " لمسيــه بســرعه " .. لمستـه و دعــت دعوه وحده .. بسبب الضيق و الخوف اللي فيها .. نزّلهـا وهو يتنهـد
راشد : كســرتي ايـدي
رفعت حاجب : رجّال على الفاضي ؟
راشد وهو يعلّي صوته عشان تسمـعه : مسكيني عشان لا تضيعيـن .. بسم الله

رفــع سحـر .. حس بالفرق بينهـم .. لمستـه .. ينـاظرها .. يبيها تعطيه دليل إنها راح تنـزل .. الأخت شكلها تصلي التراويح بإيدها !! .. نزّلهـا لأن ما منهـا رجا .. مسـك اياديهـم بإيد وحده و الثـانيه لمس فيها .. طلعـوا بصعوبـه من كثـر الزحمـه .. راحـوا بسـرعه تجـاه البنـات يخبرونهـم
سحر : واااي .. أخيـــراً .. رحنـا و لمسنا و دعينــا وبإذن الله مستجـاب و أنتم واقفين هنا ؟
روح : آآه لو تشوفون بس .. لما توقفـون هنــاك رجل وحـده بروحها تنرفع من علـى الأرض .. سبحان الله
ناظرتها سحر بإستفهام : أتفقنا نحرّهـم .. بس ما أتفقنـا نفلّع صواريـخ ! ..
روح : صليتوا ؟
مريم : ايه خلصنا ..
روح : طيب أنتظرونا نصلي و نروح نسعي ..

ابي التكمللللللللللللللللللللللللللللللللللللللللللللللله الجزء 32 بلييييييييييييز

والله ما سجلت إلا لذي الروواايه

يـأـأي خقققه مرهـ الروايـه بس قرئت من البدايـه [ندعوك للتسجيل في المنتدى أو التعريف بنفسك لمعاينة هذه الصورة] هععع

روووووووووعه بمعععنىـإآ آلكلممممهه

مـشـكـوووره

مشكووورة حبي l

مششكوره ع الطرح الجميل

استمري