رواية علمني حبك ان احزن

تذكير بمساهمة فاتح الموضوع :

{ بسم الله الرحمن الرحيم ..
اليوم جبت لكم روايه روعه وهي اول روايه لي في المنتدى هذا
وترااها كامله

هيا بصراحة من أحححلى الروايات اللي قريتها

وكلمة رووعة قليلة بحقها ^^

علمني حبك .. { أن أحزن

أنصحكم وبالقوووة إنكم تقروها

وهي بقلم الكاتبة الـ مها

ـ ـ ـ ـ

\
:
الريــــــاض
اليوم/ الثلاثاء
الساعة/ 7.30 المغرب
وفي هاليوم بالذات يكون بيتهم هــــادي جدا جدا..
الوالدة(أم عبدا لله) مثل كل ثلاثاء مجتمعة مع جاراتها..-(( واللي كل اسبوع يكون الاجتماع عند وحده منهم))-
أسـامة زى العادة في مثل هالوقت يكون مع بدرصديقه المقرب وولد جيرانهم ...
وســارة أكيــد رايحه مع أمها .. لأنها مستحيل تكون فيه روحة أو طلعة وما تكون هي أول وحدة تطلع من البيت
أمـا أبو عبدا لله فهو قليل مايكون بالبيت هالساعة لأن عنده ارتباطاته الخاصة ..

الطــابق الأول كان هادئ جدا.. إلا من صوت التكييف اللي يلطف جو البيت.. الرياض في مثل هالوقت من السنة حارة جدا لحد الموت
وما تنطــاق .. بس أهلها تعودوا عليها وحبوها بـ ـ ـ حرها وبـ ـ ـ بردها ..
الخدامــة في المطبخ تغسل الصحون والملاعق ... وهالشئ يخرب على البيت هدوءه .. ويخلق فيه ضوضاء مؤذية ومقرفة .. (( ياليتها تطلع غرفتها وتخلي المطبخ بحوسته ))
الطابق الثاني مايختلف عن الأول في هدوءه ...
لكن صوتها المبحوح واللي مبين عليه التعب .. يحطم هالهدوء والصمت اللي مخيم عالمكان ..
عذا كانت بغرفتها منسدحة عالسرير ومتغطية باللحاف .. كانت غرفتها فوضى ومقلوبة فوق تحت .. من أمس ما رتبتها ولاحتى شالت مريول المدرسة من على الأرض ... من يوم جت من المدرسة وهي حاسة نفسها تعبانة ولها السبب هي ماداومت اليوم بعد ...
كان التكييف مغلق .. وريحة الفيكس تعج في المكان .. ياحياتي مبين عليها تعبانه بالمرة .. والدليل أنها رضت على أمها تحط لها فيكس وهي اللي ماتطيق ريحته .. على كلامها يسبب لها نرفزة ويخلي عيونها تحرها وهي مو ناقصة ..
عذا :::/ يالله يا لمياء تراك والله طولتِ عليّ؟؟ وأنا إنسانة مريضة أبــــــــــــــــــــي أرتــاح ..
قسم بالله أن حلقي متسكر؟،، وخشمي يصب ،، وحالتي لله وأنت فاضية على سواليفك ..
لمياء :::/// استغفر الله ياربي ،، أنا ماأدري وش ذنبي في الحياة ان الله يرزقني بأخت مثلك وبولد مثل مهند ..

انا الظاهر بدخل الجنة بسبتكم .. وبعدين على فكرة وانت الصادقة انت إنسانة شيطانك ساري المفعول حتى في الأوقات الحرجة ..
المهم الحين اللي يسمعك يقول داقة عشان سواد عيونك .. مايدري اني داقة أخذ الحلى منك ..
يالله عطيني المقادير ؟؟
عذا / لمياء ؟؟
لمياء/ نعم
عذا/ انت غبية والا تستغبين ؟؟
لمياء/شوفي عذاي صدق انك تعبانة بس هذا لا يعني انك تسبين ؟؟
عذا/هذي اللي بأفلعها الحين ،،، يعني بتقنعيني أني ماقلت لك ((وبصراخ)) اليووووووووووووووم ماداوووووووووووومت

لمياء وهي متفشلة/ هههههههههه ايه صح صح نسيت الله يقلع بليس
طيب والحين وش الحل ؟؟ من بيجيبه لي ؟؟ وعزيمتي بكره وانا ناويه اصلحه اليوم وارتاح .. وكنت معتمده على حضرتك تجيبينه لي ..
الله ياخذ بليسك واللي يتكل عليك الحين ابروح ادور لي حلى ثاني..وبعدين بالله مالقيت تتعبين الا يوم جاء عندي عزيمة ؟؟!! حسبي الله علي عدوك يا عذا ان كانك ماتنفعيني بشي مخليه منفعتك لغيرنااااااااا ...
عذا/.. خلاص ابعطيك رقم هناء دقي لها وخليها تعطيك المقادير والطريقة.!!
لمياء/ لا حبيبتي استحي .. دقي عليها انت
عذا/ يالمياء ياحبيبتي ياقلبـ ـ ـ ـ

لمياء تقاطعها / الله الله وش هالكلام السنع والا تتدربين علينا ؟؟ ياحياتي ياخيتي مبين عليها الحرمــان ..
عذا / بكون اكبر منك ومابرد عليك .. اسمعي انا وحده مافيني شده على المكالمة والكتابة ... هناء وهذا رقمها دقي لها وخذي منها اللي تبين .. وبعدين انتم تعرفون بعض من زمان .. ماله داعي هالحياء ..
ويقطع عليهم صوت مهند ولد لمياء يصيح توه قايم من النوم ومتنرفز ..
عذا/ أوهو عـــــــاد ولدك وشغّل وناناته متى بيسكت ؟؟ لمياء الله يخليك تراني ابغى اذاني ياسكري التليفون يا سكتي هالدلوع ..
لمياء/ ارحميني تكفين ياللي ماتعودتي على الصياح والإزعاج ؟ ..
((وتلتفت على ولدها)) خلاص يا ابوهم انت .. والله انك تسوى خاله عذا وتبيعها .. خلاص حبيبي خلي ماما تخلص شغلها .. وبعدين نروح ونطق خاله عذا الوصخة اللي ريحتها فيكس وعععع .. واللي ماتسمع الكلام قليلة الأدب ..

عذا/ هيه انت لو سمحتي .. تراك تسبيني والا عارفة ؟؟
لمياء/ ايه عاد انت لا تصدقين..
مهنـــــــــــد خلاص أسكت خلني أشوف سالفة هالحلى متى بتجي الحلقة الاخيرة حقته .. أفففففففففـ،
ايه انت وش قلت بعد ؟؟!!
عذا / خلاص ابرسلك رقمها بطاقة اعمال وانت كلميها وتفاهمو ..؟؟!! ويالله مع السلامة لأني خلاااااص قفلت
لمياء/طيب انتظرك .. ويا لله مع السلامة
سكرت عذا من لمياء وهي خلاص مو قادرة تفتح عيونها .. الظاهر مفعول المضاد قرب ينتهي وبدت ترجع لها الحرارة ..ارسلت الرسالة للمياء و غطت عمرها بالبطانية زين واستسلمت للنوم من بعد ما قفلت جوالها .. مالها خلق تستقبل مكالمات او يكلم أحد ويزعج نومها ....

----------------------------------------------------------------------------

الساعة/11.30
اليوم/ الثلاثاء
و في أحد المقاهي
الشباب جالسين ويسولفون بس زياد ماكان معاهم فكريا ولا كأنه سمعهم حتى الكبتشينو
اللي عمره ماقاومه ماقدر حتى يشرب منه ولو ان ريحه الكوفي مغريته بس مو عارف وشفيه
وكأن شي واقف في بلعومه....حتى ولا انتبه لعبدالعزيز اللي جالس يراقبه وكان حاس ان خويه متكدر
عزيز كان وده يساله وش فيه بس الكل حوله ومايبغى ينبهم
فجأه تكلم خالد::/ياهووه وين سارح اللي ماخذ عقلك...هههههههه
نواف يكمل ::/هههههههههه يتهنى به
زياد حس في هاللحظه انه بدء يهوجس كثير وعلى قرابة انه ينكشف عشان كذا قام بسرعة واستأذن منهم ..
زياد:: / يالله شباب أنا ماشي نشوفكم على خير أن شاء الله ..
نواف / وين وين ؟؟ تو الوقت بدري "زيود" خلك الين 12 وعقب رح ؟؟ مابعد شبعنا منك ..!!
عبدالعزيز ينتهز الفرصة / يالله زياد خذني معك على طريقك ..
نواف/ وش فيكم يا شباب مستعجلين.. !!
زياد/ماعليه يانواف الجايات اكثر ونشوفك بكرة بالجامعة .. وبعدين الصراحة انا عندي كلاس الساعة7.30 ويالله يمديني اروح أوصل للبيت وأريح ..
خـالد/ وانت عبدالعزيز ..!! خلك قاعدين
عبدالعزيز وهو يطالع زياد وحاس ان فيه شي والمسألة ماهي مسألة كلاس مبكر ولا شي ::/ لا ماعليه شباب احس اني تعبان وودي انام وبعدين ماعاد إلا خير الساعة 11.30 وعلى بال مانوصل للبيت تلقى الساعة 12 وزيادة بعد
نواف/ الله يعين ... زين مع السلامة ورونا عرض كتافكم انت وهو ..صدق انكم سخيفين وقالبين لي شيّاب هاليومين ..
محمد/وانت الصادق واحد مدحت والثاني مصطفى .. يبي يروحون ينامون حتى يستيقظون مبكراً للذهاب إلى المدرسة ..
زياد/ ههههههههههههههههههههههههههههههههههههه الله يقلعك .. طيب انا أيهم ؟؟ مدحت والا مصطفى ؟؟
نواف وهو يتفحصه ::/تصدق انت يناسب لك مدحت .. لأن مدحت دلعه مدح دح .. وانت ماشاء الله عليك مدح دح .. فيناسب لك الأسم ..
زياد::/ حرااام عليك .. بس يالله مقيولة اللي مايعرف الصقر يشويه ..!! والا انت وش عرفك بالأجسام ..
الحين انا مدح دح .. حبيبي هذا أسمه كمااااااااال اجساام .. مهوب (( ويقلده)) مدح دح
يالله السلام عليكم جميعا ..
الكل::/ في حفظ الرحمن ..
مشى زياد عن الشباب ويحس فيه شي قابض على صدره مايدري وش سببه .. بس اللي يعرفه انه يتألم وانه متوتر ومتنرفز ومو طايق حتى نفسه .. وده يصيح وده يصرّخ وده يسوي أي شي .. بس يقتل هالشي الي بداخله ومتعبه .. مشى وراه عبدالعزيز اللي يحاول يسرع من خطواته علشان يلحق عليه ..
عبدالعزيز وهو يلهث ../ زياد!! زياد اصبر الله يهديك شوي شوي
وقف زياد والتفت على صديق عمره من ايام الطفولة ..و اللي يعتبره مثل اخوه وأعز .. هذا عبد العزيز اللي ياما واساه وياما وقف جنبه في أحلك الظروف .. سانده ودفعه في دراسته لحد ماوصل للي وصل له ..
زياد ::/ هههههههه انت لين متى بتستمر على هالحالة؟؟ ياخي الف مرة اقولك تعال معي النادي بيدربونك هناك على الجري بس انت الله يهديك ما تطيع ..!!
عبدالعزيز يلهث من الهرولة::/ اسكت الله يخليك ترى يالله اتنفس لاتحاول تكلمني لأني خطر اشفطك ..
زياد قام يطالع عبدالعزيز بنظرات غريبة وملامح مبين عليها القرف ...
انتبه له عبدالعزيز ::/ هيه أنت وش فيك يا أخينا؟؟
زياد: :/وعععع .. عاد تصدق قاعد أتخيل شكلي وانا بين أمعائك .. واسبح في معدتك .. واسيّر على بنكرياسك الخايس.. وععععععع
عبدالعزيز ::/ هه انت بس يحصل لك حبيبيي .. ترى احب أذكرك أني المحامي الكبير عبدالعزيز قريبا إن شاء الله .. وان العالم لازالوا يقنعون فيني علشان يسوون لي نصب تذكاري بس انا اللي مو راضي عارف ليه؟؟ لأني أخاف ربي .. واخاف الناس تصير تحج لي كل سنة ثم استاثم فيهم .. عشان كذا اعتذرت .. وانت يحصل لك تدخل في أحشائي وترفض؟؟ (( وبدى يحرك يده ويقول )) والله حالة
سكت زياد والتفت بيمشي وعلى وجهه شبح ابتسامة مايقدر يشوفها الا اللي يدقق في ملامحه زيــن ..
مسكه عبدالعزيز مع كتفه ورص عليه وكان مبين على وجهه علامات الجدية ...
: زياد وش فيك ؟؟ انت اليوم مو طبيعي ابدا ..!! صاير لك شي ..؟
زياد : لا مافيني الا العافية .. بسـ ـ ـ
عبدالعزيز: بس وشو زياد .. وش فيك ؟؟ ترى والله استهميت عليك00
زياد: مادري والله عبدالعزيز .. وبعدين اول شي انت عارف أني لازم اروح الحين وثانيا احس اني متضايق بالحيل .. ماادري وش السبب ..
عبدالعزيز:/ صاير لك شي في البيت ..!! يعني عمك تعرض لك بكلمة مثلا والا شي.؟؟
زياد:لالالا .. اليوم كله اصلا ماشفته شكله مسافر ..
عبدالعزيز: أجل وش فيك ؟؟
زياد: ماادري احس اني مخنوق ومب قادر اتنفس من الهم ..
عبدالعزيز وبنظرة جانبية وغمزة على طرف عينه : اييييه ..فهمنا عليك خلاص ؟؟
زياد:ههههههههههههه طيب وراك مشوه عمرك بهالطريقة ونظرات وماادري ايش ... وبعدين فهمك صحيح ...
عبدالعزيز(( حط عينه بعين زياد وشاف فيها بحور الهم والحزن اللي عايشها توأم روحه وتنهد سبحان الله وش كثر حلاة هالعيون الناعسة الكحيلة بس لولا مسحة هالكدراللي عليها كانت بتكون شي ثاني ))انتبه لعمره وقال : اييه يااخي قل كذا من الأول ولاتخليني أخاف عليك..
بعدين مو أختك طمنتك عليها ؟؟؟
زياد ::/ إلا بس بعد ودي أتأكد بنفسي ... يعني أنا ماتطمنت عليها شخصيا ...؟
عبدالعزيز: الله الله وش هالحكي السنع .. يعني لازم انت تكلمها براسها ...
زياد :أكيد هذي مافيها نقاش ... أنا أستغل المناسبات علشان اكلمها واسمع صوتها وشلون تبني أفوت علي هالفرصة .. وبعدين يالله انت بعد شكلك مطول خلنا نمشي فيني النوم وعساني اوصل للبيت بالسلامة..
عبدالعزيز ::/ زين يالله أنا بروح من هنا سيارتي موقفها عند المسجد ..
زياد : أووووه لالا انا هنا عند المواقف .. زين يالله أشوفك بكره على خير ان شاء الله
وافترقوا الأثنين في نص الطريق وكل واحد منهم راح لسيارته وكل واحد في قلبه شقى اللي له ... (())

ماراح اكمل القصة لما اشووف تفاعلكم اوكييي

بعد ما يقارب الأسبوع
اجتمعوا البنات مع بعض عقب ماخلصوا مصلين العصر وطلعوا يجلسون في الحديقة الخارجية
كانت رشاشات الزرع تشتغل وملطفة الجو ... جلسوا على مقاعد الحديقة اللي كانت مغطاة بمظلة وبدوا يسولفون .. وانتم عاد ادرى بسوالف البنات ...
ريم وهي تشرب من البيبسي ::/ تعالوا صديقتكم غادة هذي متى قررت تتزوج ... الله يقلع بليسها كانت عندنا في الحفلة ولا سمعتها جابت طاري ؟؟؟
ضحكت ندى ::/ من بكرة على طول اتصلت علينا وعلمتنا .. قالت انها استحت تقول لنا وجهاً لوجه وخصوصا ان فيه بنات كثار ..
ريم ::/ طيب متى تملكت ؟؟
سحر وهي تربط شعرها ::/ بعد الحفلة بيوم .. .. وزواجها الخميس الجاي .! لا تنسين تراها عازمتك ...
ريم ::/ ايه على طاري زواجها وينه فيه ومن بيجي وعندكم فساتين والا لا ؟؟
ندى ::/ شوي شوي .. الحين حددي اي سؤال تبينا نجاوبك عليه ؟؟
ريم بحماس ::/ كلهم .. اول شي وين زواجها فيه ؟؟
سحر ::/ في الشيراتون ..
ريم ::/ ومن بيجي من اللي تعرفونهم ؟؟
ندى ::/ رحاب أكيد بتجي لأنها بنت عمها .. وأريج قلنا بنمر عليها يوم الزواج وماعارضت يعني شكلها بتروح ...؟؟ ويمكن عمتي وبناتها .. وباقي الشلة عاد مادري من عزمت منهم ؟؟
نطت سحر وكانها توصلت لشي ::/ إلا ريم ماقلتي لي .. وش صار بشريني عن راشد وخطبته ؟؟
طالعتها ريم بنظرات مبهمة بالنسبة لسحر ... لكن تقول (( كيف تتجرأين وتسأليني مثل هالسؤال القاسي عن راشد ))
ابتسمت بخفيف وكأن فيها شي ::/ ما صار شي ... هو رفض انه يتزوج الحين ؟؟ (( وطالعتها بنظرة ثانية تبي تفهمها شي لكن سحر للأسف ماتقدر تفهم لغة العيون ))
سحر بحزن ::/ قهر .. سخيف راشد كان ودي عذا تصير وحده من الأقارب لنا مرة .. والله انها حبيبه وجلستها ما تمل ..
وجهت ندى نظرتها لسحر متفاجأة من كلامها وفي خاطرها تقول ان عذا بتكون من المقربين لكن بطريقة انتي مستحيل تقبلين فيها ...
ضحكت سحر وقالت ::/ عاد تصدقون مصعب سألني عنها وقلت له انكم ناوين تخطبونها لراشد .. عاد لو أقول له الحين ان كل شي تكنسل بيستانس ,,
طيرت ريم عيونها بنقمة ::/ والله العظيم هالعيال خربوا ... الكبار مقاطعين الزواج .. والصغار متشفقين عليه ...
استحت ندى لما سألتها ::/ ليش وش صاير خلاك تقولين كذا ؟؟
أشرت عليها ريم باستهزاء ::/ اسمعوا وش تقول ؟؟؟ يعني انها ماتدري وش السالفة ؟؟
غمزت سحر لريم ::/ لا هي فاهمة بس تبغاك تنطقين اسمه علشان تتلذذ ؟؟
ارتبكت ندى واستحت غصب عنها ونزلت عينها تتلهى بجوالها ... لكن الثنتين ما تركوها في حالها ...
ريم بخبث ::/ ايه من سمع طاري العرس وهو ناشب بحلق أمي .. إلا انا بتزوج مع راشد ؟؟
ركزت سحر نظرها على ندى ::/ طيب وش رايها خالتي في الفكرة ..؟
ابتسمت ريم ::/ قالت بكيفك مادام اخوك ما يفكر بالزواج بنخطبها لك انت ..
طالعتها سحر خايفة بس غمزت لها ريم .. رفعت ندى عيونها وسألت ::/ وش رد عليها هو ؟؟
مسكت ريم ضحكتها :/ قال لا أنا ابي وحده وما ابي غيرها ؟؟؟ اخطبوا لي ندى ..
بلعت ندى ريقها بصعوبة ومستحية من هالتصريح المباشر وقالت::/ وش ردت امك ؟؟
ضحكت سحر ::/ ياحبي لك يا ندوش ليتك تشوفين شكلك وانتي متحمسة ؟؟
ضربتها ندى على كتفها وهي خجلانة .. وردت عليها ريم ::/ امي انصدمت .. وقالت مستحيل تفكر اني اخطبها لك ؟؟ لأنها مو من نوعية البنات اللي افضلهم ...
طالعوها الثنتين بصدمة .. ندى كانت دقيقتين وتصيح .. لكن سحر عصبت على مزحة ريم اللي تعدت حدودها ..
سحر ::/ ريــــــــــــم ..!! خلاص عاد حرام عليك ؟؟؟ اوقفي هنا
ضحكت ريم وهي تصفق كف على كف ::/ والله حالة ..! مشكلة الناس اللي تحب ؟؟
لا تخافين أمي قالت ماراح نلقى أحسن منها .. بس بينتظرون شوي وبعدين بيتقدمون لكم رسمي ؟؟
سحر بفرحة ::/ والله ... ياااااااااااااااااااااااااااااااااي واخيرا بشوفكم معاريس ؟؟؟ اخوي واختي ؟؟ وناااااااااااااااااسة ؟
ريم ::/ الحمدلله والشكر اللي يسمعك يقول انتي اللي بتتزوجين ؟؟ المهم اتركونا من هالسالفة وقولوا لي عندكم فساتين تحضرون فيها زواج البنت ؟؟
سحر ::/ الحمدلله انا مفتكة عندي واحد مفصلته من فترة ..
لوت ريم فمها ::/ ماشاء الله عليك .. وانتي ندوش ؟؟
وعت ندى من سرحانها وتفكيرها اللي شغلها وابتسمت والفرح يشع من عيونها ::/ لا انا ماعندي ..رحنا امس للسوق ادور لي واحد ومالقيت شي ؟؟
صفقت ريم بفرحة ::/ يس .. أشوى فيه احد مثلي ... زين وش رايكم نطلع اليوم ندور لنا فساتين وبالمرة نتمشى ؟؟؟
التفتت سحر على ندى ::/ انا ماعندي مانع بس الأخت اللي هنا لازم تقول لأخوها ...!
ابتسمت لهم ندى ::/ ماعليكم ماراح يرفض .. بروح معكم بس طبعا بيوديني هو ...
وقفت ريم ::/ خلاص .. وانا بروح الحين لبيتنا علشان اجهز عمري للطلعة والوعد ان شاء الله بعد المغرب ... اتفقنا ...
كلهم مع بعض ::/ خلاص اتفقنا ...
مشت عنهم ريم وهي تركض بتدخل البيت .. ووقفت وراها ندى وطالعت سحر وقالت ::/ بروح لغرفته أشوفه وش حايس .. وبالمرة بقوله عن الطلعة .. انتي بتدخلين ؟؟
وقفت سحر ::/ ايه بروح عند خالتي والا بطلع لغرفتي ؟؟
ابتسمت لها ندى وهي تعطيها ظهرها ::/ خلاص اجل اشوفك فوق ...
راحت ندى لأخوها .. ومشت سحر داخلة للبيت وهي تهوجس ...،،،"" حظك يا ندى والله من السماء ...الظاهر ان أمك ماتت وهي راضية عليك .. لأن ربي رزقك بطلال اللي مخليك ملكة وانتي مو حاسة .. والحين يفكر يخطبك ويرتبط فيك ... وانا ياحسرة علي حتى النظرة ما القاها ؟؟؟ هي هدية التخرج الي حسستني باهتمامه وتفكيره فيني .. لكن انا داعية ربي انه يكون من نصيبي .. وعساه يكون يحبني بس مايوضح هالشي علشان ماينحرج ويحرجني معه ..""
انتبهت لنفسها لما سمعت اللي يدندن بألحان مختلفة .. لفت وجهها لجهة المغاسل ولقت مصعب وهو يتكشخ قدام المراية ويضبط عمره .. ابتسمت بفرح لما تذكرت سالفة راشد ..
سحر وهي فرحانة ::/ اووه أوه وش عليك ... وين بتروح على هالكشخة كلها ؟؟
التفت لها مصعب يبتسم ::/ سلامتك بس بخاوي الوالد للشركة ...
تقدمت له سحر ::/ الحمدلله ان ماعندنا اختلاط .. والا كان انفتنوا فيك البنات على طول وضعت من يدين عذا ...
طالعها مصعب مستغرب كلمتها الأخيرة::/ وش دخل عذا عاد ؟؟
ناظرته سحر وغمزت له ::/ دخلها ان راشد رفض الزواج .. يعني الحين خلت لك الساحة ..
ابتسم مصعب ابتسامة باهتة صفراء وطالع اخته بنظرات حزن لما تذكر كلام زياد ولد عمه ... الحين كلهم انكتب ان مالهم نصيب مع اللي ارتاحوا لهم لا هو ولا اخته ... ربت على كتفها وهو يقول ::/ لا خلاص كنسلت الفكرة .. ماعاد ابيها بشوف لي وحدة ثانية وتكون على ذوقك ...
استغربت سحر من رده ونظرته اللي مافهمتها .. لكن ما قدرت تقول له شي لأنه تركها لأفكارها وطلع عنها للساحة الخارجية........ !!
------------------------------------------------------------------------------

للمرة الألف قاعده تقلب في جوالها وتشوف صور الحفلة ،،، عاجبها شكل سحر في المقام الأول وبعدها شكل ندى ... قامت تتأمل الصور وتتخيل لو انها كانت مكان وحده منهم ،،، وعليها عقد الماس والساعة الشوبار آخر موديل .. والا خاتم السوليتير ؟؟؟
ابتسمت بسخرية على حالها وحالهم ،، المفروض ماتفكر هالتفكير ولا تترك له مجال انه يستحوذ على تفكيرها ... وعت على نفسها لما سمعت صوت مسج واصل ..طالعت الجوال بس مالقت شي .. رفعت راسها لعبير وشافتها مبتسمة وتقرأ اللي وصلها ..
أريج ::/ هذي العلاقات والا بلاش ؟؟؟ كل خمس دقائق مسج ؟؟؟؟
عبير من دون ماترفع راسها من الجوال ::/ اذكري الله لا ينقطعون ..
أريج ::/ تكفين عطيهم رقمي وادهني سيري علشان يرسلون لي ؟؟
طالعتها عبير بنظرة غضب ::/ وش تبين فيهم ؟؟ خليك مع صديقاتك أصرف لك ؟؟
استغربت اريج غضبها ::/ لا قومي اضربيني ؟؟
ام راكان ::/ اذكروا الله وش صار لكم ؟؟
التفتت أريج ::/ اسأليها هي يمه .. مدري عنها على طول هبت بوجهي ...!
عبير باستفهام::/بعد هبيت بوجهك ؟؟؟؟ والله ماهبيت ولا شي انتي تشوفين اشياء غريبة هاليومين حنا مانشوفها ؟؟
رفعت اريج حاجبها ::/ حتى الرسايل اليومية والإتصالات أشوفها وانتم ما تشوفونها ؟؟
وقفت عبير بغضب ::/ أريج ... ترى ما اسمح لك ؟؟ وبعدين وش فيها لا صاروا صديقاتي أحسن من صديقاتك ويراسلوني ويكلموني .؟ تغارين يعني ؟؟
أم راكان ::/ خلاص انتي واياها . وانتي بعد اجلسي وتعوذي من الشيطان .. هاليومين صايرة كبريت .. مايمدي الواحد يكلمك كلمتين الا وعصبتي ؟؟
رمت عبير نفسها على الكرسي وبدت تصيح ... استغربت أريج تصرفها وفي نفس الوقت حست ان فيه شي غريب قاعد يصير لعبير بس هي مو راضية تتكلم عنه ...
قربت لها ام راكان وخذتها في حضنها وطبطبت على ظهرها ..
ام راكان بصوت حنون ::/ وش فيك حبيبتي ؟؟؟ هاليومين انتي مو عاجبتني ؟ وش صاير ؟
دفنت عبير وجهها بصدر امها ::/ يمه والله احس اني مضغوطة من كل جهة .. احس اني في يوم بقوم الصبح وانا مجلوطة ... تعبت والله تعبت ...
ورجعت تصيح بهدوء ...
تنهدت ام راكان ::/ وش اللي متعبك طيب ؟؟
عبير ::/ كل شي يمه .. مو شي معين ؟؟
أم راكان ::/ قصدك تكاليف فستانك وتكميلاته ؟؟
رفعت راسها عبير ،، وقلبت نظراتها بين أريج وأمها ،، مسحت على شعرها وهي منزلة راسها .. ورجعت طالعت أريج وكأنها خايفة او مرتبكة ..
عبير ::/ لا يمه .. الفستان ومحلولة مشكلته .. ( ابتسمت ) خلاص عاد يمه لازم اقول ان ودي اتدلع عليك ..؟ (( وراحت تمسح دمعتها بظهر كفها ))
ضحكت ام راكان ::/ تدلعي مثل ما تبين بس عاد مو تخوفيني وتجلسين تصيحين ؟؟
ضحكت أريج لأختها لكنها في نفس الوقت مستنكرة تصرفاتها ::/ مسكينة تغار وماتعرف وشلون تجذب الأنظار .. حبيبتي ترى انا امي تدلعني بدون ما اصيح ... يعني انتي افهمي سر المهنة قبل كل شي ...
ابتسمت لهم امهم ::/ المهم ترى بيت عمكم اليوم بيجون عندنا على العشاء ... جهزوا شي حلو ويواجه ... زين ..
هزت عبير راسها بالإيجاب وهي مبتسمة .. ووقفت اريج بسرعة وهي تركض للتيلفون ..
ام راكان ::/ شوي شوي .. وش فيك ؟؟
أريج وهي تشيل السماعة ::/ ابتصل على إيمان تجيب لي واحد من فساتينها علشان أحضر به زواج غادة ...
قامت عبير رايحة للمطبخ تشوف وش الناقص علشان العشاء .. تنهدت وقلبها شايل هموم كثيرة .. تحس ان اللي تسويه غلط في غلط لأن عمرها ماسوته حتى لما كانت في الثانوي وفي أشد الحاجة للفلوس قبل لا تدخل الجامعة وتنصرف لها المكافئة ...!
------------------------------------------------------------------------------
بعد المغرب مباشرة وصلوا طلال وريم لبيت خالتهم لكن مانزلوا وقفوا عند البوابة الرئيسية واتصلوا على البنات علشان يطلعون لهم ...
ركضت سحر لغرفة ندى علشان تبلغها بوصولهم .. شافتها متمددة على السرير بعبايتها وبيدها كرت طلال وخاتم السوليتير اللي اهداه لها ... وقفت سحر عند الباب وهي مبتسمة .. دعت من خاطرها ان الله يوفقهم ويسعدهم . ويوفقها معهم .. دخلت ونطت على السرير علشان تخوفها .. ناظرتها ندى بعصبية ورمت عليها المخدة الصغيرة ..
ندى ::/ سخيفة وقليلة ذوق .. ترى فيه اختراع اسمه دق الباب قبل الدخول ..
ضحكت سحر ::/ ههههههههههههه معليش خوفتك وقطعت عليك احلامك . بس يالله تراهم عند الباب ينتظرونا ..
شهقت ندى وهي تقوم ::/ ليش توك تتكلمين .. يالله قومي اطلعي وانا بنزل لزياد واطلع انا واياه وراكم ...
قامت سحر وهي تهز راسها والله حالة هالبنت واخوها .. معقدين !! نزلت تحت بسرعة سلمت على امها وطلعت للي بالسيارة ...
اما ندى فلبست جزمتها على طول وراحت تركض مع درج غرفتها علشان تطلع هي وزياد .. كانت على وشك انها تطيح لو ماتمسكت بكل قوتها في الترابزين ..
تنفست بقوة من الخوف وهدت نفسها وتوترها وكملت باقي الدرج بهدوء ... دخلت على اخوها وشافته مثل العادة منسدح على الصوفا وممدد رجوله على الطاولة اللي قدامه ويلعب بشعره .. ابتسمت من خاطرها على شكله .. يعجبها يوم يسوي هالحركة .. تحسه كيوت وكأنه بيبي ...
ندى ::/ يالله يالحبيب ترى مو وقت شعرك .. أخاف تنام علينا الحين ...!
ضحك زياد وهو ينزل رجوله ::/ خلصتي نمشي .؟
ندى ::/ ايه يالله العالم ينتظرونا برا ..
طفى التلفزيون وخذ مفاتيحه وشماغه وطفى الأنوار وطلع معها للسيارة ...
ركبوا البي ام ومشوا للبوابة الرئيسية علشان يقابلون طلال ... وقفوا جنبه وفتح زياد دريشته وهو يبتسم علشان يسلم عليه ...
زياد ::/ مساك الله بالخير ... كيف أمسيت ؟؟
طلال وهو يضحك على اسلوب زياد ::/ بخير يامال العافية ... بشرني عنك انت طال عمرك ؟؟
حك زياد رقبته ::/ تمام الله يخليك .. وين النية ان شاء الله ؟؟
التفتت له ندى بنظرة غضب وهمست بصوت واطي ::/ مو انا قايلت لك وين بنروح ؟؟
التفت لها زياد يضحك ::/ أوه معليش آسف .. (( وبصوت هامس )) وش اسوي يابنت الحلال مالقيت سواليف .. سلم على طلال ومشوا مع بعض رايحين للمركز ...
سحر كانت ميتة من الفرح لما شافته اليوم على طبيعته وعفويته ... كل يوم تتعلق فيه زيادة وتحبه اكثر ... شكله اليوم محلق .. ياربي القفل عليه طالع حركة ...!! والا شعره أحلف انه توه محلق ومزينة ... آآآآآآآآآآآآآخ كم بصبر ياربي ؟؟
اما ندى فكانت مبسوطة وفي نفس الوقت تحس بحياء .. ماتدري وشلون بتشتري فستان والا بتقدر تتفرج على الملابس وهو بينزل معهم .. يعني حبكت اليوم ينزل معهم يوم صاروا محتاجين السوق بقوة ومحتاجين فساتين ؟؟؟ قررت انها تتجاهل وجوده وبتطلب من ريم والا سحر انها تمشي معه وراهم علشان ما تحس بوجوده وترتبك .........!
قاطع زياد سرحانها ::/ عذا بتجي معكم ؟؟؟
التفتت عليه ندى ::/ لا بس حنا بروحنا ...!! وبعدين مو كل يوم العيد والا كل يوم تبي تشوفها ؟
رفع زياد حاجبه ::/ لاوالله ..! وبعدين انا كنت أسأل.. علشان نمر عليها لا تسوي لنا حركات هذاك اليوم ..
ابتسمت ندى ::/ لا تخاف سوراج مسافر .. ووحيد سفروه .. وما عندها أحد الا اخوانها والا ابوها ..
ابتسم زياد::/ احسن كذا اتطمن اكثر ...
سكتوا وما بقى الا صوت مذيعة الأخبار يصدر من مسجل السيارة ..................!!
------------------------------------------------------------------------------

بدت تتوتر أعصابه من قربوا لبيت عمه .. خاف لا يشوف نفس المنظر اللي شافه هذاك اليوم ... ماسك اعصابه بالقوة علشان لو شاف السيارة ما ينزل ويكسر راعيها ....
التفت لأمه اللي جالسه جنبه ::/ لا تنسون اللي قلت لكم عليه ...!! حاولوا تقنعونهم ؟؟
أم نواف ::/ ابشر يمه ،، والله يقدم اللي فيه خير !!
إيمان ::/ نواف وإذا رفضت الفكرة ...؟؟
طالعها نواف من المرايه اللي قدام ::/ انتي جاسة نبضها ؟؟ والا سائلتها؟
ارتبكت إيمان ::/ لا ... بس انت عارف فكرتها عن الملكة الحين ؟؟
عصب نواف ::/ هذاك أول والحين الأول تحوّل ...!! وحاولوا توضحون لها اني هالمرة مُصِّر ..
بلعت إيمان ريقها ::/حط ببالك انها ممكن تعارض ..! وإذا عارضت مانقدر نغصبها ؟؟
زفر نواف بغضب ::/ قلت لك لاتعطونها فرصة تشاورونها .. على طول ادخلوا بالموضوع واجزموا فيه .. وقولوا لها ان الملكة بتكون عما قريب بس خلوها تستعد ...
طالعته إيمان بنظرة خوف من المرايه .. وطاحت عينه بعينها وتنهد من نظرتها القلقة . حاول يهدي عمره ويتعوذ من الشيطان علشان مايغلط أكثر ...
لفوا لبيت عمهم .. وصار اللي ماتمناه يصير ... كانت الجاكوار واقفة عند باب البيت الرئيسي هالمرة .. جن جنونه وفقد سيطرته على المقود ... صر على اسنانه لما ابيض فكه ... صار يتمتم باللعنات والشتايم ...
وقف عند الباب ونزل اهله .. مانتظرهم لحد مايدخلون ... لكن ريوس بالسيارة لوراء ورجع للباب الثاني .. وقف سيارته بنص الطريق ونزل وهو يسرع من خطواته , عيونه كانت حمراء من الغضب وتعكس النار الشابة بصدره من الغيرة والألم ...
وقف عند دريشة السائق ودق عليها ،، ما كان يقدر يشوف الموجود لأنها كلها مظللة ..
فتح الدريشة وكان هو نفسه الشاب الوقح ... وهالمرة كاشخ أحسن عن قبل وريحة عطره يشمها اللي بآخر الحارة ...
تأمل فيه نواف لدقائق وكأنه يبغاه يشوف الجنون اللي بعيونه ..
نواف ::/ وش تسوي واقف عند الباب هالمرة ؟؟
طالعه مؤيد من فوق لتحت ::/ مثل ماقلت لك هذيك المرة انت مايخصك ؟؟ هذا بيت راكان وهو اللي يحاسبني ؟؟؟
شب نواف ::/ هذا بيتي فاهم والا لا ؟؟ وهذولا اهلي ؟؟ وانا ما اسمح لحثالة مثلك يوقفون قدام الباب ؟؟
التفت مؤيد لباب البيت لما سمعه ينفتح وكان طالع منه راكان ... رفع نواف نظره للباب مكان ما يطالع مؤيد وشاف ولد عمه في هيئته المعتادة .. والشماغ على كتفه ...
رجع مؤيد نظره لنواف ::/ كنت انتظر راكان ...!! وترى ما الحثالة الا انت واشكالك ؟؟ والا ماشفت عمرك ؟؟؟
تنرفز نواف من كلام مؤيد ... رطب شفايفه بطرف لسانه وهو مقهور بس ماوده يتمادى علشان مايسوي الفضايح .. وطالع في ولد عمه قبل لايمشي وقال ::/ لو انت رجال بحق ماصادقت هالأشكال ...
مشى عنهم بيركب سيارته .. اما مؤيد فابتسم باستهزاء وهو يقول ::/ لا انت الرجال اللي يدق شبابيك العالم علشان يقولهم انتم حثالة ؟؟؟
حرك مؤيد سيارته وفحط فيها بقوة خلت نواف يلتفت ويبتعد شوي عن الشارع لا يصدمونه .. شاف السيارة من وراء وتفاجأ لما طلع مؤيد يده من الدريشة وأشر له باي باي ....
شد قبضة يده وركب سيارته وهو يتنهد بقهر .. مايدري ليه كل هذا يصير له ؟؟؟ وعشان ايش ؟؟؟ وهي ليش سوت كذا ليش؟؟؟
ضرب بيده من القهر على المقود وطلع جواله يتصل على ربعه يواعدهم لأنه حاس نفسه بيطق من القهر وماينكر انه بيموت من الغيرة والخوف عليها ............................!
------------------------------------------------------------------------------
وقفوا عند البوابة الرئيسية للمركز .. وبركن طلال سيارته بالمواقف اللي قدام البوابة لكن زياد وقف بوسط الشارع ... التفت زياد على ندى اللي كانت تضبط عبايتها::/ وش عنده طلال وقف ؟؟ بينزل معكم هو ؟؟
ارتبكت ندى وتلعثمت ::/ ها ..؟؟ ايه الظاهر انه بينزل هذا على كلام اخته ؟؟ (( وضيعت نظرها وماحبت تركز في عينه ))
ما انتبه لها زياد لكن قال ::/ حلو انه بينزل معكم . اجل انا بروح واذا خلصتي اتصلي علي امرك زين .. هذا نواف داق ويبغانا نجتمع ..
فتحت ندى الباب بتنزل ::/ خلاص ولا يهمك ... وووو تراهم الظاهر عازمينا على العشاء يعني لاتتعشى ؟؟
ابتسم لها زياد ::/ ابشري .. ولا يهمك ...
هزت ندى راسها له وابتسمت .. ونزلت رايحة لهم وهم واقفين ينتظرونها ...
وقف زياد يراقبهم لكنه ابتسم وطلع راسه من الشباك وهو يقول بصوت عالي::/ الله الله ياطلال .. لايغيبون عن عينك ... والله يكون في عونك بصراحة ؟؟
ضحك له طلال ::/ ولايهمك ارقد وآمن .. وبعدين من قال لك بطاوعهم لهم ساعة لو ماخلصوا بكيفهم يرجعون غصب ...
ضحك زياد وهو يحرك سيارته علشان يطلع .. ومشى متوجه للكوفي اللي تواعد فيه هو ونواف والظاهر ان عبدالعزيز بعد بيكون معهم ...
وقف سيارته في الباركنات ونزل بعد ماقفلها ودخل ... دور بعيونه على نواف ولقاه جالس على طاولة في الزاوية ومكتف يديه بحضنه وشكله سرحان ويهوجس ... ابتسم زياد وتقدم منه وهز المفاتيح في وجهه ::/ يااااااااااااااهوه وين وصلت ؟؟ الحرم والا البحر ؟؟؟
رفع نواف راسه وضحك ::/ لا وانا اخوك انا وين واللي انت تقول عنهم وين ؟؟
جلس زياد قدامه ::/ مافيه شي بعيد عن رب العالمين .. وبعدين لاتصعبها ؟؟ ترى انت اللي مااشتهيت تروح والا لو انك مشتهي الروحة كان قدرت تدبر عمرك ..؟
ابتسم نواف بحزن واضح ::/ الله كريم يا زياد...!!
انتبه زياد لعبدالعزيز اللي واقف بالنص ويدور عليهم وباين عليه انه ضايع والا يدور شي .. ضحك وهو يأشر له ويناديه بصوت عالي ...
انتبه لهم وراح لطاولتهم .. شافهم مابعد طلبوا شي فنادى الويتر قبل لايجلس ..
عبدالعزيز ::/ ماشاء الله كل هذي شهامة تنتظروني اجي علشان تآكلون ؟؟
طالعه زياد وهو رافع حاجبه ::/ وانت الصادق كنا عجزانين ننادي الويتر وانتظرناك لما تجي وتناديه ؟؟
عبدالعزيز وهو يطالع القائمة ::/ ها ها ها .. على فكرة بايخة لاتعيدها ..
ضحك عليهم نواف ::/ أقول اطلبوا لنا شي نآكله وأجلوا المضاربة لبعدين ؟؟؟
طلبوا كلهم خفايف مع كابتشينو وعصير ... وانهمكوا في سوالفهم وتعليقاتهم اللي ماتخلص .. ويخططون لما بعد التخرج خصوصا انه باقي لهم هالكورس ويخلصون ..
لاحظوا شرود نواف وسرحانه وكأنه باين عليه انه مهموم وفي خاطره شي ...
زياد ::/ نواف انت مو طبيعي ... وش بلاك ؟؟ فضفض وانا اخوك ؟؟
ابتسم نواف ::/صدقني مابلاني شي .. مافيني الا العافية ..
عبدالعزيز ::/ عاد بتلعب على زياد بكيفك بس أنا لا .. والله ان فيك شي وعيونك تقوله ؟؟
تنهد نواف وبدأ يطالع زياد وعبدالعزيز بنظرات يأس وحزن ::/ من وين تبغوني أبدأ ؟؟
انقبض قلب عبدالعزيز ::/ من اللي تبي وانا اخوك .. بس انت تكلم يمكن نقدر نساعدك ..
ابتسم نواف ::/ زين اول شي انا قررت اتملك على بنت عمي ...
ابتسموا الأثنين ابتسامة كبيرة وفرحانين لثالثهم لأنهم عارفين انه من زمان يبيها وخاطره منها ...
زياد ::/ زيــــــــــن يا ابن الحلال مبروك والله يوفقك ...
عبدالعزيز ::/ افا عليك هالشي يفرح مو يحزن ؟؟
ابتسم نواف ::/ لأنك ماتدري وش تبعاته (( وسكت شوي وكأن شي طرى بباله)) تملكت يعني بكون مسؤول عن عائلة ثالثة ؟؟؟ اللي هم بيت اهلي وبيت عمي وبيتي ؟؟ وانا يادوب طالب جامعة على الله ثم هالمكافئة ... قل لي بكرة اذا تخرجت من بيوظفني ؟؟ وين بلقى وظيفة اصلا ؟؟؟ وشلون بصرف على هالأرواح اللي بذمتي .. وين بدبرها معه ؟؟
ربت عبدالعزيز على كتفه ::/ هون وتهون يا ابن الحلال ... ومن هنا الى ان تتخرج بيحلها ربك .. والله خوفتني على بالي شي أكبر من كذا ..
نواف بنبرة استغراب وتهجم::/ وهذا مو شي كبير ؟؟ يمكن بنظرك انت صغير لأنك ماجربته لكن بالنسبة لي ولأمثالي فيكون بعلمك ترى يعتبر كارثة ... (( وصد بوجهه عن عبدالعزيز ))
زياد يلطف الجو ::/ اذكروا الله ما صار الا كل خير ... وبعدين ولا يهمك نواف .. انت بس تخرج وخل موضوع وظيفتك نتدبره بعدين .. لاتهتم مادام اخوك زياد راسه يشم الهواء ؟
ابتسم عبدالعزيز بطريقة كوميدية في وجه زياد ::/ وانا بعد شايل هم التخرج مادري وين بلقى وظيفة فيه ؟؟
طالعه زياد ::/ أشوفكم بديتوا تستغلوني ..؟ عموما خلونا نتخرج وانا اوعدكم خير ان شاء الله ..!
نواف تلعثم وخاف لازياد يفهمه غلط ::/ زياد انا مو قصدي هالشي اللي ذكرته .. انا كنت بفضفض لكم وبس .. ماعندي احد احكي له عن همومي الا انتم ...
عبدالعزيز ::/ والله انك تتبطر على النعمة ..! الحين الولد دق على صدره وقال ابشر بالوظيفة وانت تتهرب منها ..
ابتسم زياد ::/ يالهي عليك حتى حاسده على وظيفته قبل لايستلمها .. الظاهر بوظفك لو فراش عندي في المكتب بس علشان ماتنظل هالمسيكين ..
طالع نواف عبدالعزيز بسخرية ::/ حاسدين الفقير على موتت الجمعة ..!
وجه نواف نظره لزياد وطالعه بنظرات امتنان وكأنه يشكره من قلبه لأنه طيح ربع الهم اللي بقلبه .. والا الثلاثة ارباع فما يقدر احد يطيحه الا هي يوم توافق على الملكة وتشرح له اللي شافه وتبرره له بعذر مقنع .. ساعتها بيكون الأسعد على وجه الأرض ..........!
------------------------------------------------------------------------------
جلسوا كلهم بالصالة وجابوا قهوتهم يتقهوون .. كان الجو وناسة وسوالف وتنكيت ،، خصوصا ان ام نواف تموت على التعليقات والسواليف اللي تضحك ...
انتبهت عبير لمرت عمها ونظراتها لها ... استغربتها مثل مااستغربت نظرات إيمان من قبل .. كان باين عليهم انهم يبون يقولون شي بس مو عارفين من وين يبدأون؟؟
رن الجوال نغمة مسج ومدت إيمان يدها تطلع جوالها من الشنطة .. لكن ضحكة أريج خلتها تلتفت لها ...
إيمان ::/ خير ان شاء الله وش اللي يضحكك ؟؟
أريج ::/ رحمتك بقوة ... على بالك إن المسج لك ؟؟؟ حبيبتي مادام انتي وعبير بمكان واحد فأي رسالة توصل وتسمعين نغمتها فهي لها مو لك ؟؟
إيمان ::/ ياحياتي وانتي محد يعطيك وجه ؟؟
افتعلت اريج الصياح ::/ شفتي عاد ولا احد معبرني ؟؟ كأني مطلعه هالجوال زينة .!
إيمان ::/ طيب انتي تراسلين احد ؟؟؟
أريج ::/ الصراحة مو كثير .... لأني اخاف من الفاتورة ..
إيمان مندهشة ::/ جوالك فاتورة ؟؟؟ والله انك ماتحقرين نفسك وانتي مابعد دخلتي الجامعة ؟
أريج ::/ وش اسوي تراه هدية مااقدر اردها ...
إيمان ::/ طيب طلعي لك بطاقة وكل ماخلصت اشحنيها .. ولا تتوهقين بفاتورة الا لما تطلع لك مكافئة ..!
عقدت أريج حواجبها بتفكير ::/ تتوقعين أسوي كذا ؟
إيمان بتأكيد :/ أجل مايبي لها كلام ... وجوالك هذا لاتستخدمينه الا لما تدخلين الجامعة وتطلع فلوسك .....
رنة مسج جلجلت في المكان للمرة المليون على التوالي ... و وجهت إيمان نظرتها لعبير اللي تطالع جوالها ::/ صايرة مهمة أجل يا عبير ؟؟؟ واختك صادقة من جلسنا ماجا أحد مسجات الا انتي ؟؟؟
ابتسمت لها عبير ::/ وش اسوي اللي يحبوني كثار .. وش تبيني اقولهم لاتراسلوني ؟؟
إيمان ::/ لا وش دعوى .. الله يديم المحبة ويرزقنا اللي يحبنا ويموت بس علشان يتملك علينا ...
حست عبير بريبة في نغزة إيمان ::/ الله بيرزقك إن شاء الله ..!!
قامت عنهم عبير وطلعت برا الصالة .. واول ما انتبهت ام نواف لخروجها التفتت لأم راكان وهي مبتسمة ...
ام نواف ::/ ماشاء الله عليها عبير الله يخليها لك ان شاء الله ... قايمة بكل شي ؟؟
تنهدت ام راكان ::/ إيـــــــــــه وانا اختك لولا الله ثم هي كان مادري وش بيكون حالنا .. الله يخليها لي هي واخواتها ويهدي راكان ...
نزلت ام نواف راسها ::/ آمين ان شاء الله ربك بيهديه ويصلحه ...
سكتوا شوي لكن ام نواف ما اعجبها الوضع ولا اعجبها ترددها في طرح الموضوع .. علشان كذا على طول ومن دون تفكير لفت لأم راكان وقالت ::/ عاد يا ام راكان ترانا والله اليوم جاينكم وبخاطرنا حب ما انطحن وما راح نطلع الا يوم تطحنونه ؟؟
ضحكت ام راكان ::/ ابشري يا ام نواف باللي اقدر عليه ...
ابتسمت ام نواف وطاحت عينها بعين إيمان بنتها اللي مركزة معهم .. شجعتها نظرتها وقالت ::/ حنا نبي تحددون ملكة نواف وعبير ... الولد خاطره يتزوج وهو مابقى له غير هالترم ويخلص ان شاء الله ؟؟
استغربت ام راكان ::/ ايه يا ام نواف بس هذا انتي قلتيها توه بيتخرج ؟؟ يعني لاتوظف ولا بعد اعتمد على نفسه ؟؟؟
ابتسمت ام نواف ::/ كل هالأمور بييسرها رب العالمين ... وبعدين انتي تعرفين نواف اكثر مني .؟ فهل تتوقعين انه لعاب ومايبي يتوظف والا مهمل ؟؟
انكرت ام راكان بشدة ::/ لا والله حاشاه .. نواف ماينعاب وانا اعرف اخلاقه ..؟
ام نواف فرحانة ::/ خلاص اجل يملكون الحين والعرس عقب مايحصل وظيفة .. على الأقل يصير محرم لأحد منكم ... والعرس مااستعجلنا عليه ......!
احتارت ام راكان في ردها ..! كلام ام نواف مقنع ؟؟ بس عاد عبير وش بيلين راسها ؟؟
ام راكان وهي محتارة وباين من نبرة صوتها ::/ والله يا ام نواف عبير بنتك مثل ما هي بنتي ... وانتي عارفة رايها في الموضوع .. انا اقول هذي هي عندك كلميها واقنعيها وان شاء الله مايكون الا خير ...
استانست ام نواف لأنه على الأقل ام راكان موافقه يعني ممكن تدعم موقفها ... التفتت على إيمان وهي مبتسمة ::/ روحي إيمان نادي بنت عمك قولي لها امي تبغاك ؟؟
ارتاحت إيمان من ابتسامة امها وحست ان منال اخوها قريب ::/ إن شاء الله ..
قامت ايمان بسرعة وطلعت من الغرفة تدور على عبير مشت في الممر اللي يودي للمطبخ وقبل لاتدخله سمعت صوت عبير وكانها تكلم بالتليفون ,, استحت لما سمعتها تقول بصوت أشبه بالهمس..
.......::/ وش اسوي والله مو بيدي ... بيت عمي جو عندنا و مااقدر اطلع وهم موجودين ... زين وش الحل برأيك ؟؟؟(( سكتت شوي )) خلاص الساعة 12 تمام I'm waiting
استغربت إيمان هالكلام وفي نفس الوقت انحرجت ،، حست ان جيتهم اليوم مالها داعي أكيد عطلوهم عن شغل مهم ..
تنحنحت ودخلت المطبخ وهي تبتسم .. انتبهت لها عبير اللي كانت تجهز الشاهي وردت لها الإبتسامة ..
إيمان وهي تقرب منها ::/ خلي عنك الشاهي وانتي روحي للصالة أمي تبغاك ؟؟
انقبض قلبها عبير وحست بالموضوع اللي ممكن ام نواف تبيها فيه .. سلمت كل شي بيد إيمان وطلعت وراحت لهم الصالة ......................................!
------------------------------------------------------------------------------

خلصوا من التسوق لكن وقفوا عند آخر محل .. كانت ندى واقفة عند الكاشير بتحاسب عن فستانها .. والباقين ينتظرونها عند الباب تحاسب وتخلص وتجي لهم ...
واقفة مقابل المحاسب ومعطيته البطاقة علشان يسحب من الرصيد ...
تأخرعليها وهو كل شوي يقول العملية ملغاة ... استغربت الوضع وقالت يمكن ضغط على الشبكة ... التفتت لهم وشافتهم يأشرون لها تستعجل .. لكن طلال ماقال شي كان جالس على كرسي بجنب الباب ... أشرت لهم يصبرون والتفتت على المحاسب
ندى ::/ لو سمحت بتطول المسألة ؟؟؟ والا يالله بسرعة ..
ابتسم المحاسب ::/ معليش يا آنسة بس الظاهر البطاقة منتهية علشان كذا مو راضية تشتغل ... (( ومدها لها ))
خذت ندى البطاقة وشافت تاريخها ولقته منتهي يعني لازم تجددها .. تنهدت وطالعت المحاسب ..
ندى ::/ طيب معليش تترك الفستان عندك لربع ساعة وبعدين ارجع احاسبك ..
اعتذر منها المحاسب ::/ والله يا آنسة كان ودي .. لكن مثل ماتشوفين مو انا بس اللي اشتغل بالمحل .. وفترة الدوام انتهت ومن حق الموظفين يطلعون ...
تنهدت ندى وبتوسل اخير::/ طيب تتركه عندك لبكرة الصباح وانا اجي آخذه ..
ابتسم لها المحاسب ::/ إذا كذا ولا يهمك ... بس ترى لازم تجين الصباح بدري ولو تأخرتي بضطر أعرضه ...
ابتسمت له ندى مبسوطة ::/ لا خلاص انا بكرة الصباح بكون عندك ... مشكور
مشت ندى عنه وهي ترجع البوك في الشنطة .. الكل يطالعها مستغرب وين الفستان ووش يسوي بالمحل وليش ماخذته ؟؟
وقفت ندى قدامهم ::/ يالله نروح ؟؟
وقف طلال وتقدمت ريم لندى::/ والفستان ؟؟ بينام هنا ؟؟
ابتسمت ندى ::/ لا بكرة راح اجي آخذه من عندهم ؟؟
ريم ::/ وليش مو الحين ؟؟ خلاص مادام لقيتيه خلصي عمرك وخذيه ؟؟
انحرجت ندى وساسرت ريم ::/ بطاقتي منتهية وما معي كاش ؟؟ خلاص عاد هوينا
شهقت ريم وهي تضحك ::/ قسم بالله بايخة الحين علشان هالخرابيط بتتركين الفستان ؟؟
طالعتهم سحر اللي كانت تعلق مع طلال ::/ وش فيكم ؟؟ وش خرابيطه ؟
تخصرت ريم بعصبية ::/ الأخت بطاقتها منتهية وماخذت الفستان وقايلة للمحل بتجي تآخذه منهم بكرة وكأنها مقطوعة من شجرة ولا كأن احد معها ؟؟
قربت لها سحر وهي تحوس بشنطتها وطلّعت بوكها ::/ خذي وروحي حاسبي .. يالله لا تبطين
انحرجت ندى زيادة ::/ لا خلاص سحورة بكرة بجي انا وزياد وآخذه ؟؟
عصبت سحر ومسكتها مع يدها ::/ أقول لك امسكي وإذا جاء بكرة ردي لي الفلوس .انا ماراح أطير لكن الفستان ماراح يقعد لك ..؟
تنهدت ندى مقتنعة وخذت بوك سحر والتفتت بترجع تحاسب عن الفستان .. لكنها تفاجئت لما شافت طلال واقف هناك وكأنه ينتظر شي ...
التفتوا كلهم لما فقدوا طلال ولقوه في نفس مكان ندى الأول استغربوا وش يسوي هناك ؟؟؟
لكن لما شافوه يبتسم ويسلم على المحاسب ويآخذ الكيس فهموا وش سوى ...
قرب لهم وهو مبتسم ومد الكيس لندى وكان واضح عليه الإرتباك ... ندى من الإحراج ماعرفت وش تسوي .. وما مدت يدها .. استغرب طلال منها وخاف لاتكون عصبت ..
طلال ابتسم::/ مو هذا الفستان اللي تبينه ؟؟ ترى حاسبت عليه وبس عاد انتي تأكدي ؟؟
تشجعت ندى وردت بتلعثم::/ ليه سويت كذا ؟؟ انا ... انا كنت بروح احاسب ..
ابتسم لها طلال ::/ الحين حاسبت وخلصت خذي الكيس عاد ويالله لا نتأخر ..
ندى ::/ بس ......
مد لها الكيس بقوة ::/ لا تسوين بيني وبينك رسميات .....
طالعت سحر ريم وضحكت على شكلهم .. اما ريم فتقدمت وسحبت الكيس من يد طلال وحطته بيد ندى ::/ خلاص ياختي خذيه ... احد يحصل له واحد يدفع عنه ويرفض ؟؟
ابتسمت ندى مرتبكة ومحرجة وكل شي ... خذت نفس عميق ولحقت سحر وطلال اللي طلعوا ومشت ريم من وراها ........................!
ركبوا كلهم سيارة طلال لأن زياد مابعد وصل للمركز .. جلست سحر وندى في الخلف اما ريم ركبت قدام لكن وجهها على ورا ...
كانوا يسولفون ويعلقون على بعض اما ندى فكانت طول الوقت ساكتة وحاسة نفسها بتختنق من الحياء ... وتدعي في خاطرها على زياداللي حرقت تليفونه اتصالات علشان يسرع ...
رن جوالها في وسط الإزعاج وفرحت على بالها زياد لكن لما طالعت الشاشة شافتها عذا ...
تحطمت من داخلها لكن الشكوى على الله بترد ...
ندى مبتسمة ::/ السلام عليكم ...!!
عذا بصوت مبحوح ::/ مرحبا ...! ندى وينك ؟؟
خافت ندى من صوتها ::/ وش فيك ؟؟
سكتت عذا شوي وبعدين قالت بصوت واطي ::/ ما فيني شي بس انتي وين ؟؟
ندى ::/ انا في السوق مع البنات ؟؟
خنقتها العبرة عذا :/ من اللي مآخذك للسوق ؟؟
ندى ::/ زياد ..!! وش فيك تسألين وش صاير لك ..
رفعت عذا صوتها على قدها لأنها ماتعرف تصارخ ::/ حتى انتم ما احبكم واخوك هذا اضربيه وقولي له ما اطيقه واكرهه اكرهه اكرهه .. (( وسكرت الخط بوجه ندى))
طالعت ندى التليفون مستغربة من اللي صار .. وفي نفس الوقت بدت تقلق وش صاير لعذا وخلاها منهارة كذا ...؟ خذت نفس عميق ورن جوالها مباشرة .. رفعته واستبشرت لما شافت اسم زياد يأشر في الشاشة ..
رفعت السماعة وقال لها انه هو اللي وراهم ... استأذنت من الموجودين ونزلت بسرعة ومعها الكيس بيدها ... وطلال يراقبها بخفية مع المرايه الجانبية ويشوف ركضها لاخوها واللي يشوفها يقول كأنها مخطوفة ...! ابتسم وحرك سيارته ..
---------------------------------------------------------------------------
قبل لايوقف عند الباب ويطلعون اهله قرر يأخذ لفة على بيتهم علشان يتأكد انه مو موجود ... لف بالسيارة ثلاث مرات وما لقى شي . تنهد بنصف راحة واتصل على إيمان علشان يطلعون ...
أول ماشافهم مقبلين للسيارة اضطرب وزادت نبضات قلبه وبدت الفراشات تدغدغ معدته .. ماوده يكون الرفض هو جوابها ...
ركبت أمه ومن وراها أخته وسكروا الأبواب .. وفي الوقت وصل مسج لنواف .. ابتسم وفتحه ولقاه من عبدالعزيز مرسل له نكتة يروح فيها عن نفسه ..
ضحك لكن انتبه لما قالت له امه ::/ واللي يسلمك نواف اغلق تليفونك ترى صدع راسي من هالنغمة ؟؟؟
ضحكت إيمان ::/ معليش يمه تحملي هذي التكنولوجيا ..
ام نواف بغضب :/ الله لايوفقها من تنكلوجيا ..
ابتسم نواف وهو يحب يد امه ::/ وش فيها ام نواف معصبة على الجميع .. حتى التنكلوجيا ما سلمت منها ؟
ام نواف ::/ صدق والله من دخلنا وبنت عمك كل دقيقة ويرن جوالها ..!صدعتني.!
نغزه نواف قلبه ::/ أي وحده فيهم ؟؟
ام نواف ::/ عبير الكبيرة الله يخلف ..!!
ابتسمت إيمان لما تذكرت احراجها ::/ يمه ترى شكلهم كانوا مشغولين .. لأني اسمع عبير تكلم في الجوال وتقول معليش ماقدرت اطلع لأن بيت عمي موجودين ؟؟عاد يمكن هالرسائل اللي توصلها بهالخصوص ..!
بلع نواف ريقه وزادت نبضات قلبه ،، لكن ردت ام نواف ::/ والله عاد انا كنت متصلة على امهم وماقالت عندنا شي ؟؟ عاد لو عندهم أكيد بتقول ..
حاول نواف يربط المواضيع ::/ طيب كلمتوهم عن موضوعي ..
نطت ام نواف ::/ بسم الله علي الرحمن الرحيم .. ما امداني أقولها الكلمة الا وعصبت وقالت لا مستحيل انا الزواج ما افكر فيه الحين ..
شد نواف مسكته على المقود ::/ كان قلتوا لها ملكة بس ...
إيمان ::/ إيه أمي قالت لها كذا و قالت انها الحين ما تفكر في شي أبد غير دراستها وانها تقوم بأهلها .. وعقب ما تتخرج وتتوظف بتفكر إما توافق والا لا ؟؟
عصب نواف من قلبه ::/ هي ليه ماتقول ما ابي ولدكم وترتاح ؟
انصدمت ام نواف ::/ يمه لاتقول هالكلام .. ترى باين عليها انها ماعارضت زواجها منك بس كلامهم منطقي يقولون من وين بيصرف على عائلة وهو مابعد توظف وتوه ما تخرج ..
تنهد نواف ::/ الوظيفة مضمونة ان شاء الله .. بس انتم خلوها توافق .؟
إيمان باندفاع ::/ خلاص نواف ترى مو كل مرة بنقول لها نبي الملكة ؟؟ إن كنت تبغاها صدق فانتظر لحد ماتنتهي دراستها وعقب ما يكون لهم حجة وإذا رفضتك ساعتها يعني انها ماتبيك ...!!
سكت نواف متأثر من كلام إيمان واندفاعها .. حس انه فعلا أحرج امه و اخته مع بيت عمه .. بس مهما يكون لازم يحسون اني ابيها وابغى احميها وتكون تحت نظري اعرف دخلاتها وطلعاتها .. وتدري ان وراها رقيب مو نترك لها الحبل على الغارب ...
سكتوا شوي وما عاد تكلموا في أي موضوع ... لكن نواف تذكر سالفة المكالمة اللي أشغلته وعلى طول وجه سؤاله لإيمان ::/ ماعرفتي من كانت تكلم عبير؟؟
انتبهت له إيمان ::/ لا والله ماسمعتها تقول أسماء؟؟
نواف ::/ طيب وش سمعتي غير هالكلمتين ؟؟
إيمان بدون اهتمام ::/ قالت ان الساعة 12 اوكي .. بس عاد وش عندهم مدري .. حتى ولا احد جاب لي سيرة عن طلعة والا ان حنا عطلناهم عن شغلة مهمة ...
سكت نواف وهو حاس بالغصة في حلقه ،،، حتى لو قال انه مايشك فيها بس فيه شي في خاطره هي بيدها زرعته ؟؟؟ والا ليش تدخل مع الباب الخلفي لبيتهم بسرعة وتتلفت لا تشوف احد ... بلع ريقه بصعوبة وزاد سرعة سيارته علشان يمديه ينزل اهله ويرجع لبيت عمه يشوف وش سالفة الساعة 12 ...................................؟!!
-----------------------------------------------------------------------------
ركبت السيارة بسرعة وسكرت الباب وراها .. خذت نفس عميق وحاولت تضم يديها ببعض علشان تخف الرجفة ... استغربها زياد ..
زياد ::/ وش فيك ؟؟
التفتت له ندى بنظرات غضب وطلعت بوكها وخذت منه البطاقة ومدتها لزياد ::/ خذ.................!!
مسكها زياد مستغرب ::/ وش أسوي فيها ؟؟
ندى ::/ وش اللي وش تسوي فيها .. انتهت صلاحيتها رح جب لي وحده جديدة ..
زياد ::/ أكيد وصلتك بالبريد .. ما شيكتي عليه ؟؟
ندى ::/ ما شفتهم عطوني شي .. ولا شفتك قلت لي شي ؟؟
حرك زياد سيارته ::/ اسألي الخدامات اكيد ان السواقين جابوها والا المزارع ..!
رمى زياد البطاقة في درج السيارة .. وسكت عنها وهي سكتت بعد .. لكن هو انتبه لعمره والتفت لها ::/ أجل وشلون شريتي فستانك ؟؟ والا مالقيتي شي ؟؟
طالعته ندى بنظرة احراج ::/ طلال هو اللي حاسب عني ؟؟
رجع زياد يطالع الشارع :/ زين يعطيه العافية ... انا الحين اسحب واردهم له ..
ندى بغضب ::/ والا يعني مانويت تسوي كذا ؟
زياد مستغرب ::/ وش فيك معصبة طيب ؟؟
تأففت ندى ::/ اففف مافيني شي ... (( حطت يديها على أطراف راسها )) احس اني مصدعة شوي ..!
زياد ::/ هدي عمرك طيب .. الصداع مايبي توتر ..
طلعت ندى جوالها ::/ وشلون مايبي توتر والتوتر يجي من نفسه .. (( واتصلت ))
هذي بنت عمتك بعد زادت الطين بله ؟؟ متصله تصيح وتهاوش مدري وش فيها ؟؟
التفت زياد بانتباه ::/ من هي ؟؟
ندى ::/ من غيرها يعني اللي صياحها كثير ؟؟
زياد يبتسم ::/ أكيد مسوين لها شي ؟؟ مستحيل تصيح كذا ..
ماردت عليه ندى لأن عذا رفعت السماعة لكنها ساكتة وما تسمع ندى الا صوت شهقاتها الخفيفة ...
ندى ::/ الحين وش فيك ؟؟ بتقولين لي وش صاير والا اجيك الحين ؟؟
عذا ::/ لا لاتجين ماله لزوم ..
ندى ::/ طيب وش بلاك ؟؟
عذا ::/ تخيلي اني في البيت بروحي وماعندي أحد كلهم رايحين ؟؟ (( وبدت تصيح ))
ندى مبتسمة ::/ طيب وش فيها ؟؟
عذا ::/ انتي عارفة عقدتي الخوف ما احب اجلس في البيت بروحي أخاف ؟
ندى ::/ وين ميري عنك ؟
عذا ::/ ميري نايمة في غرفتها .. وانا قافلة على نفسي الباب ..
تنهدت ندى ::/ طيب وين عمتي والبنات ؟؟
عذا ::/ مافيه احد امي واخواتي رايحين يحضرون زواج .. (( وزادت شهقاتها )) وكنت متفـ ـ ـ متفقة مع أسـ ـ ـ أسامة اننا نطلع مشوار وقال لي اذا راحت امي اتصلي علي .. ولما اتصلت عليه تو قال لي مو فاضي يرجع للبيت لأنه بعيد مرة ... يعني كذب علي وخلاني اجلس مااروح معهم وهو ما جاء ...
ندى مستغربة ::/ وعبدالله وينه ؟؟
عذا ::/ انتي وين عايشة ...؟ عبدالله رايح مع ابوي لجدة بس هو نزل لمكة يآخذ عمرة ..!
أشر زياد لندى علشان توطي صوتها شوي لأن وصله اتصال ..
وطت ندى وهي تقول ::/ طيب سمي بسم الله وانزلي للصالة وشغلي التلفزيون لحد مايجون والا اتصلي على امك وقولي لها مقلب اسامة ؟؟
سمعت عذا ضحك زياد وظنت ان البنات راكبين معهم وهو فالّها معهم فزاد غضبها ::/ايه معليش اضحكوا واستانسوا وخلي اخوك ينبسط ويضحك مع اللي معك ولا يحتاجـ ـ ـ قطعت كلامها واكتفت لما قالت :/ .. عموما مشكورة على اتصالك ندوش خففتي من خوفي شوي ..؟
ابتسمت ندى بتعجب ::/ عادي نسوي 911
عذا بسرعة ::/ مع السلامة ..
سكرت عذا حتى قبل لاتسمع رد ندى ... استغربت ندى تصرفاتها واللي سوته .. وكلامها عن زياد ..!
سكتت شوي وهي تقلب الجوال بيدها وتفكر تتصل بعمتها وتقول لها عن كل شي ...!!
سكر زياد التليفون وانتبه لسرحان ندى .. ابتسم وهو يأشر بيده قدامها ::/ وين وصلتي ؟؟ وش قالت لك ؟؟
التفتت له ندى ::/ معصبة بالحيـــــــــل ،،، وتصيح ؟؟؟
لف لها زياد وشي تحرك بداخله ::/ وش فيها ؟؟؟ وش مسوين فيها هالمرة ؟؟
ضحكت ندى ::/ وش اللي يخليك متأكد انهم مسوين لها شي ؟
زياد ::/ أكيد هي ما تنهار وتتصل عليك إلا أحد مسوي لها شي ...!!
ندى ::/ ايه بس لاتنكر انها هي بعد دلوعة..!!
طالعها زياد بنظرات حلوة ونبرة دافية ::/ حســــــــــــاسة ... وقلبها رهيف ..!!
ابتسمت ندى وهي تهز راسها ما تقدر تعارضه ..!!::/عمتي والبنات طالعين وأسامة كان مواعدها يوديها مشوار بس الظاهر كان يلعب عليها او انه صار له ظرف وما قدر يجي ..!!
تنهد زياد ::/ ما بيذبحها الا هالأسامة ...!!
ترددت ندى شوي وبعدين قالت :/ شايلة في خاطرها عليك . مدري وش سامعة عنك والا منك ؟؟ (( وطالعته تستفهم ))
التفت عليها زياد مستغرب ويأشر على نفسه ::/ من أنا ؟؟؟ ليش وش قالت لك ؟؟؟
ندى ::/ تقول خلي اخوك ينبسط ويضحك عاد مادري وش دخلك في السالفة؟؟
ابتسم زياد ::/ ليش سمعتني تو وانا اضحك ؟؟
ابتسمت ندى ::/ لا من زمان .. اول ماكلمتني في سيارة طلال وسألتني وين انا فيه ومن معي وقلت لها انك موديني قالت لي أكرهه وما أطيقه وإذا شفتيه اضربيه ؟
استغرب زياد وحس بضيقة ::/ ليه طيب .. وش شافت مني ؟؟
سكتت ندى شوي وقالت بنبرة استفهام ::/ تعـــــــــــــال ............!!لاتحسب ان الضحك اللي سمعته والهيصة الي كانت بالسيارة انك انت اللي معنا ؟؟؟ ترى تسويها والله ؟ وعلشان كذا عصبت ؟؟؟ وتو سمعت ضحكك وعلى بالها ان البنات معي في السيارة ؟؟؟
ضحك زياد من خاطره و في نفس الوقت حس بالسعادة ولأول مرة تغمر قلبه كله ... حس انها غارت عليه .. وإذا انها تغير عليه يعني تحبه ؟؟؟
زياد ::/ زين اتصلي عليها قولي لها تتجهز ونمرها الحين ..
التفتت ندى معصبة ::/ نعم ؟؟؟ تبغانا نروح بيت عمتي ونرجع مرة ثانية لهم ؟؟
زياد ببرود ::/ ايه وش فيها عادي ؟؟
ندى ::/زيييييييييييياد ..!! شوف الساعة كم ؟؟ وعلى بال ما نروح لها ونآخذها ونرجع لهم يصيرون خلصوا عشاء ؟؟ لا وبعد المطعم بيسكر ..
زياد وكأنه ما يسمع ::/ معليش بنقول لهم مشكورين واروح انا وانتم لأحسن مطعم بالرياض ونتعشى سوا وانا بعزمكم ..!!... يالله اتصلي علشان تتجهز ولا تأخرنا قدام البيت ..؟؟
زفرت ندى بقهر وطلعت جوالها بتتصل على عذا ... ياربي منها والله العظيم انها تقهر .. اصلا انا وش لقفني اقول له عن اللي صار ...؟
ردت عذا وصوتها باين عليه الصياح ::/ مرحبا ؟؟
ندى ::/ اسمعي تجهزي الحين بنمرك ونطلع نتعشاء ..
عذا ورجعت تصيح ::/ ومن قال لك اني ابغى عشاء ؟؟؟
ندى بقلة صبر::/ عذا عن الدلع عاد .. ويالله قومي تجهزي ترى احنا قريبين من بيتكم ؟؟
عذا وهي معصبة ::/ ارجعوا مكان ماجيتوا .. انا ماراح اطلع معكم ولا راح اتعشى أصلا ... وابعتكف في غرفتي هذي لحد ما أموت وبكيفكم مشكورين لا أحد يفكر فيني أبد .. لاأنتم ولا أمي ولا أهلي ...!!
وسكرت السماعة بوجهها ... تنهدت ندى من تصرفها ورجعت جوالها بشنطتها ,, وبعصبية التفتت لزياد ::/ احلف لك أنها مريضة نفسية ؟؟ مستحيل هذي تصرفات انسانة سوية ..
طالعها زياد بحاجب مرفوع وغضب يشع من عيونه ::/ نـــــــــــــدى ؟؟ برضاي عليك لا تتكلمين بمثل هالخرابيط قدامي ... لو سمحتي ثمني الكلمة اللي تطلع منك و أوزنيها قبل لا تجرحين احد فيها ..
تنهدت ندى بقهر و بللت ريقها الناشف ::/ ما تبي تجي معنا .. وتقول ماتبي عشاء اصلا ..
زياد ::/ وليش ؟؟
ندى اللي كأنها تذكرت شي ناسيته ::/ يا حليلك لازم أمها تراضيها ... والا ابوها .. ماتجي بالساهل ...
سكت زياد وتنفس بعمق وهو يطالع في السيارات قدامه ويحس بقلبه يدق من القلق عليها .... أما ندى فسكتت لأنه بالها مشغول بشي ثاني ... كان ودها تقول اللي يدور بخاطرها بس تخاف يقول عنها تصطاد في المويه العكرة .. وبعد ما حست انهم قربوا للمطعم .. وانها بتنزل عنه ويخلى له الجو للتفكير .. على طول قالت .
ندى وهي منزلة راسها وتلعب باصابع يديها ::/ زياد ...!!
رد من دون نفس ::/ هممممممم
ندى ::/ هل تحس انها تناسبك كزوجة .. او تصلح انها تكون أم لأطفال ؟؟
سكت زياد هالمرة ومارد عليها ... استانست ندى وحست انها وصلت للي تبيه ..
ندى ::/ زياد انت مو ناقص احد يجي ويتدلع عليك ؟؟ انت بعد من حقك تعيش الدلال والحنان اللي ماقصرت علي فيه .. واظن جاء دورك انك تلقى اللي تريحك مو اللي تتعبك زيادة ؟؟؟
لف لها زياد كله وبعصبية اربكتها ::/ قصدك هي اللي بتتعبني ؟؟ يعني يا زياد لا تتزوجها ؟؟؟
ندى بلعت ريقها ::/ انا ماقلت شي ؟؟ انا اقول رأيي بس ؟؟
زياد وهو يبركن سيارته::/ مشكورة أنا راضي بدلعها علي ..و رايك على العين والراس بس لو سمحتي لاعاد تذكرينه قدامي ..!!
طالعها وكأنه يأمرها تنزل . وفعلا هذا اللي سوته سحبت شنطتها ونزلت وسكرت الباب وراها بقوة .. حست بتأنيب الضمير لأن أخوها ممكن يفكر فيها انها ماتبي الشي اللي يحبه .. اما زياد فنزل من السيارة وهو مبتسم بتصنع قفلها ومشى رايح لطلال ...!
------------------------------------------------------------------------------

اول مانزلوا اهله من السيارة حركها بسرعة راجع لبيت عمه .. استغربوا امه واخته تصرفه .. لكنهم ماحطوا ببالهم ودخلوا .. أما هو فكانت الشياطين الزرق تتنطط قدام عيونه .. وألف فكرة وفكرة جت بباله ... خلاص صار ما عاد يشوف شي من ضباب الغضب اللي اعمى عيونه .. كل اللي يشوفه الطريق الي يوديه لبيت عمه ...
أول ما دخل الحارة حاول يوقف سيارته شوي علشان يهدي اعصابه ويتماسك .. يخاف لا يشوف شي مريع ويتهور وتصير فضيحة بهالليل ...
رجع راسه وسنده على المقعد وهو أعصابه فلتانة .. خلاص يحس ما بينه وبين الجنون الا شعره ... كان عنده رغبة قوية في البكاء من الصدمة لكن كان يصبر نفسه ويقاوم هالرغبة الطفولية ... كل شوي يبلع غصته اللي نشبت بحلقه وسدت مجرى التنفس ...
تأوه بتنهيدة ألم وعذاب قطع قلبه من شاف هذاك المشهد ... ومن مجرد التفكير أن بنت عمه وحب حياته اللي كان ناوي انها تكون سيدته ممكن تكون بهالأخلاقيات الدنيئة ... ومن البنات اللي يتآكلون بالساهل ...
حرك سيارته بعد ما طالع الساعة ... ومشى متوجه لبيتهم ... ما اقدر اوصف مشاعر الرهبة والخوف اللي تملكته .. كل اللي اقدر اقوله انه كان خايف وايديه ترتجف وتعرق ... كانت شفايفه تتحرك وهو يدعي من اعماق قلبه أن مايصير شي من اللي توقعه ...
لف مع الباب الخلفي وشيك عالمكان بس الحمدلله مالقى شي ... طالع الساعة وشافها 12 تماما .. انفرجت اساريره نوعا ما .. وفرح من خاطره لأن اللي كان في باله مجرد شكوك وان بنت عمه أشرف من كذا ....
رغبة في داخله من الخوف خلته يوقف سيارته قدام براحة التراب اللي مواجهه هالباب ... وطفى انوار سيارته وقرر ينتظر لحد الـ 12 وربع وبعد مايطمن بيروح ..
طلع جواله يلعب فيه وكل شوي يرفع عيونه علشان يتأكد ...
رفع عينه للمرة الثانية لكن عقبها ماعاد قدر ينزلها ... حس بالموت يقرب منه .. وده ان ربي يآخذ روحه بس ما يشوف هالمشهد ...
دخلت السيارة الجاكوار الفضية للحارة .. ووقفت بعيد شوي عن الباب الخلفي ... والأنوار نفس الشي مطفية .. وطلعت هي من باب البيت الخلفي وكانت تتلفت من جهة اليمين وبس ... ركبت السيارة على عجل وانطلقت فيها ...
عرفها وميزها ... وشلون مايعرف اللي قدرت تتملك كيانه ؟؟ فهموني وشلون مايميز الإنسانة اللي مايسوي شي بحياته الا ويفكر فيها ؟؟؟ لما كان يفكر بتخصصه في الجامعة كان يفكر بالوظيفة اللي ممكن يحصل عليها ولا زم تكون تواجه علشان هي ماتحس بالنقص؟؟؟ ماكان يقصر عليهم بشي كله علشان خاطرها .. تجريحها واهمالها كله متحمله على امل انه بيتزوجها ويخليها تحبه من حبه لها... هي اللي يعتبرها أغلى واحلى شي بحياته المرهقة والمتعبة ... هي الوحيدة اللي لما يحس نفسه تعبان والا الهموم مسيطرة عليه يفكر فيها ويفكر في شكل حياته اللي بتجمعه معها ...!!
من دون شعور رمى جواله على المقعد اللي جنبه وشغل سيارته وانطلق وراهم يتبعهم يشوف وين رايحين ؟؟ ووين هالسيارة مآخذتها له ؟
بدأ يتبعهم من بعيد لبعيد علشان ما يشكون فيه ... بس قلبه كان يتقطع في الدقيقة مليون مرة ؟؟ والغصة خطر لاتقتله بمجرد ما يفكر بالشي اللي قاعد يصير في السيارة اللي قدامه ... وش يكون وضع بنت عمه واللي معها ..!!
دخلت السيارة لحي راقي جداً ... عمره نواف ما فكر يسكن فيه او يشتري بيت هناك..
شاف السيارة تدخل بين الحواري بكل انسيابية وكأنها عارفة طريقها ومتمرسة عليه ..
وقفت السيارة قدام مدخل قصر فاره .. وكأنه طالع من الحكايات الخرافية ...
استغرب نواف تواجدها بهالمكان .. لكن لما شاف السيارة وطرى على باله اللي طرى عرف انه ممكن يكون من اصحاب هالبيوت .. وهذا اللي اغراها ؟؟؟ وسخ الدنيا ؟
انفتحت البوابة الأتوماتيكية ودخلت السيارة ومعها عبير ... اتسكرت البوابة من ورى السيارة .. واتسكرت ابواب الدنيا بوجه نواف ...
خلاص ماقدر يمسك نفسه أكثر نزل راسه على المقود ونزلت دمعته حــــــــــارة على خده ؟؟؟ رغبه قويه بداخله أمرته انه ينزل ويشوف وش فيها ؟؟ وش اللي قاعد يصير داخل ؟؟ لكن مسك نفسه ؟؟ هي بنفسها ركبت برضاها ؟؟ وهي اللي واعدته الساعة 12 ؟؟ وهي اللي كانت خايفة لاأحد يشوفها معه وكانت تتلفت من الخوف؟؟ لكن انا اللي مااعرف من اللي داخل ولا ادري يمكن اواجه الموت واهلي بحاجتي ؟؟؟ اهلي ألزم علي من امثال هالحثالة ...!!
مسح دمعته الوحيدة بظهر كفه .. دمعة رجال اللي ما تنزل الا على غالي ؟؟ مسح دمعته وهو يحرك سيارته مبتعد عن هالوباء ... رايح للمجهول مايدري وش الدنيا مخبيت له في ثناياها أكبر من كذا ؟؟؟

سكرت السماعة وهي تدعي في خاطرها ان الله ييسر أمر ولدها ويوفقه ويرزقه من حيث لا يحتسب ... حست بمشاعر حلوة في داخلها خلتها تصيح غصب .. عيالها كبروا وصارت تخطب لهم .. هذا عبدالله اللي أمس كانت تلعبه وتأكله كبر وصار رجال وبيتزوج .. وبيكون عنده عيال .. يعني بيصير أب ؟؟؟ و آآآآآآآآآآه ياسرع الدنيا الأيام تركض واحنا ماحسبنا حسابنا ... بلعت غصتها ومسحت دمعتها لماشافت الساعة قريب الأربع وهي ماصلت العصر ... قامت وهي تستغفر راحت للحمام تتمسح ورجعت لسجادتها بالصالة وبدت تصلي ... كانت في ركوعها وسجودها تدعي ربي من خاطرها انه يوفق عيالها كلهم ويرزقهم باللي يسرهم ولايضرهم ..
سلمت منتهية من الصلاة , وقبل ماتقوم من مصلاها نزل هو على رأسها وحبها .
عبدالله ::/ الله يتقبل منك يالغالية ..
رفعت ام عبدالله راسها فرحانة ::/ هلا والله وغلا .. اسفرت وانورت .. منا ومنك حبيبي وانت بعد عمرة مقبولة ان شاءالله ..
عبدالله يبتسم::/ منا ومنك ..
مسك عبدالله يد أمه وهي تقوم .. ومشى معها وجلسوا على الكنب ،، خذوا سلامات بعض وتنشدوا عن الأحوال .. لكن عقدت ام عبدالله حواجبها مستغربة ::/ وين أبوك مارجع معك ؟؟
تلفت عبدالله حوله ::/ إلا جاي معي بس مادري وين راح ؟؟
دخل عليهم ابو عبدالله وبيده قطوة بيضاء وشكلها كيوت .. ودخلت وراه سارة ..
بان الضيق بوجه ام عبدالله والتفتت لولدها ::/ كنت متوقعة ..!! صاروا أهم عنده منا ؟
حاول عبدالله يكتم ضحكته ::/ كنت عارف بس ماودي اجرحك ؟؟
قامت ام عبدالله تسلم على زوجها وهو بيده القطوة .. انتبه لها و عرف انها معصبة من حركته .. مد القطوة لسارة ومد يده لها بس شافها متقززة من لمسته .. وعلشان يهبل فيها زود قربها منه وحط يده على كتوفها وقربها منه ,, ام عبدالله كنت مستحية من حركته وفي نفس الوقت منقرفة لأن القطوة تو كانت بيده وهي ما تحب القطاوة كثير ...
ضحكوا العيال على امهم وأبوهم .. أما عبدالله فكانت حمرة الخجل كاسية خدوده من تصرف أبوه بعكس سارة اللي كانت تعلق وما همها أحد ..
شال ابو عبدالله القطوة من عند سارة وراح يجلس على الكنب ...
حاولت ام عبدالله ماتكون جنبه وراعى ابو عبدالله هالشي .. فجلست سارة قريب منه ..
تلفت حوله وانتبه لغيابهم ..
ابو عبدالله::/ وين العيال اجل ؟
سارة ::/ عذا فوق الحين بتنزل وأسامة نايم ؟؟
دخلت عليهم عذا بهالوقت وهي من قلبها فرحانة بشوفتهم .. لكن وجهها مصفر وشاحب وملامحها متغيرة وكأنها وحده تعبانة ...
خاف عليها ابوها ما يدري وش صار عليها لكن لما قربت منه .. تقززت ووقفت بعيد وبان في نظراتها الخوف .. استغرب ابوها من ردة فعلها لكن بعدين ضحك وانتبه انها ابتعدت بسبب القطوة .. نزلها للأرض وهو يقول ::/ يالله عاد تعالي سلمي ؟؟
صرخت عذا لما تحركت القطوة ::/ يبــــــــــــــــــــه ,, أبعدها الله يخليك ؟؟
ام عبدالله بخوف ::/ شلها تكفى لاتطيح علينا مرة ثانية ؟؟
ركض عبدالله وخذها قبل لاتوصل لعذا .. وراحت عذا رمت نفسها بحضن ابوها وسلمت عليه وعلى اخوها ... وهي مبسوطة ومستانسه مو القطوة عند سارة اجل خلاص هي مرتاحة وخصوصا ان ابوها موجود ..
ابو عبدالله وهو ماسك لحية عذا بيده ::/ وش فيه وجهك شاحب ؟؟
نزلت راسها وردت ام عبدالله ::/ هاوشها الله يخليك ..!! ترى من يومين رايحين للمستشفى ... يقولون فيها انخفاض في الضغط وفقر دم ..
طالعها ابو عبدالله بعتب ::/ وليش كل هذا ؟؟
ام عبدالله ::/ ماكانت تآكل حابسة نفسها بالغرفة ومضربة عن الأكل يوم كامل ..
شرحوا له كل اللي صار .. بس مثل العادة دافعت ام عبدالله عن اسامة .... وهو فعلا كان عنده ظرف منعه يجي لها ...
ابو عبدالله بعصبية::/ هالولد يبي له احد يأدبه .,
عذا بخوف من لهجة ابوها الأكيدة ::/ لايبه معليش انا مسامحته .. حرام ماكان يقصد ..
ابتسم لها ابوها ورجعوا لسوالفهم لحد مادخلت عليهم لمياء اللي كانت عارفة بوصول ابوها من السفر اليوم .. بدوا يسولفون ويتناقشون في امورهم ..
لحد ما فتحت ام عبدالله السالفة وهي تطالع عبدالله :::/ ترى كلمت الجماعة اليوم (( وابتسمت ))
استحى عبدالله وماعرف وش يرد لكن ابو عبدالله قال ::/ ووش رأيهم ؟؟
ام عبدالله ::/ في البداية ماعارضوا ... بس يقولون بيشاورون البنت وابوها وبيردون لنا خبر ..
لمياء ::/ قلتي لهم اننا مستعجلين علشان يتملكون قبل لايسافر عبدالله ؟
حست ام عبدالله بغصة والتفتت لعبدالله ::/ متى تخلص اجازتك ؟؟
تنهد عبدالله ::/ باقي لي 3 أسابيع ,,
ابتسمت ام عبدالله ::/ زين يمديهم يردون علينا خلال هالفترة ...
ابو عبدالله وهو قايم ::/ الله يقدم اللي فيه الخير ...
طلع من الصالة وركب الدرج .. ولحقته ام عبدالله علشان تشوفه لايكون يحتاج شي وعلشان تساعده ،،،،
طلعوا لغرفتهم واول مادخل ابو عبدالله رمى غترته على الكرسي وتمدد هو على السرير ويده على جبهته وعيونه للسقف ..
دخلت عليه الجوهرة مبتسمة وسكرت الباب وراها .. مشت تآخذ غترته وهي تقول ::/ اللي مآخذ عقلك يتهنى فيه ؟؟
محمد مبتسم ::/ آآآآميــــن إن شاء الله ..!!
ام عبدالله ::/ ماقلت وش صار على الشحن والبضاعة ..؟
تنهد محمد ::/ كل شي تمام .. سلمتهم الدفعة الأولى من الفلوس والباقي بسلمه لهم يوم الشحن ...
الجوهرة وهي تجلس قريبة منه ::/ ومتى الشحن ؟؟
محمد وهو يتعدل بجلسته ::/ وقعت العقد ..وبعدين هم بيتصلون علي يبلغوني متى بتوصل (( وابتسم ))
مسكت يده الجوهرة بخوف ::/ الله يوفقك ولا يضيع تعبك ..!
حب يدها بحنان وهو يأمن ..وفي قلبه قلق ما يدري وش سببه .. لكن متعبه ومعكر عليه نومه ...

..................................................
ذرعت الغرفة روحه وجية .. قلقة وتفكر وماتدري وش تسوي ؟؟ أريج السخيفة رافضة تتصل قال إيش قال مستحية ؟؟ وهي بعد نفس الشي مستحية لكن هي لها اسبابها ؟؟؟ تستحي تتصل عليه تقول له يوديها وهي من فترة رافضة الملكة .. وعارفة في قرارت نفسها انه أخذ الموضوع بحساسية ...
فزت لما دق الباب عليها وقالت ::/ ميــن ؟؟
جاها صوت امها ::/ انا حبيبتي افتحي ؟؟
قامت عبير وهي تسحب رجولها على الأرض وفتحت لأمها .. شافتها مبتسمة وواقفة تطالعها .. استغربت عبير وقفت امها ..
عبير ::/ وش بغيتي يمه ؟؟
ام راكان ::/ الظاهر انك نسيتي موعدي اليوم ؟؟
بلعت عبير ريقها ::/ يمه انا انسى روحي ولاأنسى مواعيدك يالغالية (( وحضنتها))
ابتسمت لها ام راكان ::/ طيب يالله مو ناوية نطلع . الساعة خمس وانا موعدي قريب الست ؟؟؟ يالله يمدينا نوصل ؟؟
بعدت عبير عن امها ::/ إن شاء الله دقايق ونازلة ..
مشت ام عبير وهي تدعي لبنتها بالتوفيق والصحة .. وعبير تراقب امها وما تشوف غير ظهرها .. حست انها انانية وتفكر بنفسها .. أجل رافضة تتصل ومخربة موعد امها في المستشفى لأنها تخاف من ردة فعله ؟؟؟ أصلا هو اللي عارض عليهم كل ما احتاجوا شي يطلبونه منه ولا يرجعون لأحد غيره ..
تشجعت ورجعت لغرفتها .. رفعت جوالها ولقت واصلها مسج .. عفست ملامحها وسفهت المرسل واتصلت على إيمان ...
كانت متوترة وتحس العرق يتصبب من جبينها .. ولما وصلها صوت إيمان كانت على وشك انها تسكر السماعة بوجهها لكن استحت وردت عليها ..
عبير بارتباك ::/ هلا والله إيمان .. وش اخبارك ؟؟
إيمان ::/ الحمدلله تمام انتم وش اخباركم ؟؟ واخبار أمك ؟
عبير وتمسد جبهتها :::/ إحنا الحمدلله بخير ..
سكتوا شوي وبعدين تكلمت عبير ::/ إيمان بصراحة عندي طلب لكن مستحية منك مادري وشلون أقول لك ؟؟
ابتسمت إيمان وشجعتها ::/ الحمدلله لا أسمعك تقولين هالكلام وش تستحين منه ؟؟
عبير::/ آآآ .. شوفي اليوم امي عندها موعد بوحدة السكر الساعة ست... ووو
قاطعتها إيمان وهي تطالع الساعة ::/ وليش توك تتصلين ؟؟ يالله مع السلامة خليني أشوفه هو وين علشان تلحقون على موعدكم ولا يفوتكم ؟؟
ابتسمت عبير بود ::/ مشكورة إيمان ... والله أني أحبك موت ..
إيمان مبتسمة وتعاتبها::/ ليتك تقولين هالكلام للي محتاجة .. مو لي انا ,, عموما يالله لا تعطليني خليني اتصل عليه اقول له ..
عبير ::/ زين مع السلامة ...
سكرت منها ورمت نفسها على السرير ترتاح .. وكأنه هم وانزاح من على قلبها ...
حمدت ربها انها ما نفذت فكرتها وخلت امها تتصل .. كان الحين انحرجت لأنهم بيفهمون غلط وانها هي ماعاد تبي تكلمهم وتكبر الحزازات بينهم ..

كوب الكاباتشينو قدامه بارد وهو ما شرب منه ولا قطرة ... كل شوي يتنهد وإلا يغمض عيونه ويمسد جبهته .. باين عليه أن في قلبه جبل كبير من الهموم مضيق عليه حتى تنفسه ... حاولوا معه قد مايقدرون انه يتكلم لكن هو ساكت ومانطق بحرف ... كل ما سألوه قال لهم سلامتكم ...
المسكين ضاقت به الدنيا وهي وسيعة ... ما ينلام وهو اللي في غمضة عين ضاع كل شي من يده ... ضاع حلمه في أحلى حياة تخيلها مع الإنسانة اللي حبها من كل قلبه واخلص لها في كل شي حتى التفكير .. لكن هي للأسف قابلته بالخيانة والجحود ... حتى ما جبرت خاطره ووافقت على الملكة .. لاعاندت وركبت راسها ورفضت بشتى الطرق .. معلوم عندها اللي يغنيها عني وعن خدماتي .. واحد تاجر وهامور وعنده فلوس وسيارات .. وش تبي بواحد منتف مايضمن حتى عشاه ...
نبهه صوت تيلفونه يرن .. طالع الشاشة وعرف انها ايمان .. استأذن من اللي معه وقام يرد عليها .. لعل وعسى تكون جابت له خبر حلو ..
نواف ::/مرحبا ..
إيمان ::/ هلا والله بهالصوت ..
ابتسم نواف بتعب ::/ هلا بك .. وش عندك تدلعيني ؟؟
إيمان ::/ أول شي انت بعيد والا قريب؟؟
تنهد نواف ::/ اخلصي قولي اللي تبين ولا عليك مني قريب والا بعيد ؟
إيمان ::/ لا لازم تكون قريب لأن مرت عمي موعدها الساعة ست يعني لازم تجي الحين توديها ؟؟
تحرك شي في قلب نواف ورجعت له كل الأمور اللي يحاول يتناسها بمجرد ما أنذكر بيت عمه .. بلع غصته عن لا يتهدج صوته من الألم قدام اخته .. وانتبه عليها .
إيمان ::/ نواف وينك ؟؟
نواف بعصبية ::/ انا هنا .. وقولي لبنت عمك انا ما اشتغل سواق عندها وعند امها ؟؟؟ إذا جت وقت الحاجة تذكروني ؟؟ لكن لما انا ابغى منهم شي يرفضون ويسوون من الحبة قبة ...؟
انصدمت ايمان ::/ نواف لاتخلط الأمور مع بعض ؟؟ وش دخل موعد هالحرمة المسكينة في ملكتك انت وعبير ؟؟
انفلتت اعصاب نواف اللي كان ماسكها بالقوة ::/ ذنبها انها ام عبير .. وهي اللي اهملتهم لحد ماضاعوا ولا افتكرت فيهم ولا شي .. معطيتها الخيط والمخيط ولا تسألها وين رايحة والا من وين جاية .. وقال إيش تثق فيها ..
قاطعته إيمان معصبة ::/ نــــــــــــواف انت وش قاعد تخربط ؟؟ وش تقصد بكلامك ؟؟؟ الحين كل هالحكي الشين عن البنت و أمها لأنهم ماوافقوا على ملكتك ؟؟؟ ولأنهم ماوافقوا طلعوا خربانات وبنات فساد ؟؟؟
تنهد نواف وهو ينتبه لنفسه ::/ استغفر الله العظيم .. زين قولي لهم اني جاي ..
وسكر الخط بوجه أخته حتى من دون مايقول مع السلامة ...
هذا اللي انا ناقصه زود على توتري وانفلات اعصابي تركب معي السيارة وانا عارف خباياها . وعارف بسواد وجهها اللي تسويه .. لكن محيره اللي سمعه وعرفه ...!
الله يستر مادري وش ممكن يصير .. والا وش ممكن اقول لها ؟؟
.
.
.
استغربت إيمان انفعال اخوها الغير متوقع لكنها علقته على شماعة انه مكتأب بسبب رفضهم للملكة ... تنهدت واتصلت على عبير تقولها يتجهزون لأنه بيمر عليهم الحين ..
زاد توتر عبير لما سكرت الخط من بنت عمها ...!! مادري وشلون بقابله وانا رافضة الملكة ؟؟؟ لا وشين وقواية عين أقوله ما ابغى اتملك الحين وارجع اتصل عليه اقول له ودني للمستشفى ...
ضغطت على نفسها علشان امها ,, كان بودها ان أريج تروح مكانها لكن هي عارفة أريج ما تدبر شي ولا تعرف وين راسها من كرياسها ,,
تعوذت من الشيطان وسألت ربها يعينها وقامت تتجهز علشان ما يتأخرون زيادة فوق ماهم متأخرين ....!

.................................................. .........
نزل وشكله مبهدل وباين على ملامحه انه توه صاحي من النوم ... ولولا امه كبت عليه مويه وعفسته كان ماقام ولا صلى العصر ...
جلس معهم في الصالة بعد ماسلم على عبدالله وكان طول الوقت ساكت وكأن الشياطين راكبته من راسه لرجليه ..
رن جوال عذا اللي كانت جالسة جنبه .. وفز هو من مكانه لأنه سرحان .. عصب عليها وحط حرة النوم فيها ..
أسامة ::/ أنتي وجوالك ... تشوفين والله لأكسره على راسك ...
خافت عذا ::/ وش سويت ؟؟ انت اللي قاعد تهوجس ومو حاس باللي حولك ..
سفهته وماسمعت رده لأنها ردت على تليفونها .. كانت ندى بنت خالها تقولها انهم وصلوا علشان يفتحون الباب ..
سكرت عذا والتفتت لعبدالله مبتسمة ..::/ عبادي عيال خالي عند الباب افتح لهم ..
وقف عبدالله وهو يتمغط::/ ماشاء الله امداهم يوصلون ؟؟
ضحكوا كلهم على ملامح وجهه وطلع عبدالله رايح للباب .. التفتت عذا على أسامة كانت بتقول له يطلع لأن ندى بتدخل لهم لكن لما شافته عاقد حواجبه خافت منه لايرفع صوته عليها وهي مو ناقصة ... بلعت ريقها والتفتت على لمياء وشافتها تبتسم ...
لمياء ::/ أخ أسامة مطول في القعدة ؟؟
أسامة من طرف خشمه ::/ لايكون جالس على راسك والا في بيتك ؟
لمياء ::/ لا والله في صالة أبوي .. لكن ندى جت ومو حلوة في حقك تقعد مع بنات ؟؟
تنهد أسامة وهو يطالع اخواته بحقد ..
ردت عليه سارة وهي عاقده حواجبها ::/ أقول وش ماسكك ؟؟ يالله قام نتضارب ؟؟
حاول أسامة يمسك ابتسامته وقام من عندهم طالع للمجلس الخارجي ..
نادته لمياء بتقهره ::/ بعد شوي ادخل خذ القهوة .. وخل عنك الكسل .. ما بقى شي على الدراسة ...
سكت أسامة ومارد عليها .. تقابل مع ندى في الممر وهي تمشي وبيدها علبة شوكولاتة كبيرة .. ابتسمت له من ورى الغطاة
ندى::/ السلام عليكم ؟؟ كيف حالك أسامة ؟؟
أسامة وهو مبتسم ومنزل عيونه::/ بخير الله يسلمك ..
رفع عينه وشاف الشوكولاتة اللي بيدها ...
أسامة ::/ يامال العافية هذا لي ؟؟ وراك مكلفة على عمرك .. كان قلتي لي واجيك عند الباب آخذها ..
ضحكت ندى :/ لا هذي لها مناسبتها .. بس لا تخاف بنرحمك ونعطيك منها ..
أسامة بخيبة ::/ ووش مناسبتها ..
مشت عنه ندى ::/ يوم بنفتحها بتعرف ؟؟ والا تدري أسأل زياد ...
ابتسم وتوجه للمجلس .. اما ندى فدخلت عند البنات اللي كانوا واقفين عند الباب ينتظرون وصولها للصالة ..
خذوها بالأحضان ..وسارة على طول هجمت على العلبة .. لكن لمياء مسكتها مع اذنها وأدبتها وغصبتها ترجعها لندى .. كانوا يمزحون مع بعض لكن بطريقة كوميدية حلوة خلت ندى تضحك من خاطرها ... فعلا اكتشفت ندى انها تستانس اكثر يوم تكون ببيت عمتها ...!! يمكن لأن عندها بنات في عمرها ويونسون ...؟
دخلوا كلهم وجلسوا في الصالة ونزلت ام عبدالله تسلم على عيال اخوها ..
ندى وهي تكلم البنات ::/ ليش ماحضرتوا زواج غادة ؟؟ والله اني كنت متوقعة انكم تجون ؟
سارة ::/ وش نسوي امي رفضت تروح قالت بتجلس مع عذا لأنها تعبانة ورافضة تجي معنا .. ولمياء ارتبطت مع اهل زوجها ؟؟ وانا مااعرف احضر بروحي ؟
لمياء :/ إلا وشلون كان الزواج ؟؟ حلو والا عادي ؟
ندى متحمسة ::/ الا والله كل شي كان مرتب وحلو .. حتى غادة طالعة تجنن بالمكياج والفستان ..
عذا ::/ انزفت والا لا ؟؟
ندى ::/ افا عليك غادة وماتبغينها تنزف ؟؟ انزفت وجلست على الكوشة وعرضوا لها صور وحوسة بس بصراحة تجنن ...
سارة ::/ صورتوا معها ؟؟
ندى ::/ اممممم لا هي ما صورناها لكن تصورنا احنا البنات علشان يكون ذكرى لزواج غادة ...
بعد فترة سمعوا أسامة يتنحنح وشكله بيدخل .. تغطت ندى ودخل أسامة وهو منزل عيونه .. لكن رفعها للمياء وهويسأل ..
أسامة ::/ خلصت القهوة ؟؟
قامت لمياء ::/ أكيد .. اصبر شوي اجيبها ..
نادتها ندى ::/ جيبي معك صحن فاضي علشان نحط لهم من الشوكولاتة ؟؟
أسامة بنقمة ::/ هب يا انتم ؟؟ حتى ما بتعطونا الصندوق نآكل منه ؟؟؟
سارة ::/والله لو على ابوي وعبادي وزياد معليش بنعطيهم واثقين فيهم وفي أخلاقهم الكريمة .. لكن بعض ناس يخوفون يمكن من الحقد يكبون الباقي في الزبالة بس أهم شي ماناكل ؟؟
رفع اأسامة حاجبه في غباء :/ ومن هم هالبعض ناس القاسيين ؟؟؟
طلعت لمياء في هاللحظة ::/ عارفين انفسهم مايحتاج نحرجهم ...
مدت له الصينية وراحت للصندوق وخذت منه كم قطعة شوكولاتة ورتبتها في الصحن وعطته إياه .. مشى شوي لكن بعدين التفتت لندى ..
أسامة ::/ إلا ماقلتي وش مناسبته ؟؟ أخوك يقول خلوها هي تعلمكم ؟؟
ندى مبتسمة ::/ زين .. أولا هذا بمناسبة سلامة عذا ... قلنا نجيبه لها تتغذى علشان يرتفع دمها ؟
سارة بنظرة تطنز::/ والشوكولا هي اللي بترفع دمها ..؟؟
لمياء تحاول ترقع ::/ عادي اللي يرفع السكر يرفع الدم ..
ضحكوا كلهم .. لكن اسامة قال ::/ وثانياً ؟؟؟
ندى مبتسمة::/ ثانياً الله يسلمكم اشترينا بيت جديد وبننتقل له خلاص ..؟؟
انصعقوا كلهم من هالخبر عم السكون لدقائق قبل لاتقول سارة ::/ يعني بتطلعون من بيت عمك ؟؟
ابتسمت ندى ::/ إيه خلاص بيصير بيتي وبيت زياد وبس ...
عذا فرحانة ::/ يعني عادي نجي نزوركم فيه مانستحي ؟؟
ردت ندى بخبث ::/ تزورونا ؟؟؟؟؟؟ من انتم ؟؟
غير أسامة الموضوع ::/ أخبارك بايته .. اخوك كل تو وهو يشرح لأبوي موقعه .. لكن مافهمنا شي والظاهر نبي نروح نشوفه ..
سارة بصراخ ::/ انـــــــــــــا معكم ..
عذا ::/ وأنـــــــــــــا بعد ؟؟ وش ناقصني مااروح ؟؟
لمياء بدهاء ::/ اخاف انتي الأولى .. واحنا التاليين ..
سارة تكمل ::/ و انتي الداخلة واحنا الطالعين ...
استحت عذا و احمرت خدودها وبدت تبلع ريقها بصعوبة ضحكوا عليها لكن نقزوا لما دخل عليهم أسامة فجأة .. وارتبكت ندى وتغطت بسرعة ..
اسامة وهو مبتسم بطريقة كرتونية ::/ أقول هالشوكولاتة بمناسبة سلامة عذا ؟؟
ابتسمت ندى ::/ إيه وعلشان تتأدب أنت بعد ؟؟
كشر اسامة وبعدين رجع يبتسم ::/ اجل كثروا منه .. لأنكم كل يوم بتجيبون علبه لسلامتها .. ( وطلع بسرعة ..))
صرخت عليه عذا بعصبيتها لما فهمت قصده ::/ أســــــــــــــــــــــــــــــــــــــــــــــــ امة ....!!
ضحكوا كلهم على خبال هالولد وعلى حساسية هالبنت ... وشافوها وشلون نزلت راسها بخوف وكأن ودها تصيح .. مما يعني انها صدقت كلامه .. وخافت من اللي بيسويه ؟؟؟
في المجلس كان زياد متحمس وهو يشرح لرجل عمته موقع البيت ومميزاته ... لحد ما أصر عليهم يجون يشوفونه ..
ابو عبدالله :/ بعيد عن بيت عمك ؟؟
زياد ::/ لالا وراء الحارة اللي حنا ساكنين فيها .. بس والله يا عمي يا أن هناك فيه بيوت زينة ما تتفوت .. ليتك تشتري لك واحد في هذاك الحي ,, وتترك عنك هالبيت القديم ؟؟ وهالحي البعيد عنا؟؟
ابتسم ابو عبدالله وهو يشرب شاهي ::/ لا .. انا وين وهذيك البيوت وين ؟؟ الله يخلي لنا بيتنا وحارتنا وجيراننا ..
ضحكوا العيال على أبو عبدالله .. ومثل العادة كانت الراحة النفسية تشع من عيون زياد اللي مبسوط من هالجلسة مثل كل مرة يجي فيها لبيت عمته ... يحس هنا بالألفة والحب يربطهم ... حتى وهو ولد خالهم بس يحس بهم يعتبرونه مثل أسامة وعبدالله و هذا إذا ماكان أغلى منهم ؟؟
زياد بحماس ::/ خلاص عقب العشاء نروح تشوفونه ؟؟
ابو عبدالله ::/ لا معليش اليوم مااقدر .. معزوم على العشاء وبطلع من أصلي ..!
أسامة ::/ خلاص نروح حنا...!! وانت تروح يوم ثاني مع زياد وتشوفه ؟؟
زياد وهو متحمس للفكرة ::/ رايك فيه السداد .. (( والتفت لعمته )) نروح بعمتي اليوم وبكرة اروح انا وعمي يشوفه .. وش قلتوا ..؟؟
استحت ام عبدالله ترد زياد وهي تشوفه متحمس وكأنه مالك الدنيا ::/ خلاص تبونا نروح رحنا ...
استانس زياد من ردها ::/ خلاص اجل عقب العشاء نطلع نمر على البيت تشوفونه .. وعقبها ننزل في مطعم اعشيكم بهالمناسبة ...
ابو عبدالله ::/ الحين يوم ما صرت معكم بتعشيهم ؟؟
استحى زياد لكن عقبت ام عبدالله علشان مايتفشل ::/ وش نسوي فيك انت اللي قبلت عزيمة الرجال وتركت عزيمة زياد ؟؟ (( وغمزت له ))
فهم لها ابو عبدالله وابتسم ::/ خلاص مسامحكم .. روحوا وانبسطوا بس خذوا البنات معكم ..
رد زياد بدون شعور ::/ أكيد بدون شك ...!!
ابتسموا له كلهم .. ورد عبدالله للتأكيد ::/ خلاص إذا بعد العشاء مباشرة نكون جاهزين ..
ورجعوا لقهوتهم وهم يسولفون في مواضيع كثيرة ومتشعبة واهمها السياسة .............!!

وصل لباب البيت وهو حاس بضيق تنفس.. مو طايق حتى يدخل حارتهم ؟؟ يحسها وسخة ويحس انها هي اللي قتلت احلى شي بحياته ...
تأخر شوي قبل لا يضرب الجرس كله علشان يضبط نفسه ويضبط انفعاله ...
وبعد دقائق تشجع ونزل من سيارته وهو يتلفت خايف لايشوف السيارة إياها داخلة للحارة والا شي ... قرب للباب ودق الجرس مرتين وبعدها رجع يركب بسيارته وهو متوتر حده ويحس بالمغص في قلبه .. ونفسه مضطرب وكل هالملامح باينه على وجهه المكشوف ...
طلعت له مرت عمه وبنتها بسرعة من اول ماسمعوا الجرس .. شاف عبير وهي ماسكة أمها بكل حنان وتنزلها مع الدرج .. خنقته الغصة وهو يشوف شكلها بالعباية وكانها ملاك في حرصها على اهلها واخواتها ... لكن للأسف صارت حنيتها وملائكيتها مجرد قناع تخدع فيه الناس .. ما حب يتمادى في تفكيره لأنه ما يبي يوصل لفكرة ان بنت عمه غرتها المظاهر وخلتها تنصاع لشهواتها من دون ماتعمل حساب لنفسها ومستقبلها أو للناس اللي يعزونها ....
انتبه لنفسه لما فتحت عبير الباب الأمامي علشان تركب أمها .. حاول نواف قد مايقدر انه يبتسم في وجه أم راكان ..
ام راكان بحنية ::/ معليش يمه متعبينك معنا وبمشاويرنا ...
بلع نواف غصته ::/ وش دعوى ياخالة .. أنا بحسبة راكان والا ؟؟
ام راكان والعبرة خانقتها من انطرى اسم ولدها ::/ والله انك في مقامه واعز بعد ..
نواف بقهر ::/ خلاص أجل لاتقولين هالكلام وانتي بحسبة أمي والبنات اخواتي وانا ملزوم فيكم ..
تفاجأت عبير اللي ركبت خلف أمها من كلام نواف .. ولأول مرة من عرفته يقول انها مثل اخته ... ابتسمت وعرفت انه متضايق من سالفة الملكة .. وفي خاطرها (( مصيره بيفهم ويعرف ،، إذا مو اليوم بكرة ))
كان السكوت والصمت يعج في المكان ما فيه أي صوت إلا المسجل ،، بالعادة نواف يكون مرح و يسولف ويعلق مع ام راكان .. لكن هالمرة ساكت وماتكلم بحرف ....؟ يخاف ينطق ومن بعدها تنهار أعصابه ويغلط عليهم والا يقول شي يتندم عليه بعدين ..
وصلوا للمستشفى ووقفوا عند المدخل الرئيسي ... طالعت عبير في وجه نواف لكن شافته ما طفى السيارة وشكله ماعنده نية ينزل يجيب لأمها كرسي متحرك مثل العادة .. علشان كذا استحت على دمها ونزلت تشوف لأمها كرسي .. دخلت مع الباب ونظرات نواف تتبعها بحزن ... التفتت عليه ام راكان مستغربته ..لكنها ماعلقت ولا قالت شي أبد لأنها هي بعد حست أن هالولد فيه شي ...
طلعت عبير وهي تدفع الكرسي قدامها ووقفته جنب باب أمها .. وبعدها فتحت الباب لأمها وساعدتها تنزل .. هذا كله ونواف مركز عيونه بعبير وكأنه مو مصدق اللي شافه من يومين .. كان على وشك انه يكذب عيونه ويصدق هالإنسانة اللي قدامه .. لكن في آخر لحظة تراجع وصد عنها .. شافها وهي تحاول تدفع الكرسي لكن مو قادرة لأن امها ثقيلة شوي وهي ما فيها حيل تدفعها .. تحركت مشاعره الحلوة ناحيتها واجبرته انه ينزل لها .. مهما كان هذي عبير ...!! ورجولته ماتسمح له يوقف يطالعهم ..!
نزل ووقف جنبها .. طالعته عبير وهي مستحية ::/ معليش ماقدرت ادفعها .. بتعبك ؟
مسك نواف مقابض الكرسي ودفع مرت عمه بكل سهولة من دون ماينطق بأي حرف ..أو يرد على خجل عبير ...!!
دخلهم لقاعة الإنتظار وقال انه بينتظرهم بالسيارة ... بعد مدة دخلوا عبير وأمها على الدكتور اللي كشف عليها وكتب لها وصفة لعلاج لازم تآخذه من الصيدلية لأن سكرها مرتفع بزيادة ...
طلعوا من عنده وحطت عبير أمها بالإستراحة وراحت للصيدلية علشان تأخذ العلاج لكنها تفاجأت لما قالوا لها انه منتهي من عندهم وعطوها موعد بعد فترة علشان تراجعهم وبيكون وصلهم ...
تنهدت عبير وراحت لأمها ابتسمت لها وحاولت تساعد نفسها علشان تدفعها .. وفعلا مشت فيها لحد ما وصلوا للسيارة . اول ماشافهم نواف واقفين عند البوابة استحى على دمه وقرب بالسيارة علشان يركبون .......
طول الطريق وهم ساكتين .. لكن نواف حس انه من الواجب يسأل عن موعد مرت عمه ..
نواف وهو يقصر على صوت المسجل ::/ بشري يا خالة وش قال لك الدكتور ؟؟
تنهدت ام راكان بتعب ::/ صرف لي أدوية أقوى من اللي قبل .. يقول السكر مرتفع عن المرة اللي فاتت ..
نواف ::/ الله يستر .. زين وش سبب ارتفاعه ؟؟
ام راكان ::/ والله مدري يمه لكن هذا امر ربك ...
فجأة قطع نواف السالفة ورفع صوت المسجل بينما عبير كانت تطالع الشارع من الدريشة وتفكيرها يوديها ويجيبها ...
انتبهت له لما رفع صوت المسجل فجأة وهو كان من شوي يسولف مع أمها .. التفتت وشافته يضبط المرايه الأمامية وكأنها تركز عليها .. بلعت ريقها يوم شافته يطالعها شوي وبعدين نزل عينه وانهارت اكثر لما وصلت لمسامعها الكلمات اللي كأنه يقول انها لك وانكتبت علشانك ...
شكلك تبي تبدأ معاي الخيانة *** لا يا حبيبي هونك شوي هونك
انا اللي بنهي الحين قصة هوانا*** وانا اللي ببدي في الخيانة واخونك
شالسالفة قلبك تغير حنانه***وانا اللي اول كنت مالي عيونك
عشان قلبي حب قلبك وصانه*** والا انت ما يعجبك من هو يصونك
بعيش انا وقلبي وما انته معانا*** خل تنفعك بعدين كثرة ظنونك
انت الذي حديتني وللأمانه***حياتي صارت حيل حلوه من دونك
نظراته حرقتها .. والكلمات هزت قلبها ... خيــــــــــــــــــــــــــــــــانــة؟؟؟ ليش يقول عني كذا ؟؟؟ لأني ما وافقت صرت خاينة ؟؟؟ مجنون هذا والا شلون يفكر ... ماحبت ترفع راسها مرة ثانية لأنها مو قد النظرة الشيطانية اللي عطاها اياه ... منزلة راسها وتتمنى توصل للبيت بسرعة ؟؟ تبي تروح لحضن أريج وتقول لها عن ولد عمهم اللي على باله مسوي يحبها ..
دقائق ووصلوا ووقفهم نواف عند باب البيت .. نزلت عبير وهي تحس بالدنيا تدور فيها ومو قادرة تشوف أي شي بوضوح ... تسندت على باب السيارة شوي قبل لاتمشي لبااب امها وتفتحه وتنزلها .. مسكت يدها وركبتها الدرج بعد ما فتحت لها باب البيت علشان تدخل .. لكن عبير تحاملت على نفسها ومشت لنواف اللي طالعها مستغرب رجعتها لكن في نفس الوقت انبسط يمكن تكون غيرت رأيها ...
فتح الدريشة وهي واقفة قدامه طالعها بعيونه وكأنه يعاتبها .. لكنها ماعبرتها يمكن لأنها أصلا ما فهمت هو وش يبغى من الأغنية او وش مقصده ..
بلعت ريقها ومدت له الورقة ::/ هذا موعد لعلاج أمي ... بعد مدة بيتوفر في الصيدلية علشان تروح تجيبه ...
عطته الورقة وعطته ظهرها ماشية لبيتهم .. دخلت وسكرت الباب بقوة من وراها .. أما نواف فوقف مصدوم من الموقف .. الحين بعد كل هذا ما هانت عليها نفسها تقول لي آسفة ؟؟ والا تشرح لي اللي يصير ؟؟؟ والا تقول خلاص تعال نتملك ؟؟ معقولة انا كنت احب هالإنسانة ؟؟؟ مستحيل هي نفسها عبير اللي تكافح وتحب وتسامح ؟؟ مستحيل تكون هي اللي تخاف على امها واخواتها وكثير أسمع امي تمدحها؟؟
سند راسه على خلفية الكرسي وهو مغمض وأفكاره تايهه براسه .. ما يعرف وش الحيلة علشان يحل هالمصيبة ...
أما عبير فما قدرت تتحمل الموقف أكثر من كذا .. سكرت الباب وراحت تركض داخله للبيت ... أمها وأخواتها كانوا جالسين بالصالة لكنها ماانتبهت لهم .. راحت تركض على الدرج ويدها على فمها تمنع شهقتها لاتطلع... حست انها غلطت برفضها لنواف اللي فهمها غلط ومستحيل بيسامحها .. الظاهر ان حبل الوصل بينهم راح ينقطع ....؟ او انه انقطع وخلاص ...
استغربت أريج تصرف اختها ... وقامت من عندهم من دون مايحسون ولحقتها لغرفتها .. دخلت عليها من دون ما تدق الباب . شافتها رامية نفسها على السرير بعبايتها وتصيح من قلبها لأن شهقاتها متواصلة ... قربت منها وحاولت تآخذها في حضنها وتهديها .. وعبير ماصدقت خبر شافتها .. قامت ورمت نفسها على صدر اختها وهي منهارة وتصيح ..
حاولت أريج تفهم السالفة منها .. وعبير حاولت تتماسك علشان تفسر لها أي شي ..
بكلمتين متقطعات فهمت أريج السالفة باختصار ..
أريج بعتاب وهي منزلة راسها ::/ قلت لك بتندمين بعدين ...!! لكن انتي ماسمعتي كلامي ؟؟
عبير وهي تمسح دموعها ::/ خلاص أريج اللي فات مات ...
رفعت لها عينها أريج ::/ ونواف ؟؟
عبير توقف بكل ثبات ::/ ما عاد يلزمني ؟؟؟
وقفت أريج خايفة ::/ عبير وش تقولين ؟؟؟
عبير وهي تفصخ عبايتها ::/ اللي يبيعك بيعه .........!!
أريج بصراخ ::/ الحين علشان أغنية تقولين انه باعك ؟؟؟ (( وبنبرة سخرية))وبعدين خليك واقعية من فيكم اللي باع الثاني ؟؟
طالعتها عبير ببرود ::/ أغنيته فيها رسالة ؟؟ و انا فهمت الرسالة ؟؟
سكتت أريج وهي منصدمة من اختها ... ليه عبير تسوي كذا ؟؟؟ معقولة ما تحب نواف ولا يعني لها شي ولاتخاف على مشاعره ؟؟؟ تفاجأت أريج من كل اللي سمعته واللي قاعد يصير .. عطت أختها ظهرها ودارت على نفسها طالعة من الغرفة .. وسكرت الباب من وراها بكل قوتها وكأنها بتطلع القهر اللي بقلبها ...!!
.................................................. .........................
دخلوا كلهم للبيت برجلهم اليمين بناءاً على طلب ندى وزياد ... أول ما قابلتهم الحديقة اعجبتهم واعجبهم تصميمها ... لكن زياد ما قدر يسكت ولسانه يحكه الا يبي يتكلم ..
رفع عينه لشباك غرفة النوم الكبير المطل على الحديقة وردد نظراته على عذا وهو يقول ::/ هذا شباك غرفة نومي على طول على الحديقة . مرة يعني من تطلع الشمس تسطع علينا وإذا طالعت منه تشوف هالخضرة ... (( وابتسم ))
علق عليه عبدالله ::/ هههههههههههه ماخبرتك رومنسي يا ولد خالي ؟؟ الظاهر سفري غير فيك أشياء كثيرة ؟؟
ضحك زياد ::/ وش نسوي أمورنا تحتاج رومانسية (( ووجه نظرته لندى وكأنه يأكد لها أن عذا هي اللي بباله ..))
أما عذا فكانت في عالم ثاني ،، مو قادرة تتخيل ان هذا هو اللي بيكون بيتها في المستقبل ؟؟ والشباك اللي أشر عليه هو نفسه الشباك اللي بيكون في غرفتها هي وزياد ... حست بحرارة في وجهها من هالتفكير ... استحت وحاولت توقف تفكيرها السخيف .. تمشوا في البيت كله .. وكان باين على زياد الحماس لهالبيت ... كان يشرح لهم كل شي بالتفصيل الممل .. لحد ماوصلوا للغرفة اللي تلحق غرفة ندى ...
نطت ندى على طول وعينها على زياد ::/ هذي غرفة ملابس لي .. ابفتحها على غرفتي ويصيرون مع بعض ..
طالعها زياد بحاجب مرفوع ::/ بأمر من هالكلام ؟؟؟ أنا اللي أذكره اني قلت هذي بتكون غرفة سلطان ... (( وطاحت عينه على عذا من غير قصد ))
حست عذا بالدنيا تدور فيها من الإحراج ومن كذا قربت لسارة ومسكت بطرف عبايتها ...
عبدالله اللي انتبه لأخته ابتسم وعينه عليها وقال ::/ الله يوفقكم ان شاء الله .. بس عاد هاه ترى لي شرط ؟؟
انحرج زياد لأنه نبههم واحرج عذا ::/ آمر ,,, وش هو شرطك ؟
عبدالله ::/ ما يجي سلطان إلا وانا موجود ؟؟
ضحك زياد ::/ عاد هذا ما اضمنه لك ؟؟؟ اسمح لي وانا اخوك ..
ضحكوا كلهم الا هي كانت خدودها مولعه حريقة ...
قربت ندى لزياد وهمست::/ زياد استح على وجهك البنت بتموت ....!!
لف زياد وجت عينه بعينها وشافها تحاول تضيع نظرها في الفراغ اللي حولها .. حس في هذيك اللحظة انه بيتهور ويسوي شي يحرجه مع عمته وعيالها وفي لحظة بغى يقول لعمته يتملكون وخلاص تصير زوجته وما احد يمنعه منها .. لكن مسك نفسه ومشى معهم لجناحه ... وهو يقاوم نظرته اللي خاطرها تطيح عليها وتشبع منها.!
أول مادخلوه وتفرجوا عليه وانتهوا التفت لهم زياد جميعا وقال ::/ وسلامتكم هذا جناحي وهو آخر شي بالبيت ...
طالعه اسامة بحاجب مرفوع ::/ لك بروحك ؟؟
ابتسم زياد ::/ ليش تبي تخاويني فيه ؟؟
انقرف اسامة ::/ الله يخسك .. مالقيت اخاوي الا انت ؟؟؟ انا اقصد بالنسبة لأم سلطان ؟؟ وش بيكون موقعها ؟؟ وإلا تبيها تنام مع سلطان ؟؟
ضحك زياد ::/ لا وش دعوى هي الداخلة وحنا الطالعين ..
أسامة وهو قاصد يحرجها ::/ زين يعني هالجناح من هو له ...؟
حست ام عبدالله ان اسامة تمادى وخصوصا لما حست بكوع عذا وهي تنغزها علشان تسكته ..
ام عبدالله ::/ أسامة ... خل عنك الكلام اللي ما منه مصلحة ..
أسامة ::/ عاد يمه وش قلت انا ؟؟ هذا جزاي بحفظ حقوق الحرمة ؟؟
زياد وهو يضحك ::/ ولا يهمك هالجناح لي ولأم سلطان .. هاه عساك استانست ..؟
ابتسم اسامة وهو يحرك حواجبه ::/ افا عليك ولد الخال .. تو ما انبسطت ...
طلعوا من الجناح كلهم ونزلوا تحت للدور الأول ... بس قبل لايطلعون سألته ام عبدالله ::/ زياد الحين خلاص بتسكنون ؟؟
ابتسم زياد لعمته ::/ خلاص يالغالية كل شي صار باسمي .. واقدر اسكنه لو بغيت الحين لكن يبي لي وقت على ما استرد اقتصادي وابدأ أأثثه ...
ابتسمت له ام عبدالله ::/ الله يعطيك خيره ويكفيك شره ...
حب زياد راس عمته بكل حب ::/ آمين الله يسمع منك ويوفقني (( قالها بهمس في أذنها))
ابتسمت ام عبدالله وهي تقرصه مع يده ومشوا كلهم طالعين للسيارات .. ركبوا جميعا لكن قبل لا يمشون نزل زياد من سيارته وجاء لعبدالله ..
فتح عبدالله دريشته وهو مبتسم ::/ وش عندك بعد ؟؟ ترى اليوم عفنا صوتك يا أخي ؟
ضحك زياد ::/ الله يسامحك هذا وانا مقرر نأجل سلطان لما ترجع بالسلامة ؟؟
ضحك عبدالله ::/ أجل السموحة ...
زياد ::/ لاتصدق بالحيل .. المهم انتم روحوا الحين للمطعم وانتظروني هناك ؟
عبدالله مستغرب ::/ ليه وين بتروح انت ؟؟
زياد ::/ ابروح لبيت عمي خمس دقائق وراجع لكم ... انتم روحوا هناك وانتظروني على الطاولة وتراها محجوزة باسمي ...
عبدالله وهو يحرك سيارته ::/ خلاص تم .. ننتظرك هناك ..
نادته ام عبدالله ::/ زياد يمه لاتسرع وانتبه لنفسك ولأختك ...
ضحك زياد وهو يودعهم ...
لكن سارة ما فوتت المشهد لفت على عذا بقهر ::/ راح للقلب ..؟ مايقدر يستغني عنها واليوم من العصر وهو طالع من عندهم .. بيروح يتطمن عليها ويلحقنا ؟؟
التفتت عليها عذا بغضب ممزوج بقهر ::/ ســارة الله يخليك ..
سارة وهي تكمل ::/ وقال إيش ام سلطان وسلطان ..؟ آخ بس ما اقول الا مالت عليك انت واياها ...؟
ضربتها عذا على كتفها ::/ لاتقولين كذا ؟؟
سارة وهي تكشر ::/ اقول روحي مناك على بالها انه يحبها وانه يقصدها يوم قال ام سلطان ؟؟ حبيبتي اصحي لنفسك لاتفتحين عينك في يوم وتشوفين اللي غمضتي عنه صار وساعتها ألمك بيكون أقوى وأمر ...!!
سكتت عذا وماردت على سارة .. لكن كلامها لامس شعرة قلبها .. فلو إنها كانت من دقائق شاكة ان زياد يحبها ويقصدها بأم سلطان فهي الحين متأكدة انه ما كان يقصدها وانه يقصد سحر اللي تملكت قلبه ...!!أما هي فكانت مجرد نزوة او حب طفولة راح مع الأيام وحل محله علاقة أقوى ...!!
يعني معقولة نظراته كانت ولا شي ؟؟ وأنا اللي اتوهمها ؟؟؟!
غمضت عيونها بحزن وأسى وتمنت لو انها ما جت معهم اليوم وخلت روحتها مع ابوها بكره على الأقل بتتفادى الإحراجات وبتكون الروحة رسمية مو مثل اليوم والضغط اللي واجهته ....!!

وصلوا للمطعم المطلوب ونزلوا له كلهم .. اول مادخلو استقبلهم الويتر وسألوه عن حجز بأسم زياد سلطان ... ابتسم لهم بإحترام وطلب منهم يتبعونه للمكان ..
وقفهم قدام زاوية كبيرة جدا ومقسومة إلى جزئين بينهم حاجز .. وفي كل قسم طاولة خشبية كبيرة وكراسي فخمة ... وباين عليها مجهزة قبل بفترة لأن الصحون والكاسات والشوك والملاعق مصفوفات بترتيب ...
أشر لهم الويتر علشان يتفضلون .. ولما اعتدلوا بجلساتهم تقدم لهم وبيده المنيو وعلى وجهه إبتسامة ...
طالعه عبدالله وبادله الإبتسامة وقال له انهم راح يأجلون سالفة الطلب لحد ما يكتملون المعازيم ...
طالع عبدالله حوله بعد ما طلع الويتر ... ولاحظ فخامة المكان اللي هم فيه ؟؟؟ يعني أكيد غالي وكلفه مبلغ لابأس فيه ... وبدون شعور تنهد وهو مبتسم لأنه يتذكر يوم كانوا صغار ..
عبدالله ::/ الله يالدنيا .. والله تغيرت وزياد تغير معها ؟؟؟
نطت سارة وكأنها طاقة القدر انفتحت لها ::/ ليه تقول كذا ؟؟ انت ملاحظ انه متغير من ناحيتك ؟؟
عقد عبدالله حواجبه ::/ وش صار لك ؟؟؟ انا مو هذا قصدي ... قصدي انه تغير من ناحية الأماكن اللي يعزم فيها ... تدرون ..!! أول أيام الثانوي إذا قلنا بنشتري فطور من مطعم والا بنطلع سوا نتعشى برا كان هو يعتذر إذا ماكان معه مصروف يكفي .. وأحيانا يجي يقول لي أسلفه ... والحين شوفوا وين عازمنا فيه ؟؟؟
ابتسمت ام عبدالله ::/ سبحان اللي يغير ولا يتغير ... بس عاد هو من زمان وعنده الحلال لكن عمه ماكان يعطيه ؟
عبدالله ::/ لا لاتظلمينه .. ماكان يقصر معه يعطيه مصروفه ... لكن ماكان يكفي زياد أبدا .. وهو ماكان يتجرأ يطلب من عمه زيادة ...!! خصوصا انه احيانا يضطر يدخر من المبلغ شوي لأن عمه مو كل شهر يعطيه نفس المبلغ أحيانا اقل ...!
ضحكوا كلهم وهم يسولفون عن طفولتهم .. لكن عذا الأفكار صارت توديها وتجيبها ... خافت من فكرة ان الفلوس تغير النفوس ... يعني أكيد زياد تغير جذريا والحين ماعادت تعني له أي شي مثل ما كانت قبل مقارنة ببنت عمه اللي في نفس مستواه من جميع النواحي ... حاولت بكل قوتها تطرد هالأفكار من راسها لكن ماقدرت ... فاستسلمت لها لكن في نفس الوقت راحت تدعي من قلبها ان الله ما يكسر خاطرها وينولها مرادها ..
بعد ما مرت فترة من الزمن .. شافوا زياد ومعه بنتين يمشون ناحيتهم ... زياد وشكله وهو مقبل عليهم خطير جدا ... خصوصا تشخيصته وطوله اللي معطيه هيبة .. وعراضة كتوفه اللي مخليته رجل بكل ما تحمله الكلمة من معنى ... زاوية فمه كانت مايلة بشبه ابتسامة للعيون اللي تراقبه على الطاولة ...
وقفوا ام عبدالله والعيال لما تقدموا منهم زياد واللي معه ...
ابتسم زياد ::/ ها نحن وصلنا ...
أسامة::/ الحمدلله على السلامة ..
قربت ندى من عمتها ومعها سحر بنت عمها .. سلمت سحر على أم عبدالله ثم توجهت للبنات وسلمت عليهم كلهم ...
سارة كانت محترقة من داخلها ... كيف يتجرأ ويخليهم ينتظرونه ؟؟؟ كله علشان ست الحسن والدلال يروح يجيبها ..؟؟؟ يا اخي ما كثر الله عندهم الا السواقين خل واحد منهم يجيبها للمطعم ...
أما عذا فحاولت انها ماتعطي الموضوع أي أهمية علشان ما تتنكد وتفضحها دمعتها ... وصلها صوت زياد وكان قريب جدا من مسمعها ..
زياد ::/ أنتم تجلسون هنا .. واحنا بنروح للطاولة الثانية ...
ام عبدالله ::/ اللي يريحكم حنا ماعندنا مانع ...!!
التفتت عذا بتشوف وين موقعه ولقته واقف جنبها وما بينهم الا شعرة... بلعت ريقها بصعوبة وهي تشوف حجمها الضئيل جنبه ... نزلت عينها لما طاحت عينه عليها وهو يبتسم و تحرك من جنبها ماشي من وراها علشان يدخل للقسم الثاني ...
أول ما طلعوا رمت نفسها على الكرسي وهي تحس بعمرها دايخة من ريحة عطره ومن وقفته جنبها ... يا إلهي ما اتخيل انه كان جنبي لهالدرجة .. ولا أتخيل انه ممكن يكون بعيد عني في يوم من الأيام ؟؟
التموا كلهم حول الطاولة ... وعذا ما تحط عينها بعين سحر ،، تخاف تشوفها وترجع لها أفكارها السخيفة .. اما سارة فكانت عايشة حياتها .. إما تسولف وإلا تضحك .. ومع ذلك ماسلمت سحر من تعليقات سارة المقصودة .. لكن ام عبدالله تتدارك كل موقف وتسكتها...
طلبواعشاء .. وكل واحد خذ اللي يشتهيه ... والشباب متحلفين يخسرون زياد ... فما سلم منهم طلبوا في البداية عصير وعقبه عشاء وأكدوا له انهم بيطلبون حلويات بعد العشاء ...
وصل الويتر ومعه الطلبات وبدأ يوزعهم على الطاولة ... واول ماطلع سموا البنات بسم الله وبدأوا يتعشون ...
كانت نظرة سحر على أم عبدالله .. تشوفها وتتذكر كلام امها عنها ؟؟؟ شي سخيف انوجد بقلبها وهو انها انقهرت من ام عبدالله وحست انها كانت مآخذه نصيبها من الدلع ثالث ومثلث أما أمها ياحياتي ماجاها من أبوها إلا الغثاء فوق على أنها يتيمة ..!
أم عبدالله انحرجت من نظرات سحر المركزة .. وحبت تقطعها وتسولف بأي شي ..
ام عبدالله ::/ أجل مانويتوا تسافرون هالسنة ؟؟
انتبهت سحر من سرحانها وابتسمت ::/ إلا إن شاء الله ...
سارة ::/ طيب وش تنتظرون يالله روحوا قبل ماتفتح المدارس ؟
ضحكت سحر::/هههههههه لا إن شاء الله بنسافر قبل تفتح ؟
ام عبدالله ::/ وين ناوين ؟
سحر ::/ تركيا ... بس ما راح نطول هناك يعني قريب العشرة أيام ؟
ام عبدالله ::/ليش عسى ماشر ؟؟
سحر مبتسمة ::/ أبوي مايقدر هالإجازة يطول عن الشركة ؟ يقول عنده شغل كثير ؟
ام عبدالله وحولت نظرها لندى :::/ وانتم بتروحون معهم ؟
ابتسمت ندى::/ أممممم .. مادري انا تبع زياد إذا راح أروح وإذا جلس أكيد بجلس معه ؟
التفتت لها سحر بصوت متغنج طبيعي ::/ لا مو على كيفكم لازم تجون معنا .. ولو ماجاء هو انتي لازم تروحين؟
طالعت سارة عذا بنظرات نارية .. وأشرت على رقبتها وكأنها تقول (( ما أقوم اذبحها )) ؟؟؟ ضحكت عذا وغمزت لها علشان تسكت ..!
سألت سحر ام عبدالله ::/ وانتم مانويتوا تسافرون ؟
نطت سارة ::/ كان ودنا والله .. لكن الحجوزات على انتركتيكا فل .. وما لقينا حجز ..
عاد قال أبوي يا انتركتيكا يامافيه سفر هالسنة ...؟ تعرفين طفشنا من كثر مانسوي رحلات حول العالم ...!
ضحكوا الجالسين كلهم ..
ام عبدالله وهي تضحك ::/ لا هالسنة ما نوينا نسافر؟
لفت سارة على أمها ::/ وليش إن شاء الله ؟؟
ام عبدالله ::/ أبوك عنده شغل ومايقدر يأجله علشان كذا مانقدر نروح ونخليه ...
كتمت سارة وتنرفزت لما سمعت كلام امها .. ولما شافتها ندى على هالوضع جاء في بالها إقتراح ..
ندى ::/ مادام عمي محمد مو فاضي وش رايكم تجون انتم معنا ويجي معكم أسامة وعبدالله .. وبكذا يتشجع زياد ونروح كلنا رحلة جماعية ..!
ام عبدالله ::/ أنا ما أقدر أروح وأترك أبو عبدالله بروحه .. يا أنا وإياه وإلا مو لازم اسافر ..
رفعت سحر عينها بعين أم عبدالله من قالت هالكلام وفي خاطرها (( وش هالحب ؟؟؟ شاطرة تعطينه لهالمحمد والا يوم أيام أبوي و أنتي معذبته ورايحة تشكين منه عند أبوه واخوه ))
عذا ::/ وااااو والله بتطلع وناسة ؟؟
ام عبدالله تعقب بنرفزة واضحة ::/ وأبوكم ماراح يرضى أنكم تسافرون ؟؟
عذا ::/ ليش عاد مايرضى ؟؟ مادام اخواني معنا وزياد ليه مايرضى ؟؟
استغلت سارة الفرصة ::/ أصلا علشان زياد هو ماراح يرضى .. (( وغمزت بعينها))
استحت عذا ونزلت عينها لصحنها .. أما سحر فقطبت جبينها مستغربة من هالكلام ..
حاولت ندى تتدارك الموضوع ::/ وش دعوى اللي بتسكنون معنا ..؟؟ انتم بشقة واحنا بشقة ؟؟ وبعدين أخوي ماعنده هالأفكار الخربوطية ؟؟
ضحكوا كلهم على كلمة ندى الأخيرة .. وحاولت ندى تقلب المواضيع علشان ما ينقال شي وتتحسس بنت عمها ... وهي عندها مراجعة بكرة ..؟
تعشوا واكلوا الحلو .. وسولفوا وانبسطوا لحد ماقربت الساعة للـ 12 .. بعدها تنحنح زياد قبل لايشيل الحاجز علشان يتغطون البنات ... وبعدين دخل هو والعيال ..
زياد وهو مبتسم ::/ هاه عسى عجبكم العشاء ؟؟
ام عبدالله مبتسمة له ::/ أكيد غصب يعجبنا ؟؟ مو أنت اللي طابخه ؟؟
ضحك زياد ::/ إلا و فلوسي فيه بعد وانا اللي جايب المقاضي لهم ؟؟
مشى وجلس جنب ندى أخته يعني على يمينه ندى وسحر .. وقدامه عمته وعذا .. أما أسامة فجلس على كرسي على راس الطاولة وبعيد شوي .. وعبدالله وقف وظهره مستند على الجدار وهو يلعب بجواله وباين عليه الخجل ...
لف زياد على سحر اللي تلعب بأطراف أصابعها ومنزلة راسها وقال ::/ معليش يا بنت العم وكلناك دسم وانتي عندك موعد بكرة ؟؟
استحت سحر بالحيل لأنه وجه لها الكلام مباشرة .. نزلت راسها وغمضت عيونها وعدت من واحد لعشرة علشان تخف ضربات قلبها ..
سحر ::/ لا وش دعوى أصلا انا انتبهت لعمري وما كثرت ؟؟
ام عبدالله مهتمة ::/ سلامات حبيبتي وش له الموعد بكرة ؟؟
سحر بخجل ::/ لاعادي ياخالة مراجعة للقلب علشان آخذ احتياطاتي من ركوب الطيارة ...
ام عبدالله بحزن على هالبنت اللي مثل الوردة ::/ الله يشفيك يا قلبي ولا يوريك مكروه
ابتسمت سحر ::/ آمين .. مشكورة..
قربت سارة لعذا وهمست بأذنها ::/ حتى يعرف مواعيدها ؟؟؟
طالعتها عذا وهمست لها هي الثانية ::/ أحس اني مخنوقة ؟؟؟ تتوقعين فعلا يهتم لأمرها أكثر مني ؟؟
تنهدت سارة وأطالت النظر بعيون اختها اللي بادلتها بعد نفس النظرة الحزينة .. ابتسمت سارة و ندمت لأنها قالت هالكلام لأختها وهي اللي ما تدري متى بتتوب من الهرج الفاضي وتضييق صدرها فرجعت تهمس لها بأذنها ::/ يمكن يعتبرها مثل ندى ؟؟؟ وإلا يمكن ندى قالت له تو عن موعدها ..
ضغطت عذا على يد سارة ... وهي تقول::/ اتمنى ...
ندى ::/ ترى عيب اللي يتساسرون في المجلس ؟؟؟
أسامة ::/ يالله بسرعة قولوا وش كنتوا تقولون والا ياويلكم (( وركز نظره على عذا))
بلعت عذا ريقها وبغت تسوي نفسها قوية فضحكت ::/ههههههه معليش مستعدين لـ ياويلكم حقتك ؟؟
عقد أسامة حاجبه ::/ أشوفك استقويتي ؟؟
عذا وهي تحط يدها بيد سارة ::/ لأنها مشتركة معي في الجريمة ؟؟(( وغمزت له))
ضحكوا كلهم .. لكن هو ذاب من سمع صوتها ؟؟؟ ومن شاف قوتها الواهنة اللي تختلقها إستناداً على أختها ... ياناس قلبي ماعاد يتحمل ؟؟ وتفكيري بيذبحني خلاص ؟
أسامة بضحكة خبيثة ::/نشوف يا عذا ... انا دواك ؟
قام من مكانه وقام الكل علشان يطلعون ... عبدالله وسارة تقدموهم والباقين وراهم ... طلعوا من البوابة وراحوا لسياراتهم ..
وقفت عذا واسامة وامهم يودعون زياد واللي معه ..
قرب زياد لعمته وحبها على راسها ويدها وهو يودعها ..
ام عبدالله وهي تمسح دمعتها ::/ الله يوفقك يمه ويرزقك وأشوف عيالك ...
ابتسم زياد ::/ قريب إن شاء الله يا عمة .. بس عاد وش سالفة هالدموع ؟؟
ام عبدالله وتبتسم علشانه ::/ مادري لكن من فرحتي بك واحساسي انك كبرت ..
زياد بنبرة الحزن::/ توك تنتبهين ياعمة؟؟؟ أنا من طلعت على الدنيا وانا كبير...
حست عذا بقلبها يتقطع عليه من سمعت نبرة الحرمان اللي في صوته ومن تذكرت سوايا عمه فيه يوم كان مراهق ويجيهم لبيتهم يشتكي من ظلمه ... ودها تواسيه تقول له أي كلمة لكن ما تقدر حتى تفتح فمها ......
سلم زياد على أسامة بينما ندى تسلم على عمتها ..
زياد وهو يرص على كتف أسامة وبنظرات مخيفة ::/يا ويلك ان وصلني انك مسوي فيها شي ؟؟ ترى ترحم على روحك ساعتها ؟؟
أسامة بغضب كذاب::/ لايكون انت اخوها وانا مدري ؟؟
انحرج زياد :::/ يكفي انها متنومة بالمستشفى بسببك ... هذا وانت اخوها ..!!
ضحك أسامة وهو يأشر على عيونه يعني ماراح أسوي لهم شي .. توادعوا جميعا وكل من ركب سيارته وانطلقوا راجعين لبيوتهم ...........!!
.................................................. ......................
في الصباح قامت وهي متضايقة وتحس بجبل كبير من الهم على صدرها ومضيق تنفسها ..
طول الليل كانت تتقلب ومو قادرة تنام .. أفكارها توديها شمال وجنوب ؟؟؟
فكرت في كل شي ،،، في لو أن الدكتور رفض أنها تسافر لأن حالتها ما تسمح ؟؟؟
أو انهم ممكن يكتشفون فيها شي جديد بسبب هالفحص العادي اللي تحدد من دون موعد ... وإنما أنوخذ كحالة طوارئ ...
دخلت عليها أمها وهي قاعده على السرير وحاطه لحيتها على ركبها وتفكر ...
أم مشاري بنبرة دافية ::/ جهزتي سحر ؟؟
رفعت سحر عيونها ::/ دقائق يمه وأكون جاهزة ...!!
ابتسمت لأمها وقامت من السرير ماشية للدولاب تطلع لها ملابس ... جلست أم مشاري على الكرسي مقابل لبنتها ..
ابتسمت وهي تواسيها::/ سحر لازم تقوين إيمانك بالله ... ولازم يكون عندك حسن ظن بربك أنه ما راح يخيبك ... أنتي بنتي وقطعة مني وكل ما قرب موعد لك ينقبض قلبي خايفة لا أفقدك .. لكن إذا راجعت نفسي وفكرت .. قلت أصلا احنا كلنا مثل الأمانة في هالدنيا ولازم الأمانة ترد لصاحبها يوم من الأيام ..؟ وإذا مو اليوم بكرة .. وإذا مو بكرة اللي بعده ...!! لكن الأهم أن هالأمانة تكون على مثل ما تركها صاحبها لانآخذ منها شي ولا نهملها لحد ماتتلف ؟؟ يعني نعمل بالأسباب ...!!ويوم اللي الله يريد يسترد أمانته ما نقدر نمنعه لأن الموت حق علينا كلنا ... وما ندري يمكن أكون أنا يومي قبلك ؟؟ أو يومنا كلنا قبلك ؟؟
نزلت أم مشاري راسها تحارب دمعتها وهي عارفه انها بهالكلام تواسي نفسها أكثر من انها تواسي سحر أو أن هذا تفكيرها بس بصوت عالي ... وسحر اللي كانت معطيه امها ظهرها ووجهها للدولاب فدموعها على خدها ... ماقدرت تتحمل كلام امها أكثر . حست انها مو بس هي اللي تعبانة لا .......... كل اللي حولها يتعبون من تعبها ... قررت تتماسك والتفتت لأمها وراحت لحضنها ... غمرت وجهها بصدر أمها ،، وام مشاري مسحت على راس بنتها وهي تدعي لها ..
ام مشاري::/ يالله عاد لا تأخرين اخوك قومي تجهزي ؟؟
مسحت سحر دموعها بظهر كفها ::/ مشاري قام ؟؟
ام مشاري وهي قايمة بتطلع ::/ إيه يفطر تحت ينتظرك تخلصين ؟؟
ابتسمت سحر لأمها ::/ خمس دقائق وأكوون عندكم تحت ..!
لبست على السريع ومشطت شعرها . خذت عبايتها بيدها ونزلت تركض مع الدرج ... حست هالمرة ان كل همها راح بسبب كلام امها ... فعلا أصلا كلنا بنموت سواء المريض والا المتعافي ... لكن المهم حسن الخاتمة والعمل الصالح اللي بيشفع لنا عند رب العالمين ...!!
دخلت عليهم غرفة الطعام وهي تبتسم ... لاحظها مشاري اللي كان وجهه متجهم من القلق ويوم شافها تبتسم غصب عنه انرسمت على شفايفه ابتسامة تشجيع ..
مشاري ::/ أشوفك نشيطة اليوم ؟؟
سحر وهي تشرب من كوب الشاهي ::/ مادام السالفة فيها سفر فأنا أنشط من النشاط نفسه ..
ابتسم لها مشاري وهو يوقف ::/ لو أدري كان كل يوم بسفرك ؟؟
ضحكت سحر ::/ ههههههههه طيب هذا أنت دريت .. خلاص كلما بغيت تروح بريطانيا احجز لي معك ؟؟
تجهم وجه مشاري وانقلب للون الأزرق ::/ لا خلاص أجل ما راح أسافر لبريطانيا من اليوم وطالع ..
بهتت سحر في وجهه ::/ ياليتني عارفة انك بتكنسل هالسفرات من أقولك هالكلام كان من زمان قلته ...
مشاري :/ المهم خلصتي يالله نمشي علشان نلحق الموعد ..
سحر ::/ إن شاء الله ..
قامت من على كرسيها وحبت امها على رأسها وودعتها وترجتها تدعي لها أن الدكتور ما يسوي حركات ويمنعها من السفر لأن ساعتها فعلا بتنتحر ..
ضحك مشاري عليها وعلى لهفتها للسفر .. ومشى سابقها علشان يشغل السيارة ... لحقته بعد ما لبست عبايتها وشافته داخل بالسيارة وموقفها عند البوابة .. ابتسمت له وركبت معه ومشوا رايحين للمستشفى لكن هالمرة غير رايحة ونفسيتها أوكي ومو متضايقة ...!!
دخلت لإستراحة النساء ومشاري جلس ينتظرها بإستراحة الرجال .. دقائق قليلة وبعدها نادوا على سحر .. قامت وهي تحس برجفة بيديها مهما يكن لكن لما جاء وقت الجد خافت .. طلعت وشافت مشاري أخوها برزته وهيبته ووقفته الملكية ينتظرها في نهاية الممر ... ابتسمت في خاطرها على شكل مشاري ... كأنها أول مرة تشوف وسامته وطوله ومظهره اللي مخليه رزة باللحية والحواجب السوداء المقوسة ... وبياض بشرته الخفيف ... قربت منه ومسكت يده .. انتبه لها وابتسم بوجهها وهو يرفع حاجبه .. انتبهت للندبة اللي فوق جفنه العلوي وتنهدت وهي تتذكر اللي صار وزادت قناعتها ان الله يآخذ من يشاء لا ينظر لمرض ولا صحة ..
دخلت هي وإياه لغرفة الدكتور وتفاجأوا لما شافوا راشد ولد خالتهم جالس على المكتب والملف بيده يقلب فيه .. ابتسم مشاري وقرب لمكتبه يسلم عليه ..
مشاري ::/ هلا والله براشد
رفع راشد راسه لمشاري وابتسم لما شافه ووقف له :/ هلا والله بولد الخالة ..
سلموا على بعض وتحابوا وجلس مشاري مقابل راشد .. أما سحر فوقفت ورا مشاري أخوها ويدها على الكرسي جنب كتفه... وتنفسها اضطرب وضربات قلبها زادت .. مو قادرة تتخيل ان راشد هو اللي بيكشف عليها ؟؟ خير إن شاء الله هي مو متعودة على هالشي ..!
راشد ماكان أقل منها ارتباك .. ماتوقع ان يوم ورديته تجي فيه سحر بنت خالته .. لا والمشكلة ان معها مشاري الشخص اللي يستحي منه أكثر من أي واحد ممكن يقابله حتى الأغراب .. رفع عينه لا شعوريا لسحر وطالعها بعتب خفيف ... وهالنظرة كلها بسب اللي وصله من ريم اخته عنها ... وعن حماسها لزواجه من اللي قالوا له عنها ...
حاول يبلع ريقه .. ورجع لمشاري ..
راشد ::/ أخبار الوالد وخالتي عسى كل شي زين ؟؟
مشاري ::/ الحمدلله ماعلينا خلاف .. انت وش اخبارك وش الدنيا بك مالك لاحس ولاخبر ؟
راشد وهو يضحك ::/ ضريبة الدكتور وش اسوي .. وأزيدك من الشعر بيت من مسكوني ورديات وصرت دكتور أساسي وانا حتى أهلي ماعاد يشوفوني ؟؟
مشاري ::/ الله يعين .. ! إلا إلى الحين ماطلعت لك البعثة ؟؟
راشد وهو يوقف علشان يطلب الممرضة ::/ إن شاء الله واعديني عن قريب ..
مشاري ::/ إن شاء الله الله بيوفقك ..
ابتسم راشد ومشاري قال ::/حنا اليوم مآخذين موعد طوارئ ..! وزين اللي شفناك ؟
التفت لهم راشد وبعيونه خوف وركز نظرته على سحر ::/ خير عسى ماشر ؟
ابتسم مشاري يطمنه ::/ ما شر لكن ناوين نسافر وبنشوف صحة سحر قبل لانمشي ومدى تأثرها بركوب الطيارة ..
ارتاحت ملامح راشد المنقبضة ::/ خوفتني والله .. لكن إذا على هذا ماعليه نسوي لها فحص ...
خذ راشد نفس عميق وطلب من سحر بارتباك انها تدخل غرفة الفحص ... استحت سحر وطالعت مشاري اخوها بنظرات توسل أنها ماتبي ؟؟ لكن مشاري مسك يدها وشجعها ...
مشاري بهمس ::/ إذا دكتور غريب عنك يكشف عليك .. ماتبين ولد خالتك ؟؟
سحر ::/ مدري بس مستحية مو متعودة ؟؟
ابتسم مشاري ::/ معليك هو بس كشف ماراح يسوي لك فحص كامل ..
تنهدت سحر ومشت لغرفة الفحص .. شافت راشد وهو كل شوي يعدل نظارته والا يرجع شعره لورى وحست انه هو بعد متوتر مثلها ...
دخلت معها الممرضة وساعدتها تنام على السرير وبعد دقيقتين دخل راشد ومعه الملف حقها علشان يدون فيه ملاحظاته..
سحر من دون شعور ::/ وين مشاري ؟؟
ارتبك راشد ::/ ينتظرك في الغرفة الثانية ؟؟ دقيقتين ونخلص ...
غمضت سحر عيونها علشان ما تشوف شي وتقدم منها راشد يفحص ضربات قلبها وتنفسها وحساسية صدرها ...
خلصوا وطلعت سحر لهم في المكتب شافت راشد جالس وقدامه مشاري اخوها .. ابتسم لها مشاري وأشر لها تجي تجلس جنبه ..
راشد ::/ لا الحمدلله كل شي أوكي .. لكن بعطيك حبوب تحطينها تحت اللسان لوقت الضرورة . يعني إذا حسيتي بهبوط في القلب وخفقان او ماعاد قدرتي تتنفسين خذيها وبلغوا طاقم الطيارة علشان يعطونكم انبوبة اكسجين ..
خافت سحر ::/ يعني ممكن يصير هالشي ؟؟
ابتسم راشد ::/ لا إن شاء الله ماراح يصير لكن هذي احتياطات ..
وقف مشاري ووقفت وراه سحر .. تطمنوا على صحتها وخذوا منه وصفة العلاج ودعوه وطلعوا ... لكن هو كانت عيونه ملزقه في ظهرها .. وكأنه يبيه يفهمها شي ..
تنهد بعد ماسكروا الباب ونادى على الممرضة علشان تدخل له المريض التالي ...!!

سافروا بيت ابو مشاري لتركيـا واضطرت ندى تجي تجلس عند عمتها لحد ما يرجعون بيت عمها ... زياد كان يتردد من بيت عمه اللي ينام فيه لبيت عمته اللي يرتاح فيه بعد الدوام ويآكل وجباته ...
في هالأيام حست ندى بالفرق بين حياتها هناك وحياتها هنا .. في بيت عمتها كان كل شي يصير ببساطة ما فيه تكلف أو تصنع ،،،حتى لما يجتمعون الجيران ماتشوف ان عمتها تتكلف في حطها او لبسها .. بالعكس كان كل شي يتم بترتيب وتنويع .. لكن مافيه بهرجة ....!!لأن الهدف من الجمعة هو الوناسة والترويح مو الأكل والشرب والا اللبس ..!!عكس مرت عمها اللي تتكلف من قلب وتوصي على أرقى انواع الحلويات من أفخم محلات الرياض ..!!
لاحظت بعد ان عمتها هي المسئولة عن الطبخ .. و هي اللي تسوي كل الوجبات بمساعده من البنات .. استغربت ندى هالشي يمكن لأن ما عمرها قد فكرت تدخل المطبخ والسبب أن مرت عمها أصلا ما تدخله فعودتهم أن كل شي يبغونه يقولونه للطباخات ،،، ولما سألت عمتها ليه ما تخلي ميري هي اللي تسوي لهم الأكل وهي ترتاح .. ردت عليها أن ابو عبدالله وأسامة مايحبون أكل الخدم ؟؟ بالإضافة إلى انها هي أصلا ما تحب أكلهم بعد وتحس الأكل من يدها له طعمه ..
ما تقدر تنكر انها استانست في بيت عمتها أكثر ... يمكن لأن البنات حولها ومعها ولمياء كل شوي تطب عليهم ... مهند كان مآخذ حته من الجو .... سارة وحيواناتها اللي أذت العالم فيها وهبالها مع أسامة اللي الظاهر عمره ماراح يكبر والا يحس بالمسئولية ؟؟
عمتها اللي تداريها هي وأخوها ومحسستهم انها امهم أو أكثر ... ابوعبدالله اللي يسأل عنها وان كانت مرتاحة والا لا أو فيه أحد مضايقها ... ببساطة حست أن الأسرة هذي روح وحده ..!! واكتشفت هالشي لما اجتمع معهم ابوهم ووضح لهم ظروفه المادية اللي تمنعه من السفر.. وهم كلهم تقبلوا كلامه وماعارضوه بالعكس حاولوا مايحسسونه بالذنب ،، وفكرت في سحر لو انها تعرضت لنفس الموقف كانت بتقلب الدنيا فوق تحت والدليل هالسفرة اللي ضغطت فيها على أبوها لحد ماوافق وبصعوبة حاول يقنعها بعشرة ايام بس بسبب شغله ..!
تمنت في قلبها ان حياتها مع طلال تكون مثل عمتها وعيالها ؟؟؟ فكرت تجيب عيال وبنات كثيرين علشان تصير فيه حركة بالبيت ... مو مثل بيت عمها الهدوء فيه قاتل ...!!
كانوا هالليلة مجتمعين كلهم بالصالة ويلعبون ورقة وملتمين حلو الطاولة والبيبسي والفوشار جنبهم وهم متحمسين في اللعبة حدهم ...
وام عبدالله طالعة لحفلة زواج مع لمياء ...
قطع عليهم جوال ندى وهو يرن .. تأففت وهي تقوم بتروح تآخذه من على الطاولة ..
شافت الشاشة ولقته زياد .. ابتسمت وهي ترد ..
ندى ::/ مرحبـــــــــا ..
زياد ::/ هلا السلام عليكم ..
ندى :::/ وعليكم السلام ... بسرعة وش عندك لأني مشغولة ؟؟
ضحك زياد ::/ أصلا انتي من متى ماصرتي مشغولة ؟؟ من يوم جينا بيت عمتي وانتي مو فاضية لي ؟؟ المهم انا جاي الحين وش تبون اجيب لكم عشاء ؟؟
عقدت ندى حواجبها بتفكير ::/ مادري لكن الظاهر عبدالله بيجيب عشاء من برا لأن عنده عيال في الخيمة مجتمعين ..
زياد ::/ طيب خلوا عبدالله يجيب له ولربعه انتم وش مشتهين ؟؟
ندى ::/ اصبر شوي أسألهم ؟؟
التفتت ندى للبنات اللي تمددوا عقب ما قامت عنهم وينتظرونها ترجع علشان يكملون ..
ندى ::/ بنات وش تبون عشاء ؟؟
سارة وهي تصرخ ::/ من اللي بيجيبه ؟؟
عذا وهي تضربها ::/ يعني احد متصل على جوالها وشكله ولد من تتوقعين ياذكية ؟؟
سارة وهي تناظر عذا بـ كره ::/ يعني زياد ...
صفقت لها عذا تطنز ::/ شــاطرة صفقوا لها كلكم ..
ندى ::/ بسرعة خلصونا وش تبغون ؟؟
سكتوا البنات يفكرون شوي بعدين قالت سارة ::/ انا مشتهية مشاوي ؟؟
ابتسمت عذا ::/ خلاص انا بعد مثل سارة ؟؟
ندى ::/ تبون شي معين ؟؟ والا اخليه هو يختار لكم ؟
عذا ::/ لا خليه هو يختار ؟؟
سارة وهي رافعة حاجبها بغضب::/ بس قولي له مو يخون ثقتنا فيه او يستغلها ويجيب شي ماينوكل ؟؟
عذا وهي تضربها على ظهرها ::/ترى زياد عنده ذوق يالدوبا ..
ندى وهي ترجع السماعة لأذنها وتلعب بحواجبها في وجه سارة::/عذا صادقة .. زياد ذويق خصوصا في المشاوي ؟؟
زياد اللي سمعها تنهد وندى تسمعه ::/آآآخ ياربي ..!
ضحكت ندى ::/ اثقل تكفى ... وبعدين سمعتهم صح ؟؟
ضحك زياد ::/ ايه سمعتهم خلاص ؟؟ وانتي ماتبين شي معين ؟؟
ندى ::/ لا تسلم بآكل معهم ..
زياد ::/ زين تآمرون شي ثاني ؟؟ والا في امان الله
ندى ::/ سلامتك .. مع السلامة ...
سكرت ندى عن اخوها وتوها بتلتفت ترجع للبنات الا ويرن جوالها مرة ثانية ..
تأففت سارة ::/ أففففففففففف الظاهر ماراح نخلص من جوالك اليوم ؟
ابتسمت لهم ندى ::/ يالله شوي وبرجع ..
شافت الجوال ولقته رقم سحر بنت عمها في تركيا .. شهقت وماصدقت خبر ..من متى وهي تحاول تتصل عليها علشان تعلمها بالأخبار السعيدة بس كان الجهاز مقفل ..
ردت عليها وهي متلهفة ::/ مرحبااااااااا بهالصوت ؟؟
ضحكت سحر ::/ ههههه هلا بك يالغلا ؟؟ وش اخبارك ندوش وش علومك ؟؟
ندى ::/ انا تمام ما أسأل الا عنكم ؟؟ انتم وش اخباركم وعمي وامك ؟
سحر ::/ حنا تمام وكل شي أوكي بس والله مانقصنا الا انتي وزياد ..
ندى ::/ معليش مرة ثانية ان شاء الله .. الا وينك يا حلوة من امس وانا اتصل ويعطيني مغلق ..
ابتسمت سحر ::/ وش اسوي كانت مخلصة البطاقة وماشحنتها الا تو عاد قلت اكلمك على طول لأني بقولك شي خطير ..
صرخت ندى ::/ لاتقووووولين .. حتى انا عندي خبر بمليون دولار ؟؟
تحمست سحر ::/ يالله قولي انتي اول وش خبرك ؟
ندى ::/ دريتي عن عبدالله ولد عمتي ؟؟
ضحكت سحر علشان تقهر ندى ::/ هاهاها بايته اخبارك ياحلوة .. عرفنا انه بيتملك نهاية الأسبوع الجاي وبيآخذ ريم بنت خالتي ..
شهقت ندى بقهر ::/ من قالك ؟؟ من الحيوان اللي سرب الأخبار ؟؟
ضحكت سحر ::/ صاحبة الشأن بنفسها قايلة لي لا ومن زمان بعد من يوم ماخطبتوها
ندى وهي تلوي بوزها ::/ وانا ساكتة كل هالفترة على بالي بسوي لك مفاجئة ؟؟
سحر ::/ طيب ماسألتي وش خبري أنا ؟؟
ندى وهي متحطمة ::/ يالله قولي وشو ؟؟
سحر ::/ لا لازم تتشجعين علشان أقول ؟؟
ندى وهي تصرخ ::/ هيه هيه ،، هيه هيه ...!!يالله تشجعت قولي ؟؟
ضحكوا عليها البنات اللي كانوا يسمعونها وضحكت سحر ::/ طيب اصبري شوي .
لفت ندى لمشاري اخوها اللي كان يراقبها ومبتسم ... وقالت ::/ مشاري عن أذنك شوي ؟
مشت عن مشاري وراحت لعمود الإنارة اللي قدامها على طول وهي تطالعه علشان لاتبعد عنه .. ابتسمت له وعطته ظهرها وهي تتسند ...
سحر بصوت واطي لندى ::/ أيوه ندوش معي ؟
ندى ::/ ماصار خبر يا سحر بسرعة حرقتي اعصابي ؟
سحر بنبرة فرح::/ طلال ؟؟
قطبت ندى جبينها وهي تلف بوجهها للجدار ::/ وش فيه ؟
سحر ::/ أول شي حنا متى بنرجع ؟؟
ندى بتملل ::/ بعد يومين ؟؟
سحر ::/ يعني اي يوم ؟؟
ندى بعصبية لأنها متحمسة :: /يعني الأحد الصباح
سحر ::/ حلو .. يعني يوم الأثنين في الليل بيجي طلال يخطبك ؟؟؟
فجرت القنبلة وسكتت ندى منصدمة وبلعت ريقها بصعوبة .. خلاص الحين كل شي صار جد في جد .. وبتصير زوجة طلال رسمي ؟؟ يعني يحق لها تسولف عنه قدام الكل وتكلمه وتعبر له عن كل شي كانت تحس به ناحيته من مراهقتها لشبابها ؟؟
سحر ::/ وينك وين رحتي ؟؟
ندى::/ معك سحر .. بس من جد مااصدق ؟؟
ابتسمت سحر وهي تشوف مشاري يستعجلها ::/ لا صدقي ويوم الأثنين كل شي بيكون رسمي هذا على كلام ريم وخالتي قالوا لنا امس.. ويالله مااطول عليك مشاري يستعجلني ..
ابتسمت ندى ::/ طيب يالله باي بس اصبري سحر .. لا تنسييييييييييين دواك ياشاطرة إكليه في وقته .. (( وركزت على كلامها هذا ))
عصبت سحر ::/ زين ياندى دواك عندي يوم أرجع بقول لأبوي يرفض طلال لا ومو بس كذا الا بخليه يزوجك مشاري وتشوفين بعد ..
صرخت ندى ::/ لا أرجوك لا تعاقبيني ؟؟ يرفضون طلال بكيفهم بحاول اتحمل لكن يزوجوني مشاري مستحيل .. وبعدين انتي وش فيك عصبتي كل قصدي اني خايفة عليك بس ..
ضحكت سحر ::/ ايه عارفة انك ماشاء الله تخافين علي .. ولاتخافين دواي من رحت وانا ما أكلته ؟؟
شهقت ندى ::/ يا مجنونة ترى والله من جد انتبهي لعلاجاتك .. انا عارفتك من تستانسين تنسين نفسك ..
ابتسمت سحر ::/ طيب ولايهمك بآكله علشان احضر زواجك انتي وطلال بس .. ويالله خسرتينا
ضحكت ندى ::/ أوكي باي ..
سكرت ندى عن سحر وهي تحس بنشوة السعادة في قلبها .. يآآآآآآآآه وأخيرا كل شي بيكون رسمي ؟؟ من متى وانا انتظر هاللحظة ... والله وكبرتي ياندى وكبر طلال وكبرت علاقتكم وبتتزوجون ؟؟؟ مشت للبنات وهي مبتسمة بسعادة والفرحة تتقاطر من عيونها مثل الدمعات .. جلست معهم وانتبهوا لها عذا وسارة ..
سارة ::/ وش عندك تتبسمين ؟؟؟
ضحكت ندى ::/ عادي .. البسمة في وجه أخيك المؤمن صدقة ..
سارة ::/ مو علينا ؟؟ يالله بسرعة اعترفي ..
ماحبت ندى توضح لهم ::/ والله من سمعت صوتها ارتحت كنت خايفة عليها من امس اتصل وجوالها مغلق ..
ابتسمت سارة بقرف ::/ الحمدلله انها طيبة ...
عذا ::/ وش سالفة علاجاتها ؟؟
ندى ::/ كنت متوقعة انها ماتاكلهم .. هي كذا اذا استانست والا انبسطت ولا حست بخفقان او شي تنسى علاجها ولا تآكله ..
سارة مستغربة ::/ طيب لازم تآكله حتى لو ما تحس بشي ..؟؟؟
تنهدت ندى ::/ لازمين مو لازم وحده .. لأنها لو ماكلته وتعرضت لموقف او نوبة ممكن تروح فيها لا قدر الله ...
عذا بحزن حقيقي على حالة سحر ::/ ياحياتي والله حياتها عذاب ..
ابتسمت ندى ::/ بس الحمدلله مع الأدوية والراحة النفسية ماقد تعرضت لنوبة من زمان ..
سارة ::/قد حضرتي نوبة قلبية لها ..؟؟
عقدت ندى حواجبها تتذكر ::/اممممم ما شفتها وهي تطيح لكن أتذكر لما رحنا لها في المستشفى .. (( سكتت شوي ))
هالنوبة كانت من سنة وشوي وقت عيد الأضحى مو اللي فات اللي قبله .. كنا في وقت الشتاء والدنيا مطر ..تتذكرون هذيك السنة اللي نزل علينا مطر شديد..
عذا ::/ ايه ايه ذكرتها ..
ندى ::/ ايووووه .. هذيك السنة حنا كنا معيدين في الليل عند خالة سحر .. ام ريم .. والكل مجتمع عندهم .. وسحر الزينة ماكانت جايبه أدويتها معها .. عاد حنا مارجعنا الا بوقت متأخر ... وكان زياد هو اللي مرجعنا ومعنا مرت عمي ... نزلناها عند البوابة وانا قلت لزياد يوديني لغرفته علشان ارتبها واناظرها له .. وجت معي سحر تساعدني ..
قاطعتها سارة ::/ ليه هي متعودة تدخل غرفة زياد دائما ..؟؟
انتبهت عذا لسؤال سارة واطالت النظر في ندى تنتظرها تجاوب على احر من الجمر
ندى ::/ لا مو دائما بس إذا نزلت أنا وهي عندي تخاويني ..
سارة ::/ ايوه طيب كملي ..
ندى تبتسم ::/ بس طلعت انا واياها مع درج غرفتي وراحت هي لغرفتها وانا ما صدقت خبر اشوف السرير نمت بهدومي ولافكرت في سحر او علاجها ..
المهم هي تذكرت انها ماكلت حبتها .. فغيرت ملابسها وراحت للصيدلية بتآخذ حبوبها بس مالقت شي فوق يعني لازم تنزل تحت تآخذ من اللي في صيدلية المطبخ .. وفي نزلتها رن التليفون .. قالت بترد عليه قبل لاتروح للمطبخ وهي ماحست بخطورة اللي تسويه لأنها ما توقعت ان شي بيصير لها ..
أول مارفعت السماعة كانوا الشرطة ... قالوا لها ان مشاري اخوها مسوي حادث وان سيارته دخلت تحت شاحنة وانهم نقلوه للمستشفى بين الحياة والموت ..
عاد هي ومشاري اخوها ... تحبه موت وتعتبره ابوها من كثر احترامها له وعلاقتها فيه .. ماقدرت تتحمل اكثر جاها ضيق تنفس بسبب حساسية صدرها وماكان معها الفنتولين وهي اصلا ماكلت حبة القلب فما حست بنفسها طاحت السماعة من يدها وهي تحارب الموت .. ماتقدر تتنفس وتحس بوخز إبر في قلبها .. ولاعاد قدرت تحرك جهتها اليسار أبداً .. طاحت على الأرض وطاحت السماعة جنبها ..
عذا نزلت دمعتها متأثرة وسألت بسرعة ::/ طيب وشلون دريتوا عنها ووش صار عقب كل هذا ؟؟
ابتسمت ندى من تأثر عذا ::/ بعد دقائق دخل مصعب وشاف سحر على هالوضع .. كانت هي يالله تتنفس ويدها على قلبها و مستندة على الكنب .. ركض لها مصعب وهو خايف ... وبكلمات بسيطة عرف مصعب ان مشاري فيه شي لكن مايدري وشو ..
نادى على عمي وهو يصرخ .. نزل عمي ومرت عمي و جاء زياد أخوي وتساعدوا كلهم وشالوها للمستشفى ..
سألتها سارة بسخافة ::/ يعني زياد شال سحر ؟؟
ضحكت ندى على اهتمامات سارة ::/ مادري والله بس يمكن ..
بلعت عذا ريقها وهي مركزة ::/ طيب كملي..
ندى ::/ راحوا عمي وامها وزياد للمستشفى أما مصعب فرجع يتصل على مشاري يشوف وش الخبر .. رد عليه الشرطي وقال له اللي صار ..
طلع مصعب وراح لأخوه .. وسحر تنومت يومها في المستشفى ولا صحت إلا عقب يومين ... واضطروا يخلونها في المستشفى لمدة اسبوعين ..
عذا ::/ طيب ومشاري وش صار عليه ؟؟
ابتسمت ندى ::/ هذا هو الحين عايش ماتسمعين عنه ؟؟
ضحكت عذا ::/ إلا بس وش صار عليه يومها ؟؟
ندى ::/ صار هو احسن من سحر .. صحى من غيبوبته وقرروا يسفرونه برا لكن هو مارضى الا لما يتطمن على سحر وانها بخير .. وبس عقبها سافر يعالج والحين هو ماشاء الله كأنه البخت .. لولا هالندبة اللي في جبينه بسبب قزاز السيارة اللي تكسر عليه ودخلت شظاياه في راسه ...
ابتسموا لندى .. وبانت في عيون عذا لمعة الحزن على حال سحر واللي تمر فيه ... لكن انتبهت انهم بدوا يلعبون فانخرطت في اللعب ونست الكلام اللي دار بينهم من شوي ..!!

..................................................
وقف سيارته قدام الباب ومد يده لدرج السيارة يآخذ منه الأوراق ..
تنهد لما رفع راسه وطالع باب بيتهم .. يإلهي للمرة الأولى يحس باشمئزاز من شوفة بيتهم ؟؟ ويحس نفسه مخنوق والغصة ذابحته ؟؟؟ بالعادة كان يتحجج بأي عذر بس يجي لبيتهم .. كان يستمتع لما يسمع صوتها او حتى يلمحها .. وكان يتلذذ أكثر لما تتصل عليه أو تطلب منه طلب ... يحس باعتمادها عليه وانها مالها غيره بهالدنيا بعد رب العالمين ... لكن هالمرة كل الموازين انقلبت وهي اللي قلبتها بسوايها ...
حاول يقسي قلبه وهو يآخذ نفس عميق ... شال الظرف بيده ونزل من السيارة ..

عبير وأريج كانوا طالعين بالحوش علشان يغسلونه .. لهم فترة مانظفوه ... وكانوا يلعبون ويستهبلون وصوتهم واصل لآخر الحارة ... يقدرون يعيشون حياتهم طبيعية بس في حالة عدم تواجد راكان في البيت ...
عبير ::/ أريج يالدوبا ترى والله لأوريك .. بعدي عني الموية ؟؟
أريج وهي مستانسة وترش اختها بالموية ::/ إذا انتي عبير بنت ابوك فكي عمرك ؟؟
عبير وهي تحاول تتفادها وتركض ناحيتها ::/ تشوفين والله لأبهذلك بس خليني أمسك الخرطوم ..
أريج وهي تركض على ورى ::/ وبتحبوا مين .. ؟؟عبورة // حبيبة الملايين ؟؟ عبورة ..
عبير وهي تضحك ::/ يالله عاد خلاص خلينا نشتغل ترى أمي بتعصب ..
سكتوا كلهم ونزلت أريج خرطوم المويه لماسمعوا صوت دق على الباب .. التفتوا يطالعون بعض وبعيونهم نظرات استفهام ...
طلعت أنوار من البيت تركض علشان تفتح بس مسكتها أريج مع رقبتها ..
أريج ::/ تعالي تعالي وين رايحة ؟؟
أنوار بقلة صبر ::/ بفتح الباب ؟؟
أريج ::/ من عنده ؟؟
أنوار ::/ نواف ولد عمي ..
تشنجت أطراف عبير والمكنسة كانت بتطيح من يدها لو انها ماتدراكت عمرها ومسكتها ...نزلت أريج نظرها عن عبير وطالعت في انوار ..
اريج ::/ طيب ما قال وش يبغى ؟؟
انوار ::/ لا بس يقول افتح معي اغراض ..
تركتها اريج ::/ يالله روحي بسرعة ..
نادتها عبير بعد ماصحت من صدمتها ..::/ أنوار لحظة شوي بجي معك ..
مشت عبير مع انوار ولحقتهم أريج ووقفوا عند الباب ،، فتحته انوار ووقفوا البنات ورا الباب ..
نواف وهو مبتسم ::/ مرحبا بالحلوين ..(( وقرص خدها ))
انوار مستحية ::/ مرحبا فيك ؟؟
نواف::/ وش تسوون برا ؟؟ أسمع اصواتكم من هنا ..
انوار ببراءة ::/ لا مو احنا هذولا أريج وعبير يغسلون الحوش ..
شهقت عبير وحطت يدها على فمها مستحية أما اريج عقدت حواجبها وصرخت ::/ انوااااااااااااااااار ..
ضحك نواف لما عرف انهم وراء الباب وفي نفس الوقت حس بتنفسه يتزايد وضربات قلبه تتسارع من حس انها قريبة منه وانها تشوفه لكن هو مايشوفها ...
قرب ورقى درجات البيت ودخل وصار الباب حاجز بينه وبينهم ..
نواف برسمية ::/ السلام عليكم ..
سكتت عبير وماقدرت تحرك لسانها .. لكن الحمدلله ان اريج موجودة وانقذت الموقف ::/ هلا وعليكم السلام ..؟ وش اخبارك نواف..
نواف::/ بخير الله يسلمك ... (( مد يده وفيها ظرف لورا الباب وهو يقول))::أريج ترى هذا طلبك اللي بغيتيه .. بطاقة جوال مدفوعه زي ماقلتي لإيمان ..
مدت أريج يدها فرحانة ::/ مشكور يا ولد العم .. والله انك قدها وقدود ..
ابتسم نواف ::/ وش دعوى يعني من قبل ماكنتي تشوفيني قدها ؟؟
انحرجت اريج ::/ لاعاد مو لهدرجة .. بس أول كنت اشك لكن الحين متأكدة ..
نواف ::/ عرفتي تنقذين نفسك .. !! المهم انا بسأل عن علاج الوالدة ؟؟ يعني هي عندها اللي يكفيها والا لا ؟؟
عقدت أريج حواجبها لأنها ماتدري وطالعت عبير وشافتها سرحانة وكأن العبرة خانقتها ... نغزتها من ظهرها علشان ترد ..
بلعت عبير ريقها وقالت ::/ ليش مالقيت العلاج ؟؟
سكت نواف وهو يسمع صوتها يرن بأذانه ؟؟؟ ليه تردين علي ؟؟ ليه تقلبين علي المواجع ؟؟ كان أسهل لي لو تعاملت مع أريج على طول ورحت من دون مااشوفك او اسمع صوتك حتى ما تنفتح جروحي اللي مابعد اندملت للحين ..
رفع نظارته الشمسية وهو يقول ::/ لا .... بس صيدلية المستشفى يقولون اراجعهم بعد يومين وبحصله عاد قلت بشوف إذا الوالدة ماعندها اللي يكفي آخذه لها من صيدلية عادية لحد مايصرفونه لها المستشفى ..
ردت عليه عبير بسرعة من دون ماتفكر ::/ لالا مشكور لاتجيب شي عندها اللي يكفيها ... بس انت لاتتعب عمرك ..
سكت نواف وهو يحس بشي داخله يتحرك مايدري قهر والا ألم وفي خاطره (( أدري ان عندك مصادرك ومانتي بحاجتي))::/ على راحتكم .. يالله فمان الله ..
دفت عبير الباب ::/ مع السلامة ..
سكروا الباب ووقفت أريج في مكانها وكأنها تفكر ..و وقفت عبير مواجهتها وحركت يدها قدام عيونها ..
عبير ::/ أختي العزيزة وين وصلتي ؟؟
أريج بنبرة حزن ::/ خسارة يا عبير .. تغير علينا نواف .. والا قد سمعتيه يطلع قبل لايقول توصون شي والا تآمرون شي ؟؟ والا عمرك شفتيه مايلقى حاجتنا في مكان ويجي يشاورنا اذا يشتريه لنا والا لا ؟؟ كان من دون ما يشاور على طول يروح يجيبه وخلاص .. لا ووفوق هذا ما اصر انه يشتريه قال براحتكم ...
سكتت عبير وماردت على أختها وفي نفس الوقت كان وجهها جامد وخالي من اي انفعال او تأثر ..
كملت أريج ::/ ياخسارته حتى هو حيلتنا بهالدنيا تغير علينا ... كله بسببك ..
زفرت عبير بعصبية ::/ أوووو ه أريج خلاص .. أصلا حنا مانحتاج أحد ... الله كافينا عنه وعن غيره .. خلاص عاد لاتزيدينها .. وبعدين هذا هو جاب لك اللي تبين وبيجيب لأمي علاجها من المستشفى يعني لاتغير ولا شي بس انتي تتوهمين ...
مشت عبير وهي تسرع بخطواتها علشان تستولي على الخرطوم ..
لكن صرخت لها أريج ::/ تواسين نفسك والا تواسيني ..؟؟
ابتسمت عبير بخبث ولفت على أريج بخرطوم المويه وبدت ترشها فيه وأريج تركض عنها وبدوا يتلاحقون لما نست اريج السالفة ورجعوا لشغلهم وهم شبه مرتاحين ...!

.................................................. .........
في اليوم الثاني على الغداء جلسوا ام عبدالله والبنات يتغدون بروحهم بينما العيال في المجلس يتغدون بروحهم لأن زياد كان معهم .. وندى موجودة ..
ندى ::/ عمه ترى اليوم بعد العصر بروح بيت رحاب ...! بعد أذنك ؟
ام عبدالله وهي تشرب مويه ::/ ليش وش عندها تروحين لها ..
استحت ندى من عمتها أول مرة تستأذن من أحد غير زياد لكن وش تسوي أخوها هو اللي اجبرها تستأذن منها كونها جالسة معهم في بيتهم ...
ندى ::/ غادة بنت عمها راجعة من شهر العسل و بتجيهم اليوم عاد عزمت الشلة ..
سارة بحماس ::/ أريج صديقتكم بتجي ؟؟؟
استغربت ندى من حماس سارة ::/ إن شاء الله بتجي بس ليه تسألين ؟؟
صفقت سارة يديها في بعض::/قهــــــــــر ... ليت لميس مو جايتني اليوم كان رحت معك ... والله خويتكم ذي فلة .. تجنن..
عذا وهي تطالع سارة بتعجب::/ والله أشك انك بنت ؟؟ الظاهر انتي مشروع ولد فاشل ..
ام عبدالله ::/ عذا ...!!
عذا ::/يمه ماقلت صارورة .. انا قلت انتي مشـ ـ ـ
قاطعتها ندى ::/ هههههه الله يالدنيا صارورة .. من زمان ماناديناك بهالأسم ..
سارة بقهر ::/ يمـــه شوفي وش يقولون هاوشيهم ..
ابتسمت ام عبدالله وهي تقوم ::/ خلاص يابنات انضبطوا ..
ندى قبل لاتروح عمتها ::/ عمة وش قلتي اروح ؟؟
لفت لها ام عبدالله ::/ براحتك حبيبتي .. بس من بيوديك ؟؟
ندى ::/ زياد اخوي ..
هزت راسها ام عبدالله بإيجاب ومشت رايحة للمطبخ ... واقبلت عليهم ميري تشيل باقي الغداء ..
ندى ::/ عذا ليش ماتروحين معي ؟؟
عذا بتردد ::/ لا أستحي ؟؟(( وهزت بكتوفها)) مادري وشلون ؟؟
ندى ::/وش تستحين منه الله يخليك كلهم غادة ورحاب وانتي عارفتهم وأريج شفتيها هذاك اليوم ببيتنا ...
نزلت عذا راسها ::/ لالا .. مااعتقد اروح ..
زمت ندى بوزها ::/ براحتك .. كان ودي تروحين معي تستانسين ..
ابتسمت عذا ::/ ماتقصرين بس معليش مااستعديت أروح لناس .. كنت مقررة اننا نطلع سوق والا شي مع بعض .. بس يالله ماحصل ..
ندى ::/ ليه وش عندك في السوق ؟؟ حاجة ضرورية ..؟
عذا بخجل ::/ ودي آخذ لي لبس لملكة عبدالله ..
شهقت ندى ::/ عمى ..!! الحين ما بقى شي على ملكة أخوكم وبعدكم ما تجهزتوا ؟؟
سارة وهي رافعه حاجبها :::/ أنا خالصة .. بس عذا ما عندها شي جديد ؟؟
ندى وهي تطالع عذا ::/ خلاص انا بروح لرحاب الى صلاة المغرب بصلي هناك وبعدين بقول لزياد يمرني ونجي نآخذك ونروح للسوق وتدورين لك على لبس،،زين؟؟
عذا وهي مبتسمة ::/ يعني عادي مو تعب عليك ؟
ندى ::/ وش دعوى ... مادام السالفة فيها سوق لا تخافين حتى التعب يزول .
تنفست عذا براحة .. من قامت الصبح وهي شايلة هم ومستحية ماتدري وشلون تقول لندى تروح معها للسوق .. كان ودها بندى اللي ترافقها لأنها تحس بذوقها حلو وكشيخ .. يعني بتختار لها فستان راقي وساعتها ماراح تستحي يوم الملكة مثل ما سوت يوم حفلة النجاح ..
رن التليفون ونقزت عذا علشان ترد عليه .. اما ندى فمشت راكبه الدرج طالعه فوق علشان تتجهز ... كانت سعاد بنت جيرانهم هي المتصلة تستفسر عن لمياء ليه ما ترد على جوالها ...
استغربت عذا ::/ والله مادري عنها يا سعاد ..يمكن نايمه والا شي .؟
ابتسمت سعاد ::/ انا كنت ابغاها تجي لبيتنا اليوم .. لأن البنات كلهم مجتمعين .. بس يالله ماحصل اقول لها مباشرة .. عاد لا أوصيك اتصلي عليها الحين ووصلي لها كلامي وقولي لها تراني انتظرها ببيت اهلي .. زين ؟؟
ابتسمت عذا ::/ خلاص بتصل عليها وأقول لها ولايهمك ..
سعاد ::/ زين مااطول عليك عذا تآمرين بشي ؟؟
عذا ::/ سلامتك ...
سعاد ::/ يالله زين مع السلامة ..
عذا ::/ مع السلامة ..
سكرت عذا عن سعاد وقلبها مآكلها على لمياء ,, وفي لحظة طرى على بالها وتذكرت ان اليوم موعدها مع الدكتورة ..؟؟
رفعت عذا راسها للسماء وهي مغمضه عيونها بأسى لأنها تقريبا وصلت للسبب اللي مخلي لمياء ماترد على الجوال ...
راحت تركض فوق تبي تكلمها من غرفتها بعيد عن اللي في البيت علشان مايتكدرون من اللي فيها ،، و بتشوف وش صار عليها ووش فيها ؟؟؟؟ ووش قالت لها الدكتورة ؟؟

دخلت هي لشقتها باندفاع وهي تصيح وتشهق من شدة الصياح .. حتى ان مهند ولدها كانت مرسومة في عيونه نظرة الخوف .. يمكن على أمه واللي قاعد يصير لها .. أو الأكيد انه خوف منها ومن اللي قاعده تسويه ...
مشت تركض لغرفة النوم وسكرت على نفسها الباب بالمفتاح .. كانت منهارة و دموعها حفرت اخدود على خدها من كثر ما صاحت في السيارة وعند الدكتورة ..
سمعته يدق عليها الباب بهدوء ..
فهد ::/ لمياء .. علشاني افتحي الباب خلينا نتكلم ؟؟
لمياء في وسط شهقاتها ::/ فهد تكفى روح ما أبغى اكلم احد ولا أبغى اسمع صوت احد ،، اتركني بروحي الله يخليك ..
تنهد فهد بصوت مسموع ::/ لمياء لاتكدرين خاطري زود .. افتحي خلينا نتفاهم الحين وبسرعة (( قالها بصوت مرتفع شوي))
تحسست لمياء من كلمته (( لاتكدرين خاطري زود )) ...!! ++ يعني انت اصلا خاطرك متكدر من زمان ... من يوم ماقالت لي الدكتورة الخبير الشنيع ؟؟؟ يعني انت متضايق اني ماراح اجيب لك عيال ؟؟؟ ...!!ماتوقعتك يافهد بتقولها في وجهي من دون ماتسوي اعتبار لمشاعري المجروحة ...!
ردت عليه لمياء بانهيار ::/ قلت لك مارااااااااااااااااااااااااااح افتح يعني ماراح افتح ،،،، روح انت من عند الباب لأطلع كل حرتي فيك وبعدين اندم ... روح يافهد اطلع ... تكفى يافـ ـ ـ يا فهد ..
ما قدرت تكمل الكلمة بصوت عالي بلعت نصفها و رمت نفسها على السرير منهارة وعبايتها عليها ماشالتها ... حضنت المخدة وخلتها ترتوي من دموع الألم اللي نزلت من عيونها علشان تعبر عن الحرقة اللي بقلبها ...
كان جوفها شاب نار وصدرها متقطع من كلام الدكتورة ...
شعور صعب وقاسي لما تنام على أمل وتصحى على وعد لكن في لحظة كل شي ينهد ويطيح .. وكأن موجه عاتيه مرت على شاطئ و خذت معها كل اللي بطريقها لما انسحبت ....
++ كنت أنام وأقوم وأنا أقول بكرة إن شاء الله بتفرج .. كل يوم أشوف فيه الشمس وأسمع ضحكة مهند أقول مستحيل ربي يخيبني أو يكسر بخاطري .. والله أرحم بعباده ولابد يجي اليوم اللي يبشروني فيه بحملي ...
لكن اليوم كل شي انهار وكل آمالي تحطمت ولا بقى لي منها ولا أنقاض ... كل شي راح وانتهى ... واليأس تسلل لقلبي وما أظن انه بيفارقني ولا حتى بعد فترة وهذا كله بسبب كلام الدكتورة ..
ليش طيب كل هذا ؟؟؟ أنا كنت اعاني في كل ليلة بسبب الأدوية اللي آخذها وكنت منتظمة عليها ولا عمري فوت وقتها،، كنت اموت في كل لحظة يسوون لي فيها كشف والا أشعة ... كنت أتعب وأتعب وأتعب ومحد حاس فيني .. وبعد هذا كله تجي حضرتها وتقول لي كلمتين أسهل من نطقهم ما فيه لكن وقعهم في نفسي كان مثل الفاس يوم يآكل وسط الشجرة ويحطمه ... ++
غمضت عيونها بألم والدموع مغرقة وجهها ... لكن نقزت لما سمعت صوت الجوال يرن للمرة الثالثة على التوالي ... تعرفت على الرنة ... وهي فعلا الشخص اللي محتاجته هاللحظة ... +++ يارب أنها تكون أمي يارب +++
طلعت جوالها من الشنطة وشافت اسم عذا يأشر ... ابتسمت بشحوب وردت عليها ...
عذا وهي مو مصدقه ان لمياء وأخيرا ردت ::/ لمو وينك ؟؟ وش فيك ليش ما تردين علي من متى وانا اتصل بك ؟؟
حاولت لمياء تمسك عبرتها ::/ كنت تعبانة شوي وما سمعت الجوال..
تنهدت عذا بصوت مسموع ::/ رحتي لموعدك اليوم ؟؟
ماقدرت لمياء تتماسك وانهارت مرة وحده ::/ رحت وياليتني مارحت ... والله اني قايله لفهد ما ابغى اروح بس هو أصر علي إلا لازم أروح وأشوف وش صارت النتائج ؟؟؟؟ كل منه هو .. هو السبب لو اني مارحت كان ما سمعت كلامها السم اللي قالته لي وحطمت آخر أمل يسري بعروقي ...
حاولت عذا تتماسك علشان اختها ::/ لمو الله يخليك أهدي واذكري الله ...
سكتت لمياء وماردت عليها وماكنت عذا تسمع الا صوت شهقاتها
عذا باصرار ::/ لمياء اذكري الله ...
لمياء بصعوبة ::/ لا إله الا الله ..
خذت عذا نفس عميق ::/ لمياء انتي انسانة مؤمنة بالقضاء والقدر واللي الله كاتبه على عبده ؟؟؟ ترى اللي تسوينه لا يرضي الله ولا يرضي خلقه ؟؟؟ معقولة انتي العاقلة الفاهمة المتعلمة تتذمرين من شي الله كتبه عليك من وانتي في بطن أمك ...؟؟
لمياء تقاطعها ::/ لكن ياعــ ـ ـ
قاطعتها عذا ::/ لمياء مهما كان الكلام اللي قالته لك الدكتورة صعب ان الواحد يتحمله فأنتي لازم تؤمنين ان الأطباء مافي يدهم شي ؟؟ لاحياة ولا موت وكل شي بيد رب العالمين ؟؟؟ وهالدكاترة ماهم إلا أسباب أوجدها ربي علشان يتم المكتوب .. ؟؟
لمياء فهمتيني ؟؟؟ الله هو المسبب وهو اللي بيده يرزقك اطفال وبيده يحرمك منهم ؟؟ وهالدكتورة مابيدها لا حل ولاربط ؟؟ كل اللي عليها انها تساعدك لكن لو الله كاتب انك تحملين فأنتي بتحملين حتى لو هي ماساعدتك ..؟ ولو كان كاتب انه مالك ذرية غير مهند فصدقيني حتى لو رحتي لأكبر أطباء العالم ماراح يفيدونك بشي ....

سكتت عذا وهي تتنهد .. وتنتظر لمياء ترد عليها .. لكنها ما سمعت جواب ولا سمعت رد ... حاولت تمسك دمعتها اللي على وشك النزول بسبب وضع أختها ..
عذا ::/ لمو وش قالت لك الدكتورة ؟؟
لمياء اللي كأنها هدت شوي بعد كلام عذا ::/ تقول ان جسمي بطئ في تقبل العلاج وهذي بوادر سيئة .. لأن البرنامج اللي هي مسويته لي بسيط والمفروض استجيب له بسرعة ... ؟
عذا ::/ المعنى ؟؟
لمياء ::/ تقول بحاول أكثفه لك لكن ما اقدر ننتقل لمرحلة ثانية وانتي حتى هالمرحلة مااستجبتي لها ..
عذا ::/ سألتي عن طفل الأنابيب ؟؟
بلعت لمياء غصتها ::/ تقول مو وقته الحين لأن نسبة نجاح العملية للي في مثل وضعي ضعيفة .. فتقول الأفضل اننا ندخرهالعملية لوقتها المناسب ولانضيع عليك آخر فرصة .
عذا مبتسمة ::/ شفتي أن ربك كريم ... يعني هي ماقطعت الأمل مرة .. تقول لك فيه أمل لكن ضعيف .. وأنتي لازم تتمسكين فيه يالمياء حتى لو نسبة هالأمل نص بالمية ..
ابتسمت لمياء من خاطرها ::/ مشكورة عذا .. ياحبي لك ماتوقعتك كذا ؟
ابتسمت عذا وهي تمسح دمعتها ::/ المهم فهد ومهند وينهم ؟؟
لمياء ::/ مادري عنهم انا جيت منهارة سكرت على نفسي الباب وماعاد ادري عن شي ..
عذا ::/ شكلك حتى العباية ماشلتيها صح ؟؟
ضحكت لمياء وهي تطالع نفسها ::/ صح ...!! وش دراك ؟؟
عذا تضحك ::/ أختي وفاهمتها ... (( قالت بتشجيع )) لمياء اسمعيني زين لا تحاولين تبعدين فهد عنك ... ترى اللي تسوينه غلط ..! المفروض تحسسينه بمسؤوليته من هالناحية وانه لازم يوقف معك في محنتك ... حبيبتي عطيه فرصة يوقف جنبك ويواسيك .. ترى مو معقولة كل ماصارت مشكلة يا تجين عندنا والا تقفلين على عمرك
فهمتي قصدي ؟؟
لمياء وهي تهز رأسها بالإيجاب ::/ فهمت ياحلوة ..
ضحكت عذا ::/ المهم ترى سعاد متصله وتبغاك تجين لبيتهم وش قلتي ؟؟
لمياء بتفكير ::/ ما أظن أروح .. إلا إذا بتروح وحده منكم معي أوكي ماعندي مشكلة ..
عذا ::/ لا أنا ما أظن وسارة بتجيها لميس لكن ندى بتروح لهم الحين ..
لمياء ::/ لا الحين انا ما اقدر على بالي لو اروح لها اروح بعد المغرب ؟؟
عذا مبتسمة ::/ لا بعد المغرب ما اظن تروح ندى ..!! متفقة أنا واياها نطلع للسوق ..
ابتسمت لمياء ::/ ماشاء الله من وراي ؟؟
عذا::/ وش اسوي بروح اشتري لي فستان .. المهم توصين شي أمي تناديني ..
لمياء ::/ سلامتك وسلمي على أمي والبنات ..
عذا::/ أوكي باي ..
سكرت لمياء عن عذا وتنهدت من قلبها وهي تطالع شاشة الجوال .. ما تدري وش حصل لكن عذا صحت في خاطرها شي كانت غافلة عنه اللي هو قوة الإيمان بالله وحسن الظن فيه ...
مدت يدها بتحط الجوال على الكومدينو وطاحت عينها على صورة فهد وهو جالس على ركبه وقدامه مهند وكان وراهم البحر ... ومهند وفهد مبتسمين والفرحة تشع من عيونهم ...
شالت الصورة بين يديها وانغمرت عيونها دموع من دون ماتحس ... مررت أصبعها على الصورة وكأنها تحدد وجه فهد ...
++ ياربي أحبه وما اتمنى له إلا كل خير ... ليتني أقدر أسعده ليت ؟؟ ليتني أقدر أجيب له بنوته حلوة يفرح فيها ... ليتني على الأقل ماجبت مهند وجبت له العنود .. اللي كان يتمناها من أيام خطوبتنا وكان يقول لي ابي اسمهيا العنود رضيتي والا مارضيتي مسميها العنود يعني مسميها ... ++
استحقرت نفسها لماشافت مهند وهو يضحك مع أبوه ،، وشلون جاء في خاطرها أصلا انها تتمنى لو انها ما جابته .. حضنت الصورة بكل قوتها وهي تردد (( والله اني احبكم انتم الأثنين ومادري وش حياتي بدونكم ))
وعاها صوت مسج واصلها .. مسحت دموعها ونزلت الصورة ورفعت الجوال .. لقتها من فهد .. ابتسمت بعذوبة وهي تفتحها وكان كاتب(( حياتي ،، انا ومهند طلعنا للسوبرماركت .. مهند كان يصيح وخايف عليك فقلت اطلع انسيه شوي // ودي أرجع واشوفك تنتظرينا برا الغرفة ... إذا مو علشاني علشان مهند ...))
اابتسمت وهي تمسح الرسالة وقامت من على السرير وشالت عبايتها .. وتوجهت للحمام غسلت وجهها بماء بارد علشان يخف الإنتفاخ لاحظت وجهها بالمراية وهو ذبلان من كثر الدموع وعيونها صايرة حمرا وخدودها على اللون الوردي وشفايفها صارت قرمزية ... كله بسبب هالصياح والحالة النفسية الشينة ...
طلعت وغيرت ملابسها ببيجامة حرير بسيطة وطلعت للصالة تنتظرهم ...!
فتحت التلفزيون علشان تلهي نفسها شوي لحد مايجون ،، لكن هي وين والتلفزيون وين ؟؟ تنهدت وحطت الريموت جنبها وسندت راسها على الجدار اللي وراها وغاصت من دون ماتحس في بحور التفكير والخيال والأماني ... وعت على نفسها لما سمعت باب الشقة يتسكر ... عدلت جلستها وحاولت ترسم إبتسامة حلوة على وجهها ... سمعت مهند وهو يكلم أبوه ...
مهند ::/بابا إذا عتيت مامي حلاوة خلاص ما عاد تصيح مرة ثاني ؟؟
ابتسم فهد لولده ::/ إن شاء الله ... انت قول يارب انها ماتصيح ثاني ..
مهند ::/ طيب أقول ... بس وشون أعتيها الحلاو وهي ما تفتح الباب ..؟؟
فهد ::/ لا الحين ندق عليها ونقول لها ياماما لو سمحتي احنا جبنا لك حلاوة معليش تفتحين الباب علشان تآخذينها ؟؟
مهند ::/ وبعدين هي تفتح وماتقول لا ؟؟ أكيد ؟؟
ابتسم فهد لمهند وأشر له على الكنبة أول ما دخلوا الصالة علشان يشوف من قاعد عليها ،،، التفت مهند على المكان اللي أشر له أبوه وشاف أمه جالسة وتبتسم .. ماقدر يقاوم بدء يدف ابوه على صدره يبي ينزل علشان يروح يرمي نفسه بحضن أمه اللي ما صدق شافها تبتسم ومو حابسة نفسها بالغرفة مثل ماتوقع ..
ضحك فهد على ولده ونزله للأرض ،، وماصدق مهند ركض لأمه وهو ماسك الكيس بيده ,, وقف قدامها وأطال النظر بعيونها كأنه يبي يتأكد إذا هي تصيح والا خلصت ..
ابتسم لما ما شاف الدموع بعيونها .. فتح الكيس على طول وبدء ينشر أغراضه ..
مهند ::/ مامي توفي دبت لك حلويات كسيرة
ابتسمت لمياء ::/ والله ...
مهند وهو متشقق ::/ إيه والله ،، خذي ...
وبدأ يعطيها كل اللي اشتراه لها وهو يبتسم .. نزلت الدمعة من عين لمياء من دون ماتحس فيه ،، شافت حركات مهند لها وخوفه عليها .. وانتبهت لفهد اللي جلس جنبهم وكان يراقب حركاتها وحركاته ........
مهند وهو مبوز ::/ مامي ..؟ حلوياتي مو حلوة ؟؟
مسحت لمياء دمعته ::/ لا حبيبي ..حلوياتك أحسن شي بالعالم كله .. ((وابتسمت ))
مهند ::/ أدل ليش تسيحين ؟؟
لمياء وهي تأشر على فهد ::/ هذا الدوبي يآكل حلوياتي ..؟
طارت عيونه فهد في لمياء ::/ أنا آكلهم ؟؟ لا اقلبي الولد ضدي ؟؟
لمياء بخبث ::/ شوف مهند ترى هذا الولد اللي مو حلو (( وتأشر على فهد )) هو ضربني وقال لي لا لا تشترين حلويات .. انا ما احبه ..
ضحك مهند ::/ ماما هذا ما أسمه ولد هذا أسمه بابا
لمياء ::/ طيب يالله روح اضربه علشان مرة ثاني يشتري لي حلاو ؟؟
احتار مهند وهو يطلع بين أمه وابوه .. لكن فهد استغل الفرصة ؟؟
فهد ::/ مهند حبيبي بابا مسكين .. هو اللي راح معاك السوبرماركت علشان تشتري حلاو ... وماما ماراحت ولا حاجة بس جالسة بالبيت وتصيح .. (( والتفت يطالع لمياء ))
مهند ::/ ماما معليش نسامحه االحين وبعدين نضربه .. طيب ؟
لمياء مبستمة :/ خلاص طيب ..
وقف فهد وهو يرمي الغترة على الكنب ويمدد يديه وكأنه يتمغط .. ::/ أبروح اتحمم ...
ابتسمت له لمياء وعطاها هو ظهره متوجه للحمام ... وعيونها مانزلت عنه ولا دقيقة كانت تراقبه لحد ما دخل للحمام وسكر الباب وسمعته يقفله ...
وعت لمهند اللي طلع جنبها وانسدح على رجولها .. شافته يحوس في الريموت وسحبته من يده ..
مهند ::/ ماما حتي سبيس تون ..
ابتسمت لمياء وهي ترجع تسدحه مرة ثانية على رجلها ::/ إن شاء الله بس نام انت ..
بدت تلعب في شعر مهند اللي منسجم مع البرنامج في التلفزيون .. كانت عينه كل شوي تغفي وتغمض لحد ما نام ... انتبهت لمياء انه نام كان ودها تقوم تشيله للغرفة لكن عجزانه وتحس نفسها متكسلة ..
نزلت راسها له وباسته على جبهته وغيرت القناة ...
بعد دقائق دخل عليها فهد الصالة والفوطة على رقبته وشكله توه طالع من الحمام .. جلس على الكرسي اللي جنبها وهو منزل راسه وكفوفه في حجره .. التفتت له لمياء لما حست بوجوده وشافت وضعه .. تحرك قلبها ناحيته وحست بعمق مشاعرها ناحية هالإنسان الرائع اللي ذاقت طعم الحياة على يديه ،،، لكن في لحظة بدت مشاعر اليأس والحزن تتمكن منها ... حاولت تقاومها وتبعدها لأنها قرت في عيونه كلام يبي يقوله لكن ينتظر الفرصة المناسبة ,, أو انه مايدري وشلون يبدأ الموضوع ..
فحست انه من الأفضل انها ماتطالعه علشان ماتضعف وتصيح وتخرب عليه ..
لفت وجهها للتلفزيون وهي تفكر بالكلام اللي ممكن يفاجئها فيه فهد .. هل بيكون دعم لموقفها او اقناع لها انها توقف علاج ... اخذتها التفاكير وما انتبهت الا لما سمعته يناديها ..
فهد وهو على نفس الوضعية ::/ لميــاء ...!!
تنهدت وحاولت تمسك نفسها ::/ هلا ..
فهد ::/ لمياء ترى اللي تسوينه بنفسك مايعجبني أبد ومستحيل أسمح لك مرة ثانية تسوينه ... باختصار إذا كنتي بتنهارين مع كل روحة للدكتور فخلاص انسي اننا نروح مرة ثانية ... وانسي فكرة العلاج ...
انصدمت من كلامه ونزلت الريموت من يدها ::/ المقصود ؟؟..
تنفس بعمق ::/ لمياء لاتفهمين غلط ... انا اللي مايرضيني هو حالتك النفسية بس ..
أما لو على علاجك فأنا مستعد أوقف معك لنهاية الدنيا ... حتى لو قالوا لنا ان علاجك ما ينوجد إلا بآخر العالم فثقي اني مستعد أوديك لهالمكان مادام فيه سعادتك وراحتك ..
لكن إذا بتستمرين على صياحك ويأسك فاسمحي لي انا ما اقبل بخسارتك بأي حال من الأحوال ...
صاحت لمياء وهي ماكانت تتوقع انها بتصيح .. لكن قواها خارت وماعاد قدرت تتحمل أكثر ..::/ وش اسوي يافهد قول لي ؟؟ وشلون ماتبيني اصيح وانا اسمع كلام الدكتورة اليائس ... قلي وشلون ماتبيني اصيح وهي تقول لي ماعاد بتصيرين ام عقب مهند ..قـ ـ ـ ـل قل لي ..
رفع فهد عينه لها وشاف انهزامها وصياحها .. ودموعها اللي حس بها خنجر تطعن في صدره ... ماقدر يمسك عمره قام من مكانه وراح جلس جنبها على الكرسي .. حاول يحسسها بوجوده جنبها لكن هي ما تدري باللي حولها كانت تصيح وتصيح وتصيح وكأن كل شي رجع لها من أول وجديد .. مسح بيده على شعره المبلول محتار كيف يتعامل معها ويهديها وهو محتاج اللي يهديه ويريح قلبه ....!
بلل شفايفه واستسلم لمشاعره وقرب منها وأخذها في حضنه وهو يمسح على شعرها ... ماقاومته لمياء لكن استسلمت له وشدت قبضتها على صدره وزادت شهقاتها لما حست بحنانه اللي عودها اياه ..
لمياء وسط شهقاتها ::/ وانت وش رايك ..؟
ابتسم فهد ::/ أنا مؤمن بالقضاء والقدر .. واللي كاتبه ربي لي انا راضي فيه ... بس انتي اهدي الحين ...
حاولت لمياء تمسك دموعها خصوصا لما حست انها زودتها وغرقت بلوزة فهد بالدموع .. حست بالراحة وهي قريبة منه وعلى صدره ... حست بالأمان وهو جنبها وشعور الأمل كأنه بدأ يرجع لها من جديد .. ماحاولت تقوم من مكانها إلا تمسكت فيه أكثر وكأنها تنشده القوة والثبات ..
همس لها فهد ::/ لمياء أهم شي انتي ترتاحين وهذا المهم عندي ..
لمياء ::/ بالله عليك انت مرتاح على هالوضع ؟؟
فهد ::/ احمدي ربك على النعمة يا بنت ... وبعدين وشلون ماارتاح وانا مرضي الوالدين واخواني كلهم بصحة وعافية وعندي ولدي اللي يسوى عيوني وأكلي وشربي من حلال .. قولي لي فيه احد عنده كل هالنعم وما يرتاح ؟؟ (( وابتسم بخبث ))
رفعت لمياء راسها تواجهه وهي رافعه حاجبها ::/ بس ؟؟؟ هذولا اللي يهمونك ؟؟ ومرتاح من راحتهم ..؟
فهد وكأنه معصب ::/ لمياء لا تصيرين طماعة .. هذولا يعتبرون نعمة من رب العالمين ورضاهم وراحتهم هي نص راحتي ..
ضربته لمياء في صدره ::/ وانا ؟؟؟ والا مو محسوبة منهم ؟؟
فهد هو يمسد ضربتها ::/ آي .. توجع يا دوبا ماتوقعتك عنيفة ..؟؟
لمياء ::/ لاتغير الموضوع ؟؟؟ إذا أنا ما أهمك أجل من هي اللي تهمك وتخاف عليها ؟؟
ضحك فهد ::/ كل اللي عديتهم لك من شوي هم اللي يهموني ..(( ونزل عيونه)) وعروسي الجديدة ....!!
تهورت لمياء وعضته مع يده اللي كانت على كتفها وقامت بسرعة وهي ناسية مهند اللي كان نايم على رجلها ..
فز مهند مفزوع لما قامت أمه وهو طاحت رقبته على الكنب.. طالع حوله وعيونه شبه مغمضة ...
شهقت لمياء لما ذكرت وشافته ،، عضت على شفايفها ورجعت لها وبدت تطبطب على ظهره لحد مارجع للنوم مرة ثانية ...
قامت من عنده وطالعت في فهد اللي بدأ يقلب القنوات .. مشت ووطت رجله متعمده ودعست عليها بقوة ..
فهد وهو يصرخ ::/ لميوه ... والله أني أشك في أنوثتك ؟؟
طالعته لمياء بحاجب مرفوع وابتسامة استهزاء ::/ ها ها ها ها شكراً ..
مشت تاركته ومتوجهه للمطبخ ..
فهد ::/ جيبي لي معك مثلك ؟؟
لمياء وهي تصرخ ::/ انا بجيب قهوة بشربها مع حلاو مهند .. تبي قهوة انت بعد ؟
فهد ::/ إيه الله يخليك ..
لمياء ::/ أجل لا ...!! ماراح اجيب لك شي .. تبي تعال انت وخذ ..
ضحك فهد في خاطره وحمد ربه انها قدرت على الأقل تتعدى هالمعضلة اللي مرت عليهم ... ودعا في خاطره ان الله يعطيها قوة الإيمان علشان تقتنع بأي شي ممكن يصير في المستقبل ..

خلصت صلاة المغرب وقامت من مصلاها بسرعة .. جهزت نفسها ولبست عبايتها ونزلت تحت تنتظر ندى وزياد يمرون عليها ...
رن جوالها وهي تنزل مع الدرج وشافت ندى متصلة .. ردت عليها وعرفت انهم ينتظرونها عند الباب ... سرعت خطواتها شوي وراحت للمطبخ تسلم على أمها وتقول لها انها بتطلع ...
عذا وهي داخله ::/ يمـــه يالله أنا بروح الحين .. توصين شي ؟؟
أم عبدالله ::/ سلامتك عيوني .. بس انتبهي لعمرك ..!!
ابتسمت عذا ::/ ابشري .. يالله مع السلامة ...
تقدمت عذا لأمها وحبتها على رأسها .. ولما لفت بتطلع مسكتها أمها مع يدها وباين في عيونها الجدية ..
ام عبدالله ::/ معك اللي يكفيك ؟؟
ابتسمت عذا ::/ إيه يمه لا تخافين .. معي اللي يكفي وزيادة ماقصر أبوي ..
ام عبدالله ::/ الله يخليه لكم ... بس عاد انت مو تصيرين مسرفة وتشترين شي فوق طاقتك ؟؟ ترى انا عارفة ندى وذوقها .. وعارفة الأشياء اللي تشتريها .. فأنتي مدي رجليك على قد لحافك .. ولو قالت لك بتحاسب عنك في شي لاتوافقين مهما يكون إلا إن كان شي ضروري .. والباقي انتي ادفعي عنه .. زين ؟؟
هزت عذا راسها بالإيجاب ومشت طالعة من المطبخ وكلام أمها يرن بأذنها ... شي أكيد ماراح أسمح لهم يحاسبون عني في شي ؟؟؟ أنا ماعلي قاصر وأقدر أكفي نفسي ،، وإن كان ذوق ندى بيكلفني الكثير و ممكن أنه يرهق أبوي فبالناقص منه مو لازم أشتريه .. بحاول أدور لي على شي حلو ومرتب وأنيق وسعره معقول ..
ابتسمت بينها وبين نفسها وهي مرتاحة من قناعتها ,, ومرتاحة من وضعها اللي هي عايشته ...
راحت للصالة بتشوف أبوها وتسلم عليه وتبلغه انها بتطلع الحين وبعدها بتروح لهم في السيارة ...
.
.
.
.
هو كان يتقرص بمكانه ومو قادر يسيطر على موجة الفرح اللي اجتاحت مشاعره من وقف قدام باب البيت ينتظر طلعتها وركوبها معهم ..؟
كان متقصد انه يوقف بالعرض علشان مايكون قدامها خيارات وتركب وراه مباشرة ..
يكفي انه يشم ريحة عطرها .. ويكفي أنه يحس بدفا أنفاسها وهي تستنشق نفس الهواء ..
"أحبها ...؟؟؟" ما أقدر أقول هالكلمة بس .. أبغى شي إضافي عليها علشان أقدر أعبر عن مشاعري لما تنطرى هي قدامي أو تكون متواجده معي في نفس المكان ...
"أموت في هواها ... ؟؟؟" يمكن لكن ما أحس أني وفيت أحاسيسي حقها .. وأحس اني ظلمتها وأجحفت بحقها ...
حاليا أقدر أقول أني سكران في حبها بكل جوارحي .. ولا أقدر أتخيل حياتي بدون وجودها معي في نفس الصورة .. أحس أن اسمي واسمها مربوطين ببعض من طلعت على الدنيا وبديت أفهم معنى الحياة ..!!
التفت لندى لما حس انها تاخرت عليهم ... وشافها تلعب بجوالها وكأن الوضع عادي .
زياد ::/ وينها بنت عمتك تأخرت ؟؟ لا يكون ما انتبهت لكلامك وانتي تقولين ننتظرك ..
ضحكت ندى ::/ لا منتبهة ونص .. لكن اصبر شوي ،،،(( لفت له ))أولاً لازم تروح وتسلم على أبوها وأمها وتودعهم وعقب تطلع لنا ... طول بالك حبتين وبعدين توصل ..
زياد ::/ الله .. اللي يسمعك يقول بنسافر..! كلها ساعة واحنا راجعين ..
ابتسمت ندى بحزن ::/ شفت عاد ... لكن هذا طبعهم كلهم ..!! يقولون لازم نودعهم ونبلغهم بطلعتنا يمكن ما يكتب ربي أننا نرجع لهم بعدها.. أو يمكن تصادفهم شي من نوائب الدنيا .. وساعتها بيكونون مرتاحين أكثر لأنهم لما طلعوا شافوا امهم وأبوهم وتأكدوا من رضاهم عليهم .
ابتسم زياد مستغرب ::/ غريـبـــــيـن ...!!
ندى ::/ بالعكس .. قصدك مشاعر وأحاسيس تربطهم وتخليهم يعيشون بسعادة ..
سكتت شوي وبعدين كملت وهي منزلة راسها ::/ زياد تتوقع لو عندنا أم وأب ممكن نسوي مثلهم ؟؟ أو بنصير عادي نحبهم ونغليهم لكن مانتعامل معهم بهالطريقة ..؟
تنهد زياد ::/ ما ادري يا ندى لاتسأليني عن أشياء صعب أجاوبك عليها ..؟
سكتوا الأثنين وكل واحد منهم خذته أفكاره لبحر لاساحل له ..
حس بقليل من الغيرة يتسلل لقلبه من وضعها اللي تعيشه ... مع أمها وأبوه وأخوانها وأخواتها كلهم يحيطونها ،،، حست بمعنى الأسرة والإنتماء لعائلة متكاملة تجمعهم كلمة وحدة ومشاعر وحدة ...
مكتفية من الحب والدلال والراحة والإهتمام .. صدق أنا ما قصرني شي لكن ينقصني أشياء .. ينقصني أب أحس باعتماده علي وافتخاره بنجاحاتي ,, تنقصني الأم اللي تسهر بالليل تحاتيني إذا تأخرت وأشوف الفرحة بعيونها يوم أقولها أبي أتزوج .. أسمع دعواتها لي في جوف الليل بالهداية والتوفيق ... أحس بدلالها واتدلع في حضنها .. أشرب من حنانها واتدفى بدفاها ,,,
تنهد بعمق وألم لما طرت ندى على باله ... إذا هذا تفكيره وهو شاب كيف بيكون وضع ندى اخته ..؟؟ اللي من طلعت على الدنيا ما حست بحضن امي أو حنان أبوي ... حتى الشوف ما متعت نظرها بهم ..!!
وعى من أفكاره لما شافها تطلع من الباب وتسكره وراها ... حس بشي يتحرك داخله من الفرحة لما شاف شكلها بالعباية متوجهه لسيارتهم ..
كتم نفسه لما سمعها تفتح الباب اللي وراه ... وأول شهيق خذه نقلت له ذرات الهواء معه ريحة عطرها الصيفي اللي متعودة تحطه يوميا بالبيت ... كان خفيف بريحة الفواكه الصيفية المنعشة ...
عذا بصوت واطي مستحي ::/ السلام عليكم ..!
زياد ::/ وعليكم السلام والرحمة ... كيف حالك عذا ؟؟
بلعت عذا ريقها ::/ بخير .. انت كيفك ؟؟
زياد مبتسم ::/ تمام ... الحمدلله ..
ندى ::/ وينك تأخرتي ؟؟
استحت عذا من كلام ندى::/ آسفة طولت عليكم ..
طالع زياد ندى بنظرة تسكتها وتقول لها ما عليك منها ...
تصنعت ندى الخوف ::/ طيب حبيبتي خذي راحتك وتأخري مثل ما تحبين ...
ضحك زياد ::/ شاطرة ..
سكتت عذا وماعلقت بـ ولا كلمة ،،، طول الطريق وهي ساكتة وحتى عيونها ما رفعتها من حجرها ... تخاف ترفعها وتطيح عينها بعينه .. ماتدري ليه بس تحس أن زياد تغيرت نظراته ناحيتها وتحولت لنظرات تحرجها وتخليها ماتقدر تتنفس بأريحية ..
تحس بكلامه ورنة صوته تتغلل لأعماقها حتى لو ماكان يقصدها أو يتكلم بالتليفون ..
المهم أن نبرته الرجوليه العميقة تخلي قلبها ينتفض بمشاعر غريبة وعميقة وفي نفس الوقت حلوة ... يكفيها أنها تغمض عيونها وتسمع صوته وتتخيل حركاته وبكذا تكون مرتاحة وأكثر من مجرد مرتاحة ...
وصلوا لمكانهم المقصود بعد فترة .. نزلوا جميعا من السيارة .. كانت عذا مستحية من وجود زياد معهم وماتعرف وشلون تتصرف أو كيف تمشي علشان كذا قررت انها تتأخر شوي وتخلي زياد وندى يتقدمونها .. اول مادخلوا مع البوابة انتبه زياد لتراجعها وحس باحراجها ابتسم بينه وبين نفسه وحاول يكبح جماح مشاعره واستغفر ربه والتفت لندى اللي ما انتبهت لهالشي ..
لف لعذا وحب يحرجها فوق ماهي منحرجة ..
زياد ::/ عذا ليش تمشين ورانا .. تعالي تقدمي ..
بلعت عذا ريقها ::/ لا مو مشكلة عادي ..
انتبهت ندى لعذا ووقفت عن المشي علشان تصير هي واياها مع بعض .. أما زياد لماشافهم يمشون وراه أخر مشيه شوي علشان يتقدمونه ويصير هو وراهم ... ويكونون تحت نظره ..
دخلوا محلات وطلعوا منها من دون مايعجبهم أي شي ..و فيه بعض المحلات احتاروا في القطع اللي تعرضها وما يدرون وش يختارون من كثر ماهي حلوة وأنيقة ..
استقر رأيهم على فستان ناعم وشكله بيطلع حلو على عذا .. لأن ألوانه بنوتية وموديله راقي وخامة القماش فخمة وراقية ...
خذوا وقت وهم يتناقشون على اللون والمقاس ... لدرجة ان زياد مل منهم وجلس على كرسي بزاوية المحل ... راح يراقبهم ويراقب حركاتهم واندماجهم في النقاش .. تمنى في سره لو كان هو اللي واقف جنبها وتشاوره هو عن نوعية اللبس اللي يناسبها ... لو كان فعلا كان اختار لها اللون الأحمر و الأورنج ... كانت بتطلع فيه وحده ثانية وكأنها وحدة من ملكات القصص الخرافية الرومانسية ...
ندى ::/ زياد ..!!
انتبه زياد من سرحانه ::/ نعم ... وش عندك ؟
ندى ::/ الحمدلله على السلامة .. لي ساعة اناديك وانت ولا هنا ؟؟
ابتسم زياد وهو يقوم ::/ خلصتوا نمشي ؟؟
ندى ::/ إيه خلصنا بس بنمر محل المكياج نآخذ لنا شوي أغراض ...
مشى زياد ::/ زين يالله ..
دخلوا لمحل المكياج وتوجهوا مباشرة لماركة ندى المفضلة .. بدوا يتفرجون على القلوسات والمناكير .. وزياد واقف جنبهم ويتفرج معهم وهو متملل لكن وش يسوي ما باليد حيلة ...
ندى وهي متحمسة ::/ زياد بالله عليك وش أحلى لون هذا الروج والا هذ ؟؟؟
سكت زياد محتار مايدري وش يرد .. زياد ::/ أمممم طيب وش لون لفستان ؟؟
ندى ::/ أحمر وأورنج ...
طارت عيون زياد في ندى وهو مبسوط والإبتسامة شاقه حلقه ::/ اخترتوا هاللون
ندى مستغربة ::/ إيه .. عاد وش فيك فرحان لهالدرجة ؟؟ لايكون انت اللي بتلبسه
ضحك زياد ::/ ههههههههه حلوة منك ... بس هو أحلى لون اللي اخترتوه
ندى وهي تلف لعذا ::/ كان قلت من زمان علشان يصير صوتين ضد صوت ونشتريه ولا نقعد نتشاور ونتذابح لنا ساعة..
ابتسم زياد وتفاجأ لما كلمه واحد من اللي يشتغلون بالمحل وعزمه معه علشان يفرجه على آخر العطورات الرجالية اللي نازلة السوق ... نبه ندى بروحته ومشى مع العامل للمكان اللي يقصده ...
خلصوا مشترياتهم بعد ما انهد حيلهم وطلعوا من المحل وهم خالصين من كل شي ...
ندى وعذا تقدموا زياد في مشيهم وكان هو متأخر وراهم لكن مانزل نظره عنهم ..
مروا الثنتين قبل زياد بمحل لانجري وكان العامل واقف عند الباب وشكله مو مريح أبدا ...
لفت عذا بوجهها تطالع الفترينة وتشوف وش عارضين وش هي البضاعة اللي مخصوم عليها ... انتبه لها العامل وحس بميولها في دخول المحل .
العامل ::/ تفضلي أختي ترى مسوين خصومات على آخر الموديلات النازلة ..
ردت عليه ندى وهي تمشي ::/ شكراً ..
تحرك العامل من مكانه وهو يتقدم بخطوات بطيئة .. لكن دنائة نفسه خلته يتلفظ بألفاظ بعيدة تماماً عن الأخلاق والذوق ... ارتجفت ندى بمكانها .. اما عذا فشهقت من الخوف وشدت مسكتها في يد ندى بكامل قوتها ..
ومن سوء حظ العامل المسكين أن كلامه وصل لمسامع زياد اللي ثارت الثائرة عنده واسودت الدنيا بوجهه وما عرف كيف يتحمل الموقف ...
مشى للعامل وهو يحاول انه يمسك قبضته عن لايتهور ..واجهه والغضب ينصب من عيونه .. كانت ملامحه الحادة ونظرته الثاقبة وحاجبه المقوس المرفوع بحدة يشتعلون بالغيرة والقهر....
زياد ::/ يا اخوي ترى عيب عليك اللي تسويه واللي قلته ... وما أظن انك ترضاها على اهلك وأخواتك ؟؟
العامل باحتقار ::/ أقول توكل على الله وشف دربك ..
صر زياد على أسنانه ::/ وش قلت ؟؟
العامل وهو يدف زياد مع كتفه ::/ أقول توكل وما لك شغل ..
ما قدر زياد يمسك نفسه اكثر ودف العامل بكل قوته لحد ما اختل توازن العامل وطاح على الأرض .. ما اكتفى زياد باللي سواه قرب له ومسكه مع جيب بلوزته وسحبه علشان يوقفه على رجوله ...
صرخت ندى لزياد تبي توقفه لكن الظاهر انه مايسمع شي والغيرة معميه عيونه .. كيف لا والخسيس يتحرش بأغلى ثنتين على قلبه ؟؟ والأهم انهم وحده اخته والثانية زوجته مستقبلا ..؟؟؟ وعموما هو ما يتحمل يشوف مثل هالمشاهد ويسكت عنها مهما كان ...!
اجتمعوا الناس حولهم يبون يفكونهم .. لكن زياد متمسك بهالعامل إلا يمسح بوجهه الأرض .. والعامل كان مرة يقاوم وعشره يستسلم ... أما زياد فعيونه كانت تشتعل غضب وفكه القائم مبيض من كثر مايشد عليه ومنظره يخوف ... عموما لما الرجل يعصب ويبان بعيونه الغضب والنار تحس بشعور الخوف والرهبة غصب عنك ...
ماقدرت ندى تمسك نفسها أكثر خافت لايسوون شي بأخوها الوحيد .. تقدمت له ومسكته مع يده تتوسله ..
ندى وهي تصيح ::/ زياد الله يخليك اتركه بكيفه خلنا نروح وماعليك منه ؟؟
زياد كان ساكت وما يحس باللي حوله كل اللي سواه انه سحب يده بقوة من يدين ندى ورجع للعامل ... لحقته ندى وحاولت تتشبث فيه .. وتقدموا الرجال وحاولوا يمنعونه من انه يتقدم أكثر واجتمعوا رجال الأمن ومسكوا زياد ...
في خضم هالأحداث كلها كانت عذا واقفة وكأنها متفرجة وماسوت شي أبد ,, غير أنها متفاجئة من اللي صار .. ومتفاجئة من تصرف زياد المرعب .. وخايفة من هالجانب المخيف في شخصيته واللي عمرها ماشافته ولا توقعته فيه ,,,
توجهوا كلهم لإدارة السوق وحلوا المشكلة بطريقة ودية وقدم زياد شكوى ضد العامل ..
وبعدها طلع هو وندى وعذا راجعين للبيت ..
أول ما ركبوا السيارة رفع زياد راسه وسنده على الكرسي .. وبعدها طالع ندى مستغرب ..
زياد ::/ أنا وش سويت ؟؟
ابتسمت ندى ::/ عادي ماسويت شي بغيت تموت الرجال بس ,,
ضحك زياد ::/ يستاهل الحيوان أكثر من اللي صار له ... لكن يحمد ربه انهم فكوه مني والا والله كان اليوم ارتكبت فيه جريمة ...
ندى ::/ الحمدلله اللي فكوه والا كان الحين انت منقع بالمخفر ... ساعتها مايفيد الندم ؟؟
زياد يضحك ::/ لا ماتوصل لهالدرجة .. صدق كنت معصب وانا أضربه لكن كنت واعي للي حولي ..
ندى وعيونه طايرة فيه ::/ أتحداك لو كنت واعي ؟؟؟ عموما ترى ماشاء الله عليك عندك عضلات بس لاعاد تعيدها مرة ثانية لأن قلبي مايتحمل ...
زياد وهو يرفع يده ::/ هههههههههههههههههههه بالله عليكم وش رايكم في عضلاتي قوي صح ؟؟
ندى تتطنز ::/ قوي وبس .. إلا مصارع ثيران ماشاء الله عليك ...؟ مو صح عذا ؟
عذا كانت سرحانة في صدمتها ومو قادرة ترد بكلمة .. لكن استجمعت قواها لما وجهوا لها الكلام وقدرت تقول ::/ تخوف ...
زياد متفاجئ ::/ نعــم ؟؟
استحت عذا لكن عادتها ::/ تـ خـ وفـ
سكت زياد وبلع ريقه ... حس ان هالكلمة طالعة من قلبها لأنها أول شي قالته لما سألوها ... ضاق صدره انه تهور قدامها ووضح هالجانب السيئ فيه .. وهو سرعة الغضب وعدم تمالك النفس .....!
مشى زياد وعم الهدوء السيارة ومحد تكلم او علق ... هي عذا اللي كانت ضايعة في أفكارها وفي الشي الغريب اللي شافته اليوم ..
وصلوا للبيت وتوها عذا بتنزل لكن وقفتها ندى ..
ندى ::/ عذا ترى بروح لبيت عمي برتب غرفة زياد وبرجع ان شاء الله اذا خلصت ....!! بلغي عمتي ..
عذا مبتسمة ::/ خلاص يصير خير ,,
نزلت عذا بعد ماودعتهم تشيعها نظرات زياد وتودعها ...
ودخلت للبيت وآثار الصدمة مازالت مرسومة على وجهها ..
اول مادخلت الصالة شافت لمياء وسارة جالسين بروحهم ... تقربت منهم ورمت أغراضها على الكنبة وعلى طول سألت ..
عذا ::/ وينها لميس ؟؟
سارة ::/ اتصلت تقول ان خالتها بيجون لهم اليوم علشان كذا ماقدرت تجي .. قهر ليتها قالت لي من زمان كان رحت معكم ..
سكتت عذا وماردت على سارة ..
لمياء ::/ وين ندى ؟؟
عذا وهي سرحانة ::/ هاه ؟؟
سارة ::/ من قال هاه سمع ... نقول وين ندى ؟؟
عذا ::/ راحت ترتب غرفة زياد و بترجع ...
لمياء مستغربة ::/ وش فيك انتي وجهك أسود وشفايفك مبيضة وكأن احد لاحقك وانتي منحاشة عنه ..
بلعت عذا ريقها وعيونها معلقة بالفراغ قدامها ::/ مرعب ... أول مرة أدري أنه إنسان مخيف ؟؟
لمياء ::/ من هو ؟؟
عذا بعد دقيقة صمت::/ زياد ..........!!
سارة وهي تتربع ومتحمسة::/ وش صار لكم ؟؟ وش سوى لك؟
قصت عذا اللي صار كله لهم من أول شي لآخر شي والخوف باين بعيونها وصوتها ..
لمياء مبتسمة على أختها اللي كبرت الموضوع وهو مايستاهل::/ عادي كل الرجال كذا ..
عذا ::/ بس أبوي مو كذا ولا أخواني ؟؟
ضحكت لمياء :: لأنك ما جربتيهم ؟؟
سارة باستهزاء::/ يوووه الله يعينك يا عذا لو يسوي لك هالسوات بعدين في المستقبل الظاهر بتموتين في لحظتها ..
عذا بتشكيك ::/ الظاهر مافيه مستقبل ......!!من اللي شفته اليوم حسيت انه مايصلح كزوج .. أبداً
لمياء تضحك ::/ ليش عاد مايصلح زوج مرة وحده ؟؟
عذا بخجل وتشتت افكار ::/ كذا ما أحس اننا نتوافق من هالناحية ؟؟؟ يعني انا لو أشوف منه هالجانب يوم واحد ممكن اتنوم في المستشفى ,, الحين بغيت اموت وهو مايقصدني بالكلام اجل لو كنت انا المعنية باللي صار وش كنت بسوي ؟؟
سارة بخبث::/ يعني إذا خطبك بكرة نقول له سوري بنتنا ماتصلح لك ؟؟
انحرجت عذا وماعرفت ترد لأنها فعلا ما فكرت في الإجابة ولا فكرت في اليوم اللي بترفض فيه زياد وبترفض حياتها معه علشان كذا لهتهم عن الإجابة وطلعت لهم فستانها وراحت تقيسه علشان يشوفونه ويقولون رايهم فيه ...
-------------------------------------------------------------------------------

قرب يأذن الفجر وهي لحد الآن عيونها مجافية النوم ... شعور غريب متولد في صدرها حارمها لذة تغميض الجفون ... تفكيرها يآخذها ويوديها ماتنكر إنها فرحانة ومرتاحة لكن شعور أقوى يخليها خايفة أو متخوفة من اللي راح يصير ...
ملت من كثر التقلب على السرير ،، لفت على يمينها وفتحت الأباجورة وطالعت السقف ... تنهدت بتعب وشالت عنها اللحاف وقامت من السرير .. تبي أحد تسولف عليه وتفضفض له وتقول له اللي يدور بخاطرها كله .. عساه يهون عليها ويخفف عنها الألم والهم اللي بصدرها ...
توجهت على طول لغرفة أنيستها وجليستها وأختها اللي انحرمت منها بسبب القدر والمكتوب ...
فتحت عليها الباب من دون ما تدقه .. لوت بوزها بخيبة أمل واضحة لما شافتها نايمة .. لكن ما استسلمت تقدمت منها وجلست على السرير وبدت تسوي لها حركات وتدغدغها مع رجولها تبغاها تقوم وهي متنرفزة علشان يطير النوم من عيونها ..
سحر ::/ يوووووووووووووووه ابعدوا عني ابي انام ؟
ندى وهي تضحك ::/ لا مافيه يالله قومي ابغى اكلمك بموضوع مصيري يا إيه يا لا ؟
فزت سحر لما سمعت صوت ندى ,, فركت عيونها تبي تتاكد هي تحلم والا واقع ..؟
فتحت الأباجورة لأن الغرفة كانت ظلام دامس .. واعتدلت في جلستها وهي تمسح على شعرها المعفوس ..
سحر ::/ وش فيك بسم الله ؟؟؟ لايكون محلمة بكابوس وجاية تبغيني أحسسك بالأمان .
ندى ::/ هاهاهاهاهاها مايضحك .. المهم صحصحي معي أبي أكلمك بشي خطير .
سحر بخوف ::/ وش فيك .. لاتخوفيني بهالليل ؟ تو اني تاركتك مافيك الا العافية؟
ندى وهي منزلة راسها ::/ سحر بسألك وجاوبيني بصراحة ؟؟
سحر بخوف وترقب::/ وش هالسؤال اللهم اجعله خير ؟؟
ندى ::/ وش رأيك بطلال ؟؟
ضحكت سحر بصوت عالي وسكتتها ندى ::/ انتي ترى الناس نايمة قصري صوتك ؟
سحر وهي تضحك ::/ سوري .. بس من جد سؤالك صدمني ؟؟؟ وش هالسؤال الغبي اللي مقومتني من النوم علشان تسألينه ؟؟
ندى بجدية ::/ سحر أكلمك بجد ... وش رأيك بطلال ؟؟؟ والله إني أحس بشي غريب مادري كيف أفسره ؟؟ مادري خوف او تراجع .. تبين الصراحة ودي اقول (( لا )) وارتاح .
شهقت سحر ::/ مجنونة انتي ترفضين ؟ تبين تدمرين طلال .. والله لو ترفضين ان يجي يسحبك من شعرك ويتزوجك بدون ما يسمع ردك ... وبعدين شعورك هذا كل وحده تحس فيه وقت خطوبتها .. يعني عادي مايستدعي أنك تفكرين بهالسوداوية .
ندى مبتسمة ::/ قصدك أن بكرة كل شي بيكون أوكي .. وبستانس وانبسط ؟
سحر ::/ صدقيني بكرة بتحسين بشعور الفرح أكثر من أي وقت ثاني .. ويوم الملكة بتحسين انك ملكتي الدنيا باللي فيها ... مو أنتي تحبين طلال ؟؟
ندى بتأكيد ::/ مو احبه بس ... إلا أحس أن قدري مربوط فيه ...
سحر مبتسمة ::/ خلاص أجل هذا بيت القصيد ... المهم انك تحبينه وشعورك الخايس هذا أسفهيه تراه من عمل الشيطان ...
ندى ::/ حلوة من عمل الشيطان ..
سحر تتثاوب ::/ يالله عاد قومي خليني أنام .. عطيتك وجه
ندى وهي تضربها ::/ يالله نومي يالنوامة ..
ضحكت ندى وهي تقوم من على السرير وسكرت الأباجورة وطلعت وسكرت الباب وراها ..
وسحر رجعت لوضعها وتلحفت بفراشها وكلها امل أنها تمر بهاليوم وبهالمشاعر اللي تمر فيها ندى ...
-------------------------------------------------------------------------------
من بكرة على الغداء .. كانوا ابو مشاري والعيال كلهم مجتمعين حول السفرة يتغدون ..
و ام مشاري مركزة نظرها على مشاري اللي وجهه صاير أسود وذبلان .. محتارة تسأله قدامهم وش فيه والا تتركه لما يطلع غرفته وبعدين تروح له .... هاليومين حاله مو عاجبها ... أكله صار قليل وكلامه صار أقل ... وإذا تكلم كان شبه يائس من الحياة ومآخذها ببساطة ... انتبه مصعب لأمه ..
مصعب ::/ يمه ... تبين الرقم ؟؟
انتبهت ام مشاري ::/ نعم ؟؟
مصعب يتبسم ::/ أقول تبين الرقم ؟؟
ام مشاري ::/ رقم مين ؟؟
مصعب يضحك ::/ رقم مشاري .. أشوفك تناظرينه ومركزة على ملامحه ؟؟ لايكون معجبة فيه وانا مدري ..
ابو مشاري ::/ هههههه مصعب أثقل وثمن كلامك ..
ام مشاري ::/ وانت بس هذا اللي قدرك الله عليك ... يثمن كلامه .؟؟؟ ترى هالولد حايسني شف لك صرفه معه .. كلما جاء يكلمني تقول واحد من ربعه
سحر تضحك ::/ ههههه ياحياتي يمه كل هذا تعانين واحنا مادرينا عن ..
مصعب ::/ وش دعوى ام مشاري المفروض تفرحين لأن هذا من حبي لك ..
ام مشاري ::/ مشكور مانبيك تحبنا يوم هذا هو حبك ..
كان الحديث يدور ومشاري مو معهم ولا شاركهم بأي كلمة ,,, ساكت ويطالع في صحنه ومارفع عينه لهم ... انتبهت ام مشاري له لأنها من البداية وهي تطالعه وملاحظته ... فز قلبها لما شافته يغمض عيونه بألم ويصر بأسنانه ..
مشاري وهو يقوم ::/ الحمدلله سفرة دائمة
ام مشاري بخوف ::/ مشاري ماكلت شي ... وش فيك يمه ؟؟
مشاري بقل صبر ::/ سلامتك يالغالية بس بطلع ارتاح احس اني مرهق شوي .
طلع مشاري من غرفة الطعام وتوجه على طول للدرج كان الألم هالمرة متمكن منه وماقدر يسيطر عليه ... فكر انه يطلع لغرفته يستلقي على سريره عساه يرتاح بهالطريقة ...
.
.
.
.
أما ندى فكانت جالسة تتغدى مع زياد بجسدها بس،،، لكن روحها كانت مو بيدها ..
++ الحين معقولة أوافق واتزوج طلال ؟؟؟ أحس اني مو مستعدة لهالموقف أبداً إني أكون زوجة ولمن ؟؟ لطلال ؟؟ يعني لازم أترك زياد في بيت عمي بروحه ؟؟؟ مادري من يناظره ومن يتطمن عليه كل شوي ؟؟؟ معقولة بهالسرعة أتزوج وأترك زياد اللي ماقصر علي بشي .. والحين لما كبرت انا وجاء دوري أخدمه وأقدم له شوي من اللي عطاني إياه أتركه وأروح لطلال ؟؟؟ لا مستحيل هالشي يصير ... ولو وافقت ماراح أتزوج إلا لما يتزوج زياد وبيكون هذا شرطي ؟؟؟؟؟؟؟؟
يتزوج زياد ؟؟ يعني يآخذ عذا ؟؟ يا سلام وأنا أطلع منها وعذا تآخذ كل شي مني .. وأهم شي زياد أخوي وأبوي وصديقي ... معناتها أكيد زياد ماراح يكون اللي انا اعرفه ... بيتغير علي وبيعطي كل شي لها هي وبس ؟؟ أكيد بيعطيها ... الحين كل شي معطيه اياه وانا معه وشلون بكرة إذا تزوجت وابتعدت عن عينه وصارت هي تحت نظره .. يا خوفي ينساني وماعاد يتذكر ان له أحد من اهله باقي بهالدنيا .......

انتبه زياد لندى اللي تلعب بالملعقة في يدها وما تأكل شي ...
زياد ::/ ندوش ... يا إما كلي والا لا تقعدين تحوسين النعمة ,,
بلعت ندى ريقها وابتسمت ::/ وش أسوي مو مشتهية شي بس قلت اجلس معك علشان أفتح نفسك ..؟
زياد ::/ الله يالواثقة ؟؟؟ تفتحين نفسي مرة وحدة ؟؟
ندى بقهر ::/ ليه مو ماليه عينك ؟؟
زياد وحب يغيضها ::/ أفا عليك ماليتها ونص بس عاد القلب ومايهوى ..
ندى ::/ وش تقصد زياد ؟؟ خليك دايركت
زياد ::/ يعني لو انك ناس يحق لك تقولين اللي قلتيه ؟؟
ندى بغيرة واضحة ::/ والله انك واحد وقح وما تستحي تقولها بوجهي كذا ؟؟ الحين انا اختك من امك وابوك ما افتح نفسك وهذي اللي تسميها بنت عمتك هي اللي تفتح النفس وتشجعك على الأكل .. صدق انك سخيف وبليد وما أحبك ...
قامت ندى من كرسيها والدمعة نزلت غصب عنها من عينها ... كيف وزياد زادها وزاد حرارة أفكارها ؟. هي أصلا من البداية متزعزعة ومحتارة وخايفة وكل المشاعر المخيفة متعرشة قلبها ...
ارتاع زياد من ردة فعلها الغير متوقعة اطلاقا .. قام من غداه وهو يمسح يده والخوف باين بعيونه .. جلس جنبها على الكنب وانتبه لها وهي تمسح دموعها ..
زياد مصدوم ::/ اللهُ أكبر عليك تصيحين ؟؟؟
ندى ::/ يعني تبيني اضحك ؟؟
زياد ::/ لا بس اللي قلته مايستدعي ..كل اللي تسوينه ؟؟
التفتت له ندى وباستهزاء::/ صح مايستدعي لأنك ماقلت شي بس قلت اني ما اهمك ..
زياد أشر على نفسه ::/ أنا قلت هالكلام ؟؟ متى ؟
عصبت ::/ واللي تو قلته وش تسميه ؟؟
زياد مبتسم ::/ قلت انك أختي على عيني وراسي ... أحبك وأخاف عليك أكثر من نفسي وأتمنى لك السعادة من كل قلبي .. لكن عذا شي ثاني ؟؟
ندى بغيرة وقهر ::/ شفت رجعت تقول شي ثاني ؟؟؟ خلاص لو سمحت اسكت لاتقول شي يضيق الخلق ..
ضحك::/ انت وش فيك ولعتي مرة وحده ... انتي أختي .. لكن عذا بتكون زوجتي بإذن الله ... شفتي الإختلاف ؟؟
بلعت ندى ريقها ::/ انا عارفة هالشي مايحتاج تقوله
زياد ::/ طيب مادمتي عارفة ليش عصبتي ؟؟ يعني تتوقعين اني أحبها أكثر منك ؟؟
ندى مستحية ::/ يمكن ..
زياد مبتسم ::/ حبكم في قلبي بنفس المقدار .. لكن أنتي غير وهي غير وانا وضحت لك الفرق ...
استحت ندى من تصرفها الغبي وقامت من الكنب من دون ماترد ورجعت للسفرة وبدت تشيل المواعين والضيقة اللي فيها مخليتها ما تسمع شي غير دقات قلبها وتنفسها السريع ..
-----------------------------------------------------------------------------

بعد ما خلصوا العالم متعبدين ربهم ومصلين له وطالبين منه المغفرة والرحمة والقبول وبعد صلاة المغرب بدت دقات قلبها تزيد اكثر وأكثر ... خلاص ساعة الصفر قربت وخطوبتها بتتم اليوم وبعد دقائق أو بالأصح ثواني ....
فتحت عليها سحر الباب بقوة روعتها ...
سحر ::/ قومي يالله تحركي ..
ندى بخوف ::/ ليه وش صاير ؟؟
سحر وهي تسحبها من يدها ::/ قومي نشوفهم من شباك غرفتي .. تعالي بسرعة ؟؟
ندى ويدها على قلبها ::/ وصلوا ؟؟
سحر ::/ لا ينتظرونك ..؟؟
سحبت سحر ندى ومشوا يركضون رايحين لغرفتها علشان يشوفون الرجال من شباك سحر الكبير والمطل على واجهة البيت الرجالية ...
أول ماطلعوا ضربت سحر بريك قوي وضربت فيها ندى ...
ندى وهي تسحب شعر سحر ::/ الحين انتي وش فيك استخفيتي ؟؟؟
طالعتها سحر شوي وبعدين سحبتها وخبتها ورى ظهرها ...
سحر ::/ مشاري لف شوي لو سمحت .. وش فيك تنحت ؟؟
مشاري اللي كان واقف عند باب غرفته ويسكره بلع ريقه والإرهاق باين تحت عيونه ::/ ها ..؟؟ أنتم اللي وش فيكم طايرين ؟؟
سحر ::/ طيب .. صد شوي ..؟ يعني عطنا ظهرك خلنا نمشي ..
ابتسم مشاري وهو يعطيهم ظهره ::/ يالله بسرعة ..
مشت سحر على جنب وندى متمسكة في بلوزتها ومغطية راسها في ظهر سحر ... لحد مادخلوا الغرفة وانطلقت ندى ورمت نفسها على السرير ..
ندى تتنهد ::/ يا ربي منه أخوك هذا .. مادري وش الله مسلطه علي ؟؟
سحر وهي تسكر الأنوار ::/ خلي عنك مشاري الحين ويالله تعالي نشوفهم ..
قاموا الثنتين وفتحوا الستارة على خفيف علشان ما تبين حركتهم .. ووقفوا منتصبات وعيونهم مركزة على باب الشارع ينتظرونه ينفتح ... ابتسمت سحر وضغطت على يد ندى وعيونها تلمع بالحب لما شافت زياد يتقدم بكشخته ورزته علشان يفتح الباب ..
سحر ::/ ياحبي له تلقين ريحته الحين دهن عود ..
ضحكت ندى ::/ هههههههههههههههه وانتي وش عرفك ؟؟ لايكون انتي اللي ملبسته هدومه وانا مادري ؟؟
سحر وهي تغير الموضوع ::/ شوفي شوفي طلول .. يا قلب أمه كاشخ على آخر درجة ..
التفتت ندى للمكان اللي أشرت عليه سحر .. وأول ماشافت طلال حست بشعور غريب يدغدغ معدتها ... حطت يدها على فمها وهي تهمس ::/ يا حبي له طالع يجنن .
سحر ::/ اسكتي وش يجنن إلا خبال ...
و تسندت على الشباك وهي تكمل ::/ آآآآآآآآآآآآآه ياحظك يا ندى حصلتي واحد كل البنات في العالم يتمنونه .. وسيم وحبوب وغني وفوق كل هذا يحبك ويموت على طاريك .
ندى وهي تنفث على نفسها ::/ حبس حابس حجر يابس .. (( وضربتها على كتفها )) قولي ماشاء الله يا دوبا لا يصير لنا شي ؟؟
سحر بعيون حالمة ::/ يا ربي متى يجي دوري أنا وأصير بمكانك وأجي لهالشباك وأطالع فارس أحلامي ...؟؟
ندى ::/ يا حليلك بتبطين ..
سحر وحواجبها معقودة ::/ ليش إن شاء الله انتي وش احسن مني فيه ؟؟
ندى وهي ماشية للباب::/ ولا شي ... المهم أحس اني متضايقة بقوة .. ابروح لغرفتي استلقي هناك لحد ما يجي زياد ويقول لي كل السالفة ..
تنهدت سحر وهي تضبط شعرها ::/ خلاص وانا بنزل تحت أتشمم لك الأخبار من عند أبوي وأخواني وأشوف وش فكرتهم .. و وش رايهم ؟؟
طلعت ندى وهي تهز رأسها بالإيجاب لسحر .. تحس بكسل في مشاعرها بعد ماكانت مشتعلة من دقائق وتبلد في دقات قلبها بعد ما كانت مثل القطار في سرعتها من ثواني
تنهدت ووكلت أمرها لربها وتفائلت خير .. ودخلت لغرفتها شغلت المسجل وانسدحت على سريرها وحضنت مخدتها .....!! .
.
.
.
.

في مجلس الرجال الفخم الملكي .. كان طلال جالس بكشخته اللي تعكس مشاعر الفرحة بقلبه ... كان واثق ومالي يده من موافقتهم عليه .. ليش وين بيحصلون واحد أحسن منه .. وفوق كل هذا يصير ولد عمهم بالرضاع .. يعني من كل الجهات محلولة ولا عندهم عذر علشان يرفضون ...
أما زياد اللي كان عارف السالفة وفاهم سبب زيارة طلال وأهله اليوم .. كان يحس بمشاعر كبيرة في قلبه .. حس ان ندى كبرت وهو كبر معها .. وجاء اليوم اللي يجون فيه الناس يخطبون أخته اللي كبرت قدام عيونه ... حس أنه مسؤول عنها أكثر من قبل .. لكن كلما طالع في عيون طلال وشاف الحنان والمحبة .. ارتاح قلبه .. يعني حتى لو وافق على طلال بيكون مرتاح لأن ندى بتكون في يد أمينة تحافظ عليها وتخاف ..
كانت السوالف اللي تدور في المجلس عامة .. والموضوع الأساسي الى الآن محد تطرق له ... كانت مشاعر حلوة يحس فيها زياد قبل لايرن جواله بوصول رسالة مضمونها يقول ..:: (( إن كانت سمعة عائلتك .. أو بالأصح أختك تهمك .. طلال هذا لا توافق عليه ))

(( إن كانت سمعة عائلتك .. أو بالأصح أختك تهمك .. طلال هذا لا توافق عليه ))
عقد زياد حواجبه مستغرب .. من اللي ممكن يرسل رسالة مثل هذي .. خصوصا أنه ما تعرف على الرقم ... تبدلت المشاعر الحلوة بداخله إلى مشاعر أشبه ماتكون بخوف .. حتى لوأنها رسالة وممكن تكون خرابيط لكن مهما يكون اشعلت في قلب زياد شرارة الخوف .. قرر يترك جواله ومايهتم .. لكن لما وصلته الرسالة الثانية ... (( أتمنى أن رسالتي وصلتك وانك استوعبت كلامي ... أنا ما أبغى الإساءة لكن لو اضطريت استخدمها فاسمح لي باستخدامها ))
قام زياد والخوف والغضب متمكن منه .. طلع للحديقة وجواله في يده ... اتصل على هالرقم لكن محد يرد ... حاول مرتين وثلاث لكن محد جاوبه .. وبعدها وصلته رسالة .. ((( ما له داعي تتصل أو تسمع صوتي لأن هذا مايفيدك .. اللي يفيدك هو أنك ترفض طلال .. هذا إذا كنت تحب أختك وتخاف على سمعتها ؟؟))
شبت ضلوع زياد من هالكلام وأرسل له مسج :: (( وأنت وش مصلحتك من رفض طلال ..؟ ))
تأخر الرد ما وصل لزياد وكان طول هالفترة كأنه واقف على شوك .. دقيقتين ورن جواله .. : )) مالي مصلحة .. لكن مثل ما أختك قهرتني ،،، جاء دوري أنا الحين أكسر قلبها واقهرها ))
بلع زياد ريقه وأسودت الدنيا بعيونه .. هذا وش قاعد يقول ووش قاعد يخربط ؟؟ كيف يتجرأ ويقول عن ندى أختي هالكلام .. أرسل له مسج :: (( اسمع لو كنت رجال رد على اتصالاتي ؟؟ ))
وصله الرد على طول (( أنا رجال حتى لو ما رديت على مكالماتك .. لكن شف إذا مو مصدقني أنا مستعد ارسل لك صورها بالوسائط هذا واحد .. إثنين علشان تتأكد من كلامي .. أطلع لغرفتها وفتش دولابها اللي قافلته عنك .. وشف الهدايا اللي كانت تآخذهم مني على أساس انها تحبني وأنا ياغافلين لكم الله .. وأكبر دليل طالع الخاتم اللي بيدها وأسألها من اللي مهديها إياه .. وساعتها بتصدقني ))
ثارت الثائرة عند زياد .. الدنيا صارت سوداء .. والأكسجين حوله انتهى وماعاد له وجود .. حط يده على جبهته لما حس توازنه اختل ... مستحيل اللي قاعد يصير أكيد انا بحلم ؟؟؟ لحظة يمكن يكون مقلب من احد ؟؟ وهذا وقته أحد يسوي مقلب مثل هذا ؟؟
ماقدريتحمل أكثر أرسل مسج ::/ (( أنت واحد جبان ولو فيك ذرة رجولة ماسويت كذا ببنات الناس ))؟
وصله الرد :: / ( أنت قلتها بنات الناس ,, يعني مو اختك ؟؟ وعلى فكرة مثل ماقلت لك لو حبيت أرسل لك صورها ترى ما عندي مشكلة أنت بس اطلب وأنا أنفذ .. ولا تنسى ترفض طلال إذا كنت خايف على سمعتكم أو سمعة اختك .. او حتى طلال نفسه ))
ذرع زياد المكان اللي هو واقف فيه روحه و جيئة .. وكل شوي يمسح على وجهه .. مو عارف وش يسوي أو كيف يتصرف ..؟؟ ينفذ كلامه ويرفض طلال ..؟ بس على أي أساس يرفضه ويقول لهم لا ؟؟ وندى معقولة أنها تكون راعية هالحركات ..؟؟
رفع راسه للسماء وتنهد بألم ..؟؟ مو معقولة ندى تكون هذي سوايها ؟؟ مستحيل أختي وأعرفها زين يستحيل تكون من هالبنات الغير متربيات ...؟ هذي ندى ياعالم انا اللي مربيها وعارف أخلاقها وقيمها ..؟؟
طالع وراء البيت وقرر يطلع الحين لغرفتها علشان يقطع الشك باليقين ويبعد هالوساوس اللي غزت تفكيره وأقلقته ...
توه كان بيمشي لكن صوت مصعب وقفه ::/ زياد انت وينك .. عمي ابو راشد يسأل عنك ؟؟
التفت زياد والربكة والإرتجاف باين عليه ::/ هاه .. ايه يالله جايكم انا الحين ..
مشى زياد وهو يحاول يتماسك ويضبط نفسه .. واول ماقرب لمصعب قال له ..
مصعب ::/ زياد وش فيك ؟؟ صاير شي ؟؟
حاول زياد يبتسم ::/ لا لاتهتم مشكلة صغيرة وإن شاء الله محلولة ..
مشى زياد ودخل المجلس وأول ما طاحت عينه على طلال حس بالضيقة والقهر .. وحس بمشاعر غريبة تخنقه وتخليه مايقدر يتنفس ...
جلس جنب مشاري وهو يحاول يرسم الإبتسامة على وجهه ,, أول ما شافه ابو راشد داخل على طول فتح الموضوع ودخل في السالفة ..
ابو راشد ::/ والله يا بو مشاري ولايهون زياد والسامعين .. حنا اليوم جايينكم بطلب ونتمنى نلقاه عندكم وماتردونا ..
ابتسم ابو مشاري ::/ افا عليك يابو راشد عزيز وغالي .. وطلبك عندنا إن قدرنا عليه .
ابو راشد مبتسم::/ الله يسلمك عشمنا فيك يالغالي .. حنا اليوم جايينكم نبي نخطب ندى بنت اخوك واخت زياد لولدي طلال ... إن ماكان عندكم مانع ...
وجه ابو طلال نظراته لزياد وكأنه يبي منه هو الإجابة .. ارتبك زياد وماعرف وش يرد أو وش يقول .. تلعثم في البداية لكن عمه أنقذ الموقف لما قال ..
ابو مشاري ::/ طلبك على عيننا وراسنا يا بو راشد .. ولو هي ذبيحة ما سدتكم .. لكن بنت أخوي مخطوبة ... ونعتبرها فايته ..
بانت الصدمة بعيون طلال ... وعيون كل الجالسين ................
مخطوبة ................................؟؟
كيف ومتى ومن اللي خطبها ؟؟؟ وليش سحر ماقالت لي ؟؟ ووأصلا ليش يقولون لي أنها تحبني وتبيني وأنها موافقة على الزواج ؟؟ ليه يحطوني في هالموقف ؟؟
بلع ريقه بصعوبة وهو مو قادر يستوعب الأحداث اللي صارت من دقائق ... وده يسأل من هالحيوان اللي تجرأ وأخذها منه ؟؟ من هاللي داعية عليه امه وقرر يخطبها وراسه يشم الهواء .. انتبه لأبوه اللي قال ..
ابو راشد ::/ ما كان عندنا خبر بهالشي يا بو مشاري .. لكن على ما أظن ان ولد عمها هو احق بها ..
ابو مشاري وهو يبتسم ::/ صدقت ... لكن ولد عمها الشقيق أقرب لها من ولد عمها اللي بالرضاع ؟؟
انبهت كل اللي في المجلس .. وش قاعد يخربط ابو مشاري .. ووش قاعد يهبب عليهم
ابو راشد مستغرب ::/ ومن يكون ؟؟
ابو مشاري ::/ مشاري ولدي الله يحفظك ..؟
فجر ابو مشاري القنبلة بكل برود .. وكأن شي ما يهمه ... توجهت الأنظار كلها على مشاري اللي ما قدر حتى يبلع ريقه واحتقن الدم في وجهه من المفاجأة .. وشلون ومتى خطبتها انا ؟؟ ما اذكر اني في يوم قلت لأهلي حتى أني موافق على الزواج هالدور بصير خطبت ندى بعد ؟؟؟
انتبه لنظرات طلال الموجهه له .. كانت حزينة وكسيرة ... كأنه شخص يأس وفقد الأمل .. إذا مشاري هو اللي خطبها معناته خلاص هو ماعاد له أي داعي ولا له أي أمل في أنه يآخذ ندى ؟؟ بس كيف سحر ماقالت له هالشي .. وهذا اللي كان محيرة ويدور براسه ...
مشاري كان وده يقوم لطلال ويقول له أن هذا كله كذب .. وانه لاخطب ندى ولاهم يحزنون .. بس مايدري وش فيه أبوه ضربت فيوزاته وقام يقط خيط وخيط ..
،،،وخله يستمر في عرضه على الأقل البنت تلقى لها سند في هالدنيا مو هو اللي لايمكن يكون ..!!
لكن كانوا هم أسبق منه ... قام ابو راشد وعياله واستأذنوا من ابو مشاري ومشوا طالعين بعد ما انرد طلبهم اللي عمره طلال ماحسب حساب لهاللحظة اللي بينرفض فيها .. وبتبتعد ندى عنه ...
بمجرد ماطلعوا قام مشاري وطلع من المجلس ودخل للبيت ... ماحب يتناقش مع ابوه قدام زياد ويوضح له انه ماكان يدري عن الخطبة وانه اصلا رافض ندى .. اما ابو مشاري فقام لزياد اللي حس ان عمه فعلا أنقذه من مشكلة كبيرة .. لكن لا زال منصدم كيف مشاري خطبها وهو ماعنده خبر ..؟؟
ابو مشاري ::/ اسمع يا زياد وانا عمك .. ترى هالخطبة راح اعتبرها رسمية .. وان ندى لمشاري .. وهذا كلام مافيه رجعة ... تم ..؟
زياد بارتباك ::/ لو علي ياعمي انا موافق لكن بنسأل ندى قبل ..؟
ابو مشاري ::/ وبتردني يا ولد أخوي مرة ثانية ؟؟
افتشل زياد من عمه ::/ لا ياعمي ماعاش من يردك .. واعتبر هالموضوع تم بإذن الله .. ندى وين بتلقى أحسن من مشاري ؟؟
ربت ابو مشاري على كتف زياد وهو مبتسم وطلع من المجلس متوجه للبيت ... وكان عارف بالي بيواجهه داخل ووش راح يقابل ...
-------------------------------------------------------------------------------
طلع هو من المجلس وبقد ما يقدر حاول يمسك أعصابه وما يثور ويعصب لحد ما يتأكد من اللي وصله ...
فتح باب غرفتها قبل لايدقه ..
فزت ندى من مكانها لما دخل عليها زياد .. شافت وجهه أسود وكأنه مهموم وإلا حاصل له شي مكدره .. قامت من على السرير وراحت له بخطوات سريعة وخايفة ..
ندى ::/ زياد وش فيك ؟؟؟
طالعها زياد وعيونه تعبانة .. بعدها عن طريقه وتوجه لدولابها .. فتح الباب الأول والثاني والثالث وكلهم انفتحوا معه عادي .. حس بالراحة تسري بعروقه .. يعني ممكن يكون كلام هذاك النذل كذب في كذب ... لكن لما وصل الرابع .. وتحت نظرات عيون ندى الخايفة وأوصالها المرتعده ... حاول زياد يفتح الدولاب لكن ما انفتح ... غمض عيونه بألم وحرقة وحاول يفتحه مرة ثانية لكن ما انفتح معه ...
وبقهر أعمى عيونه صر على أسنانه وحاول يكسر الدولاب .. كان يبيه ينفتح بأي طريقة بس ماكان يبغاه يصير مقفول علشان مايكون كلام االنذل صدق وحقيقة .. لما ما رضى ينفتح معه .. ضرب الباب برجله بكل قوته وضرب عليه بيده .. والتفت عليها وعيونه مولعة نار ...
خافت ندى وحضنت يدها في صدرها ..
زياد بصوت مقهور ::/ ليش مقفلة الدولاب ؟؟
ندى بخوف والدمعة بعيونها ::/ مو علشان شي بس كذا ..
زياد بصوت عالي آمر ::/ افتحيــــــــــــــــــــــه ,,,
بلعت ندى ريقها وما قدرت تتحرك من مكانها ,.,, وشلون تفتحه لزياد .. وشلون تخليه يشوف كل هدايا طلال ... وكروته اللي كان يكتب فيها كلام رومانسي وقصائد نزار وغيره ...
لما شافها زياد تجمدت في مكانها قرب لها بخطوات نارية .. وكأن الأرض تهتز من حوله .. مسكها مع يدها بأقوى قوته لحد ما انغرست أظافره بعضدها .. وسحبها للدولاب ..
زياد بصوت أعلى ::/ افتحيه ياندى لا أكسره فوق راسك ...
هزت ندى راسها بإيجاب ومشت والدموع تنزل على خدها وطلعت المفتاح من صندوق احمر خشبي منحوت على شكل قلب ... وفتحت له الدولاب .. وعلى طول رجعت شوي تبتعد عنه ...
فتح زياد الدولاب على مصراعيه ... وشاف اللي كان خايف منه ..؟ علب هدايا ..!!
.. كروت في سلة خشبية ... دببه صغيرة ومكتوب عليها عبارات عشق وغرام ...
غمض عيونه بغضب .. شد على قبضته وصر أسنانه بقهر ... كان معطي ندى ظهره .. وندى مركزة نظرها على ظهره ماتدري وش ممكن يقول لها او ممكن يسألها ..؟
مد زياد يده وأخذ السلة وبدأ يقرأ الكروت ... بعضها كان الكلام اللي فيها عادي .. لكن البعض الثاني كان فيها كلام حب ..
مسك السلة لف على ندى ورماها في وجهها ..
زياد باحتقار ::/ وش هالخرابيط ..؟؟
سكتت ندى وما ردت عليه ..................
زياد بصوت عالي ::/ ندى لا تسوين بريئة .. قولي لي وش هاللي انا قاعد أشوفه .. فسري لي اللي قدامي لا أسوي شي تندمين عليه ..؟
ندى بصوت متقطع وشهقات صياح ::/ هـ ـ ـ هد.... هدايـ ـ ـا ..
زياد بصوت أعلى::/ عــــــــــــــــــــارف انهم هدايا لكن من ميــــــــــــــــــن ؟؟
بلعت ندى ريقها ورفعت عيونها وهي تصيح وبصوت عالي وهي تشاهق ::/ زياد الله يخليك لاتسوي لي كذا.. وبعدين هذي هدايا انت وش فيك معصب ؟؟
قرب لها زياد ومسكها مع يدها ::/ من اللي كان يعطيك اياهم يا ندى .. تكلمي لا اطربق الدنيا عليك ..
سحبت ندى يدها وعطته ظهرها .. وش ترد عليه ؟؟ تقول له من طلال .. هنا الكارثة ممكن يسحقها في مكانها ؟؟ وشلون تآخذ منه هالكم الهائل من الهدايا وتقبل منه هالكروت الغزلية المزحومة بعبارت الغرام وهي لا خطيبته ولا زوجته ؟؟ يعني ممكن يطيح من عينه ومايهون عليها طلال تسوي له كذا ..
التفتت عليه وعيونها بالأرض ::/ من صديقاتي ؟؟
زياد باستهزاء ::/ وصديقاتك هذولا بيكتبون لك هالكلام الغزلي ؟؟
ندى ودموعها تسبقها ::/ اسألهم هم ؟؟
زياد وحب يضيق عليها ::/ من هم اللي يعطونك الهدايا حددي لي أسماء ..؟
ارتبكت ندى ومسحت دموعها و نزلت يدها على صدرها ::/ كثيرين ما أتذكرهم ..؟
انتبه زياد للخاتم اللي بيد ندى .. وزادت شكوكه حتى قاربت انها تكون حقيقة .. أول ما شافه حس بطعنه في قلبه .. كان من دقائق يحاول يصدقها ويقول أن هالهدايا من صديقاتها .. لكن هالخاتم .. لا مستحيل يكون احد اهداه لها ... لأن هالخاتم أشبه ما يكون بخاتم خطوبة ..؟ فمعقولة وحده من البنات تهديها هالشي ...؟
قرب زياد وسحب يدها وخلاها قدام عيونها وركز نظره عليها ::/ وهذا ؟؟ من صديقاتك بعد ؟
سحبت ندى يدها وحضنتها وهي تحاول انها تتماسك وماتنهار ... عارفة زياد لو شم ريحة أي شي ممكن يكسر عظامها .. تعرفه إذا عصب أو تنرفز مايعرف الأسود من الأبيض ..
ندى بتردد ::/ وش اسوي فيهم إذا صاروا يهدون بهالطريقة ؟؟
مسكها زياد مع كتوفها وهزها بقوة::/ ندى , لا تكذبين علي لأني كاشفك .. لو انتي صادقة اتصلي لي على البنت اللي اهدتك اياه خليني اسألها ..؟
طارت عيونها ندى في كلام زياد ؟؟ وش بتسوي ؟؟ ووش الحيلة علشان تطلع من هالمأزق ...؟
سكتت وما ردت عليه ..
طلع زياد جواله وعطاها إياه ::/ خذي .. اتصلي واسأليها قدامي الحين ..
فكرت ندى في لعبة وقررت تتصل على رحاب ..
ضغطت الرقم وهي ماسكة عبرتها ... وشلون بتكذب ووشلون تشرح لرحاب الخطة علشان يشتركون ثنتينهم في الكذبة ... أول ماردت عليها رحاب حطت السبيكر .. و طالعت في زياد وبعدين سألتها ..
ندى ::/ رحاب بسألك سؤال ...؟
رحاب تضحك ::/ ليه مشتركة في برنامج فوازير رمضان ؟؟
ابتسمت ندى لكن ما قدرت تواصل كذبها على زياد .. خلاص هي مكشوفة مكشوفة .. فليش تخلي رحاب تعرف عن الموضوع وتنفضح قدامها ؟؟؟ سكرت السماعة ورمت الجوال وطاحت على ركبها وهي تصيح منهارة .. غطت وجهها بيدها وبدت تشهق من الصياح ...
مسح زياد على وجهه وعرف انها تكذب .. وان اللي وصله اليوم صحيح 100%
خلاص الغضب عنده وصل حده ... الغيرة ضربت أقصى درجاتها .. القهر بلغ أوج عظمته ... ماقدر يتحمل أكثر .. قرب منها سحبها من يدها علشان تقوم تواجهه .. حس انه عورها وانه آلمها بسحبه .. لكن ما اهتم لهالشعور ,,
زياد بصوت عالي متأثر::/ آخر شي كنت اتوقعه منك يا ندى .. يا بنت أمي وأبوي ,,
ندى وسط شهقاتها ::/ ز ... زيـ ـ ـ .. زيـ ـ ـ ـا ـد أنا ما لي دخلـ ـ ـ
زياد بزمجرة ::/ لك دخل ونص .. مو انتي استقبلتي هداياه ؟؟؟ مو انتي رضيتي لنفسك بالمذلة والهوان ... انتي اللي خليته يستغلك وخربتي علي وعلى كل اللي يحبونك .. أنا اللي كنت واثق منك .. كنت معتبرك مثال للأخلاق وكنت أقول والنعم في تربيتنا والنعم في اختي وأخلاقها اللي علمتها أياه ,, لكن للأسف ياندى طحتي من عيني .. ماكنت اتوقع منك هالتصرف في أي يوم أبدا .. أبدا ..
بعد ما كان شاد قبضته على يدها تركها ورماها بقوة على السرير ...
طاحت ندى على حافته وضرب طرف فمها .. نزل الدم لكن بدون ماتحس بألم أو بحرارة اللي طلع من فمها ... كانت الدموع مغرقة عيونها وما انتبهت لزياد اللي طلع من الغرفة مكسور .. من زمان كانت تقول ماراح تستقبل هدايا من طلال ؟؟ من زمان كانت تبي تتخلص منهم لكن الزمن سبقها واكتشفها زياد .. كانت متوقعة ردت فعله .. وكانت زمان تسولف على سحر باللي ممكن يسويه زياد لو عرف عن هالشي .. لما كانت تقرأ كروت طلال اللي فيها كلام حب . كانت تلتفت على سحر بابتسامة وتقول ::/ لو يشوفها زياد بيدفني وانا حية ...
واليوم صار اللي كانت خايفة منه .. وعرفت سبب انقباض قلبها ..
مسحت على شعرها ومسحت دموعها وانتبهت للدم اللي بيدها .. قامت وراحت للتسريحة شافت الجرح اللي جنب فمها ... وانتبهت لعلامات يد زياد على يدها .. كان مخيف .. ونظراته مخيفة ... لكن دمعته اللي لمحتها بوسط عينه هزت مشاعرها مرة ثانية ونزلت للأرض تصيح من الندم والقهر ...
-------------------------------------------------------------------------------
دخل ابو مشاري الصالة وهو عاد العدة لأي سؤال أو ردة فعل ممكن يواجهها ... سواء من مشاري أو من امه ... دخل وشافهم جالسين في الصالة لكن ماكان باين عليهم شي
ابو مشاري ::/ السلام عليكم ..
ردوا عليه السلام ... ومشاري أول ما سمع صوت ابوه لف له على طول ..
مشاري بغضب مكتوم ::/اشرح لنا الحين اللي سويته يا ابو مشاري ؟؟؟ وفسر لي الكلام اللي قلته اليوم بالمجلس ؟؟
سكت ابو مشاري ومارد عليه تقدم منهم وجلس بصدر المجلس من دون اهتمام ..
طالع الجميع .. وبعدين رد بثلجية
........::/ اللي سمعته كان واضح وما يحتاج تفسير
مشاري وهو شاد قبضته ::/ لايحتاج تفسير لأنك حطيتني في موقف محرج .. ولا أدري وشلون بطلع منه .. فلو سمحت مثل ماحطيتني فيه طلعني منه ..
تلفتوا ام مشاري وسحر على بعض يبون يفهمون وش صاير ..
ام مشاري ::/ وش فيكم .. وش صار بالمجلس ..
مشاري بغضب :/ اسألي أبوي الله يطول بعمره ..
ابو مشاري ::/ مشـــــــــــــــاري .. احترم ابوك واحترم كلامك معه
تنفس مشاري بعمق ::/ السموحة يبه .. لكن فهمهم وش سويت اليوم ؟؟
ابو مشاري ::/ رفضنا طلال ..
انصدمت سحر وباندفاعية ::/ ليـــــــــــــــــــــش ؟؟؟ وش فيه طلال رفضتوه ؟؟
ابو مشاري ::/ لأن مشاري خطب ندى ...
عم الهدوء في الصالة .... والصدمة سكتت سحر وخلتها تجمد في مكانها ...
ندى ومشاري ؟؟؟ وشلون ؟؟ وكيف خطبها مشاري وحنا ماعندنا خبر ؟؟؟ حتى ندى ماعمرها جابت لي هالسيرة ..؟ بالعكس كانت كل يوم تكرهه وتكره حركاته الدكتاتورية والمتسلطة... قطع عليها امها لما قالت ..
ام مشاري ::/ ومن متى خطبتوا ندى وانا مادري ؟؟
مشاري بغضب ::/ اسألي أبوي ؟؟ إذا أنا المقصود مادريت عن السالفة إلا اليوم وشلون انتم تدرون ؟؟؟ صدمنا اليوم لما قال هالكلام .. حتى طلال انلفع وجهه ويحسب اني عارف بالموضوع واني من جد خاطب ندى ..
ام مشاري بغضب ::/ ابراهيم ... وش اللي سويته ؟؟
ابو مشاري ::/ ماصار شي يا حصة .. كل اللي قلته ان مشاري أحق بندى من طلال .. كفرت ؟؟
وقف مشاري وهو يحاول يسيطر على كلماته علشان مايغلط على أبوه ::/ أنت ما كفرت يبه لكن قللت من قيمتي ؟؟ انت حتى ماشاورتني ؟؟ ولا أخذت موافقتي ؟؟
أبو مشاري ::/ ليه عندك اعتراض على ندى ؟؟
مشاري ::/ أنا اعتراضي على الزواج كله ... أنا من زمان قايل لكم زواج ما ابي اتزوج .. وانت بسلامتك جاي اليوم تخطب لي من دون علمي ؟؟؟
ابو مشاري بعصبية ::/ وليش ان شاء الله معارض الزواج ؟؟؟ وش هي اسبابك ؟؟ يعني بتعيش طول عمرك عزابي ؟؟ والا بتحرمنا من عيالك ؟؟
انهز مشاري من كلام ابوه ... ::/ أسبابي خاصة فيني .. وزواج ما راح اتزوج .. وهالمأزق اللي حطيتني وحطيت نفسك فيه حاول تطلعنا منه .. والا انا بروح لزياد وأقول له اختك ماعاد ابغاها ...
وقف ابو مشاري وهو يهز يده ::/ ندى بتتزوجها وخطبه وخطبتها لك ... رفعت الأقلام وجفت الصحف .. وهالموضوع منتهي وغير قابل للنقاش ...
تدخلت ام مشاري ::/ ابراهيم .. مااتفقنا على كذا ... وتراني قلت لك كل شي ولاتغصب عيالي ... وانت عارف بالعواقب أكثر مني ..
التفت ابو مشاري على مرته ::/ انتي خليك بعيدة ...
انصدمت ام مشاري من كلمته لكن ردت عليه ::/ في أمورك انا بكون بعيدة نهائيا لكن اللي يخص عيالي بكون قريبة .. وأقرب لهم من نفسهم ...
ابو مشاري ::/ اللي عندي قلته .. وزواج مشاري من ندى تم خلاص ..
ام مشاري بصوت عالي ::/ لا ماتم ... مادام مشاري معارض مستحيل يتم يا ابراهيم .. انا ماعندي استعداد اضحي بولدي وحياته وعياله في المستقبل ..
التفت لها ابو مشاري معصب ::/ حصـــــــــــة ...لما انا اتكلم مع عيالي انتي ماتدخلين ؟؟
ام مشاري ::/ ليه وانا مو أمهم ؟؟؟ مثل ما أنت أبوهم ؟؟
ابو مشاري بصوت عالي ::/ انتي امهم على العين والراس .. لكن في المواضيع اللي تخصني انا وهم انت تكونين بعيدة عنها فاهمة ..
ام مشاري باستهزاء ::/ وفي رأيك موضوع زواج ولدي البكر يخصك انت وهو بس وانا خارج الحسبة ؟؟
ابو مشاري ويحاول يتماسك ويصر على أسنانه ::/ أنا قررت وخطبت وانتهينا ... غير هالكلام ماعندي ...!
ام مشاري بعناد ::/ وانا قلت لك عيالي ماينغصبون على شي مايبونه وخصوصا مسألة الزواج ..!
قرب أبو مشاري بنظرات غاضبة لحد ما واجه زوجته ::/ تتحديني ياحصة ؟؟؟؟؟ (( وأشر على نفسه ))
انهزت حصة من كلامه وحست بالخوف يتسلل لقلبها ::/ أنا اواجهك بموقفك ..
ابو مشاري ::/ يعني تبين تكسرين كلمتي وتقوينهم علي .. وتوضحين ان انت يا ابراهيم مالك كلمة عليهم ؟؟
ام مشاري مرتبكة ::/ أنت اللي حطيت نفسك بهالموقف ... وانا وانت كنا متفقين من قبل وأكدت لي انك ماراح تغصب أحد على شي ...
لف ابو مشاري وعطى حصة ظهره ::/ أنا قلت اللي عندي ... مشاري بيآخذ ندى .. واللي عنده كلام غير كلامي يقوله الحين ..
وسكت ينتظر أحد يرد عليه ... ينتظر أحد يعارضه .. او حتى يأيده .. لكن الصمت كان هو الجواب .. محد تجرأ يقول له شي ..
ابو مشاري وهو يطالع مشاري ::/ وانت ؟؟؟؟ موافق والا معارض ؟؟
سكت مشاري وماعرف وش يرد عليه ؟؟؟ ما يدري يقول إيه ويدمر حياته وإلا يرفض ويزعل أبوه وتتنغص حياة امه ...
ابو مشاري ::/ وش قلت ؟؟؟
مشاري ::/ لو قلت لك معارض ولا أبغاها وش بتسوي ؟؟
ابو مشاري مبتسم ::/ بقولك الله يهنيك بحياتك مع امك ...
تركهم ابو مشاري وطلع الدرج رايح لغرفته ... كلهم انصدموا من كلام ابوهم ومن قسوته المفاجأة .. مستحيل يكون هذا أبوهم اللي دائما يسعى انه مايفرق بينهم في شي أبدا مهما يكون ... هالمرة صار متسلط ويفرض عليهم رأيه من دون نقاش ..
انسحب مشاري من بينهم وطلع لغرفته بخطوات سريعة ... اما سحر فكانت الصدمة لازالت راسمة ملامحها على محياها ... ما حست بنفسها الا وهي ماشية لغرفة ندى ..

.
.
.
.
.
دارت بمقبض الباب برجفة وخوف ... ماتدري وش راح تكون حالة ندى ؟؟؟ أكيد زياد قال لها كل شي ؟؟ أكيد فهمها انهم رفضوا طلال لأن مشاري خطبها ؟؟؟ مية بالمية بتتوقع أني أعرف بالسالفة وما قلت لها ؟؟؟
طلت براسها على خفيف وشافت ندى جالسة في زاوية الغرفة وحاضنه رجولها لصدرها ... وصوت شهقاتها معبي المكان ...
بلعت سحر ريقها وحاولت تتشجع ... دخلت ومشت لها بخطوات خفيفة ... نزلت لمستواها وحطت يدها على كتوف ندى ..
سحر ::/ ندى استهدي بالله .. ترى هالصياح مابينفعك ؟؟
ندى وسط شهقاتها ::/ هذا اللي كنت خايفة منه يا سحر ... صار وياليتني مت قبل لايصير ؟؟
لفت سحر بوجهها من الحزن ::/ ندى ترى هذا اللي الله كتبه لك ؟؟؟ ولو كان طلال من نصيبك صدقيني ما كان فيه قوة في الأرض بتخلي زياد يرفض ..
رفعت ندى راسها ووجهها مليان دموع ::/ رفض طلال ؟؟؟
طالعتها سحر باستفهام ::/ إيه ...؟ ماقال لك ؟؟
زادت نوبة الصياح عند ندى ::/ كله مني أنا السبب .. الله يآخذني الله يآخذني وارتاح وافتك ؟؟؟ ليتني مت في بطن أمي ولا انولدت ...
حضنتها سحر وهي تصيح وحاولت تهديها بكم كلمة .. سكتتها وبعدها خذتها للسرير خلتها تنسدح وتتمدد .. وطلعت من عندها بتجيب لها عصير والا شي يهديها .. مو معقولة وضعها ؟؟؟
---------------------------------------------------------------------------
دخلت أم عبدالله وعبدالله للبيت وهي خلاص هلكانة من الدوران في السوق ... دخلت عليهم في الصالة وشافتهم مجتمعين ومعهم قهوة ... رمت عبايتها على الكرسي وحطت جنبها شنطتها و قربت منهم ..
ام عبدالله صوت منهك ::/ السلام عليكم ...
سارة وهي تقلد صوت العجايز::/ هلا والله بأم المعرس .. هلا وغلا ..؟؟ هاه بشري عسى لقيتوا شي زين ويستر على الوجه ...
ام عبدالله مبتسمة::/ الحمدلله لقينا ومابغينا نلقى ... المهم قومي جيبي لي كاس موية قبل لاأموت عليكم ...
حضنت عذا امها مع كتوفها ::/ بسم الله عليك يومي قبل يوك ...
قامت سارة متوجهه للمطبخ .. وفي نفس الوقت دخل عبدالله مع باب الصالة وفي يده كيس هدايا كبير .. ابتسمت له سارة وقالت ::/ يا ويلك توريهم شي قبل لا أصير معهم ؟؟
عبدالله مبتسم ::/ زين .. بس جيبي لي مويه معك ؟؟
سارة بصوت مستفهم عالي ::/ وش قصتكم مع المويه اليوم ؟؟؟
ضحك عليها عبدالله وسلم على أهله الموجودين بالصالة ... وأول ماشافت لمياء الكيس نقزت عليه بتآخذه منه .. لكن هو مسكه بقوة وحضنه ..
عبدالله ::/ لا ممنوع .. اصبري شوي لحد ماتجي سارة ..
لمياء ::/ طيب نشوفه الحين وإذا جت سارة تشوفه ؟؟
عبدالله وهو يآكل من الحلى ::/ لا أنا واعدها اننا نشوفه سوا ...
أسامة بنبرة استهزاء::/الله أكبر ياسارة .. وفجأة قام عزك وصاروا الناس يعملون لك حساب ..
سارة وهي طالعة من المطبخ ::/ ليش حبيبي ما ملت عينك سارة يوم تقول عنها هالكلام ؟؟
عذا ::/ يمه منها تسمع الشي الشين لكن الشي الزين أذنها مطموسة عنه ...
سارة وهي تمد الكاسات ::/ لاتقعدين تتفلسفين علي ... (( التفتت على عبدالله )) يالله عبادي طلع أشيائك وخلنا نشوف ذوقك أنت والمام ..
جلست سارة قدام عبدالله .. والكل مركز عينه عليه ينتظرونه يطلع لهم الشبكة من الكيس ...
طلّع عبدالله الصندوق وهو يبتسم ... وحطه في حضنه ...
عبدالله مبتسم ::/ كلوا يسكر عينه وإلا ترى ما أوريكم ؟؟
سارة بحماس ::/ اترك عنك شغل البزارين وافتح العلبة ..
عبدالله باصرار ::/ أقول غمضوا كلكم .. شوفوا عذا ماشاء الله عليها تسمع الكلام ؟؟
أسامة وهو يغمض عيونه ::/ ياشين المذلة وانا أخوك ..
كملت عليه لمياء ::/ وانت الصادق يا شين البزران إذا بغوا يتزوجون ؟؟
عصب عليهم عبدالله ::/ يوم هذا كلامكم أنسوا أوريكم شي ..
كلهم هبوا فيه يعتذرون ويتأسفون واللي يحب راسه واللي يقول له راح أخدمك بعيوني بس أنت خلنا نشوف شبكتك ...
انصاعوا كلهم لكلامه وغمضوا عيونهم وينتظرونه يطلعها لهم ...
كانت ام عبدالله تشوف لمعة السعادة والراحة بعيون عبدالله .. وهالشئ لاحظته من بعد ما قبلوا فيه أهل ريم وشافها الشوفه الشرعية ...
فتح عبدالله العلبة وحطها لهم على الأرض ..
عبدالله بصوت عالي ::/ يالله فـــتـــحــــــــوا ................!!
فتح الكل عيونه .. وأشد واحد انبهر كان أسامة ... تقدم للعلبة ولمس بأصابعه العقد ..
أسامة ::/يخرب بيتك يا عبيد ؟؟؟ كل هالمهارات عندك وانا مدري ؟؟
عبدالله بخجل ::/ إيه عاد هذي الريم لازم نجيب لها شي يليق بمكانتها ...!!
سارة بقهر ::/ يخرب بيتها هي بعد .. يا حظها بتلبس هالخاتم وهالعقد ؟؟
ام عبدالله ::/ اذكري الله لا تعطينها من الثقيل وتموت البنية قبل لاتلبسه ..
عبدالله باندفاعية ::/ بسم الله عليها .. وش هالفال ؟؟
ضحكوا عليه كلهم ومن كلامه عن ريم ..
حاولت ام عبدالله تغير الموضوع لما شافت الإحراج واضح على ملامح عبدالله ..
ام عبدالله تأشر لعذا ::/ عذاي عيوني جيبي شنطتي خلني أتصل على ندى أشوف وش صار عليهم ؟؟
لمياء::/ ليش وش فيهم ؟؟
ام عبدالله ::/اليوم بيجيهم طلال ... وعاد أكيد الحين راحوا أبشوف وش صار ؟؟
سار بنظرة جانبية ::/ والله ماخبرتك ملقوفة يا ام عبود .. إلا من خطبتي لوللدك وانتي خربانة ..
أسامة وعيونه طايرة في سارة :::/ هيه انتي عيب عليك .. ترى ما أسمح لك تقولين لها هالكلام وأنا موجود ؟؟
ضحكت ام عبدالله ::/ ههههههههه يعني لو انت مو موجود عادي يهزئوني ...؟
وصلت عذا لأمها وبيدها الجوال ومدته لها ::/ لا عاد إذا راح أسامة أنا اناوب ..
لمياء ::/ وانت ما تجين إلا في الأخير لكن تسوين شي من نفسك ماتعرفين؟؟
عذا بنبرة دلع ::/ يمــــــــه سكتيها ؟؟
ضحكت ام عبدالله وهي تتصل ::/ هذا وانتي راح تدافعين عني ؟؟ الله يخلف عليك الظاهر انتي تبين أحد يدافع عنك ...
أسامة يضحك ::/ لا ماعليش عذا طول ما أنا موجود بحاول أدافع عنك انتي وأمي ..
سارة بنقمة ::/ أنت اكفها شرك وهي غنية عن خيرك ..
سكتوا كلهم لما بدت امهم تتكلم ,,,
ام عبدالله ::/ مرحبا ندوش حبيبتي وش أخبارك ؟؟؟
ندى اللي كانت تصيح على خفيف انهارت لما سمعت صوت عمتها وحست بالأمان اللي افتقدته من دقائق.. وفي وسط شهقاتها ردت عليها ::/ عمه والله مالي دخل أنا ما سويت شي غبي ... أنا عارفة إني غلطانة بس مو لهالدرجة ..
ام عبدالله بنبرة خوف ::/ ندى وش فيك تصيحين ؟؟ شصاير لكم ؟؟
ندى وشهقاتها تزيد ::/ زيـ ـ ـ زيـ ـ ـاد ..
حطت ام عبدالله يدها على قلبها ::/ وش فيه زياد ؟؟
كل اللي عند ام عبدالله انشد انتباههم لما ذكرت أسمه .. وخصوصا ان ملامح الخوف علت وجهها .. وخافوا لا يكون صار له شي ..
حطت عذا يدها على فمها من دون شعور .. تنتظر امها تكمل جملتها .. وتقول وش اللي صاير ..
ام عبدالله ::/ ندى لاتخوفيني عليكم ... تكلمي ؟؟
ندى ::/ ما دري وش فيه ياعمة ؟؟ اسأليه هو لا تسأليني أنا ..؟
سكرت ندى عن عمتها لما حست انها لا يمكن تقدر تكمل كلامها أو يطلع منها حرف ثاني غير اللي قدرت تقوله ...
اما ام عبدالله فنزلت السماعة من يدها وهي تحس بعظامها ترتجف .. ماعندها جرأة تتصل على جوال زياد تخاف تنصدم بشي مو زين ؟؟
ام عبدالله تطالع عبدالله ::/ عبدالله اتصل على زياد وشف وش فيه ؟؟
عبدالله بخوف ::/ ندى وش قالت لك ؟؟
ام عبدالله ::/ ماعطتني سالفة ... بس كانت تصيح .. اتصل الله يخليك خلنا نشوف وش صاير لهم ...
طلع عبدالله جواله من جيب ثوبه وعلى طول اتصل على زياد ...
انتظره يرد لكن لاحياة لمن تنادي ..
عبدالله بنبرة خوف ::/ مــايرد ..؟
عذا والدمعة شوي وبتنزل ::/ يمه كلميه من جوالك يمكن إذا شاف رقمك يرد ؟
تنفست ام عبدالله بعمق ومدت التليفون للمياء اللي كانت جالسة حنبها ::/ لمياء خذي اتصلي وإذا رد عطيني إياه ..!
خذت لمياء الجوال من يد أمها واتصلت على زياد ... الرنة الثانية رد عليها ..
رمت لمياء الجوال على أمها علشان تكلمه ...
ام عبدالله ::/ زياد وينك ليه ماتردون علي ..؟ وش فيكم ؟؟
تنهد زياد اول ماسمع صوت عمته ... كان متمدد على سريره والأنوار متسكرة وحالته لله ... منصدم من اللي صار ... وماكان يتوقع هالشي يصير من أخته اللي تُعتبر تربيته ... ماكان فيه حيل يتكلم لكن صوتها أجبره انه يرد عليها ...
زياد بصوت واطي مكسور ::/ هلا عمه .. مافينا إلا العافية ..
ام عبدالله والدمعة نزلت من عينها ::/ لا تكذب علي .. انتم فيكم شي .. من شوي كلمت ندى وكانت تصيح وتقول لي كلام مو مفهوم ... عاد انت الحين فهمني ؟؟
زياد وهو يمسح على شعره ::/ ما فيه شي ياعمه .. وش تبيني أحلف لك به ؟؟ كل اللي صار سوء تفاهم بيني وبينها بس ..؟؟
ام عبدالله ::/ زياد ؟؟
تنفس زياد بعمق ::/ صدقيني لو فينا شي كنت بقول لك بس صدق مافينا شي ؟؟
ام عبدالله بلهجة أمر::/ طيب خذ أختك وتعالوا لنا الحين ..
زياد ::/ معليش ياعمه خليها يوم ثاني ..
ام عبدالله بإصرار ::/ أقولك الحين .. وإلا ترى أجيكم انا وعبدالله وآخذها ..
زياد بقلة حيلة ::/ زين أمرك يا أغلى عمة دقائق وحنا عندكم ..
سكرت ام عبدالله عنه وبالها مو متطمن ...قلبها يقول لها إن فيه شي قوي حاصل .. لكن الله يستر .. كلها دقائق ويجون وبتفهم منهم كل شي ..
-----------------------------------------------------------------------------
بعد ساعة من مكالمتهم دخلت عليهم ندى الصالة وشكلها يرثى له ... كانت عيونها متنفخة من كثر الصياح ... والجرح على طرف فمها ملفوف بستيكر جروح ... كانت الرجفة بيديها واضحة .. والخوف بعيونها جلي لعيون عمتها وبناتها ...
ام عبدالله وهي تسلم على ندى ::/ وين أخوك ؟؟
ندى بصوت هامس ::/ نزلني وقال بيرجع بعدين ؟؟
ام عبدالله تتحسس وجه ندى ::/ وأنتي وش اللي مسوي فيك كذا ؟؟
ندى ويدها على الجرح ::/ عادي زلقت بالحمام ..
ام عبدالله بنظرة تشكيك ::/ ندى تخبين علي ؟؟
ندى ودمعتها نزلت ::/ لا والله ياعمة ..
أم عبدالله ::/ أجل وش بينك وبين زياد ؟؟؟
ندى ::/ عادي كان فيه سوء فهم بيني وبينه وانتي تعرفينه إذا عصب مايعرف امه من أبوه .. هذا كل مافي الموضوع ...
الصدمة اللي تملكت عذا خلتها تقول ::/ زياد ضربك ؟؟؟؟؟
حاولت ندى تستدرك ::/ لا من قال .. لكن صرخ علي وهاوشني وانا ما أتحمل يصير لي شي من زياد ...!؟
سكتت عنها عمتها وحاولت تصدق اللي انقال وعموما هي ترتاح في الكلام مع زياد أكثر لأنها تفهمه أكثر وتعرف تطلع منه السالفة ...!! وهو أكيد بيقول لها ...؟
تركتها مع البنات وهي طلعت لأبو عبدالله اللي كان جالس بحديقتهم الخارجية يتقهوى وطالبها تجيه ...
جلسوا البنات بالصالة .. لكن لو ندى قدرت تمشي كذبتها على ام عبدالله فيستحيل أن لمياء ممكن تصدقها أو تنطلي عليها ...
لمياء بنبرة أمر ::/ ندى قولي وش اللي صار ..؟
بلعت ندى ريقها ::/ اللي صار قلته ؟؟
لمياء ::/ هذيك أمي واللي يكلمك الحين انا ... فلا تراوغين ... تكلمي ...!!
سكتت ندى شوي تحاول تستجمع قوتها علشان تقدر ترتب كلامها لكن عجزت .. انهارت وبدت تصيح ... تقربت منها لمياء و هي تحس بالعطف على هالبنت المسكينة ..
لمياء وهي حاضنتها ::/ ندو وش فيك ؟؟
ندى وسط دموعها ::/ زياد شاف كل شي وعرف كل شي ؟؟
لمياء وهي تطالع بعيون ندى ::/ وش تقصدين ؟؟
ندى ::/ كل الأشياء اللي وصلتني من طلال زياد عرف عنها ؟؟ لا وفوق كل هذا قرأ الكروت .. وغسل شراعي ورمـ ـ ى عـ ـ ـ لي كلامي قاسي ؟؟
لمياء وهي تحاول تهديها ::/ وش قال لك ؟؟
ندى وهي تشهق ::/ حسسني بأني مذنبة واني ما استاهل ثقته ...؟؟ قسم بالله يالمياء كنت بموت من كلامه .. حتى لما شفت دمعته بعينه حسيت اني حقيرة وناكرة معروف ..
لمياء بعتاب ::/ كنت قايلة لك ... ومنبهتك على هالشي .. وقايلة انه مهما كان طلال يعتبر ولد عمكم من الرضاع بس زياد مايعتبره هالشي ويحسه مجرد ولد خالة عيال عمكم واللي تسوينه وتآخذينه منه لايمكن زياد يقبل به مهما كان لأن حضرته يهديك ويرسل في الطالعة والنازلة اونتي ساكتة وتستقبلين منه من دون اعتراض ..!؟
سكتت ندى وسكتت معها لمياء اللي كانت مآخذتها في حضنها وتمسح على شعرها ..
خلاص الفاس طاح في الراس وزياد عرف كل شي .. يعني الحين مو وقت عتاب وملامة ..
رجعت لمياء والتفتت لندى :: عرف انهم من عند طلال ؟؟
هزت ندى كتوفها :: ما دري بس الكروت ماكان ينكتب عليها أسمه ..؟

أما عذا فكانت في عالم ثاني ....
معقولة زياد يكون بهالوحشية ؟؟؟؟ لهالدرجة عصب على اخته والموضوع قابل للنقاش والتفاهم ؟؟؟ ليه ماجلس معها وطلب منها تحاوره وتناقشه واستفهم منها عن اللي صار ؟؟؟ المستحيل انه يكون هو اللي ضربها ..
طاحت عينها على يد ندى اللي كانت علامات أصابع زياد واضحة مثل الشمس بلونها الأزرق الخفيف ...
ومن دون شعور وقفت ومشت لندى .. وقفت قدام وجهها ونزلت لمستواها .. مررت يدها على مكان أصابع زياد من دون شعور وتحت مرأى من لمياء وندى ..
عذا بنبرة رجاء ::/ أمانتك ندى قولي لي .. هو اللي سوى لك كذا ؟؟
حنت ندى على زياد وخافت لا تهتز صورته قدامها ::/ لا عذا مو منه صدقيني ؟
طالعتها عذا بنظرة تشكيك ::/ احلفي ؟؟
لفت ندى تطالع لمياء تبغاها تنقذها من هالمأزق لكن مالقت بد من انها تقول لها الحقيقة ..
ندى ::/ عذا لاتلومينه تراه كان معصب ؟؟
عذا بعصبية ::/ يعني حتى الجرح اللي بفمك بسببه هو ؟؟
ندى بنبرة تردد::/ نوعا ما .. مو كله بسببه ...

سكتت عذا و ما ردت على ندى .. كل اللي سوته انها هزت راسها ومشت من عندهم طالعة الدرج وتاركتهم وراها يطالعونها بنظرات تعجب ...

---------------------------------------------------------

صحت من نومها مفزوعة والعرق يتصبب من جبهتها ... زادت عليها الكوابيس هاليومين وهي عارفة ليش ... سمت بسم الله وتلفتت حولها علشان تتعرف على المكان اللي هي فيه ... تنهدت براحة لما تذكرت أنها أمس نامت مع عبير أختها بالغرفة ... شالت اللحاف عنها وقامت للحمام تتغسل وتصلي الظهر ...
أول مادخلت وطاحت عينها على صورتها بالمراية ... ماقدرت تتحمل تشوف شكلها وعيونها الذبلانة ... دمعت عينها وحاولت ما تطالع المراية كثير ... غسلت بشكل سريع وطلعت على طول فرشت سجادتها وبدت تصلي ...
أول ماخلصت رفعت يديها تدعي ربها من خاطرها أنه ينفس عليها كربتها ... و غصب عنها صاحت وهي تدعي ...
دخلت عليها عبير وشافتها على وضعها .. تركتها براحتها وجلست على طرف السرير تنتظرها تخلص ...
أريج وهي تقوم من مكانها ::/ تغديتوا والا بتفطرون ؟؟
عبير مبتسمة ::/ لا أمي مسوية غداء ...
لفت أريج سجادتها وراحت تصلح شعرها قدام التسريحة ... وهي ساكتة من دون ما تتكلم ...
عبير ::/ بتروحين اليوم للملكة ؟؟؟
أريج ::/ مادري ..ودي أروح وما ودي ؟؟؟
عبير مبتسمة ::/ حددي موقفك .. لأن على أساسه انا يتحدد موقفي ؟؟
لفت لها أريج وهي مكتفة يديها ::/ طيب لو رحت وش ألبس؟؟
قامت عبير ومشت للدولاب ::/ البسي فستانك الأورنجي ... بيطلع عليك حلو؟
أريج بنبرة تفكير ::/ ما تحسين موديله قديم ؟؟
عبير وهي فاتحة الدولاب ::/ اممم لا عادي ... يعني ماله فترة أنتي مفصلته ؟؟
أريج ::/ خلاص طلعيه علشان أكويه وأجهزه للبس ؟؟
ابتسمت لها عبير بحب ... حاسة ان فيها شي غريب والدليل أن أمس ما تركتها تنام من كثر ما تتحرك في السرير وتتنهد وتتأوه وهي نايمة ... خايفة عليها وماتدري وش صار لها ؟؟؟
طلعت أريج من الغرفة وجلست عبير تجهز أشغالها للحفلة بالليل .. اليوم زواج نهلة صديقة عمرها وأختها الروحية ...كان كل شي جاهز الفستان والإكسسوارات حتى المكياج حنان تكفلت ترسل لها كوافيرة علشان تصلحها ...
طلت أريج براسها مع فتحة الباب ::/ عبير ترى نواف هو اللي راح يوديني أنا وأمي ؟؟
نقزت عبير من مكانها لأن أريج فاجأتها ... ومن سمعت اسم نواف حست بقلبها ينغزها وكأن الفراشات النايمة ببطنها بدت تطير من جديد ..
عبير ::/ قلتوا له ؟؟
أريج ::/ بقول لأمي تتصل عليهم الحين .. أو أنا بقول لإيمان ؟؟
ابتسمت عبير ::/ خلاص براحتكم ..
أريج باستفهام وفي عيونها نظرة غريبة ::/وانتي من راح يوصلك للقاعة ؟؟
تلعثمت عبير ::/ أنا محلولة بشوف لي أحد يمرني من البنات لا تشيلين هم ..؟
أريج بنبرة استهزاء ::/ أكيد أي وحده من البنات ؟؟
عبير بعصبية ::/ أريج ....!!اطلعي وخذي الباب معك ...
هزت أريج كتوفها بعدم مبالاة وطلعت وسكرت الباب وراها .. وخلت عبير غرقانة في دوامة تفكيرها وفي الصورة اللي تشكلت في مخيلة أختها عنها ...
--------------------------------------------------------------------------

في الليل وبعد صلاة المغرب كان الكل يشتغل على قدم وساق في بيت ام عبدالله ...
كل وحدة من البنات مشغولة بنفسها .. اللي تصلح شعرها واللي تضبط فستانها ... كانوا فرحانين من اعماق قلبهم لأخوهم ... مو مصدقين أن عبادي بيتزوج وبتصير عندهم مرت أخو ؟؟؟ وأكثر فرحتهم أنهم بيكونون عمات وخالات في نفس الوقت ...
أول من خلص منهم أم عبدالله ... كانت لابسة جلابية مطرزة فخمة .. ومسوية شعرها بشكل ناعم ومكياجها كان خفيف ومو متكلف ... بنظرة عامة شكلها متناسق مع عمرها وجسمها النحيل ...
نزلت تحت للصالة وكان ابو عبدالله وأسامة وحتى المعرس جالسين فيها يطالعون التلفزيون وينتظرون العشاء يأذن علشان يصلون وعقب يروحون للناس ويملكون ..
أسامة وهو يطالع امه ::/ وااااااااااااااااااااااو .. احلى يالحركات ؟؟ والله ماتوقعتك حلوة لهالدرجة يمه ؟؟
أبو عبدالله بنبرة حب::/ أمك طول عمرها حلوة بمكياج والا بدون مكياج ؟؟
عبدالله وهو يطالع أسامة ::/ يا ويلك تسب فيها والأخ روميو موجود ؟؟؟
جلست ام عبدالله معهم بالصالة بدون ما تعلق .. لأنها في الأساس مستحية وحمرة الخجل واضحة على وجهها ..
أسامة ::/ عاد وش دعوى عطينا نظرة على الأقل ؟؟
ام عبدالله ::/ أسامة فكني من شرك ؟؟
قام أسامة وجلس جنبها ::/ اللله .. يا زينها ريحة عطرك ؟؟؟
ام عبدالله وهي مستحية ::/ اللي يسمعك يقول ماعمرك شميتها هالريحة ؟؟
ابتسم أسامة لأمه وحبها على رأسها ::/ والله أخاف لا يحسبونك انتي العروس وتخطفين الأضواء من ريم ..؟
ابو عبدالله يضحك ::/ لاتقول هالكلام عند عبدالله لا يذبحك ؟؟
عبدالله بنبرة حنان ::/ لا أنا أذبحه في الكذب ،، لكن في الصدق ما أقدر عليه ؟؟؟ وأمي اليوم سارقة الأضواء وكأنها هي العروس ؟؟
ابو عبدالله بغيرة ::/ قومي الجوهرة وامسحي هاللي انتي حاطته ؟؟
ام عبدالله منصدمة ::/ ليش ؟؟؟
ابوعبدالله ::/ بس أخاف يخطبونك قصدي ينظلونك ؟؟
ام عبدالله بنظرة جانبية وشبه ابتسامة ::/ لا لاتخاف قريت المعوذات ..
أسامة يضحك ::/ يا ربي منك يالغيار ... قل ماتبيها تصير أحلى وحده ؟؟
ابو عبدالله ::/ نشوفك وش بتسوي بـ أم العيال بكرة ؟؟
أسامة وهو ينفخ صدره ::/ هه ومن قال لك بخليها تحط مكياج أصلا ؟؟؟ علي الطلاق لو حطت شي ؟؟
ضربته ام عبدالله على صدره ::/ أيوه يا حمش .. خل عنك الحلوف اللي مالها طعم ؟
أذن عليهم العشاء وقاموا الشباب بيروحون للمسجد ،، لكن ابو عبدالله قصد أنه يتأخر شوي لأنه ما بعد قال اللي في قلبه ... ومايقدر ينتظر لحد مايرجعون في الليل ...
بعد ماطلعوا العيال من الصالة قام ابو عبدالله ومشى في طريقه لحد ما صار قريب منها ...
وبصوت حنون للجوهرة ::/ كل يوم تزيد حلاتك بعيوني ...
رفعت الجوهرة عينها له بخجل ::/ مشكور .. ويالله اطلع معهم لاتفضحنا ؟؟
ابو عبدالله يضحك ::/ والله لو يشكنا أسامة أن مايخلينا ..؟؟
ضحكت ام عبدالله ::/ مادمت عارف يالله الحقهم قبل لايجي ...
ابتسم ابو عبدالله ونزل حبها على راسها ومشى يكمل طريقه ... غمضت الجوهرة عيونها بحب .. هذا هو محمد وهذا اللي تعرفه عنه ...
.
.
.
.
.
بعد ماخلصوا الصلاة كان الكل جاهز علشان ينطلقون ... دخلوا العيال بعد ما رجعوا من المسجد للصالة وشافوا اخواتهم وأمهم جالسين ينتظرونهم ...
أسامة مبتسم ::/ أحلى عليهم الكشيخات .. بس عاد مستحيل أوديكم قبل لا تشيلون العبايات .. خلوني أشوف كشختكم ؟؟
لمياء من دون نفس ::/ أسامة لاتزيدها ... خلنا نطلع قبل لا أسوي لك شي تندم عليه ؟
ابو عبدالله باستفهام ::/ وش فيك معصبة ؟؟ الحين هذي نفسية وحده بتروح لملكة اخوها ؟؟
ردت عليه عذا مبتسمة :::/ متضايقة من شعرها ما ضبطت تسريحته ؟؟
عبدالله وهو يطالع لمياء من فوق لتحت ::/ الحين كل هذا وتقولين شكلك مو حلو ؟؟
لمياء مبتسمة ::/ مشكورين كلكم على رفع المعنويات .. بس انا مقتنعة أن شكلي مو حلو ؟؟
سارة ::/ أحسن تستاهلين هذي عقوبة مهند ... مخليته يروح مع أبوه وهو يصيح ؟؟
أسامة ::/ المهم خلونا نشوف ملابسكم ولا تكثرون الهرج علشان يمدينا نوصل هناك ..
شالوا البنات عباياتهم لأخوانهم وأبوهم اللي انبهروا وشجعوهم بكلمتين .. وبعدها طلعوا كلهم للسيارات بيتوجهون لمقر الحفلة اللي هو بيت أهل الريم ..
-----------------------------------------------------------------------------
في مقر الحفلة كان كل شي خالص وقائم على أتم مايكون ... البوفيه المفتوح جاهز وخالص في ساحة البيت الخارجية .. الأنوار كانت مغيرة الجو وقالبة الليل للنهار ..
كوشة العروس كانت أجمل كوشة ممكن يشوفونها الحاضرين .. مجهزة من أفضل الخامات وعند أفضل المصممين .. أكيد هذي هي بنتهم آخر العنقود .. لازم يسوون لها كذا وأكثر ...
بدأ المعازيم يوصولون لبيت ام راشد وهي وأختها ام مشاري وبنتها العنود واخوات زوجها الثنتين كانوا في الإستقبال ...
أما العروس ريم وسحر ومعهم ندى كانوا جالسين في الجناح الخاص بريم في الدور الثاني ... كانوا يشجعونها ويدعمونها معنوياً .. هي خالصة من تجهيز نفسها وحتى الفستان لابسته .. بس كانت تنتظرهم يوصلون ويكتب الشيخ العقد وبعدها تنزف تحت علشان يدخل عليها عبدالله ويلبسها الشبكة ... وهذا هو الشي اللي كانت خايفة منه ومو قادرة تتصوره ؟؟
ندى كانت جالسة على الكنب اللي بزاوية الغرفة والهم راكبها من دخلت .. ومن شافت صور طلال اللي بالصالة .. وصورته الكبيرة اللي مصورها يوم تخرجه معلقه على جدار الصالة العلوية وهي خلاص الدنيا ضاقت فيها وحست انها مو قادرة ترد نفسها وكأن عظم واقف عند مدخل رئتها واللي زاد مأساتها هو موقف زياد منها ,, لكن وش تسوي حاولت تتماسك علشان عمتها وولد عمتها اللي بمثابة أخوها ...
سحر بصوت عالي ::/ يا ندى ياحلوة .. جوالك مات وهو يرن ؟؟
ابتسمت ندى ::/ صدق ...؟؟ ماسمعته .
قامت ندى لشنطتها وطالعت جوالها وشافت عمتها متصلين عليها ؟؟ ابتسمت ورجعت تطالع ريم ..
ندى ::/ جاك الموت ياتارك الصلاة .. هذولا عمتي متصلين شكلهم وصلوا ؟؟
ريم وبدت ترتجف ::/ كـــــــــــــــذابـــة ..
ابتسمت ندى ::/ عاد هذا هو اللي صار ... يالله تجهزي .. انا بنزل اسلم عليهم تحت ..
تنهدت ندى وخذت طرحتها وطلعت من الغرفة نازلة تحت ..
استغلت ريم الفرصة وعلى طول التفتت لسحر ..
ريم ::/ الحين فهميني وش السالفة ؟؟؟ من متى أخوك المحترم خاطب ندى ؟؟
تنهدت سحر ::/ اسكتي الله يخليك لاتذكريني بالسالفة ؟؟ أصلا احنا ماعرفنا بهالشي إلا لما قال لنا ابوي ؟؟
نزلت ريم راسها ::/ كنت متوقعة أنكم ماتعرفون ...! لكن طلال لما رجع كان معصب و مايشوف اللي قدامه .. كان شايل عليكم في خاطره بالمرة ... وخصوصا انتي ؟؟
سكتت سحر شوي وبعدين ردت ::/ كسروا خاطري والله هو وندى ... الحين هو مو مشكلة انا بعتذر منه وافهمه .. لكن المشكلة الأكبر انه هو و ندى خلاص مستحيل يصيرون لبعض ..؟
ابتسمت ريم ::/ آخر شي كنت اتوقعه ان ندى وطلال مايتزوجون ؟
سحر ::/ كل شي بهالدنيا جايز ... حتى حالة ندى ماكنت متوقعتها ؟؟؟ شوفيها الى الحين مو قادرة تتأقلم ،، مع أنها قبل توضح لنا أنها ماتهتم له كثير ؟؟
ريم ::/ حرام عليك .. يكفي أنه يبان بعيونها الحب لما نطري اسمه ؟؟؟
سحر بنبرة حزن::/ تصدقين ....!! هذاك اليوم اللي انرفض فيه طلال . توقعت يصير شي بعقلها لكن ربي ستر .
ريم وهي قايمة متوجهه للشباك ::/ الله لايلومها يا سحر... أتخيل لو أنا ينفصل عني عبادي ؟؟
ضحكت سحر من قلبها ::/ ههههههههههههههههههههههه من الحين حبيته وصرتي تسمينه عبادي ؟؟ لا وتخافين من فراقه بعد ؟؟
انحرجت ريم من زلة لسانها ::/ سحــــــــــر ... يالله عاد لاتحرجيني ..؟؟
ابتسمت سحر ::/ قولي لي الصدق عاد ؟؟؟ حبيتيه؟؟
ريم وهي مستحية ::/ امممم تصدقين سحورة ... !والله حبيته من شفته هذاك اليوم بعد الخطبة ومن قالوا لي انه خلاص بيصير زوجي وانا احس روحي تعلقت فيه ؟؟ كذا مادري وشلون سبحان الله ..
ابتسمت سحر وقامت لها وحضنتها ::/ الله يديم عليكم المحبة و يوفقكم يارب ...
.
.
.
.
نزلت ندى للدور الأرضي وعلى طول طلعت للمجلس الخارجي علشان تشوف عمتها .. وأول مالمحت سارة راحت لهم وهي مبتسمة ...
ندى ::/ هلا والله بأهل المعرس .. تو مانور البيت ..
ام عبدالله ::/ بوجودكم حبيبتي ..
سلمت ندى على عمتها وحبتها على راسها ::/ مبروك عمه الله يوفقهم يارب ..
ام عبدالله ::/ آمين الله يسمع منك وعقبالكم ...
حاولت ندى تتجاهل كلمة عمتها الأخيرة اللي ركزت عليها وكأنها بتقول لها ان الحياة ماوقفت على رفض زياد لطلال وان العجلة لازم بتمشي ..
لفت للبنات وسلمت عليهم وحده وحده ... وبعدها جلست جنب عذا ..
عقبت لمياء ::/ فستانك روعة يا ندى ..
ابتسمت ندى ::/ تسلمين يا بعدهم عيونك الحلوة ...
سكتوا شوي .. وبعدين لفت ندى على عذا اللي جالسة جنبها وهمست بأذنها ..
ندى ::/ وش رايك تملكون انتم بعد الحين مرة وحدة قبل لايصير لكم شي مثل اللي صار لي ؟؟
سكتت عذا لما حست بنبرة الحزن في صوت ندى وبعدين لفت لها ::/ ندوش لو لي نصيب مع اخوك بآخذه .. ولو نصيبي معه زيك انتي وطلال فمن المستحيلات اني بآخذه حتى لوقررنا نملك الحين ..
نطت لهم سارة اللي قدرت تسمع كلامهم ::/ يعني ممكن يموت الشيخ إذا جاء دور زياد وعذا وبكذا ماراح يملكون !!
ضحكت ندى وضربتها على كتفها ::/ لاتفاولين على الرجال .. الله يخليه لعياله ..
سارة ::/بس عاد خلي عنك الخرابيط و قولي لي مو عذا اليوم شكلها روعة ؟؟
ابتسمت ندى ::/ عذا برائتها تحليها ..؟
نزلت عذا راسها تبتسم ::/ مشكورة ندى بس خلاص لاتحرجيني ؟؟
نطت سارة ::/ يعني هي أحلى من سحر بنت عمك ؟؟
استغربت ندى ::/ والحين من جاب سيرة سحر ؟؟
بلعت عذا ريقها وأشرت لسارة تسكت ::/ لا بس كنت أقول لها ان سحر بنت عمك ماشاء الله حلوة وهي تقول اننا احلى منها ؟؟
ابتسمت ندى لسارة ::/ والله من الغيرة اللي فيك ..؟
----------------------------------------------------------------------------
نزلت أريج تركض من الدرج وعبايتها في يدها وتحوس في شنطتها علشان تدخل الجوال فيها ... مشت على طول للصالة ولقت امها وعبير جالسين ..
أريج وهي تلهث ::/يالله يمه خلصتي ؟؟
ام راكان ::/ شوي شوي على عمرك لايوقف نفسك ؟؟؟ إيه خلصت وانتي ؟
أريج وهي تلبس عبايتها ::/ زين يالله نواف عند الباب ..
قامت ام راكان تلبس عبايتها علشان يطلعون ... لكنها لفت على عبير اللي تحوس بجوالها .. تأملتها لبرهة وابتسمت حزن على هالبنت الوردة اللي حملوها مسؤولية فوق طاقتها ...
أم راكان ::/ عبير متى بتطلعين انتي ؟؟
عبير ::/ مادري يمه يمكن بعد شوي ؟؟
أم راكان ::/ بتتأخرين في الليل ؟؟
عبير بتفكير ::/ مادري يمه لكن الأكيد اني بحضر الزفة وبسلم عليها وبجلس لحد ماتروح ؟؟ عاد متى هي بتنزف ومتى بتطلع مادري ؟؟
أم راكان مبتسمة ::/طيب حاولي ما تتأخرين في الليل وترجعين مبكرة ... زين ؟
ابتسمت عبير لأمها وهزت رأسها بالإيجاب ...
طالعتها أريج بنظرة تصغير انقهرت منها عبير وبعدها مشت مع أمها طالعين لنواف اللي صار عند الباب له ساعة ...
ركبوا أريج وام راكان السيارة .. ونواف احتارت نظرته بينهم وبين الباب ؟؟ وشلون سكروا الباب ؟؟يعني عبير ماراح تجي و بتجلس بروحها في البيت ؟؟؟ ياسلام عليهم يعني يقولون لها العبي بذيلك مادام مافيه أحد ؟؟؟ وبعدين ليش أرسلوا أنوار ونورة لبيتنا ؟؟ كان تركوهم معها على الأقل يمسكون على يدها شوي وماتقدر تسوي شي ؟؟
قطعت عليه ام راكان ::/ كيف حالك نواف ؟؟وش أخبارك ؟؟
انتبه نواف وابتسم ::/ بخير الله يسلمك .. انتي بشريني عن صحتك ؟؟
ام راكان بتعب::/ الحمدلله على كل حال ؟؟
حاول نواف يلقى الفرصة المناسبة واستغلها ::/ خلاص هذا انتم اللي بتروحون ؟؟ والا باقي؟
ردت عليه أريج::/ ايه خلصنا ..
ام راكان ::/ بقت عبير وبتروح لزواج صديقتها ..
نواف بتشكيك ::/ ومن صديقتها هذي ؟؟ ومن بيوديها ؟؟
أريج :/ بتمرها وحده من البنات وبتروح معها ؟؟
نواف بقهر ::/ لاو الله .. على كيفها هو ؟؟وليش ماقالت لي أنا أوديها ؟؟
استغربت ام راكان اسلوب نواف الدفش تجاه عبير ::/ عادي يمه ماحبينا نكلف عليك ونخليك تتمشور في شوارع الرياض .. وصديقتها رايحة رايحة للزواج قالت لها تمرها
تنهد نواف بعصبية وكأنه فهم اللي تبي تسويه عبير من وراء أمها واختها .. واستغفر بصوت مسموع ...
مشى نواف متوجه لبيت الريم وكانت أريج هي اللي توصف له .. بس هو طول الطريق وباله مو معه ؟؟ يفكر باللي ممكن قاعد يصير عند بيت عمه ؟؟ تخيل الوضع اللي ممكن تكون عليه عبير وهي في السيارة ؟؟أول مابدت هالأفكار تغزيه حس بقلبه شاب ضو ...ماصدق خبر يوصلهم وينزلون إلا وهو شاخط بالسيارة ومطلع جواله واتصل عليها بدون شعور .. ...
أول ماشافت عبير رقمه وهي بتطلع استغربت اتصاله ؟؟ وعلى طول ردت عليه خافت لايكون صار لهم شي ..
عبير بصوت خايف ::/ مرحبا ؟؟
نواف وهو مايشوف قدامه ::/ السلام عليكم ..
عبير ::/ هلا نواف وعليكم السلام ..
حس نواف بقلبه يتقطع من قالت اسمه بصوتها الناعم ::/ طلعتي والا بعدك ؟؟
عبير وهي مبتسمة براحة::/ ايه الحين بطلع ..
نواف ::/ وين بتروحين ؟؟
عبير مستغربة::/ زواج صديقتي ؟؟
نواف::/من هي بنته ؟؟ وفي أي قاعة ؟؟
عصبت عبير عليه ::/ وانت ليه تسأل ؟؟
نواف واعصابه فلتانة ::/ وانتي ليه ماتبغين تجاوبين ؟؟
تعوذت عبير من الشيطان لما حسته معصب ::/ مو مسألة ما ابي أجاوب لكن ماتعودت أحد يحقق معي بهالصورة وكأني في مخفر شرطة ؟؟
نواف باستهزاء::/ موهذا اللي خلاك توصلين مواصليك ؟؟ أنك ماعمرك حسيتي بأنك في مخفر شرطة؟؟
عبير باستفهام ومستغربة ::/وش تقصد ؟؟
نواف::/ ما اقصد شي .. بس متى بترجعين للبيت ؟؟ ومن بيرجعك ؟؟
عند هالسؤال فقدت عبير قدرتها على التحكم في اعصابها .. أول شي كلامه الماصخ اللي قاله من شوي واللي ماله طعم .. وسؤاله الأخير ونبرة صوته وهو يسألها جرحتها وحسستها أنها وحده وسخة وحده ماتربت ولا هي أهل للثقة ..
وانفجرت عليه ::/ اسمعني زين نواف ... انت ماتدخل في أمورنا الخاصة مهما كانت .. أنت تخدمنا بعيونك ويعطيك ألف عافية على اللي تسويه واللي سويته ... لكن انك تجي تحقق معي وين رايحة ووين جاية .. فأحب أقولك أنت مالك أي وجه حق .. امي وعارفة أني بطلع .. وهي اللي اعتبرها مسؤولة مباشرة عني ...
عصب عليها نواف ومن طريقتها وقاطعها ::/ وهذا اللي ضيعكم أنها هي اللي مسؤولة عنكم ...؟ وما وراكم رجال ؟؟
شهقت عبير من الصدمة وما قدرت تتمالك نفسه ::/.. الحين انت مكلمني علشان تسمني بهالكلام ؟؟؟؟؟؟ وتقول عن أمي هالألفاظ ؟؟؟
تعوذ نواف من الشيطان ::/ عبير .. اسمعيني أنا آسف ماكان قـ ـ ـ ـ
قاطعته عبير وصوت شهقاتها تسبقها ::/وقـ ـ ـ ح ...
سكرت عنه السماعة ورمت نفسها على الكرسي ... ونزلت دمعاتها غصب عنها من كلامه القوي الجارح ؟؟؟ هزتها كلماته وضربتها في الصميم ..خلتها تندم على اللي سوته واللي قاعده تسويه للحين ......!! قبل لاتتخذ أي قرار رن جوالها وأول ما سمعته وقفت على حيلها وحاولت تمسح دموعه وتصلح مكياجها اللي اخترب .. ولبست عبايتها وطلعت ....
------------------------------------------------------------------------------
دخلت أريج وأمها البيت وكانت منحرجة ومتفشلة بقوة .. لأنها ماتعرف أحد أبد ..
مشت هي وأمها ودخلوا للمجلس واستقبلتهم ام مشاري اللي تعرفت على أريج وامها...
ندى كانت جالسة مع عمتها والبنات .. وأول مالمحت أريج واصلة ابتسمت من خاطرها لهالبنت اللي ترتاح لها أكثر وحده بعد سحر والتفتت لعمتها على طول ..
ندى ::/ عمه عن أذنك هذي أريج وصلت بروح استقبلهم ..
ام عبدالله ::/ اذنك معك حبيبتي ..
مشت ندى لكن رجعت فجأة مرة ثانية ::/ ايه عمه ترى بجيب خالتي ام راكان تجلس معك زين ؟
ابتسمت لها عمتها وهزت راسها انه عادي ومافيها شي ..
مشت ندى متوجهه لأريج وأمها اللي كانوا واقفين في اول المجلس ... انتبهت أريج عليها وافتشلت أكثر من شكلها لما شافت ندى مقبلة عليهم بفستانها الأحمر الحرير وحلقات الأذن الألماس والياقوت اللي كانت لابستها ... لكن خنقتها العبرة وحست بالدموع تتزاحم عند عينها لما تذكرت اللي صار لها وانها انفصلت عن طلال اللي كانت تهاذي به عندها دائما ...
حاولت تمسك نفسها ولاتصيح .. وتقدمت هي وأمها يمشون علشان يتقابلون مع ندى ..
وصلتهم ندى وهي مبتسمة ::/ هلا والله ... واخيرا جيتوا مابغيتوا توصلون ..
ام راكان :/ وش نسوي بالزحمات وانا خالتك ...
قربت ندى لأم راكان و حبتها على راسها ::/ هلا والله خالة وش اخبارك .؟
ام راكان ::/ الحمدلله بخير ونعمة ... انت وش اخبارك (( وطالعتها بنظرتها الحنونة المعتادة ))
تنهدت ندى ورجعت تبتسم من ورى خاطرها ::/ نحمد الله ..
نطت عليهم أريج ::/ يا اختي عبريني سلمي علي على الأقل ..
لفت لها ندى وخذتها في حضنها ::/ ياربي عليهم اللي يغارون من أمهم .. طيب اصبري لحد مانسلم على خالتنا أولى منك ..
ضربتها أريج على كتفها ::/ وش اخبارك بس يالدوبا ..
ابتسمت ندى وهي تطالع عمرها من تحت لفوق ::/ هذا احنا عايشين ...
ابتسمت لها أريج تخفف عنها وقرصتها مع يدها ..
التفتت ندى على ام راكان وسفهت أريج ::/ خالة تعالي أوديك عند عمتي والبنات ..
أريج ::/ احلى يا ام ركان بتجلسين مع اهل المعرس ..
ابتسمت ام راكان وهي تمشي مع ندى ::/ الله يوفقهم ويسعدهم ..
مشت ندى وهي ماسكة يد أم راكان لحد ما وصلوا لمكان عمتها سلموا البنات على بعض وجلست ام راكان جنب ام عبدالله وخذتهم السوالف ...
اما اريج فلفت على ندى ::/ ندى ماودك توديني لريم ؟؟ تراها قايلة أول ما أوصل أطلع لها
ابتسمت ندى وهي توقف ::/ طيب قومي نروح ..
طالعتهم سارة بقهر ::/ ودي أروح معكم ..
ندى وهي تغايضها ::/ مافيه اجلسي هنا لحد مايزفونها لكم ...
طلعت سارة لسانها في وجه ندى .. وسفهتها الأخيرة تغايضها وخذت يد أريج علشان تقهر سارة أكثر ..
صرخت عليها سارة من القهر::/ تشوفين إذا مالحقتكم ؟؟؟
ما ردت عليها ندى ومشت مع أريج طالعين لغرفة ريم ..

.
.
.
.
....................../ الله عليكم .. الحين من العروس فيكم ؟؟ (( وطالعت في الثلاث كلهم ))
ضحكوا كلهم عليها .. وردت سحر تنكت ::/ انتي من دون منافس ..
ابتسمت أريج بحالمية ::/ ياليته صدق ... وانا عروس والبس فستان العرس .. ويجي الفارس الملثم ويشيلني بين ذراعيه ـ ـ ـ
قاطعتها ندى ::/ هيه هيه انتي .. وقفي خيالاتك شوي ... وباركي للبنت
ابتسمت اريج ::/ اي والله نسيت ابارك لك ريمو ..
و قربت منها وسلمت عليها ::/ ألف مبروك ياحلوة .. منك المال ومنه العيال ؟؟
ندى::/ لو سمحتي العكس ..
اريج باصرار ::/ لا ... هي منها المال لأنها ماعليها قصور وهو عليه العيال ؟؟ بعد مو عدل ان كل شي يصير عليها هي بس ..
ضحكت عليها ريم ::/ وش رايك نخليها المال والعيال كلهم عليه هو ؟؟
سكتت أريج وكأنها تفكر ::/ كلام منطقي ... وانتي ماعليك الا تتمشين وترفهين عن نفسك ؟؟
سحر ::/ ايه والله حركة .. وهو خليه يكرف في البيت ويروح الدوام ويجيب لكم العيال ويربيهم وكل شي ..
أريج ::/ ايه واذا شفتيه قصر في شي ماعليك الا تجيبين هذيك العصا وتخلينها تسوي علامات على ظهره ... وان ماقدرتي عليه بروحك اتصلي علينا نجي نساعدك ..
ريم وهي تضحك ::/ ايوه يا سلاحف النينجا ..
قاطعتهم ندى وهي تصرخ ::/ هي انتي واياها ترى ما اسمح لكم هذا عبدالله .. وانتي يالغبية (( تطالع ريم )) تاركتهم يتكلمون عنه بهالطريقة و ساكتة ؟؟
سوت ريم نفسها مكتأبة وانه ضاق صدرها ::/ الله يقلع بليسكم بنات خليتوني اغتابه ويآخذ حسناتي ؟؟
ضربتها ندى على كتفها ::/ بس هذا اللي همك ... لكن شي اسمه رومانسية ماتعرفين ؟؟
ضحكت ريم ::/ هههههههههه ارجوك ترى هالمصطلح انا متبرية منه ليوم الدين ..
ندى ::/ عاد انتبهي لنفسك ترى ولد عمتي هذا بزيادة رومانسي وحساس وخجول ,, فانتبهي لتعاملك معه ؟؟
سكتت ريم وماردت عليه لأنها فعلا حست بالخجل يسيطر عليها ... وعلاماته بانت على خدودها من انذكر اسمه..
بدوا البنات يسولفون في مواضيع عامة وينتظرون هالدفتر يجي علشان توقع عليه ويزفونها ويرتاحون ...
بعد دقائق سمعوا دق خفيف على الباب ...
نقزت ندى ::/ احلف لكم انها سارة ؟؟
ريم باستفهام ::/ من سارة ؟؟
ندى بقل صبر ::/ من غيرها بنت عمتي ؟
شهقت ريم ::/ لا لا تقولين ... وش بيطلعها ؟؟
سحر ::/ لا ندى ماتوصل لهالدرجة انها تطلع فوق من دون مايكون أحد معها ...
سكتت ندى وكأنها اقتنعت ... وقامت سحر تشوف من عند الباب ...
سحر تستهبل ::/ من الطارق ..؟
طلال يستهبل ::/ انا اللص السارق ؟؟
كملت سحر ::/ الا تخجل من نفسك يا فاسق ؟؟
ضحك عليها طلال ::/ افتحي الباب الله يخليك ..
ضحكت سحر وفتحت له الباب .. وشافت في يده الدفتر ... وعلى طول التفتت لهم ..
سحر ::/ كلولولولولوش .. ابشركم جاء الفرج ... والدفتر هذا هو وصل .. يالله تغطوا علشان يزفه اخونا الكريم ..
ضحكوا البنات كلهم الا هي ... صوته الرجولي العميق قلب عليها المواجع .. ورجع لها الغصة اللي بحلقها ... ليه مااختار الا هالوقت اللي بتنزف فيه ريم علشان يخليني اشوفه واسمع صوته ...؟
دخل طلال وهو منزل عيونه والدفتر بيده .. وأريج وندى تغطوا وجلسوا في زاوية الغرفة بعيدين شوي ..
مد طلال الدفتر لريم اخته ينتظرها توقع .. لكن ريم رفعت راسها له والدمعة تأذن بالنزول ::/ لازم اوقع طلال ؟؟
ابتسم لها بحنان قطع قلب ندى اللي تطالعه من وراء الحجاب ::/ هذي حال الدنيا وانا اخوك... لكن وقعي وما جاك علي ..
تنفست ريم بعمق وضربات قلبها زادت والعرق ملى يدها .. وقربت للدفتر وعطاها طلال القلم ... وأخيرا وقعت ...
وصارت في هالساعة وهالدقيقة وهاللحظة حرم عبدالله بن محمد ... لكن هل ياترى بتتوفق وبتقدر هي واياه يكونون اسرة ؟؟ والا ممكن كل شي ينهد وما تصير فيه عائلة وهالتوقيع يلتغي بورقة او ظرف من ظروف الدنيا ؟؟
زغرطت سحر ::/ كلووووووووووووووووووووووووولووووووش
وتقدمت وحضنت ريم وبدت تبوسها ::/ مبروك ألف ألف مبروك يالغالية ..
حضنتها ريم ::/ الله يبارك فيك وعقبالك ..
والتفتت على البنات وبحركة مضحكة ::/ عقباااااااااااااااالكم كلكم واحضر ملكاتكم كلكم .. وياويلكم لو ماعزمتوني ؟؟
ضحكوا عليها الجميع .. وتقرب منها طلال ::/ واخوك ماله عقبالك ؟؟
انصدمت سحر لما سمعته وزادت غصتها على ندى بنت عمها .. تخيلت لو انها سمعت هالكلمة اللي قالها بهمس في أذن ريم .. وما قدرت تتوقع وش ممكن يصير ؟؟
حضنت ريم طلال وهو لف يديه عليها ..
ريم ::/ عقبالك يالغالي .. وارقص ان شاء الله في عرسك ..
ضحك طلال ::/ انتي وبنتك ..
استحت ريم وبعدت شوي عن اخوها ... قرب لها طلال وحبها مع جبهتها ومشى طالع من الغرفة ... والألم والحسرة يملون قلبه ..لكن مكابرته ورجولته اللي يحس انها ممكن تنقص خلته ما يوضح اي شي او اي تعبير على ملامحه واكتفي انه يختزن هالحزن في قلبه هو وبس ... لأن في اعتقاده ان هي اللي اختارت ... ومو من حقه يعترض عليها ولا من حقها تشوف تأثير انفصالها عنه ...!!
أكيد انها وحده من المتغطين ... مو أكيد الا هي ندى اللي جالسة على اليسار ...
الله يالدنيا .. كان المفروض نكون انا وانتي معهم اليوم وينعقد قراننا .. لكن يالله انتي اخترتي مشاري يكون زوجك .. والله يوفقك ... ويوفقني بعدك ...؟
--------------------------------------------------------------------------
و على ألحان هادية .. وأضواء خافتة ... دخلت ريم للمجلس الكبير المخصص لمثل هالمناسبات ... كان شكلها في الفستان والتسريحة والمكياج الترابي ... فوق الوصف ..
يعني كانت بالفعل عروس ونعم الإختيار ...
من شافتها ام عبدالله وانبهرت بشكلها بدت تقرأ عليها المعوذات وتسمي عليها وتدعي ربها يحرسها ويوفق ولدها معها ...
مشت ريم بخطوات بطيئة ... والأنظار كلها مسلطة عليها .. كانت خايفة في قلبها وأطرافها ترتجف لكن مشيتها الملكية ... ونظرتها الواثقة أخفت هالإرتباك اللي تحس فيه ...
ابتسمت لمياء من فرحتها بأخوها وزوجته ... ودعت ربها أن مخبرها يكون مثل مظهرها جميل وبرئ ... أما ندى فخيالاتها ودتها لبعيد ... تخيلت نفسها لوكانت مكان ريم الحين ... وانها هي اللي تنزف لطلال .. اللي تحلم فيه من لما وعت على الدنيا وعرفت تميزه وتميز غيره ..
وصلت ريم للكوشة وطلعت عليها ... وكانت المصورة تلتقط لها بعض الصور وهي فوق الستيج ...
بعدها جلست ريم على الكرسي ورجعت الأنوار اشتغلت والموسيقى الهادية راحت وحل مكانها ألحان راقصة ...قامت ام عبدالله والبنات علشان يروحون يسلمون عليها ... طلعوا لها الستيج وقربت منها ام عبدالله بابتسامة حنونة ونظرات فرحانة..
ام عبدالله ::/ مبروك حبيبتي ... الله يوفقكم ويخليكم لبعض ..
استحت ريم وحبت ام عبدالله على راسها ::/ الله يسلمك يا خالة ..
تقدموا منها البنات وسلموا عليها كلهم ... انعجبت ريم في سارة وجرأتها معها وعذا وخجلها البنوتي البرئ ... ولمياء راعية التعليقات والسوالف اللي ماتنمل .. حمدت ربها ان هذي هي بتكون عائلتها الجديدة ... يعني أكيد أم عبدالله ماراح تحسسها بفقدان أمها .. والبنات بيملون عليها وقتها ... ويونسونها ..
نزل الجميع من الكوشة ومابقى الا ريم جالسة فيها ...
و بعد فترة من وصول الريم للمجلس ... تقربت منها امها وهي مبتسمة ... ونزلت لها شوي وهي تسمي عليها ..
ام راشد ::/ مستعدة حبيبتي ..؟؟ ترى عبدالله بيدخل الحين ..!!
شهقت ريم ويدها على فمها ::/ لا يمه تكفين مو الحين ؟؟
ربتت ام راشد على كتفها ::/ يعني متى تبين ؟؟ خلاص خلصوا متعشين ووقت الشبكة الحين ...
مسكت ريم في يد امها تتوسلها ::/ يمه خلك معي تكفين ..
ابتسمت لها امها ::/ أكيد حبيبتي ... بس بيدخل معه راشد وطلال ..
ريم ::/ وأبوي ؟؟
ام راشد ::/ و من يقعد عند الرجال ؟؟ اخوانك هم اللي يجون معه ويمكن بعد بس واحد مو الأثنين ..
نزلت ام راشد من عند بنتها وبعد دقائق دخل عبدالله مع الباب الرئيسي ومعه راشد اخوها .. أول ماشافتهم ريم انتفضت وبغت تطيح مغمى عليها ... مو قادرة تستوعب الفكرة انه يدخل عليها وهي مامعها احد ,,,
انتبهت ام عبدالله لريم وشافت لونها انخطف .. رحمتها وطلعت الستيج كونها كانت قريبة منها ومسكت يد الريم وساعدتها توقف ..
شكرتها الريم في خاطرها لأنها فعلا أنقذت الموقف ... ووقفت وهي مستنده على يد ام عبدالله ...
وصل عبدالله للستيج والإحراج باين في عيونه واخواته يضحكون عليه ... طلع للكوشة وتقدم من الريم وسلم عليها ...
مدت ريم يدها المرتجفة وهي ماتدري وشلون تصافحه .. حتى هو ضاعت علومه ومايدري وش يسوي ؟؟
ابتسمت لهم ام عبدالله وسندت يد ريم وشجعتها تمد يدها ... سلموا على بعض وسلم راشد على أخته وبارك لها وبعدها نزل وطلع ...
قربت ام عبدالله لولدها وحضنته وهي تبارك له ...
ام عبدالله وعيونها تدمع::/ ألف مبروك حبيبي ... منك المال ومنها العيال ..
ابتسم عبدالله وهو يحب راس امه ::/ الله يطولي بعمرك يالغالية وتشوفين عيال عيالي .
طلعوا سارة ولمياء وعذا يباركون له ... ولما وصل الدور لعذا كانت واقفه في مكانها ودموعها أربع اربع على خدودها ومو قادرة تمسك نفسها ولا قادرة تتحرك من مكانها علشان تسلم عليه ...
ابتسم لها عبدالله ومد يده علشان تجي .. مومعقولة بتتسمر في مكانها بهالصورة..!
ماصدقت عذا شافت يده الا ورمت نفسها عليه وهي تصيح ... انحرج عبدالله وحاول انه مايحسسها بالإحراج مسح على شعرها وبعدها عنه ..
عبدالله ::/ ماله داعي كل هالصياح ؟؟ ترى انا مابهاجر ؟؟
ابتسمت عذا وسط دموعها ونظرات ريم لها ::/ عارفة بس تذكرت سفرك ...
ابتسم عبدالله بحزن::/ مو اول مرة أسافر عذا ؟؟
ضربتها سارة ::/ اعوذ بالله منك .. الحين هذا وقت تتذكرين هالخبر اللي مثل وجهك ؟
ابتسمت عذا ورد عبدالله ::/ والله ان وجه عذا احلى من الخبر ... الا وانتي الصادقة مثل وجهك انتي ..
تخصرت سارة وهي تشهق ::/ حتى في احلك المواقف توقف معها ضدي ؟؟
سكتتهم ام عبدالله ::/ انت واياها ترى احنا مو بالبيت ترانا قدام الناس استحوا على وجوهكم ولا تتهاوشون ..
ابتسمت ريم من قلبها لماشافت علاقته باخواته وعلاقتهم فيه .. توسمت فيه الخير وحست انهم ممكن يتفاهمون مادام انه مرن بهالشكل ..
طلعت ام عبدالله علبة الشبكة ووقفت جنب عبدالله وبدت تساعده هي ولمياء علشان يلبسها الطقم ... واول ماخلصوا ولبسها الخاتم آخر شي ..
رفع يدها لفمه وحبها وعيونه تطالعها ..
عبدالله ::/ مبروك يالريم ..
استحت ريم من تصرفه وسحبت يدها على طول وهي مستحية ::/ الله يبارك فيك ...
استانست عذا من اللي سواه عبدالله .. لكن سارة ماعجبها الوضع ... وما استساغت الفكرة ولازم الا تعلق ..
سارة بقرف ::/ يعني لازم بوسة اليد هذي ..؟
ضربتها لمياء::/ سويرة ؟؟
ضحك عبدالله::/ نشوف الفارس المغوار بكرة وش يسوي بك ؟؟
سارة باستهزاء ::/ اتحداه يحاول يقرب مني ؟؟ هالدور تبيه يحب يدي .. مستحيل .
ابتسم لها عبدالله وهو يطالع الريم ... منبهر في البنت اللي قدامه ...
فجأة ومن خطبوها له حس بأنه يحبها وكأنه يعرفها من زمان ... واليوم لما شافها حس ان روحه تعلقت فيها ... وانه خلاص غرق في حبها وما احد بينقذه منه ...
اما ريم فمن شافته داخل ومقبل عليها بكشخته وهي خلاص تحس بعضلة قلبها مرهقة و ما عاد قادرة تتحرك .. صدق ان جسمه نحيف وبياضه خفيف ... لكنه جذاب .. وقدر يجذبها ويسيطر على مشاعرها ....
------------------------------------------------------------------------------
بعد مانتهوا العالم من احتفالهم .. وتضيفوا وتعشوا .. تفرق الجميع والساعة وقتها كان قريب من منتصف الليل ...
التفتت ام عبدالله على بناتها ::/يالله نمشي ؟؟
وقفت لمياء وعذا ::/ يالله حتى أسامة متصل يقول انه ينتظرنا ..
لفت لهم سارة اللي كانت تسولف مع ندى وأريج ::/ يمه خلونا نقعد شوي ..
ام عبدالله وهي تطالع الساعة ::/خلاص يمه ماعاد الا خير الوقت تأخر ولازم نمشي عيب عند الناس ...
تنهدت سارة من الطفش وابتسمت لها ندى ::/ سارونة أصلا حتى انا بطلع الحين وأريج اكيد الحين بتروح فلا تكتأبين ..
ضحكت سارة ::/ شكرا لأنكم فاهميني ..
قاموا البنات مع أمهم وسلموا على الريم وأمها وودعوهم .. وبعدها لبسوا عباياتهم وطلعوا وكانت معهم ندى اللي ينتظرها زياد برا البيت ..
لما طلعت ام عبدالله قابلها زياد عند الباب يسلم عليها ويبارك لها في الشارع .. وقفت ام عبدالله والبنات ومعهم أسامة ينتظرونه يخلص سلاماته ..
زياد وهو يحب راس عمته ::/ مبروك يا عمه ما سويتوا لعبدالله .. وعقبال هالدلخ اللي على يمينك ..
صرخ عليه اسامة ::/ أول دورك انت يالشايب وعقب يجي دور الدلوخ ...
ضحكت ام عبدالله ::/عقبالكم كلكم .. واشوف عيالكم اجمعين ...
تنهد زياد :/ آمين ان شاء الله ويارب يكون باب الإجابة مفتوح في هالليلة ..
ردت عليه لمياء مبتسمة::/كان تطنزت على عبدالله علشان تلحقك الطنزة وتخطب قريب ..
ابتسم زياد ::/ حتى لو ماتطنزت انا ان شاء الله خاطب خاطب ..
حبت سارة تبدد شكوكها ::/ ومن هي اللي انت مصر على خطبتها بهالشكل ..
امتقع لون وجه عذا من الصدمة ؟؟ كيف تجرأت سارة تسأل هالسؤال وهي موجودة ؟؟ وعلى طول مشت تركب السيارة من دون وعي منها وكأنها مسيرة ...
اما زياد فتلعثم وعيونه على عذا اللي مشت وتركتهم لكنه تدارك الموقف ::/ لا عاد هذي خليها مفاجئة لكم ... مثل ما فاجأكم عبدالله أنا بفاجئكم ...
سكتت سارة لما خزتها أمها بنظرة نارية ... والا هي كان ودها تتمادى معه علشان يوضح موقفه ؟؟ هو يبي عذا والا صرف نظر عنها ويبي سحر ..؟
بعد سلامهم توادع الجميع ومشوا البنات يركبون السيارة وندى راحت لسيارتهم .. لكن ام عبدالله قبل لاتمشي وقفت زياد ومسكته ...
ام عبدالله ::/ وش صار عليكم ؟؟ قلت لأختك ؟؟
تنهد زياد مبتسم ::/ لا ماقلت لها شي للحين ؟؟
ام عبدالله ::/ وش تنتظر ؟؟
زياد ::/ مشاري نفسه قايل لنا لانقول لها شي ... يخاف لاتحسب أني رفضت طلال لأنه هو خطبها وبعدين تكرهه زود وماتوافق عليه أو توافق وهي مغصوبة ..
تنهدت ام عبدالله ::/ الله يقدم اللي فيه الخير .. يالله تصبح على خير ..
ابتسم زياد ::/ وانتي من اهل الخير .. لكن لاتنسين ترى مشاري موصينا ما نقول لها شي ..
هزت ام عبدالله راسها بالإيجاب ومشت رايحة للسيارة ...
لف زياد وراح يركب هو بعد السيارة وفي قلبه فرحة ما يقدر يوصفها ,, وحماس مشتعل غير عن كل مرة .. لأن عبدالله صديق طفولته تملك اليوم .. وهذا الشي عطاه دافع زيادة انه يستعجل على عمره ويخطبها ويرتاح باقي عمره من هالشوق اللي ذبحه ..
ركب السيارة وانقلبت معالم وجهه 180 درجة وصارت جدية لأبعد الحدود ... عقب اللي صار وهو يتعامل مع ندى بكل رسمية وما يتكلم معها الا في الشي الضروري ...
وهذا ماجاء الا بعد ماقدرت ندى تقنعه بقصتها الوهمية اللي حفظتها لها لمياء ووصتها تقولها له علشان تبعد الشكوك عن نفسها ومايظن فيها زياد ظن السوء ... ولا يظن في طلال وتكبر السالفة ...
فراحت له ندى بعد الموقف ووضحت له ان الهدايا كانت توصلها من معجبات في المدرسة .. وشرحت له تفاهتهم وحقارة تفكيرهم بس انها كانت تأخذها منهم اتقاء لشرهم وتحتفظ بالحلو منهم والشين ترميه .. وحلفت ان الخاتم استلمته من سحر .. وهذا هو الواقع انها فعلا مستلمته من سحر مو من طلال ...
ولما استفسر عن الصور ... تلعثمت وانحاست لأنها ماكانت تعرف عن هالسالفة ولاعملت حسابها وماتدري عن هالشخص اللي فعلا اتصل على زياد وقال له هالأقاويل ..في نفسها خافت بس قدرت تتماسك وتثبت قدامه و اقسمت له انها ماتدري عن اللي يصير ... ولا تعرف شي عن هالشاب واللي يمكن يكون بنت من المعجبات بس هي صدتها وما عطتها وجه فحبت تنتقم منها؟؟ وقالت له لو هو صادق خله يرسل لك الصور ؟؟ أصلا انا ما اعطي صوري أحد أبد ... إلا المقربين واللي اثق فيهم ..! وان كنت مصر خله يرد عليك وتأكد انه شاب ؟؟؟؟
انطلت اللعبة على زياد .. لكن لازال شايل بخاطره عليها ويحس بالقلق من الإتصال والكلام اللي وصله ؟؟؟ مو سهلة عليه احد يتكلم في عرضه ؟؟؟... لكن مصيبته هانت لما عرف انها مو من النوع الخربان اللي يواعد شباب ... زعل عليها فترة لابأس فيها لأنه ماكان يدري عن اللي يصير من وراه وأنها أصلا كانت تقبل هدايا من ناس مثل هالأشكال ؟؟؟ وسمحت للناس انها تطلع عليها حكي ..؟
طالعته ندى أول ماركب وحست ان العبرة خانقتها .. ماتعودت هالمعاملة القاسية من زياد ... معودها انه يكون لها الصديق اللي تفضفض له وتسولف عليه بكل شي ...
وخصوصا انه معودها بعد كل حفلة فيها عذا لازم يسأل بشكل غير مباشر عنها ..
ندى مبتسمة ::/ اليوم الحفلة كانت روعة .. الله يوفقهم ..
زياد باقتضاب ::/ آمين ..
تفشلت ندى لكنها ما يئست ::/ عقبالك ..
سكت زياد ومارد عليها ..
هنا ندى حست بوجهها طاح من الفشيلة لكن مع ذلك ماوقفت ...
ندى ::/ بنات عمتي اليوم ماشاء الله ماعليهم كلام ...
ابتسم زياد ::/ طول عمرهم ماعليهم كلام (( وطالعها بنظرات غريبة ))
ماحبت ندى نظراته ... حست انه يقصد بكلامه شي ثاني ... ومن هنا ماقدرت تتحمل ونزلت دمعتها غصب عنها ... لكن مسحتها على طول .. ومارضت بهالهزيمة ..
ندى ::/ تصدق ... اليوم عذا طالعة حركة كأنها عروس لو انك عاقد عليها وزافينكم كان ريحتونا من حفلة ثانية ...
ابتسم زياد ومارد عليها ..
ندى وهي مستمرة ::/ على بالك ماقلت لها هالكلام قلت لها ولايفوتك شكلها ...
سكتت ندى وماكملت ... وكأنها قاصدتها ...
وفعلا زياد اشتعل قلبه نار ووده يعرف وش كان ردها .. لكن مكابرته ماخلته يسأل ..
وندى تنتظر ردة فعله لكن لاحياة لمن تنادي ... وعلشان تأدبه سكتت وماكملت سالفتها لحد ماوصلوا للبيت .. ونزلت وعلى وجهها ابتسامة نصر خصوصا لما شافت نظرات زياد المتلهفة ..
لفت ندى لزياد وهي تبتسم ::/ تصبح على خير .. وعقبال ملكتك ...
زياد ::/ وانتي من اهل الخير ..
وطلعت درج غرفتها .. اما زياد دخل غرفته وعلى طول انسدح على سريره حتى من دون ما يبدل تارك لنفسه العنان انه على الأقل يتخيل ليلة ملكته .........
-----------------------------------------------------------------------------

قرب يأذن الفجر وهي لحد الآن عيونها مجافية النوم ... شعور غريب متولد في صدرها حارمها لذة تغميض الجفون ... تفكيرها يآخذها ويوديها ماتنكر إنها فرحانة ومرتاحة لكن شعور أقوى يخليها خايفة أو متخوفة من اللي راح يصير ...
ملت من كثر التقلب على السرير ،، لفت على يمينها وفتحت الأباجورة وطالعت السقف ... تنهدت بتعب وشالت عنها اللحاف وقامت من السرير .. تبي أحد تسولف عليه وتفضفض له وتقول له اللي يدور بخاطرها كله .. عساه يهون عليها ويخفف عنها الألم والهم اللي بصدرها ...
توجهت على طول لغرفة أنيستها وجليستها وأختها اللي انحرمت منها بسبب القدر والمكتوب ...
فتحت عليها الباب من دون ما تدقه .. لوت بوزها بخيبة أمل واضحة لما شافتها نايمة .. لكن ما استسلمت تقدمت منها وجلست على السرير وبدت تسوي لها حركات وتدغدغها مع رجولها تبغاها تقوم وهي متنرفزة علشان يطير النوم من عيونها ..
سحر ::/ يوووووووووووووووه ابعدوا عني ابي انام ؟
ندى وهي تضحك ::/ لا مافيه يالله قومي ابغى اكلمك بموضوع مصيري يا إيه يا لا ؟
فزت سحر لما سمعت صوت ندى ,, فركت عيونها تبي تتاكد هي تحلم والا واقع ..؟
فتحت الأباجورة لأن الغرفة كانت ظلام دامس .. واعتدلت في جلستها وهي تمسح على شعرها المعفوس ..
سحر ::/ وش فيك بسم الله ؟؟؟ لايكون محلمة بكابوس وجاية تبغيني أحسسك بالأمان .
ندى ::/ هاهاهاهاهاها مايضحك .. المهم صحصحي معي أبي أكلمك بشي خطير .
سحر بخوف ::/ وش فيك .. لاتخوفيني بهالليل ؟ تو اني تاركتك مافيك الا العافية؟
ندى وهي منزلة راسها ::/ سحر بسألك وجاوبيني بصراحة ؟؟
سحر بخوف وترقب::/ وش هالسؤال اللهم اجعله خير ؟؟
ندى ::/ وش رأيك بطلال ؟؟
ضحكت سحر بصوت عالي وسكتتها ندى ::/ انتي ترى الناس نايمة قصري صوتك ؟
سحر وهي تضحك ::/ سوري .. بس من جد سؤالك صدمني ؟؟؟ وش هالسؤال الغبي اللي مقومتني من النوم علشان تسألينه ؟؟
ندى بجدية ::/ سحر أكلمك بجد ... وش رأيك بطلال ؟؟؟ والله إني أحس بشي غريب مادري كيف أفسره ؟؟ مادري خوف او تراجع .. تبين الصراحة ودي اقول (( لا )) وارتاح .
شهقت سحر ::/ مجنونة انتي ترفضين ؟ تبين تدمرين طلال .. والله لو ترفضين ان يجي يسحبك من شعرك ويتزوجك بدون ما يسمع ردك ... وبعدين شعورك هذا كل وحده تحس فيه وقت خطوبتها .. يعني عادي مايستدعي أنك تفكرين بهالسوداوية .
ندى مبتسمة ::/ قصدك أن بكرة كل شي بيكون أوكي .. وبستانس وانبسط ؟
سحر ::/ صدقيني بكرة بتحسين بشعور الفرح أكثر من أي وقت ثاني .. ويوم الملكة بتحسين انك ملكتي الدنيا باللي فيها ... مو أنتي تحبين طلال ؟؟
ندى بتأكيد ::/ مو احبه بس ... إلا أحس أن قدري مربوط فيه ...
سحر مبتسمة ::/ خلاص أجل هذا بيت القصيد ... المهم انك تحبينه وشعورك الخايس هذا أسفهيه تراه من عمل الشيطان ...
ندى ::/ حلوة من عمل الشيطان ..
سحر تتثاوب ::/ يالله عاد قومي خليني أنام .. عطيتك وجه
ندى وهي تضربها ::/ يالله نومي يالنوامة ..
ضحكت ندى وهي تقوم من على السرير وسكرت الأباجورة وطلعت وسكرت الباب وراها ..
وسحر رجعت لوضعها وتلحفت بفراشها وكلها امل أنها تمر بهاليوم وبهالمشاعر اللي تمر فيها ندى ...
-------------------------------------------------------------------------------
من بكرة على الغداء .. كانوا ابو مشاري والعيال كلهم مجتمعين حول السفرة يتغدون ..
و ام مشاري مركزة نظرها على مشاري اللي وجهه صاير أسود وذبلان .. محتارة تسأله قدامهم وش فيه والا تتركه لما يطلع غرفته وبعدين تروح له .... هاليومين حاله مو عاجبها ... أكله صار قليل وكلامه صار أقل ... وإذا تكلم كان شبه يائس من الحياة ومآخذها ببساطة ... انتبه مصعب لأمه ..
مصعب ::/ يمه ... تبين الرقم ؟؟
انتبهت ام مشاري ::/ نعم ؟؟
مصعب يتبسم ::/ أقول تبين الرقم ؟؟
ام مشاري ::/ رقم مين ؟؟
مصعب يضحك ::/ رقم مشاري .. أشوفك تناظرينه ومركزة على ملامحه ؟؟ لايكون معجبة فيه وانا مدري ..
ابو مشاري ::/ هههههه مصعب أثقل وثمن كلامك ..
ام مشاري ::/ وانت بس هذا اللي قدرك الله عليك ... يثمن كلامه .؟؟؟ ترى هالولد حايسني شف لك صرفه معه .. كلما جاء يكلمني تقول واحد من ربعه
سحر تضحك ::/ ههههه ياحياتي يمه كل هذا تعانين واحنا مادرينا عن ..
مصعب ::/ وش دعوى ام مشاري المفروض تفرحين لأن هذا من حبي لك ..
ام مشاري ::/ مشكور مانبيك تحبنا يوم هذا هو حبك ..
كان الحديث يدور ومشاري مو معهم ولا شاركهم بأي كلمة ,,, ساكت ويطالع في صحنه ومارفع عينه لهم ... انتبهت ام مشاري له لأنها من البداية وهي تطالعه وملاحظته ... فز قلبها لما شافته يغمض عيونه بألم ويصر بأسنانه ..
مشاري وهو يقوم ::/ الحمدلله سفرة دائمة
ام مشاري بخوف ::/ مشاري ماكلت شي ... وش فيك يمه ؟؟
مشاري بقل صبر ::/ سلامتك يالغالية بس بطلع ارتاح احس اني مرهق شوي .
طلع مشاري من غرفة الطعام وتوجه على طول للدرج كان الألم هالمرة متمكن منه وماقدر يسيطر عليه ... فكر انه يطلع لغرفته يستلقي على سريره عساه يرتاح بهالطريقة ...
.
.
.
.
أما ندى فكانت جالسة تتغدى مع زياد بجسدها بس،،، لكن روحها كانت مو بيدها ..
++ الحين معقولة أوافق واتزوج طلال ؟؟؟ أحس اني مو مستعدة لهالموقف أبداً إني أكون زوجة ولمن ؟؟ لطلال ؟؟ يعني لازم أترك زياد في بيت عمي بروحه ؟؟؟ مادري من يناظره ومن يتطمن عليه كل شوي ؟؟؟ معقولة بهالسرعة أتزوج وأترك زياد اللي ماقصر علي بشي .. والحين لما كبرت انا وجاء دوري أخدمه وأقدم له شوي من اللي عطاني إياه أتركه وأروح لطلال ؟؟؟ لا مستحيل هالشي يصير ... ولو وافقت ماراح أتزوج إلا لما يتزوج زياد وبيكون هذا شرطي ؟؟؟؟؟؟؟؟
يتزوج زياد ؟؟ يعني يآخذ عذا ؟؟ يا سلام وأنا أطلع منها وعذا تآخذ كل شي مني .. وأهم شي زياد أخوي وأبوي وصديقي ... معناتها أكيد زياد ماراح يكون اللي انا اعرفه ... بيتغير علي وبيعطي كل شي لها هي وبس ؟؟ أكيد بيعطيها ... الحين كل شي معطيه اياه وانا معه وشلون بكرة إذا تزوجت وابتعدت عن عينه وصارت هي تحت نظره .. يا خوفي ينساني وماعاد يتذكر ان له أحد من اهله باقي بهالدنيا .......

انتبه زياد لندى اللي تلعب بالملعقة في يدها وما تأكل شي ...
زياد ::/ ندوش ... يا إما كلي والا لا تقعدين تحوسين النعمة ,,
بلعت ندى ريقها وابتسمت ::/ وش أسوي مو مشتهية شي بس قلت اجلس معك علشان أفتح نفسك ..؟
زياد ::/ الله يالواثقة ؟؟؟ تفتحين نفسي مرة وحدة ؟؟
ندى بقهر ::/ ليه مو ماليه عينك ؟؟
زياد وحب يغيضها ::/ أفا عليك ماليتها ونص بس عاد القلب ومايهوى ..
ندى ::/ وش تقصد زياد ؟؟ خليك دايركت
زياد ::/ يعني لو انك ناس يحق لك تقولين اللي قلتيه ؟؟
ندى بغيرة واضحة ::/ والله انك واحد وقح وما تستحي تقولها بوجهي كذا ؟؟ الحين انا اختك من امك وابوك ما افتح نفسك وهذي اللي تسميها بنت عمتك هي اللي تفتح النفس وتشجعك على الأكل .. صدق انك سخيف وبليد وما أحبك ...
قامت ندى من كرسيها والدمعة نزلت غصب عنها من عينها ... كيف وزياد زادها وزاد حرارة أفكارها ؟. هي أصلا من البداية متزعزعة ومحتارة وخايفة وكل المشاعر المخيفة متعرشة قلبها ...
ارتاع زياد من ردة فعلها الغير متوقعة اطلاقا .. قام من غداه وهو يمسح يده والخوف باين بعيونه .. جلس جنبها على الكنب وانتبه لها وهي تمسح دموعها ..
زياد مصدوم ::/ اللهُ أكبر عليك تصيحين ؟؟؟
ندى ::/ يعني تبيني اضحك ؟؟
زياد ::/ لا بس اللي قلته مايستدعي ..كل اللي تسوينه ؟؟
التفتت له ندى وباستهزاء::/ صح مايستدعي لأنك ماقلت شي بس قلت اني ما اهمك ..
زياد أشر على نفسه ::/ أنا قلت هالكلام ؟؟ متى ؟
عصبت ::/ واللي تو قلته وش تسميه ؟؟
زياد مبتسم ::/ قلت انك أختي على عيني وراسي ... أحبك وأخاف عليك أكثر من نفسي وأتمنى لك السعادة من كل قلبي .. لكن عذا شي ثاني ؟؟
ندى بغيرة وقهر ::/ شفت رجعت تقول شي ثاني ؟؟؟ خلاص لو سمحت اسكت لاتقول شي يضيق الخلق ..
ضحك::/ انت وش فيك ولعتي مرة وحده ... انتي أختي .. لكن عذا بتكون زوجتي بإذن الله ... شفتي الإختلاف ؟؟
بلعت ندى ريقها ::/ انا عارفة هالشي مايحتاج تقوله
زياد ::/ طيب مادمتي عارفة ليش عصبتي ؟؟ يعني تتوقعين اني أحبها أكثر منك ؟؟
ندى مستحية ::/ يمكن ..
زياد مبتسم ::/ حبكم في قلبي بنفس المقدار .. لكن أنتي غير وهي غير وانا وضحت لك الفرق ...
استحت ندى من تصرفها الغبي وقامت من الكنب من دون ماترد ورجعت للسفرة وبدت تشيل المواعين والضيقة اللي فيها مخليتها ما تسمع شي غير دقات قلبها وتنفسها السريع ..
-----------------------------------------------------------------------------

بعد ما خلصوا العالم متعبدين ربهم ومصلين له وطالبين منه المغفرة والرحمة والقبول وبعد صلاة المغرب بدت دقات قلبها تزيد اكثر وأكثر ... خلاص ساعة الصفر قربت وخطوبتها بتتم اليوم وبعد دقائق أو بالأصح ثواني ....
فتحت عليها سحر الباب بقوة روعتها ...
سحر ::/ قومي يالله تحركي ..
ندى بخوف ::/ ليه وش صاير ؟؟
سحر وهي تسحبها من يدها ::/ قومي نشوفهم من شباك غرفتي .. تعالي بسرعة ؟؟
ندى ويدها على قلبها ::/ وصلوا ؟؟
سحر ::/ لا ينتظرونك ..؟؟
سحبت سحر ندى ومشوا يركضون رايحين لغرفتها علشان يشوفون الرجال من شباك سحر الكبير والمطل على واجهة البيت الرجالية ...
أول ماطلعوا ضربت سحر بريك قوي وضربت فيها ندى ...
ندى وهي تسحب شعر سحر ::/ الحين انتي وش فيك استخفيتي ؟؟؟
طالعتها سحر شوي وبعدين سحبتها وخبتها ورى ظهرها ...
سحر ::/ مشاري لف شوي لو سمحت .. وش فيك تنحت ؟؟
مشاري اللي كان واقف عند باب غرفته ويسكره بلع ريقه والإرهاق باين تحت عيونه ::/ ها ..؟؟ أنتم اللي وش فيكم طايرين ؟؟
سحر ::/ طيب .. صد شوي ..؟ يعني عطنا ظهرك خلنا نمشي ..
ابتسم مشاري وهو يعطيهم ظهره ::/ يالله بسرعة ..
مشت سحر على جنب وندى متمسكة في بلوزتها ومغطية راسها في ظهر سحر ... لحد مادخلوا الغرفة وانطلقت ندى ورمت نفسها على السرير ..
ندى تتنهد ::/ يا ربي منه أخوك هذا .. مادري وش الله مسلطه علي ؟؟
سحر وهي تسكر الأنوار ::/ خلي عنك مشاري الحين ويالله تعالي نشوفهم ..
قاموا الثنتين وفتحوا الستارة على خفيف علشان ما تبين حركتهم .. ووقفوا منتصبات وعيونهم مركزة على باب الشارع ينتظرونه ينفتح ... ابتسمت سحر وضغطت على يد ندى وعيونها تلمع بالحب لما شافت زياد يتقدم بكشخته ورزته علشان يفتح الباب ..
سحر ::/ ياحبي له تلقين ريحته الحين دهن عود ..
ضحكت ندى ::/ هههههههههههههههه وانتي وش عرفك ؟؟ لايكون انتي اللي ملبسته هدومه وانا مادري ؟؟
سحر وهي تغير الموضوع ::/ شوفي شوفي طلول .. يا قلب أمه كاشخ على آخر درجة ..
التفتت ندى للمكان اللي أشرت عليه سحر .. وأول ماشافت طلال حست بشعور غريب يدغدغ معدتها ... حطت يدها على فمها وهي تهمس ::/ يا حبي له طالع يجنن .
سحر ::/ اسكتي وش يجنن إلا خبال ...
و تسندت على الشباك وهي تكمل ::/ آآآآآآآآآآآآآه ياحظك يا ندى حصلتي واحد كل البنات في العالم يتمنونه .. وسيم وحبوب وغني وفوق كل هذا يحبك ويموت على طاريك .
ندى وهي تنفث على نفسها ::/ حبس حابس حجر يابس .. (( وضربتها على كتفها )) قولي ماشاء الله يا دوبا لا يصير لنا شي ؟؟
سحر بعيون حالمة ::/ يا ربي متى يجي دوري أنا وأصير بمكانك وأجي لهالشباك وأطالع فارس أحلامي ...؟؟
ندى ::/ يا حليلك بتبطين ..
سحر وحواجبها معقودة ::/ ليش إن شاء الله انتي وش احسن مني فيه ؟؟
ندى وهي ماشية للباب::/ ولا شي ... المهم أحس اني متضايقة بقوة .. ابروح لغرفتي استلقي هناك لحد ما يجي زياد ويقول لي كل السالفة ..
تنهدت سحر وهي تضبط شعرها ::/ خلاص وانا بنزل تحت أتشمم لك الأخبار من عند أبوي وأخواني وأشوف وش فكرتهم .. و وش رايهم ؟؟
طلعت ندى وهي تهز رأسها بالإيجاب لسحر .. تحس بكسل في مشاعرها بعد ماكانت مشتعلة من دقائق وتبلد في دقات قلبها بعد ما كانت مثل القطار في سرعتها من ثواني
تنهدت ووكلت أمرها لربها وتفائلت خير .. ودخلت لغرفتها شغلت المسجل وانسدحت على سريرها وحضنت مخدتها .....!! .
.
.
.
.

في مجلس الرجال الفخم الملكي .. كان طلال جالس بكشخته اللي تعكس مشاعر الفرحة بقلبه ... كان واثق ومالي يده من موافقتهم عليه .. ليش وين بيحصلون واحد أحسن منه .. وفوق كل هذا يصير ولد عمهم بالرضاع .. يعني من كل الجهات محلولة ولا عندهم عذر علشان يرفضون ...
أما زياد اللي كان عارف السالفة وفاهم سبب زيارة طلال وأهله اليوم .. كان يحس بمشاعر كبيرة في قلبه .. حس ان ندى كبرت وهو كبر معها .. وجاء اليوم اللي يجون فيه الناس يخطبون أخته اللي كبرت قدام عيونه ... حس أنه مسؤول عنها أكثر من قبل .. لكن كلما طالع في عيون طلال وشاف الحنان والمحبة .. ارتاح قلبه .. يعني حتى لو وافق على طلال بيكون مرتاح لأن ندى بتكون في يد أمينة تحافظ عليها وتخاف ..
كانت السوالف اللي تدور في المجلس عامة .. والموضوع الأساسي الى الآن محد تطرق له ... كانت مشاعر حلوة يحس فيها زياد قبل لايرن جواله بوصول رسالة مضمونها يقول ..:: (( إن كانت سمعة عائلتك .. أو بالأصح أختك تهمك .. طلال هذا لا توافق عليه ))

(( إن كانت سمعة عائلتك .. أو بالأصح أختك تهمك .. طلال هذا لا توافق عليه ))
عقد زياد حواجبه مستغرب .. من اللي ممكن يرسل رسالة مثل هذي .. خصوصا أنه ما تعرف على الرقم ... تبدلت المشاعر الحلوة بداخله إلى مشاعر أشبه ماتكون بخوف .. حتى لوأنها رسالة وممكن تكون خرابيط لكن مهما يكون اشعلت في قلب زياد شرارة الخوف .. قرر يترك جواله ومايهتم .. لكن لما وصلته الرسالة الثانية ... (( أتمنى أن رسالتي وصلتك وانك استوعبت كلامي ... أنا ما أبغى الإساءة لكن لو اضطريت استخدمها فاسمح لي باستخدامها ))
قام زياد والخوف والغضب متمكن منه .. طلع للحديقة وجواله في يده ... اتصل على هالرقم لكن محد يرد ... حاول مرتين وثلاث لكن محد جاوبه .. وبعدها وصلته رسالة .. ((( ما له داعي تتصل أو تسمع صوتي لأن هذا مايفيدك .. اللي يفيدك هو أنك ترفض طلال .. هذا إذا كنت تحب أختك وتخاف على سمعتها ؟؟))
شبت ضلوع زياد من هالكلام وأرسل له مسج :: (( وأنت وش مصلحتك من رفض طلال ..؟ ))
تأخر الرد ما وصل لزياد وكان طول هالفترة كأنه واقف على شوك .. دقيقتين ورن جواله .. : )) مالي مصلحة .. لكن مثل ما أختك قهرتني ،،، جاء دوري أنا الحين أكسر قلبها واقهرها ))
بلع زياد ريقه وأسودت الدنيا بعيونه .. هذا وش قاعد يقول ووش قاعد يخربط ؟؟ كيف يتجرأ ويقول عن ندى أختي هالكلام .. أرسل له مسج :: (( اسمع لو كنت رجال رد على اتصالاتي ؟؟ ))
وصله الرد على طول (( أنا رجال حتى لو ما رديت على مكالماتك .. لكن شف إذا مو مصدقني أنا مستعد ارسل لك صورها بالوسائط هذا واحد .. إثنين علشان تتأكد من كلامي .. أطلع لغرفتها وفتش دولابها اللي قافلته عنك .. وشف الهدايا اللي كانت تآخذهم مني على أساس انها تحبني وأنا ياغافلين لكم الله .. وأكبر دليل طالع الخاتم اللي بيدها وأسألها من اللي مهديها إياه .. وساعتها بتصدقني ))
ثارت الثائرة عند زياد .. الدنيا صارت سوداء .. والأكسجين حوله انتهى وماعاد له وجود .. حط يده على جبهته لما حس توازنه اختل ... مستحيل اللي قاعد يصير أكيد انا بحلم ؟؟؟ لحظة يمكن يكون مقلب من احد ؟؟ وهذا وقته أحد يسوي مقلب مثل هذا ؟؟
ماقدريتحمل أكثر أرسل مسج ::/ (( أنت واحد جبان ولو فيك ذرة رجولة ماسويت كذا ببنات الناس ))؟
وصله الرد :: / ( أنت قلتها بنات الناس ,, يعني مو اختك ؟؟ وعلى فكرة مثل ماقلت لك لو حبيت أرسل لك صورها ترى ما عندي مشكلة أنت بس اطلب وأنا أنفذ .. ولا تنسى ترفض طلال إذا كنت خايف على سمعتكم أو سمعة اختك .. او حتى طلال نفسه ))
ذرع زياد المكان اللي هو واقف فيه روحه و جيئة .. وكل شوي يمسح على وجهه .. مو عارف وش يسوي أو كيف يتصرف ..؟؟ ينفذ كلامه ويرفض طلال ..؟ بس على أي أساس يرفضه ويقول لهم لا ؟؟ وندى معقولة أنها تكون راعية هالحركات ..؟؟
رفع راسه للسماء وتنهد بألم ..؟؟ مو معقولة ندى تكون هذي سوايها ؟؟ مستحيل أختي وأعرفها زين يستحيل تكون من هالبنات الغير متربيات ...؟ هذي ندى ياعالم انا اللي مربيها وعارف أخلاقها وقيمها ..؟؟
طالع وراء البيت وقرر يطلع الحين لغرفتها علشان يقطع الشك باليقين ويبعد هالوساوس اللي غزت تفكيره وأقلقته ...
توه كان بيمشي لكن صوت مصعب وقفه ::/ زياد انت وينك .. عمي ابو راشد يسأل عنك ؟؟
التفت زياد والربكة والإرتجاف باين عليه ::/ هاه .. ايه يالله جايكم انا الحين ..
مشى زياد وهو يحاول يتماسك ويضبط نفسه .. واول ماقرب لمصعب قال له ..
مصعب ::/ زياد وش فيك ؟؟ صاير شي ؟؟
حاول زياد يبتسم ::/ لا لاتهتم مشكلة صغيرة وإن شاء الله محلولة ..
مشى زياد ودخل المجلس وأول ما طاحت عينه على طلال حس بالضيقة والقهر .. وحس بمشاعر غريبة تخنقه وتخليه مايقدر يتنفس ...
جلس جنب مشاري وهو يحاول يرسم الإبتسامة على وجهه ,, أول ما شافه ابو راشد داخل على طول فتح الموضوع ودخل في السالفة ..
ابو راشد ::/ والله يا بو مشاري ولايهون زياد والسامعين .. حنا اليوم جايينكم بطلب ونتمنى نلقاه عندكم وماتردونا ..
ابتسم ابو مشاري ::/ افا عليك يابو راشد عزيز وغالي .. وطلبك عندنا إن قدرنا عليه .
ابو راشد مبتسم::/ الله يسلمك عشمنا فيك يالغالي .. حنا اليوم جايينكم نبي نخطب ندى بنت اخوك واخت زياد لولدي طلال ... إن ماكان عندكم مانع ...
وجه ابو طلال نظراته لزياد وكأنه يبي منه هو الإجابة .. ارتبك زياد وماعرف وش يرد أو وش يقول .. تلعثم في البداية لكن عمه أنقذ الموقف لما قال ..
ابو مشاري ::/ طلبك على عيننا وراسنا يا بو راشد .. ولو هي ذبيحة ما سدتكم .. لكن بنت أخوي مخطوبة ... ونعتبرها فايته ..
بانت الصدمة بعيون طلال ... وعيون كل الجالسين ................
مخطوبة ................................؟؟
كيف ومتى ومن اللي خطبها ؟؟؟ وليش سحر ماقالت لي ؟؟ ووأصلا ليش يقولون لي أنها تحبني وتبيني وأنها موافقة على الزواج ؟؟ ليه يحطوني في هالموقف ؟؟
بلع ريقه بصعوبة وهو مو قادر يستوعب الأحداث اللي صارت من دقائق ... وده يسأل من هالحيوان اللي تجرأ وأخذها منه ؟؟ من هاللي داعية عليه امه وقرر يخطبها وراسه يشم الهواء .. انتبه لأبوه اللي قال ..
ابو راشد ::/ ما كان عندنا خبر بهالشي يا بو مشاري .. لكن على ما أظن ان ولد عمها هو احق بها ..
ابو مشاري وهو يبتسم ::/ صدقت ... لكن ولد عمها الشقيق أقرب لها من ولد عمها اللي بالرضاع ؟؟
انبهت كل اللي في المجلس .. وش قاعد يخربط ابو مشاري .. ووش قاعد يهبب عليهم
ابو راشد مستغرب ::/ ومن يكون ؟؟
ابو مشاري ::/ مشاري ولدي الله يحفظك ..؟
فجر ابو مشاري القنبلة بكل برود .. وكأن شي ما يهمه ... توجهت الأنظار كلها على مشاري اللي ما قدر حتى يبلع ريقه واحتقن الدم في وجهه من المفاجأة .. وشلون ومتى خطبتها انا ؟؟ ما اذكر اني في يوم قلت لأهلي حتى أني موافق على الزواج هالدور بصير خطبت ندى بعد ؟؟؟
انتبه لنظرات طلال الموجهه له .. كانت حزينة وكسيرة ... كأنه شخص يأس وفقد الأمل .. إذا مشاري هو اللي خطبها معناته خلاص هو ماعاد له أي داعي ولا له أي أمل في أنه يآخذ ندى ؟؟ بس كيف سحر ماقالت له هالشي .. وهذا اللي كان محيرة ويدور براسه ...
مشاري كان وده يقوم لطلال ويقول له أن هذا كله كذب .. وانه لاخطب ندى ولاهم يحزنون .. بس مايدري وش فيه أبوه ضربت فيوزاته وقام يقط خيط وخيط ..
،،،وخله يستمر في عرضه على الأقل البنت تلقى لها سند في هالدنيا مو هو اللي لايمكن يكون ..!!
لكن كانوا هم أسبق منه ... قام ابو راشد وعياله واستأذنوا من ابو مشاري ومشوا طالعين بعد ما انرد طلبهم اللي عمره طلال ماحسب حساب لهاللحظة اللي بينرفض فيها .. وبتبتعد ندى عنه ...
بمجرد ماطلعوا قام مشاري وطلع من المجلس ودخل للبيت ... ماحب يتناقش مع ابوه قدام زياد ويوضح له انه ماكان يدري عن الخطبة وانه اصلا رافض ندى .. اما ابو مشاري فقام لزياد اللي حس ان عمه فعلا أنقذه من مشكلة كبيرة .. لكن لا زال منصدم كيف مشاري خطبها وهو ماعنده خبر ..؟؟
ابو مشاري ::/ اسمع يا زياد وانا عمك .. ترى هالخطبة راح اعتبرها رسمية .. وان ندى لمشاري .. وهذا كلام مافيه رجعة ... تم ..؟
زياد بارتباك ::/ لو علي ياعمي انا موافق لكن بنسأل ندى قبل ..؟
ابو مشاري ::/ وبتردني يا ولد أخوي مرة ثانية ؟؟
افتشل زياد من عمه ::/ لا ياعمي ماعاش من يردك .. واعتبر هالموضوع تم بإذن الله .. ندى وين بتلقى أحسن من مشاري ؟؟
ربت ابو مشاري على كتف زياد وهو مبتسم وطلع من المجلس متوجه للبيت ... وكان عارف بالي بيواجهه داخل ووش راح يقابل ...
-------------------------------------------------------------------------------
طلع هو من المجلس وبقد ما يقدر حاول يمسك أعصابه وما يثور ويعصب لحد ما يتأكد من اللي وصله ...
فتح باب غرفتها قبل لايدقه ..
فزت ندى من مكانها لما دخل عليها زياد .. شافت وجهه أسود وكأنه مهموم وإلا حاصل له شي مكدره .. قامت من على السرير وراحت له بخطوات سريعة وخايفة ..
ندى ::/ زياد وش فيك ؟؟؟
طالعها زياد وعيونه تعبانة .. بعدها عن طريقه وتوجه لدولابها .. فتح الباب الأول والثاني والثالث وكلهم انفتحوا معه عادي .. حس بالراحة تسري بعروقه .. يعني ممكن يكون كلام هذاك النذل كذب في كذب ... لكن لما وصل الرابع .. وتحت نظرات عيون ندى الخايفة وأوصالها المرتعده ... حاول زياد يفتح الدولاب لكن ما انفتح ... غمض عيونه بألم وحرقة وحاول يفتحه مرة ثانية لكن ما انفتح معه ...
وبقهر أعمى عيونه صر على أسنانه وحاول يكسر الدولاب .. كان يبيه ينفتح بأي طريقة بس ماكان يبغاه يصير مقفول علشان مايكون كلام االنذل صدق وحقيقة .. لما ما رضى ينفتح معه .. ضرب الباب برجله بكل قوته وضرب عليه بيده .. والتفت عليها وعيونه مولعة نار ...
خافت ندى وحضنت يدها في صدرها ..
زياد بصوت مقهور ::/ ليش مقفلة الدولاب ؟؟
ندى بخوف والدمعة بعيونها ::/ مو علشان شي بس كذا ..
زياد بصوت عالي آمر ::/ افتحيــــــــــــــــــــــه ,,,
بلعت ندى ريقها وما قدرت تتحرك من مكانها ,.,, وشلون تفتحه لزياد .. وشلون تخليه يشوف كل هدايا طلال ... وكروته اللي كان يكتب فيها كلام رومانسي وقصائد نزار وغيره ...
لما شافها زياد تجمدت في مكانها قرب لها بخطوات نارية .. وكأن الأرض تهتز من حوله .. مسكها مع يدها بأقوى قوته لحد ما انغرست أظافره بعضدها .. وسحبها للدولاب ..
زياد بصوت أعلى ::/ افتحيه ياندى لا أكسره فوق راسك ...
هزت ندى راسها بإيجاب ومشت والدموع تنزل على خدها وطلعت المفتاح من صندوق احمر خشبي منحوت على شكل قلب ... وفتحت له الدولاب .. وعلى طول رجعت شوي تبتعد عنه ...
فتح زياد الدولاب على مصراعيه ... وشاف اللي كان خايف منه ..؟ علب هدايا ..!!
.. كروت في سلة خشبية ... دببه صغيرة ومكتوب عليها عبارات عشق وغرام ...
غمض عيونه بغضب .. شد على قبضته وصر أسنانه بقهر ... كان معطي ندى ظهره .. وندى مركزة نظرها على ظهره ماتدري وش ممكن يقول لها او ممكن يسألها ..؟
مد زياد يده وأخذ السلة وبدأ يقرأ الكروت ... بعضها كان الكلام اللي فيها عادي .. لكن البعض الثاني كان فيها كلام حب ..
مسك السلة لف على ندى ورماها في وجهها ..
زياد باحتقار ::/ وش هالخرابيط ..؟؟
سكتت ندى وما ردت عليه ..................
زياد بصوت عالي ::/ ندى لا تسوين بريئة .. قولي لي وش هاللي انا قاعد أشوفه .. فسري لي اللي قدامي لا أسوي شي تندمين عليه ..؟
ندى بصوت متقطع وشهقات صياح ::/ هـ ـ ـ هد.... هدايـ ـ ـا ..
زياد بصوت أعلى::/ عــــــــــــــــــــارف انهم هدايا لكن من ميــــــــــــــــــن ؟؟
بلعت ندى ريقها ورفعت عيونها وهي تصيح وبصوت عالي وهي تشاهق ::/ زياد الله يخليك لاتسوي لي كذا.. وبعدين هذي هدايا انت وش فيك معصب ؟؟
قرب لها زياد ومسكها مع يدها ::/ من اللي كان يعطيك اياهم يا ندى .. تكلمي لا اطربق الدنيا عليك ..
سحبت ندى يدها وعطته ظهرها .. وش ترد عليه ؟؟ تقول له من طلال .. هنا الكارثة ممكن يسحقها في مكانها ؟؟ وشلون تآخذ منه هالكم الهائل من الهدايا وتقبل منه هالكروت الغزلية المزحومة بعبارت الغرام وهي لا خطيبته ولا زوجته ؟؟ يعني ممكن يطيح من عينه ومايهون عليها طلال تسوي له كذا ..
التفتت عليه وعيونها بالأرض ::/ من صديقاتي ؟؟
زياد باستهزاء ::/ وصديقاتك هذولا بيكتبون لك هالكلام الغزلي ؟؟
ندى ودموعها تسبقها ::/ اسألهم هم ؟؟
زياد وحب يضيق عليها ::/ من هم اللي يعطونك الهدايا حددي لي أسماء ..؟
ارتبكت ندى ومسحت دموعها و نزلت يدها على صدرها ::/ كثيرين ما أتذكرهم ..؟
انتبه زياد للخاتم اللي بيد ندى .. وزادت شكوكه حتى قاربت انها تكون حقيقة .. أول ما شافه حس بطعنه في قلبه .. كان من دقائق يحاول يصدقها ويقول أن هالهدايا من صديقاتها .. لكن هالخاتم .. لا مستحيل يكون احد اهداه لها ... لأن هالخاتم أشبه ما يكون بخاتم خطوبة ..؟ فمعقولة وحده من البنات تهديها هالشي ...؟
قرب زياد وسحب يدها وخلاها قدام عيونها وركز نظره عليها ::/ وهذا ؟؟ من صديقاتك بعد ؟
سحبت ندى يدها وحضنتها وهي تحاول انها تتماسك وماتنهار ... عارفة زياد لو شم ريحة أي شي ممكن يكسر عظامها .. تعرفه إذا عصب أو تنرفز مايعرف الأسود من الأبيض ..
ندى بتردد ::/ وش اسوي فيهم إذا صاروا يهدون بهالطريقة ؟؟
مسكها زياد مع كتوفها وهزها بقوة::/ ندى , لا تكذبين علي لأني كاشفك .. لو انتي صادقة اتصلي لي على البنت اللي اهدتك اياه خليني اسألها ..؟
طارت عيونها ندى في كلام زياد ؟؟ وش بتسوي ؟؟ ووش الحيلة علشان تطلع من هالمأزق ...؟
سكتت وما ردت عليه ..
طلع زياد جواله وعطاها إياه ::/ خذي .. اتصلي واسأليها قدامي الحين ..
فكرت ندى في لعبة وقررت تتصل على رحاب ..
ضغطت الرقم وهي ماسكة عبرتها ... وشلون بتكذب ووشلون تشرح لرحاب الخطة علشان يشتركون ثنتينهم في الكذبة ... أول ماردت عليها رحاب حطت السبيكر .. و طالعت في زياد وبعدين سألتها ..
ندى ::/ رحاب بسألك سؤال ...؟
رحاب تضحك ::/ ليه مشتركة في برنامج فوازير رمضان ؟؟
ابتسمت ندى لكن ما قدرت تواصل كذبها على زياد .. خلاص هي مكشوفة مكشوفة .. فليش تخلي رحاب تعرف عن الموضوع وتنفضح قدامها ؟؟؟ سكرت السماعة ورمت الجوال وطاحت على ركبها وهي تصيح منهارة .. غطت وجهها بيدها وبدت تشهق من الصياح ...
مسح زياد على وجهه وعرف انها تكذب .. وان اللي وصله اليوم صحيح 100%
خلاص الغضب عنده وصل حده ... الغيرة ضربت أقصى درجاتها .. القهر بلغ أوج عظمته ... ماقدر يتحمل أكثر .. قرب منها سحبها من يدها علشان تقوم تواجهه .. حس انه عورها وانه آلمها بسحبه .. لكن ما اهتم لهالشعور ,,
زياد بصوت عالي متأثر::/ آخر شي كنت اتوقعه منك يا ندى .. يا بنت أمي وأبوي ,,
ندى وسط شهقاتها ::/ ز ... زيـ ـ ـ .. زيـ ـ ـ ـا ـد أنا ما لي دخلـ ـ ـ
زياد بزمجرة ::/ لك دخل ونص .. مو انتي استقبلتي هداياه ؟؟؟ مو انتي رضيتي لنفسك بالمذلة والهوان ... انتي اللي خليته يستغلك وخربتي علي وعلى كل اللي يحبونك .. أنا اللي كنت واثق منك .. كنت معتبرك مثال للأخلاق وكنت أقول والنعم في تربيتنا والنعم في اختي وأخلاقها اللي علمتها أياه ,, لكن للأسف ياندى طحتي من عيني .. ماكنت اتوقع منك هالتصرف في أي يوم أبدا .. أبدا ..
بعد ما كان شاد قبضته على يدها تركها ورماها بقوة على السرير ...
طاحت ندى على حافته وضرب طرف فمها .. نزل الدم لكن بدون ماتحس بألم أو بحرارة اللي طلع من فمها ... كانت الدموع مغرقة عيونها وما انتبهت لزياد اللي طلع من الغرفة مكسور .. من زمان كانت تقول ماراح تستقبل هدايا من طلال ؟؟ من زمان كانت تبي تتخلص منهم لكن الزمن سبقها واكتشفها زياد .. كانت متوقعة ردت فعله .. وكانت زمان تسولف على سحر باللي ممكن يسويه زياد لو عرف عن هالشي .. لما كانت تقرأ كروت طلال اللي فيها كلام حب . كانت تلتفت على سحر بابتسامة وتقول ::/ لو يشوفها زياد بيدفني وانا حية ...
واليوم صار اللي كانت خايفة منه .. وعرفت سبب انقباض قلبها ..
مسحت على شعرها ومسحت دموعها وانتبهت للدم اللي بيدها .. قامت وراحت للتسريحة شافت الجرح اللي جنب فمها ... وانتبهت لعلامات يد زياد على يدها .. كان مخيف .. ونظراته مخيفة ... لكن دمعته اللي لمحتها بوسط عينه هزت مشاعرها مرة ثانية ونزلت للأرض تصيح من الندم والقهر ...
-------------------------------------------------------------------------------
دخل ابو مشاري الصالة وهو عاد العدة لأي سؤال أو ردة فعل ممكن يواجهها ... سواء من مشاري أو من امه ... دخل وشافهم جالسين في الصالة لكن ماكان باين عليهم شي
ابو مشاري ::/ السلام عليكم ..
ردوا عليه السلام ... ومشاري أول ما سمع صوت ابوه لف له على طول ..
مشاري بغضب مكتوم ::/اشرح لنا الحين اللي سويته يا ابو مشاري ؟؟؟ وفسر لي الكلام اللي قلته اليوم بالمجلس ؟؟
سكت ابو مشاري ومارد عليه تقدم منهم وجلس بصدر المجلس من دون اهتمام ..
طالع الجميع .. وبعدين رد بثلجية
........::/ اللي سمعته كان واضح وما يحتاج تفسير
مشاري وهو شاد قبضته ::/ لايحتاج تفسير لأنك حطيتني في موقف محرج .. ولا أدري وشلون بطلع منه .. فلو سمحت مثل ماحطيتني فيه طلعني منه ..
تلفتوا ام مشاري وسحر على بعض يبون يفهمون وش صاير ..
ام مشاري ::/ وش فيكم .. وش صار بالمجلس ..
مشاري بغضب :/ اسألي أبوي الله يطول بعمره ..
ابو مشاري ::/ مشـــــــــــــــاري .. احترم ابوك واحترم كلامك معه
تنفس مشاري بعمق ::/ السموحة يبه .. لكن فهمهم وش سويت اليوم ؟؟
ابو مشاري ::/ رفضنا طلال ..
انصدمت سحر وباندفاعية ::/ ليـــــــــــــــــــــش ؟؟؟ وش فيه طلال رفضتوه ؟؟
ابو مشاري ::/ لأن مشاري خطب ندى ...
عم الهدوء في الصالة .... والصدمة سكتت سحر وخلتها تجمد في مكانها ...
ندى ومشاري ؟؟؟ وشلون ؟؟ وكيف خطبها مشاري وحنا ماعندنا خبر ؟؟؟ حتى ندى ماعمرها جابت لي هالسيرة ..؟ بالعكس كانت كل يوم تكرهه وتكره حركاته الدكتاتورية والمتسلطة... قطع عليها امها لما قالت ..
ام مشاري ::/ ومن متى خطبتوا ندى وانا مادري ؟؟
مشاري بغضب ::/ اسألي أبوي ؟؟ إذا أنا المقصود مادريت عن السالفة إلا اليوم وشلون انتم تدرون ؟؟؟ صدمنا اليوم لما قال هالكلام .. حتى طلال انلفع وجهه ويحسب اني عارف بالموضوع واني من جد خاطب ندى ..
ام مشاري بغضب ::/ ابراهيم ... وش اللي سويته ؟؟
ابو مشاري ::/ ماصار شي يا حصة .. كل اللي قلته ان مشاري أحق بندى من طلال .. كفرت ؟؟
وقف مشاري وهو يحاول يسيطر على كلماته علشان مايغلط على أبوه ::/ أنت ما كفرت يبه لكن قللت من قيمتي ؟؟ انت حتى ماشاورتني ؟؟ ولا أخذت موافقتي ؟؟
أبو مشاري ::/ ليه عندك اعتراض على ندى ؟؟
مشاري ::/ أنا اعتراضي على الزواج كله ... أنا من زمان قايل لكم زواج ما ابي اتزوج .. وانت بسلامتك جاي اليوم تخطب لي من دون علمي ؟؟؟
ابو مشاري بعصبية ::/ وليش ان شاء الله معارض الزواج ؟؟؟ وش هي اسبابك ؟؟ يعني بتعيش طول عمرك عزابي ؟؟ والا بتحرمنا من عيالك ؟؟
انهز مشاري من كلام ابوه ... ::/ أسبابي خاصة فيني .. وزواج ما راح اتزوج .. وهالمأزق اللي حطيتني وحطيت نفسك فيه حاول تطلعنا منه .. والا انا بروح لزياد وأقول له اختك ماعاد ابغاها ...
وقف ابو مشاري وهو يهز يده ::/ ندى بتتزوجها وخطبه وخطبتها لك ... رفعت الأقلام وجفت الصحف .. وهالموضوع منتهي وغير قابل للنقاش ...
تدخلت ام مشاري ::/ ابراهيم .. مااتفقنا على كذا ... وتراني قلت لك كل شي ولاتغصب عيالي ... وانت عارف بالعواقب أكثر مني ..
التفت ابو مشاري على مرته ::/ انتي خليك بعيدة ...
انصدمت ام مشاري من كلمته لكن ردت عليه ::/ في أمورك انا بكون بعيدة نهائيا لكن اللي يخص عيالي بكون قريبة .. وأقرب لهم من نفسهم ...
ابو مشاري ::/ اللي عندي قلته .. وزواج مشاري من ندى تم خلاص ..
ام مشاري بصوت عالي ::/ لا ماتم ... مادام مشاري معارض مستحيل يتم يا ابراهيم .. انا ماعندي استعداد اضحي بولدي وحياته وعياله في المستقبل ..
التفت لها ابو مشاري معصب ::/ حصـــــــــــة ...لما انا اتكلم مع عيالي انتي ماتدخلين ؟؟
ام مشاري ::/ ليه وانا مو أمهم ؟؟؟ مثل ما أنت أبوهم ؟؟
ابو مشاري بصوت عالي ::/ انتي امهم على العين والراس .. لكن في المواضيع اللي تخصني انا وهم انت تكونين بعيدة عنها فاهمة ..
ام مشاري باستهزاء ::/ وفي رأيك موضوع زواج ولدي البكر يخصك انت وهو بس وانا خارج الحسبة ؟؟
ابو مشاري ويحاول يتماسك ويصر على أسنانه ::/ أنا قررت وخطبت وانتهينا ... غير هالكلام ماعندي ...!
ام مشاري بعناد ::/ وانا قلت لك عيالي ماينغصبون على شي مايبونه وخصوصا مسألة الزواج ..!
قرب أبو مشاري بنظرات غاضبة لحد ما واجه زوجته ::/ تتحديني ياحصة ؟؟؟؟؟ (( وأشر على نفسه ))
انهزت حصة من كلامه وحست بالخوف يتسلل لقلبها ::/ أنا اواجهك بموقفك ..
ابو مشاري ::/ يعني تبين تكسرين كلمتي وتقوينهم علي .. وتوضحين ان انت يا ابراهيم مالك كلمة عليهم ؟؟
ام مشاري مرتبكة ::/ أنت اللي حطيت نفسك بهالموقف ... وانا وانت كنا متفقين من قبل وأكدت لي انك ماراح تغصب أحد على شي ...
لف ابو مشاري وعطى حصة ظهره ::/ أنا قلت اللي عندي ... مشاري بيآخذ ندى .. واللي عنده كلام غير كلامي يقوله الحين ..
وسكت ينتظر أحد يرد عليه ... ينتظر أحد يعارضه .. او حتى يأيده .. لكن الصمت كان هو الجواب .. محد تجرأ يقول له شي ..
ابو مشاري وهو يطالع مشاري ::/ وانت ؟؟؟؟ موافق والا معارض ؟؟
سكت مشاري وماعرف وش يرد عليه ؟؟؟ ما يدري يقول إيه ويدمر حياته وإلا يرفض ويزعل أبوه وتتنغص حياة امه ...
ابو مشاري ::/ وش قلت ؟؟؟
مشاري ::/ لو قلت لك معارض ولا أبغاها وش بتسوي ؟؟
ابو مشاري مبتسم ::/ بقولك الله يهنيك بحياتك مع امك ...
تركهم ابو مشاري وطلع الدرج رايح لغرفته ... كلهم انصدموا من كلام ابوهم ومن قسوته المفاجأة .. مستحيل يكون هذا أبوهم اللي دائما يسعى انه مايفرق بينهم في شي أبدا مهما يكون ... هالمرة صار متسلط ويفرض عليهم رأيه من دون نقاش ..
انسحب مشاري من بينهم وطلع لغرفته بخطوات سريعة ... اما سحر فكانت الصدمة لازالت راسمة ملامحها على محياها ... ما حست بنفسها الا وهي ماشية لغرفة ندى ..

.
.
.
.
.
دارت بمقبض الباب برجفة وخوف ... ماتدري وش راح تكون حالة ندى ؟؟؟ أكيد زياد قال لها كل شي ؟؟ أكيد فهمها انهم رفضوا طلال لأن مشاري خطبها ؟؟؟ مية بالمية بتتوقع أني أعرف بالسالفة وما قلت لها ؟؟؟
طلت براسها على خفيف وشافت ندى جالسة في زاوية الغرفة وحاضنه رجولها لصدرها ... وصوت شهقاتها معبي المكان ...
بلعت سحر ريقها وحاولت تتشجع ... دخلت ومشت لها بخطوات خفيفة ... نزلت لمستواها وحطت يدها على كتوف ندى ..
سحر ::/ ندى استهدي بالله .. ترى هالصياح مابينفعك ؟؟
ندى وسط شهقاتها ::/ هذا اللي كنت خايفة منه يا سحر ... صار وياليتني مت قبل لايصير ؟؟
لفت سحر بوجهها من الحزن ::/ ندى ترى هذا اللي الله كتبه لك ؟؟؟ ولو كان طلال من نصيبك صدقيني ما كان فيه قوة في الأرض بتخلي زياد يرفض ..
رفعت ندى راسها ووجهها مليان دموع ::/ رفض طلال ؟؟؟
طالعتها سحر باستفهام ::/ إيه ...؟ ماقال لك ؟؟
زادت نوبة الصياح عند ندى ::/ كله مني أنا السبب .. الله يآخذني الله يآخذني وارتاح وافتك ؟؟؟ ليتني مت في بطن أمي ولا انولدت ...
حضنتها سحر وهي تصيح وحاولت تهديها بكم كلمة .. سكتتها وبعدها خذتها للسرير خلتها تنسدح وتتمدد .. وطلعت من عندها بتجيب لها عصير والا شي يهديها .. مو معقولة وضعها ؟؟؟
---------------------------------------------------------------------------
دخلت أم عبدالله وعبدالله للبيت وهي خلاص هلكانة من الدوران في السوق ... دخلت عليهم في الصالة وشافتهم مجتمعين ومعهم قهوة ... رمت عبايتها على الكرسي وحطت جنبها شنطتها و قربت منهم ..
ام عبدالله صوت منهك ::/ السلام عليكم ...
سارة وهي تقلد صوت العجايز::/ هلا والله بأم المعرس .. هلا وغلا ..؟؟ هاه بشري عسى لقيتوا شي زين ويستر على الوجه ...
ام عبدالله مبتسمة::/ الحمدلله لقينا ومابغينا نلقى ... المهم قومي جيبي لي كاس موية قبل لاأموت عليكم ...
حضنت عذا امها مع كتوفها ::/ بسم الله عليك يومي قبل يوك ...
قامت سارة متوجهه للمطبخ .. وفي نفس الوقت دخل عبدالله مع باب الصالة وفي يده كيس هدايا كبير .. ابتسمت له سارة وقالت ::/ يا ويلك توريهم شي قبل لا أصير معهم ؟؟
عبدالله مبتسم ::/ زين .. بس جيبي لي مويه معك ؟؟
سارة بصوت مستفهم عالي ::/ وش قصتكم مع المويه اليوم ؟؟؟
ضحك عليها عبدالله وسلم على أهله الموجودين بالصالة ... وأول ماشافت لمياء الكيس نقزت عليه بتآخذه منه .. لكن هو مسكه بقوة وحضنه ..
عبدالله ::/ لا ممنوع .. اصبري شوي لحد ماتجي سارة ..
لمياء ::/ طيب نشوفه الحين وإذا جت سارة تشوفه ؟؟
عبدالله وهو يآكل من الحلى ::/ لا أنا واعدها اننا نشوفه سوا ...
أسامة بنبرة استهزاء::/الله أكبر ياسارة .. وفجأة قام عزك وصاروا الناس يعملون لك حساب ..
سارة وهي طالعة من المطبخ ::/ ليش حبيبي ما ملت عينك سارة يوم تقول عنها هالكلام ؟؟
عذا ::/ يمه منها تسمع الشي الشين لكن الشي الزين أذنها مطموسة عنه ...
سارة وهي تمد الكاسات ::/ لاتقعدين تتفلسفين علي ... (( التفتت على عبدالله )) يالله عبادي طلع أشيائك وخلنا نشوف ذوقك أنت والمام ..
جلست سارة قدام عبدالله .. والكل مركز عينه عليه ينتظرونه يطلع لهم الشبكة من الكيس ...
طلّع عبدالله الصندوق وهو يبتسم ... وحطه في حضنه ...
عبدالله مبتسم ::/ كلوا يسكر عينه وإلا ترى ما أوريكم ؟؟
سارة بحماس ::/ اترك عنك شغل البزارين وافتح العلبة ..
عبدالله باصرار ::/ أقول غمضوا كلكم .. شوفوا عذا ماشاء الله عليها تسمع الكلام ؟؟
أسامة وهو يغمض عيونه ::/ ياشين المذلة وانا أخوك ..
كملت عليه لمياء ::/ وانت الصادق يا شين البزران إذا بغوا يتزوجون ؟؟
عصب عليهم عبدالله ::/ يوم هذا كلامكم أنسوا أوريكم شي ..
كلهم هبوا فيه يعتذرون ويتأسفون واللي يحب راسه واللي يقول له راح أخدمك بعيوني بس أنت خلنا نشوف شبكتك ...
انصاعوا كلهم لكلامه وغمضوا عيونهم وينتظرونه يطلعها لهم ...
كانت ام عبدالله تشوف لمعة السعادة والراحة بعيون عبدالله .. وهالشئ لاحظته من بعد ما قبلوا فيه أهل ريم وشافها الشوفه الشرعية ...
فتح عبدالله العلبة وحطها لهم على الأرض ..
عبدالله بصوت عالي ::/ يالله فـــتـــحــــــــوا ................!!
فتح الكل عيونه .. وأشد واحد انبهر كان أسامة ... تقدم للعلبة ولمس بأصابعه العقد ..
أسامة ::/يخرب بيتك يا عبيد ؟؟؟ كل هالمهارات عندك وانا مدري ؟؟
عبدالله بخجل ::/ إيه عاد هذي الريم لازم نجيب لها شي يليق بمكانتها ...!!
سارة بقهر ::/ يخرب بيتها هي بعد .. يا حظها بتلبس هالخاتم وهالعقد ؟؟
ام عبدالله ::/ اذكري الله لا تعطينها من الثقيل وتموت البنية قبل لاتلبسه ..
عبدالله باندفاعية ::/ بسم الله عليها .. وش هالفال ؟؟
ضحكوا عليه كلهم ومن كلامه عن ريم ..
حاولت ام عبدالله تغير الموضوع لما شافت الإحراج واضح على ملامح عبدالله ..
ام عبدالله تأشر لعذا ::/ عذاي عيوني جيبي شنطتي خلني أتصل على ندى أشوف وش صار عليهم ؟؟
لمياء::/ ليش وش فيهم ؟؟
ام عبدالله ::/اليوم بيجيهم طلال ... وعاد أكيد الحين راحوا أبشوف وش صار ؟؟
سار بنظرة جانبية ::/ والله ماخبرتك ملقوفة يا ام عبود .. إلا من خطبتي لوللدك وانتي خربانة ..
أسامة وعيونه طايرة في سارة :::/ هيه انتي عيب عليك .. ترى ما أسمح لك تقولين لها هالكلام وأنا موجود ؟؟
ضحكت ام عبدالله ::/ ههههههههه يعني لو انت مو موجود عادي يهزئوني ...؟
وصلت عذا لأمها وبيدها الجوال ومدته لها ::/ لا عاد إذا راح أسامة أنا اناوب ..
لمياء ::/ وانت ما تجين إلا في الأخير لكن تسوين شي من نفسك ماتعرفين؟؟
عذا بنبرة دلع ::/ يمــــــــه سكتيها ؟؟
ضحكت ام عبدالله وهي تتصل ::/ هذا وانتي راح تدافعين عني ؟؟ الله يخلف عليك الظاهر انتي تبين أحد يدافع عنك ...
أسامة يضحك ::/ لا ماعليش عذا طول ما أنا موجود بحاول أدافع عنك انتي وأمي ..
سارة بنقمة ::/ أنت اكفها شرك وهي غنية عن خيرك ..
سكتوا كلهم لما بدت امهم تتكلم ,,,
ام عبدالله ::/ مرحبا ندوش حبيبتي وش أخبارك ؟؟؟
ندى اللي كانت تصيح على خفيف انهارت لما سمعت صوت عمتها وحست بالأمان اللي افتقدته من دقائق.. وفي وسط شهقاتها ردت عليها ::/ عمه والله مالي دخل أنا ما سويت شي غبي ... أنا عارفة إني غلطانة بس مو لهالدرجة ..
ام عبدالله بنبرة خوف ::/ ندى وش فيك تصيحين ؟؟ شصاير لكم ؟؟
ندى وشهقاتها تزيد ::/ زيـ ـ ـ زيـ ـ ـاد ..
حطت ام عبدالله يدها على قلبها ::/ وش فيه زياد ؟؟
كل اللي عند ام عبدالله انشد انتباههم لما ذكرت أسمه .. وخصوصا ان ملامح الخوف علت وجهها .. وخافوا لا يكون صار له شي ..
حطت عذا يدها على فمها من دون شعور .. تنتظر امها تكمل جملتها .. وتقول وش اللي صاير ..
ام عبدالله ::/ ندى لاتخوفيني عليكم ... تكلمي ؟؟
ندى ::/ ما دري وش فيه ياعمة ؟؟ اسأليه هو لا تسأليني أنا ..؟
سكرت ندى عن عمتها لما حست انها لا يمكن تقدر تكمل كلامها أو يطلع منها حرف ثاني غير اللي قدرت تقوله ...
اما ام عبدالله فنزلت السماعة من يدها وهي تحس بعظامها ترتجف .. ماعندها جرأة تتصل على جوال زياد تخاف تنصدم بشي مو زين ؟؟
ام عبدالله تطالع عبدالله ::/ عبدالله اتصل على زياد وشف وش فيه ؟؟
عبدالله بخوف ::/ ندى وش قالت لك ؟؟
ام عبدالله ::/ ماعطتني سالفة ... بس كانت تصيح .. اتصل الله يخليك خلنا نشوف وش صاير لهم ...
طلع عبدالله جواله من جيب ثوبه وعلى طول اتصل على زياد ...
انتظره يرد لكن لاحياة لمن تنادي ..
عبدالله بنبرة خوف ::/ مــايرد ..؟
عذا والدمعة شوي وبتنزل ::/ يمه كلميه من جوالك يمكن إذا شاف رقمك يرد ؟
تنفست ام عبدالله بعمق ومدت التليفون للمياء اللي كانت جالسة حنبها ::/ لمياء خذي اتصلي وإذا رد عطيني إياه ..!
خذت لمياء الجوال من يد أمها واتصلت على زياد ... الرنة الثانية رد عليها ..
رمت لمياء الجوال على أمها علشان تكلمه ...
ام عبدالله ::/ زياد وينك ليه ماتردون علي ..؟ وش فيكم ؟؟
تنهد زياد اول ماسمع صوت عمته ... كان متمدد على سريره والأنوار متسكرة وحالته لله ... منصدم من اللي صار ... وماكان يتوقع هالشي يصير من أخته اللي تُعتبر تربيته ... ماكان فيه حيل يتكلم لكن صوتها أجبره انه يرد عليها ...
زياد بصوت واطي مكسور ::/ هلا عمه .. مافينا إلا العافية ..
ام عبدالله والدمعة نزلت من عينها ::/ لا تكذب علي .. انتم فيكم شي .. من شوي كلمت ندى وكانت تصيح وتقول لي كلام مو مفهوم ... عاد انت الحين فهمني ؟؟
زياد وهو يمسح على شعره ::/ ما فيه شي ياعمه .. وش تبيني أحلف لك به ؟؟ كل اللي صار سوء تفاهم بيني وبينها بس ..؟؟
ام عبدالله ::/ زياد ؟؟
تنفس زياد بعمق ::/ صدقيني لو فينا شي كنت بقول لك بس صدق مافينا شي ؟؟
ام عبدالله بلهجة أمر::/ طيب خذ أختك وتعالوا لنا الحين ..
زياد ::/ معليش ياعمه خليها يوم ثاني ..
ام عبدالله بإصرار ::/ أقولك الحين .. وإلا ترى أجيكم انا وعبدالله وآخذها ..
زياد بقلة حيلة ::/ زين أمرك يا أغلى عمة دقائق وحنا عندكم ..
سكرت ام عبدالله عنه وبالها مو متطمن ...قلبها يقول لها إن فيه شي قوي حاصل .. لكن الله يستر .. كلها دقائق ويجون وبتفهم منهم كل شي ..
-----------------------------------------------------------------------------
بعد ساعة من مكالمتهم دخلت عليهم ندى الصالة وشكلها يرثى له ... كانت عيونها متنفخة من كثر الصياح ... والجرح على طرف فمها ملفوف بستيكر جروح ... كانت الرجفة بيديها واضحة .. والخوف بعيونها جلي لعيون عمتها وبناتها ...
ام عبدالله وهي تسلم على ندى ::/ وين أخوك ؟؟
ندى بصوت هامس ::/ نزلني وقال بيرجع بعدين ؟؟
ام عبدالله تتحسس وجه ندى ::/ وأنتي وش اللي مسوي فيك كذا ؟؟
ندى ويدها على الجرح ::/ عادي زلقت بالحمام ..
ام عبدالله بنظرة تشكيك ::/ ندى تخبين علي ؟؟
ندى ودمعتها نزلت ::/ لا والله ياعمة ..
أم عبدالله ::/ أجل وش بينك وبين زياد ؟؟؟
ندى ::/ عادي كان فيه سوء فهم بيني وبينه وانتي تعرفينه إذا عصب مايعرف امه من أبوه .. هذا كل مافي الموضوع ...
الصدمة اللي تملكت عذا خلتها تقول ::/ زياد ضربك ؟؟؟؟؟
حاولت ندى تستدرك ::/ لا من قال .. لكن صرخ علي وهاوشني وانا ما أتحمل يصير لي شي من زياد ...!؟
سكتت عنها عمتها وحاولت تصدق اللي انقال وعموما هي ترتاح في الكلام مع زياد أكثر لأنها تفهمه أكثر وتعرف تطلع منه السالفة ...!! وهو أكيد بيقول لها ...؟
تركتها مع البنات وهي طلعت لأبو عبدالله اللي كان جالس بحديقتهم الخارجية يتقهوى وطالبها تجيه ...
جلسوا البنات بالصالة .. لكن لو ندى قدرت تمشي كذبتها على ام عبدالله فيستحيل أن لمياء ممكن تصدقها أو تنطلي عليها ...
لمياء بنبرة أمر ::/ ندى قولي وش اللي صار ..؟
بلعت ندى ريقها ::/ اللي صار قلته ؟؟
لمياء ::/ هذيك أمي واللي يكلمك الحين انا ... فلا تراوغين ... تكلمي ...!!
سكتت ندى شوي تحاول تستجمع قوتها علشان تقدر ترتب كلامها لكن عجزت .. انهارت وبدت تصيح ... تقربت منها لمياء و هي تحس بالعطف على هالبنت المسكينة ..
لمياء وهي حاضنتها ::/ ندو وش فيك ؟؟
ندى وسط دموعها ::/ زياد شاف كل شي وعرف كل شي ؟؟
لمياء وهي تطالع بعيون ندى ::/ وش تقصدين ؟؟
ندى ::/ كل الأشياء اللي وصلتني من طلال زياد عرف عنها ؟؟ لا وفوق كل هذا قرأ الكروت .. وغسل شراعي ورمـ ـ ى عـ ـ ـ لي كلامي قاسي ؟؟
لمياء وهي تحاول تهديها ::/ وش قال لك ؟؟
ندى وهي تشهق ::/ حسسني بأني مذنبة واني ما استاهل ثقته ...؟؟ قسم بالله يالمياء كنت بموت من كلامه .. حتى لما شفت دمعته بعينه حسيت اني حقيرة وناكرة معروف ..
لمياء بعتاب ::/ كنت قايلة لك ... ومنبهتك على هالشي .. وقايلة انه مهما كان طلال يعتبر ولد عمكم من الرضاع بس زياد مايعتبره هالشي ويحسه مجرد ولد خالة عيال عمكم واللي تسوينه وتآخذينه منه لايمكن زياد يقبل به مهما كان لأن حضرته يهديك ويرسل في الطالعة والنازلة اونتي ساكتة وتستقبلين منه من دون اعتراض ..!؟
سكتت ندى وسكتت معها لمياء اللي كانت مآخذتها في حضنها وتمسح على شعرها ..
خلاص الفاس طاح في الراس وزياد عرف كل شي .. يعني الحين مو وقت عتاب وملامة ..
رجعت لمياء والتفتت لندى :: عرف انهم من عند طلال ؟؟
هزت ندى كتوفها :: ما دري بس الكروت ماكان ينكتب عليها أسمه ..؟

أما عذا فكانت في عالم ثاني ....
معقولة زياد يكون بهالوحشية ؟؟؟؟ لهالدرجة عصب على اخته والموضوع قابل للنقاش والتفاهم ؟؟؟ ليه ماجلس معها وطلب منها تحاوره وتناقشه واستفهم منها عن اللي صار ؟؟؟ المستحيل انه يكون هو اللي ضربها ..
طاحت عينها على يد ندى اللي كانت علامات أصابع زياد واضحة مثل الشمس بلونها الأزرق الخفيف ...
ومن دون شعور وقفت ومشت لندى .. وقفت قدام وجهها ونزلت لمستواها .. مررت يدها على مكان أصابع زياد من دون شعور وتحت مرأى من لمياء وندى ..
عذا بنبرة رجاء ::/ أمانتك ندى قولي لي .. هو اللي سوى لك كذا ؟؟
حنت ندى على زياد وخافت لا تهتز صورته قدامها ::/ لا عذا مو منه صدقيني ؟
طالعتها عذا بنظرة تشكيك ::/ احلفي ؟؟
لفت ندى تطالع لمياء تبغاها تنقذها من هالمأزق لكن مالقت بد من انها تقول لها الحقيقة ..
ندى ::/ عذا لاتلومينه تراه كان معصب ؟؟
عذا بعصبية ::/ يعني حتى الجرح اللي بفمك بسببه هو ؟؟
ندى بنبرة تردد::/ نوعا ما .. مو كله بسببه ...

سكتت عذا و ما ردت على ندى .. كل اللي سوته انها هزت راسها ومشت من عندهم طالعة الدرج وتاركتهم وراها يطالعونها بنظرات تعجب ...

---------------------------------------------------------

صحت من نومها مفزوعة والعرق يتصبب من جبهتها ... زادت عليها الكوابيس هاليومين وهي عارفة ليش ... سمت بسم الله وتلفتت حولها علشان تتعرف على المكان اللي هي فيه ... تنهدت براحة لما تذكرت أنها أمس نامت مع عبير أختها بالغرفة ... شالت اللحاف عنها وقامت للحمام تتغسل وتصلي الظهر ...
أول مادخلت وطاحت عينها على صورتها بالمراية ... ماقدرت تتحمل تشوف شكلها وعيونها الذبلانة ... دمعت عينها وحاولت ما تطالع المراية كثير ... غسلت بشكل سريع وطلعت على طول فرشت سجادتها وبدت تصلي ...
أول ماخلصت رفعت يديها تدعي ربها من خاطرها أنه ينفس عليها كربتها ... و غصب عنها صاحت وهي تدعي ...
دخلت عليها عبير وشافتها على وضعها .. تركتها براحتها وجلست على طرف السرير تنتظرها تخلص ...
أريج وهي تقوم من مكانها ::/ تغديتوا والا بتفطرون ؟؟
عبير مبتسمة ::/ لا أمي مسوية غداء ...
لفت أريج سجادتها وراحت تصلح شعرها قدام التسريحة ... وهي ساكتة من دون ما تتكلم ...
عبير ::/ بتروحين اليوم للملكة ؟؟؟
أريج ::/ مادري ..ودي أروح وما ودي ؟؟؟
عبير مبتسمة ::/ حددي موقفك .. لأن على أساسه انا يتحدد موقفي ؟؟
لفت لها أريج وهي مكتفة يديها ::/ طيب لو رحت وش ألبس؟؟
قامت عبير ومشت للدولاب ::/ البسي فستانك الأورنجي ... بيطلع عليك حلو؟
أريج بنبرة تفكير ::/ ما تحسين موديله قديم ؟؟
عبير وهي فاتحة الدولاب ::/ اممم لا عادي ... يعني ماله فترة أنتي مفصلته ؟؟
أريج ::/ خلاص طلعيه علشان أكويه وأجهزه للبس ؟؟
ابتسمت لها عبير بحب ... حاسة ان فيها شي غريب والدليل أن أمس ما تركتها تنام من كثر ما تتحرك في السرير وتتنهد وتتأوه وهي نايمة ... خايفة عليها وماتدري وش صار لها ؟؟؟
طلعت أريج من الغرفة وجلست عبير تجهز أشغالها للحفلة بالليل .. اليوم زواج نهلة صديقة عمرها وأختها الروحية ...كان كل شي جاهز الفستان والإكسسوارات حتى المكياج حنان تكفلت ترسل لها كوافيرة علشان تصلحها ...
طلت أريج براسها مع فتحة الباب ::/ عبير ترى نواف هو اللي راح يوديني أنا وأمي ؟؟
نقزت عبير من مكانها لأن أريج فاجأتها ... ومن سمعت اسم نواف حست بقلبها ينغزها وكأن الفراشات النايمة ببطنها بدت تطير من جديد ..
عبير ::/ قلتوا له ؟؟
أريج ::/ بقول لأمي تتصل عليهم الحين .. أو أنا بقول لإيمان ؟؟
ابتسمت عبير ::/ خلاص براحتكم ..
أريج باستفهام وفي عيونها نظرة غريبة ::/وانتي من راح يوصلك للقاعة ؟؟
تلعثمت عبير ::/ أنا محلولة بشوف لي أحد يمرني من البنات لا تشيلين هم ..؟
أريج بنبرة استهزاء ::/ أكيد أي وحده من البنات ؟؟
عبير بعصبية ::/ أريج ....!!اطلعي وخذي الباب معك ...
هزت أريج كتوفها بعدم مبالاة وطلعت وسكرت الباب وراها .. وخلت عبير غرقانة في دوامة تفكيرها وفي الصورة اللي تشكلت في مخيلة أختها عنها ...
--------------------------------------------------------------------------

في الليل وبعد صلاة المغرب كان الكل يشتغل على قدم وساق في بيت ام عبدالله ...
كل وحدة من البنات مشغولة بنفسها .. اللي تصلح شعرها واللي تضبط فستانها ... كانوا فرحانين من اعماق قلبهم لأخوهم ... مو مصدقين أن عبادي بيتزوج وبتصير عندهم مرت أخو ؟؟؟ وأكثر فرحتهم أنهم بيكونون عمات وخالات في نفس الوقت ...
أول من خلص منهم أم عبدالله ... كانت لابسة جلابية مطرزة فخمة .. ومسوية شعرها بشكل ناعم ومكياجها كان خفيف ومو متكلف ... بنظرة عامة شكلها متناسق مع عمرها وجسمها النحيل ...
نزلت تحت للصالة وكان ابو عبدالله وأسامة وحتى المعرس جالسين فيها يطالعون التلفزيون وينتظرون العشاء يأذن علشان يصلون وعقب يروحون للناس ويملكون ..
أسامة وهو يطالع امه ::/ وااااااااااااااااااااااو .. احلى يالحركات ؟؟ والله ماتوقعتك حلوة لهالدرجة يمه ؟؟
أبو عبدالله بنبرة حب::/ أمك طول عمرها حلوة بمكياج والا بدون مكياج ؟؟
عبدالله وهو يطالع أسامة ::/ يا ويلك تسب فيها والأخ روميو موجود ؟؟؟
جلست ام عبدالله معهم بالصالة بدون ما تعلق .. لأنها في الأساس مستحية وحمرة الخجل واضحة على وجهها ..
أسامة ::/ عاد وش دعوى عطينا نظرة على الأقل ؟؟
ام عبدالله ::/ أسامة فكني من شرك ؟؟
قام أسامة وجلس جنبها ::/ اللله .. يا زينها ريحة عطرك ؟؟؟
ام عبدالله وهي مستحية ::/ اللي يسمعك يقول ماعمرك شميتها هالريحة ؟؟
ابتسم أسامة لأمه وحبها على رأسها ::/ والله أخاف لا يحسبونك انتي العروس وتخطفين الأضواء من ريم ..؟
ابو عبدالله يضحك ::/ لاتقول هالكلام عند عبدالله لا يذبحك ؟؟
عبدالله بنبرة حنان ::/ لا أنا أذبحه في الكذب ،، لكن في الصدق ما أقدر عليه ؟؟؟ وأمي اليوم سارقة الأضواء وكأنها هي العروس ؟؟
ابو عبدالله بغيرة ::/ قومي الجوهرة وامسحي هاللي انتي حاطته ؟؟
ام عبدالله منصدمة ::/ ليش ؟؟؟
ابوعبدالله ::/ بس أخاف يخطبونك قصدي ينظلونك ؟؟
ام عبدالله بنظرة جانبية وشبه ابتسامة ::/ لا لاتخاف قريت المعوذات ..
أسامة يضحك ::/ يا ربي منك يالغيار ... قل ماتبيها تصير أحلى وحده ؟؟
ابو عبدالله ::/ نشوفك وش بتسوي بـ أم العيال بكرة ؟؟
أسامة وهو ينفخ صدره ::/ هه ومن قال لك بخليها تحط مكياج أصلا ؟؟؟ علي الطلاق لو حطت شي ؟؟
ضربته ام عبدالله على صدره ::/ أيوه يا حمش .. خل عنك الحلوف اللي مالها طعم ؟
أذن عليهم العشاء وقاموا الشباب بيروحون للمسجد ،، لكن ابو عبدالله قصد أنه يتأخر شوي لأنه ما بعد قال اللي في قلبه ... ومايقدر ينتظر لحد مايرجعون في الليل ...
بعد ماطلعوا العيال من الصالة قام ابو عبدالله ومشى في طريقه لحد ما صار قريب منها ...
وبصوت حنون للجوهرة ::/ كل يوم تزيد حلاتك بعيوني ...
رفعت الجوهرة عينها له بخجل ::/ مشكور .. ويالله اطلع معهم لاتفضحنا ؟؟
ابو عبدالله يضحك ::/ والله لو يشكنا أسامة أن مايخلينا ..؟؟
ضحكت ام عبدالله ::/ مادمت عارف يالله الحقهم قبل لايجي ...
ابتسم ابو عبدالله ونزل حبها على راسها ومشى يكمل طريقه ... غمضت الجوهرة عيونها بحب .. هذا هو محمد وهذا اللي تعرفه عنه ...
.
.
.
.
.
بعد ماخلصوا الصلاة كان الكل جاهز علشان ينطلقون ... دخلوا العيال بعد ما رجعوا من المسجد للصالة وشافوا اخواتهم وأمهم جالسين ينتظرونهم ...
أسامة مبتسم ::/ أحلى عليهم الكشيخات .. بس عاد مستحيل أوديكم قبل لا تشيلون العبايات .. خلوني أشوف كشختكم ؟؟
لمياء من دون نفس ::/ أسامة لاتزيدها ... خلنا نطلع قبل لا أسوي لك شي تندم عليه ؟
ابو عبدالله باستفهام ::/ وش فيك معصبة ؟؟ الحين هذي نفسية وحده بتروح لملكة اخوها ؟؟
ردت عليه عذا مبتسمة :::/ متضايقة من شعرها ما ضبطت تسريحته ؟؟
عبدالله وهو يطالع لمياء من فوق لتحت ::/ الحين كل هذا وتقولين شكلك مو حلو ؟؟
لمياء مبتسمة ::/ مشكورين كلكم على رفع المعنويات .. بس انا مقتنعة أن شكلي مو حلو ؟؟
سارة ::/ أحسن تستاهلين هذي عقوبة مهند ... مخليته يروح مع أبوه وهو يصيح ؟؟
أسامة ::/ المهم خلونا نشوف ملابسكم ولا تكثرون الهرج علشان يمدينا نوصل هناك ..
شالوا البنات عباياتهم لأخوانهم وأبوهم اللي انبهروا وشجعوهم بكلمتين .. وبعدها طلعوا كلهم للسيارات بيتوجهون لمقر الحفلة اللي هو بيت أهل الريم ..
-----------------------------------------------------------------------------
في مقر الحفلة كان كل شي خالص وقائم على أتم مايكون ... البوفيه المفتوح جاهز وخالص في ساحة البيت الخارجية .. الأنوار كانت مغيرة الجو وقالبة الليل للنهار ..
كوشة العروس كانت أجمل كوشة ممكن يشوفونها الحاضرين .. مجهزة من أفضل الخامات وعند أفضل المصممين .. أكيد هذي هي بنتهم آخر العنقود .. لازم يسوون لها كذا وأكثر ...
بدأ المعازيم يوصولون لبيت ام راشد وهي وأختها ام مشاري وبنتها العنود واخوات زوجها الثنتين كانوا في الإستقبال ...
أما العروس ريم وسحر ومعهم ندى كانوا جالسين في الجناح الخاص بريم في الدور الثاني ... كانوا يشجعونها ويدعمونها معنوياً .. هي خالصة من تجهيز نفسها وحتى الفستان لابسته .. بس كانت تنتظرهم يوصلون ويكتب الشيخ العقد وبعدها تنزف تحت علشان يدخل عليها عبدالله ويلبسها الشبكة ... وهذا هو الشي اللي كانت خايفة منه ومو قادرة تتصوره ؟؟
ندى كانت جالسة على الكنب اللي بزاوية الغرفة والهم راكبها من دخلت .. ومن شافت صور طلال اللي بالصالة .. وصورته الكبيرة اللي مصورها يوم تخرجه معلقه على جدار الصالة العلوية وهي خلاص الدنيا ضاقت فيها وحست انها مو قادرة ترد نفسها وكأن عظم واقف عند مدخل رئتها واللي زاد مأساتها هو موقف زياد منها ,, لكن وش تسوي حاولت تتماسك علشان عمتها وولد عمتها اللي بمثابة أخوها ...
سحر بصوت عالي ::/ يا ندى ياحلوة .. جوالك مات وهو يرن ؟؟
ابتسمت ندى ::/ صدق ...؟؟ ماسمعته .
قامت ندى لشنطتها وطالعت جوالها وشافت عمتها متصلين عليها ؟؟ ابتسمت ورجعت تطالع ريم ..
ندى ::/ جاك الموت ياتارك الصلاة .. هذولا عمتي متصلين شكلهم وصلوا ؟؟
ريم وبدت ترتجف ::/ كـــــــــــــــذابـــة ..
ابتسمت ندى ::/ عاد هذا هو اللي صار ... يالله تجهزي .. انا بنزل اسلم عليهم تحت ..
تنهدت ندى وخذت طرحتها وطلعت من الغرفة نازلة تحت ..
استغلت ريم الفرصة وعلى طول التفتت لسحر ..
ريم ::/ الحين فهميني وش السالفة ؟؟؟ من متى أخوك المحترم خاطب ندى ؟؟
تنهدت سحر ::/ اسكتي الله يخليك لاتذكريني بالسالفة ؟؟ أصلا احنا ماعرفنا بهالشي إلا لما قال لنا ابوي ؟؟
نزلت ريم راسها ::/ كنت متوقعة أنكم ماتعرفون ...! لكن طلال لما رجع كان معصب و مايشوف اللي قدامه .. كان شايل عليكم في خاطره بالمرة ... وخصوصا انتي ؟؟
سكتت سحر شوي وبعدين ردت ::/ كسروا خاطري والله هو وندى ... الحين هو مو مشكلة انا بعتذر منه وافهمه .. لكن المشكلة الأكبر انه هو و ندى خلاص مستحيل يصيرون لبعض ..؟
ابتسمت ريم ::/ آخر شي كنت اتوقعه ان ندى وطلال مايتزوجون ؟
سحر ::/ كل شي بهالدنيا جايز ... حتى حالة ندى ماكنت متوقعتها ؟؟؟ شوفيها الى الحين مو قادرة تتأقلم ،، مع أنها قبل توضح لنا أنها ماتهتم له كثير ؟؟
ريم ::/ حرام عليك .. يكفي أنه يبان بعيونها الحب لما نطري اسمه ؟؟؟
سحر بنبرة حزن::/ تصدقين ....!! هذاك اليوم اللي انرفض فيه طلال . توقعت يصير شي بعقلها لكن ربي ستر .
ريم وهي قايمة متوجهه للشباك ::/ الله لايلومها يا سحر... أتخيل لو أنا ينفصل عني عبادي ؟؟
ضحكت سحر من قلبها ::/ ههههههههههههههههههههههه من الحين حبيته وصرتي تسمينه عبادي ؟؟ لا وتخافين من فراقه بعد ؟؟
انحرجت ريم من زلة لسانها ::/ سحــــــــــر ... يالله عاد لاتحرجيني ..؟؟
ابتسمت سحر ::/ قولي لي الصدق عاد ؟؟؟ حبيتيه؟؟
ريم وهي مستحية ::/ امممم تصدقين سحورة ... !والله حبيته من شفته هذاك اليوم بعد الخطبة ومن قالوا لي انه خلاص بيصير زوجي وانا احس روحي تعلقت فيه ؟؟ كذا مادري وشلون سبحان الله ..
ابتسمت سحر وقامت لها وحضنتها ::/ الله يديم عليكم المحبة و يوفقكم يارب ...
.
.
.
.
نزلت ندى للدور الأرضي وعلى طول طلعت للمجلس الخارجي علشان تشوف عمتها .. وأول مالمحت سارة راحت لهم وهي مبتسمة ...
ندى ::/ هلا والله بأهل المعرس .. تو مانور البيت ..
ام عبدالله ::/ بوجودكم حبيبتي ..
سلمت ندى على عمتها وحبتها على راسها ::/ مبروك عمه الله يوفقهم يارب ..
ام عبدالله ::/ آمين الله يسمع منك وعقبالكم ...
حاولت ندى تتجاهل كلمة عمتها الأخيرة اللي ركزت عليها وكأنها بتقول لها ان الحياة ماوقفت على رفض زياد لطلال وان العجلة لازم بتمشي ..
لفت للبنات وسلمت عليهم وحده وحده ... وبعدها جلست جنب عذا ..
عقبت لمياء ::/ فستانك روعة يا ندى ..
ابتسمت ندى ::/ تسلمين يا بعدهم عيونك الحلوة ...
سكتوا شوي .. وبعدين لفت ندى على عذا اللي جالسة جنبها وهمست بأذنها ..
ندى ::/ وش رايك تملكون انتم بعد الحين مرة وحدة قبل لايصير لكم شي مثل اللي صار لي ؟؟
سكتت عذا لما حست بنبرة الحزن في صوت ندى وبعدين لفت لها ::/ ندوش لو لي نصيب مع اخوك بآخذه .. ولو نصيبي معه زيك انتي وطلال فمن المستحيلات اني بآخذه حتى لوقررنا نملك الحين ..
نطت لهم سارة اللي قدرت تسمع كلامهم ::/ يعني ممكن يموت الشيخ إذا جاء دور زياد وعذا وبكذا ماراح يملكون !!
ضحكت ندى وضربتها على كتفها ::/ لاتفاولين على الرجال .. الله يخليه لعياله ..
سارة ::/بس عاد خلي عنك الخرابيط و قولي لي مو عذا اليوم شكلها روعة ؟؟
ابتسمت ندى ::/ عذا برائتها تحليها ..؟
نزلت عذا راسها تبتسم ::/ مشكورة ندى بس خلاص لاتحرجيني ؟؟
نطت سارة ::/ يعني هي أحلى من سحر بنت عمك ؟؟
استغربت ندى ::/ والحين من جاب سيرة سحر ؟؟
بلعت عذا ريقها وأشرت لسارة تسكت ::/ لا بس كنت أقول لها ان سحر بنت عمك ماشاء الله حلوة وهي تقول اننا احلى منها ؟؟
ابتسمت ندى لسارة ::/ والله من الغيرة اللي فيك ..؟
----------------------------------------------------------------------------
نزلت أريج تركض من الدرج وعبايتها في يدها وتحوس في شنطتها علشان تدخل الجوال فيها ... مشت على طول للصالة ولقت امها وعبير جالسين ..
أريج وهي تلهث ::/يالله يمه خلصتي ؟؟
ام راكان ::/ شوي شوي على عمرك لايوقف نفسك ؟؟؟ إيه خلصت وانتي ؟
أريج وهي تلبس عبايتها ::/ زين يالله نواف عند الباب ..
قامت ام راكان تلبس عبايتها علشان يطلعون ... لكنها لفت على عبير اللي تحوس بجوالها .. تأملتها لبرهة وابتسمت حزن على هالبنت الوردة اللي حملوها مسؤولية فوق طاقتها ...
أم راكان ::/ عبير متى بتطلعين انتي ؟؟
عبير ::/ مادري يمه يمكن بعد شوي ؟؟
أم راكان ::/ بتتأخرين في الليل ؟؟
عبير بتفكير ::/ مادري يمه لكن الأكيد اني بحضر الزفة وبسلم عليها وبجلس لحد ماتروح ؟؟ عاد متى هي بتنزف ومتى بتطلع مادري ؟؟
أم راكان مبتسمة ::/طيب حاولي ما تتأخرين في الليل وترجعين مبكرة ... زين ؟
ابتسمت عبير لأمها وهزت رأسها بالإيجاب ...
طالعتها أريج بنظرة تصغير انقهرت منها عبير وبعدها مشت مع أمها طالعين لنواف اللي صار عند الباب له ساعة ...
ركبوا أريج وام راكان السيارة .. ونواف احتارت نظرته بينهم وبين الباب ؟؟ وشلون سكروا الباب ؟؟يعني عبير ماراح تجي و بتجلس بروحها في البيت ؟؟؟ ياسلام عليهم يعني يقولون لها العبي بذيلك مادام مافيه أحد ؟؟؟ وبعدين ليش أرسلوا أنوار ونورة لبيتنا ؟؟ كان تركوهم معها على الأقل يمسكون على يدها شوي وماتقدر تسوي شي ؟؟
قطعت عليه ام راكان ::/ كيف حالك نواف ؟؟وش أخبارك ؟؟
انتبه نواف وابتسم ::/ بخير الله يسلمك .. انتي بشريني عن صحتك ؟؟
ام راكان بتعب::/ الحمدلله على كل حال ؟؟
حاول نواف يلقى الفرصة المناسبة واستغلها ::/ خلاص هذا انتم اللي بتروحون ؟؟ والا باقي؟
ردت عليه أريج::/ ايه خلصنا ..
ام راكان ::/ بقت عبير وبتروح لزواج صديقتها ..
نواف بتشكيك ::/ ومن صديقتها هذي ؟؟ ومن بيوديها ؟؟
أريج :/ بتمرها وحده من البنات وبتروح معها ؟؟
نواف بقهر ::/ لاو الله .. على كيفها هو ؟؟وليش ماقالت لي أنا أوديها ؟؟
استغربت ام راكان اسلوب نواف الدفش تجاه عبير ::/ عادي يمه ماحبينا نكلف عليك ونخليك تتمشور في شوارع الرياض .. وصديقتها رايحة رايحة للزواج قالت لها تمرها
تنهد نواف بعصبية وكأنه فهم اللي تبي تسويه عبير من وراء أمها واختها .. واستغفر بصوت مسموع ...
مشى نواف متوجه لبيت الريم وكانت أريج هي اللي توصف له .. بس هو طول الطريق وباله مو معه ؟؟ يفكر باللي ممكن قاعد يصير عند بيت عمه ؟؟ تخيل الوضع اللي ممكن تكون عليه عبير وهي في السيارة ؟؟أول مابدت هالأفكار تغزيه حس بقلبه شاب ضو ...ماصدق خبر يوصلهم وينزلون إلا وهو شاخط بالسيارة ومطلع جواله واتصل عليها بدون شعور .. ...
أول ماشافت عبير رقمه وهي بتطلع استغربت اتصاله ؟؟ وعلى طول ردت عليه خافت لايكون صار لهم شي ..
عبير بصوت خايف ::/ مرحبا ؟؟
نواف وهو مايشوف قدامه ::/ السلام عليكم ..
عبير ::/ هلا نواف وعليكم السلام ..
حس نواف بقلبه يتقطع من قالت اسمه بصوتها الناعم ::/ طلعتي والا بعدك ؟؟
عبير وهي مبتسمة براحة::/ ايه الحين بطلع ..
نواف ::/ وين بتروحين ؟؟
عبير مستغربة::/ زواج صديقتي ؟؟
نواف::/من هي بنته ؟؟ وفي أي قاعة ؟؟
عصبت عبير عليه ::/ وانت ليه تسأل ؟؟
نواف واعصابه فلتانة ::/ وانتي ليه ماتبغين تجاوبين ؟؟
تعوذت عبير من الشيطان لما حسته معصب ::/ مو مسألة ما ابي أجاوب لكن ماتعودت أحد يحقق معي بهالصورة وكأني في مخفر شرطة ؟؟
نواف باستهزاء::/ موهذا اللي خلاك توصلين مواصليك ؟؟ أنك ماعمرك حسيتي بأنك في مخفر شرطة؟؟
عبير باستفهام ومستغربة ::/وش تقصد ؟؟
نواف::/ ما اقصد شي .. بس متى بترجعين للبيت ؟؟ ومن بيرجعك ؟؟
عند هالسؤال فقدت عبير قدرتها على التحكم في اعصابها .. أول شي كلامه الماصخ اللي قاله من شوي واللي ماله طعم .. وسؤاله الأخير ونبرة صوته وهو يسألها جرحتها وحسستها أنها وحده وسخة وحده ماتربت ولا هي أهل للثقة ..
وانفجرت عليه ::/ اسمعني زين نواف ... انت ماتدخل في أمورنا الخاصة مهما كانت .. أنت تخدمنا بعيونك ويعطيك ألف عافية على اللي تسويه واللي سويته ... لكن انك تجي تحقق معي وين رايحة ووين جاية .. فأحب أقولك أنت مالك أي وجه حق .. امي وعارفة أني بطلع .. وهي اللي اعتبرها مسؤولة مباشرة عني ...
عصب عليها نواف ومن طريقتها وقاطعها ::/ وهذا اللي ضيعكم أنها هي اللي مسؤولة عنكم ...؟ وما وراكم رجال ؟؟
شهقت عبير من الصدمة وما قدرت تتمالك نفسه ::/.. الحين انت مكلمني علشان تسمني بهالكلام ؟؟؟؟؟؟ وتقول عن أمي هالألفاظ ؟؟؟
تعوذ نواف من الشيطان ::/ عبير .. اسمعيني أنا آسف ماكان قـ ـ ـ ـ
قاطعته عبير وصوت شهقاتها تسبقها ::/وقـ ـ ـ ح ...
سكرت عنه السماعة ورمت نفسها على الكرسي ... ونزلت دمعاتها غصب عنها من كلامه القوي الجارح ؟؟؟ هزتها كلماته وضربتها في الصميم ..خلتها تندم على اللي سوته واللي قاعده تسويه للحين ......!! قبل لاتتخذ أي قرار رن جوالها وأول ما سمعته وقفت على حيلها وحاولت تمسح دموعه وتصلح مكياجها اللي اخترب .. ولبست عبايتها وطلعت ....
------------------------------------------------------------------------------
دخلت أريج وأمها البيت وكانت منحرجة ومتفشلة بقوة .. لأنها ماتعرف أحد أبد ..
مشت هي وأمها ودخلوا للمجلس واستقبلتهم ام مشاري اللي تعرفت على أريج وامها...
ندى كانت جالسة مع عمتها والبنات .. وأول مالمحت أريج واصلة ابتسمت من خاطرها لهالبنت اللي ترتاح لها أكثر وحده بعد سحر والتفتت لعمتها على طول ..
ندى ::/ عمه عن أذنك هذي أريج وصلت بروح استقبلهم ..
ام عبدالله ::/ اذنك معك حبيبتي ..
مشت ندى لكن رجعت فجأة مرة ثانية ::/ ايه عمه ترى بجيب خالتي ام راكان تجلس معك زين ؟
ابتسمت لها عمتها وهزت راسها انه عادي ومافيها شي ..
مشت ندى متوجهه لأريج وأمها اللي كانوا واقفين في اول المجلس ... انتبهت أريج عليها وافتشلت أكثر من شكلها لما شافت ندى مقبلة عليهم بفستانها الأحمر الحرير وحلقات الأذن الألماس والياقوت اللي كانت لابستها ... لكن خنقتها العبرة وحست بالدموع تتزاحم عند عينها لما تذكرت اللي صار لها وانها انفصلت عن طلال اللي كانت تهاذي به عندها دائما ...
حاولت تمسك نفسها ولاتصيح .. وتقدمت هي وأمها يمشون علشان يتقابلون مع ندى ..
وصلتهم ندى وهي مبتسمة ::/ هلا والله ... واخيرا جيتوا مابغيتوا توصلون ..
ام راكان :/ وش نسوي بالزحمات وانا خالتك ...
قربت ندى لأم راكان و حبتها على راسها ::/ هلا والله خالة وش اخبارك .؟
ام راكان ::/ الحمدلله بخير ونعمة ... انت وش اخبارك (( وطالعتها بنظرتها الحنونة المعتادة ))
تنهدت ندى ورجعت تبتسم من ورى خاطرها ::/ نحمد الله ..
نطت عليهم أريج ::/ يا اختي عبريني سلمي علي على الأقل ..
لفت لها ندى وخذتها في حضنها ::/ ياربي عليهم اللي يغارون من أمهم .. طيب اصبري لحد مانسلم على خالتنا أولى منك ..
ضربتها أريج على كتفها ::/ وش اخبارك بس يالدوبا ..
ابتسمت ندى وهي تطالع عمرها من تحت لفوق ::/ هذا احنا عايشين ...
ابتسمت لها أريج تخفف عنها وقرصتها مع يدها ..
التفتت ندى على ام راكان وسفهت أريج ::/ خالة تعالي أوديك عند عمتي والبنات ..
أريج ::/ احلى يا ام ركان بتجلسين مع اهل المعرس ..
ابتسمت ام راكان وهي تمشي مع ندى ::/ الله يوفقهم ويسعدهم ..
مشت ندى وهي ماسكة يد أم راكان لحد ما وصلوا لمكان عمتها سلموا البنات على بعض وجلست ام راكان جنب ام عبدالله وخذتهم السوالف ...
اما اريج فلفت على ندى ::/ ندى ماودك توديني لريم ؟؟ تراها قايلة أول ما أوصل أطلع لها
ابتسمت ندى وهي توقف ::/ طيب قومي نروح ..
طالعتهم سارة بقهر ::/ ودي أروح معكم ..
ندى وهي تغايضها ::/ مافيه اجلسي هنا لحد مايزفونها لكم ...
طلعت سارة لسانها في وجه ندى .. وسفهتها الأخيرة تغايضها وخذت يد أريج علشان تقهر سارة أكثر ..
صرخت عليها سارة من القهر::/ تشوفين إذا مالحقتكم ؟؟؟
ما ردت عليها ندى ومشت مع أريج طالعين لغرفة ريم ..

.
.
.
.
....................../ الله عليكم .. الحين من العروس فيكم ؟؟ (( وطالعت في الثلاث كلهم ))
ضحكوا كلهم عليها .. وردت سحر تنكت ::/ انتي من دون منافس ..
ابتسمت أريج بحالمية ::/ ياليته صدق ... وانا عروس والبس فستان العرس .. ويجي الفارس الملثم ويشيلني بين ذراعيه ـ ـ ـ
قاطعتها ندى ::/ هيه هيه انتي .. وقفي خيالاتك شوي ... وباركي للبنت
ابتسمت اريج ::/ اي والله نسيت ابارك لك ريمو ..
و قربت منها وسلمت عليها ::/ ألف مبروك ياحلوة .. منك المال ومنه العيال ؟؟
ندى::/ لو سمحتي العكس ..
اريج باصرار ::/ لا ... هي منها المال لأنها ماعليها قصور وهو عليه العيال ؟؟ بعد مو عدل ان كل شي يصير عليها هي بس ..
ضحكت عليها ريم ::/ وش رايك نخليها المال والعيال كلهم عليه هو ؟؟
سكتت أريج وكأنها تفكر ::/ كلام منطقي ... وانتي ماعليك الا تتمشين وترفهين عن نفسك ؟؟
سحر ::/ ايه والله حركة .. وهو خليه يكرف في البيت ويروح الدوام ويجيب لكم العيال ويربيهم وكل شي ..
أريج ::/ ايه واذا شفتيه قصر في شي ماعليك الا تجيبين هذيك العصا وتخلينها تسوي علامات على ظهره ... وان ماقدرتي عليه بروحك اتصلي علينا نجي نساعدك ..
ريم وهي تضحك ::/ ايوه يا سلاحف النينجا ..
قاطعتهم ندى وهي تصرخ ::/ هي انتي واياها ترى ما اسمح لكم هذا عبدالله .. وانتي يالغبية (( تطالع ريم )) تاركتهم يتكلمون عنه بهالطريقة و ساكتة ؟؟
سوت ريم نفسها مكتأبة وانه ضاق صدرها ::/ الله يقلع بليسكم بنات خليتوني اغتابه ويآخذ حسناتي ؟؟
ضربتها ندى على كتفها ::/ بس هذا اللي همك ... لكن شي اسمه رومانسية ماتعرفين ؟؟
ضحكت ريم ::/ هههههههههه ارجوك ترى هالمصطلح انا متبرية منه ليوم الدين ..
ندى ::/ عاد انتبهي لنفسك ترى ولد عمتي هذا بزيادة رومانسي وحساس وخجول ,, فانتبهي لتعاملك معه ؟؟
سكتت ريم وماردت عليه لأنها فعلا حست بالخجل يسيطر عليها ... وعلاماته بانت على خدودها من انذكر اسمه..
بدوا البنات يسولفون في مواضيع عامة وينتظرون هالدفتر يجي علشان توقع عليه ويزفونها ويرتاحون ...
بعد دقائق سمعوا دق خفيف على الباب ...
نقزت ندى ::/ احلف لكم انها سارة ؟؟
ريم باستفهام ::/ من سارة ؟؟
ندى بقل صبر ::/ من غيرها بنت عمتي ؟
شهقت ريم ::/ لا لا تقولين ... وش بيطلعها ؟؟
سحر ::/ لا ندى ماتوصل لهالدرجة انها تطلع فوق من دون مايكون أحد معها ...
سكتت ندى وكأنها اقتنعت ... وقامت سحر تشوف من عند الباب ...
سحر تستهبل ::/ من الطارق ..؟
طلال يستهبل ::/ انا اللص السارق ؟؟
كملت سحر ::/ الا تخجل من نفسك يا فاسق ؟؟
ضحك عليها طلال ::/ افتحي الباب الله يخليك ..
ضحكت سحر وفتحت له الباب .. وشافت في يده الدفتر ... وعلى طول التفتت لهم ..
سحر ::/ كلولولولولوش .. ابشركم جاء الفرج ... والدفتر هذا هو وصل .. يالله تغطوا علشان يزفه اخونا الكريم ..
ضحكوا البنات كلهم الا هي ... صوته الرجولي العميق قلب عليها المواجع .. ورجع لها الغصة اللي بحلقها ... ليه مااختار الا هالوقت اللي بتنزف فيه ريم علشان يخليني اشوفه واسمع صوته ...؟
دخل طلال وهو منزل عيونه والدفتر بيده .. وأريج وندى تغطوا وجلسوا في زاوية الغرفة بعيدين شوي ..
مد طلال الدفتر لريم اخته ينتظرها توقع .. لكن ريم رفعت راسها له والدمعة تأذن بالنزول ::/ لازم اوقع طلال ؟؟
ابتسم لها بحنان قطع قلب ندى اللي تطالعه من وراء الحجاب ::/ هذي حال الدنيا وانا اخوك... لكن وقعي وما جاك علي ..
تنفست ريم بعمق وضربات قلبها زادت والعرق ملى يدها .. وقربت للدفتر وعطاها طلال القلم ... وأخيرا وقعت ...
وصارت في هالساعة وهالدقيقة وهاللحظة حرم عبدالله بن محمد ... لكن هل ياترى بتتوفق وبتقدر هي واياه يكونون اسرة ؟؟ والا ممكن كل شي ينهد وما تصير فيه عائلة وهالتوقيع يلتغي بورقة او ظرف من ظروف الدنيا ؟؟
زغرطت سحر ::/ كلووووووووووووووووووووووووولووووووش
وتقدمت وحضنت ريم وبدت تبوسها ::/ مبروك ألف ألف مبروك يالغالية ..
حضنتها ريم ::/ الله يبارك فيك وعقبالك ..
والتفتت على البنات وبحركة مضحكة ::/ عقباااااااااااااااالكم كلكم واحضر ملكاتكم كلكم .. وياويلكم لو ماعزمتوني ؟؟
ضحكوا عليها الجميع .. وتقرب منها طلال ::/ واخوك ماله عقبالك ؟؟
انصدمت سحر لما سمعته وزادت غصتها على ندى بنت عمها .. تخيلت لو انها سمعت هالكلمة اللي قالها بهمس في أذن ريم .. وما قدرت تتوقع وش ممكن يصير ؟؟
حضنت ريم طلال وهو لف يديه عليها ..
ريم ::/ عقبالك يالغالي .. وارقص ان شاء الله في عرسك ..
ضحك طلال ::/ انتي وبنتك ..
استحت ريم وبعدت شوي عن اخوها ... قرب لها طلال وحبها مع جبهتها ومشى طالع من الغرفة ... والألم والحسرة يملون قلبه ..لكن مكابرته ورجولته اللي يحس انها ممكن تنقص خلته ما يوضح اي شي او اي تعبير على ملامحه واكتفي انه يختزن هالحزن في قلبه هو وبس ... لأن في اعتقاده ان هي اللي اختارت ... ومو من حقه يعترض عليها ولا من حقها تشوف تأثير انفصالها عنه ...!!
أكيد انها وحده من المتغطين ... مو أكيد الا هي ندى اللي جالسة على اليسار ...
الله يالدنيا .. كان المفروض نكون انا وانتي معهم اليوم وينعقد قراننا .. لكن يالله انتي اخترتي مشاري يكون زوجك .. والله يوفقك ... ويوفقني بعدك ...؟
--------------------------------------------------------------------------
و على ألحان هادية .. وأضواء خافتة ... دخلت ريم للمجلس الكبير المخصص لمثل هالمناسبات ... كان شكلها في الفستان والتسريحة والمكياج الترابي ... فوق الوصف ..
يعني كانت بالفعل عروس ونعم الإختيار ...
من شافتها ام عبدالله وانبهرت بشكلها بدت تقرأ عليها المعوذات وتسمي عليها وتدعي ربها يحرسها ويوفق ولدها معها ...
مشت ريم بخطوات بطيئة ... والأنظار كلها مسلطة عليها .. كانت خايفة في قلبها وأطرافها ترتجف لكن مشيتها الملكية ... ونظرتها الواثقة أخفت هالإرتباك اللي تحس فيه ...
ابتسمت لمياء من فرحتها بأخوها وزوجته ... ودعت ربها أن مخبرها يكون مثل مظهرها جميل وبرئ ... أما ندى فخيالاتها ودتها لبعيد ... تخيلت نفسها لوكانت مكان ريم الحين ... وانها هي اللي تنزف لطلال .. اللي تحلم فيه من لما وعت على الدنيا وعرفت تميزه وتميز غيره ..
وصلت ريم للكوشة وطلعت عليها ... وكانت المصورة تلتقط لها بعض الصور وهي فوق الستيج ...
بعدها جلست ريم على الكرسي ورجعت الأنوار اشتغلت والموسيقى الهادية راحت وحل مكانها ألحان راقصة ...قامت ام عبدالله والبنات علشان يروحون يسلمون عليها ... طلعوا لها الستيج وقربت منها ام عبدالله بابتسامة حنونة ونظرات فرحانة..
ام عبدالله ::/ مبروك حبيبتي ... الله يوفقكم ويخليكم لبعض ..
استحت ريم وحبت ام عبدالله على راسها ::/ الله يسلمك يا خالة ..
تقدموا منها البنات وسلموا عليها كلهم ... انعجبت ريم في سارة وجرأتها معها وعذا وخجلها البنوتي البرئ ... ولمياء راعية التعليقات والسوالف اللي ماتنمل .. حمدت ربها ان هذي هي بتكون عائلتها الجديدة ... يعني أكيد أم عبدالله ماراح تحسسها بفقدان أمها .. والبنات بيملون عليها وقتها ... ويونسونها ..
نزل الجميع من الكوشة ومابقى الا ريم جالسة فيها ...
و بعد فترة من وصول الريم للمجلس ... تقربت منها امها وهي مبتسمة ... ونزلت لها شوي وهي تسمي عليها ..
ام راشد ::/ مستعدة حبيبتي ..؟؟ ترى عبدالله بيدخل الحين ..!!
شهقت ريم ويدها على فمها ::/ لا يمه تكفين مو الحين ؟؟
ربتت ام راشد على كتفها ::/ يعني متى تبين ؟؟ خلاص خلصوا متعشين ووقت الشبكة الحين ...
مسكت ريم في يد امها تتوسلها ::/ يمه خلك معي تكفين ..
ابتسمت لها امها ::/ أكيد حبيبتي ... بس بيدخل معه راشد وطلال ..
ريم ::/ وأبوي ؟؟
ام راشد ::/ و من يقعد عند الرجال ؟؟ اخوانك هم اللي يجون معه ويمكن بعد بس واحد مو الأثنين ..
نزلت ام راشد من عند بنتها وبعد دقائق دخل عبدالله مع الباب الرئيسي ومعه راشد اخوها .. أول ماشافتهم ريم انتفضت وبغت تطيح مغمى عليها ... مو قادرة تستوعب الفكرة انه يدخل عليها وهي مامعها احد ,,,
انتبهت ام عبدالله لريم وشافت لونها انخطف .. رحمتها وطلعت الستيج كونها كانت قريبة منها ومسكت يد الريم وساعدتها توقف ..
شكرتها الريم في خاطرها لأنها فعلا أنقذت الموقف ... ووقفت وهي مستنده على يد ام عبدالله ...
وصل عبدالله للستيج والإحراج باين في عيونه واخواته يضحكون عليه ... طلع للكوشة وتقدم من الريم وسلم عليها ...
مدت ريم يدها المرتجفة وهي ماتدري وشلون تصافحه .. حتى هو ضاعت علومه ومايدري وش يسوي ؟؟
ابتسمت لهم ام عبدالله وسندت يد ريم وشجعتها تمد يدها ... سلموا على بعض وسلم راشد على أخته وبارك لها وبعدها نزل وطلع ...
قربت ام عبدالله لولدها وحضنته وهي تبارك له ...
ام عبدالله وعيونها تدمع::/ ألف مبروك حبيبي ... منك المال ومنها العيال ..
ابتسم عبدالله وهو يحب راس امه ::/ الله يطولي بعمرك يالغالية وتشوفين عيال عيالي .
طلعوا سارة ولمياء وعذا يباركون له ... ولما وصل الدور لعذا كانت واقفه في مكانها ودموعها أربع اربع على خدودها ومو قادرة تمسك نفسها ولا قادرة تتحرك من مكانها علشان تسلم عليه ...
ابتسم لها عبدالله ومد يده علشان تجي .. مومعقولة بتتسمر في مكانها بهالصورة..!
ماصدقت عذا شافت يده الا ورمت نفسها عليه وهي تصيح ... انحرج عبدالله وحاول انه مايحسسها بالإحراج مسح على شعرها وبعدها عنه ..
عبدالله ::/ ماله داعي كل هالصياح ؟؟ ترى انا مابهاجر ؟؟
ابتسمت عذا وسط دموعها ونظرات ريم لها ::/ عارفة بس تذكرت سفرك ...
ابتسم عبدالله بحزن::/ مو اول مرة أسافر عذا ؟؟
ضربتها سارة ::/ اعوذ بالله منك .. الحين هذا وقت تتذكرين هالخبر اللي مثل وجهك ؟
ابتسمت عذا ورد عبدالله ::/ والله ان وجه عذا احلى من الخبر ... الا وانتي الصادقة مثل وجهك انتي ..
تخصرت سارة وهي تشهق ::/ حتى في احلك المواقف توقف معها ضدي ؟؟
سكتتهم ام عبدالله ::/ انت واياها ترى احنا مو بالبيت ترانا قدام الناس استحوا على وجوهكم ولا تتهاوشون ..
ابتسمت ريم من قلبها لماشافت علاقته باخواته وعلاقتهم فيه .. توسمت فيه الخير وحست انهم ممكن يتفاهمون مادام انه مرن بهالشكل ..
طلعت ام عبدالله علبة الشبكة ووقفت جنب عبدالله وبدت تساعده هي ولمياء علشان يلبسها الطقم ... واول ماخلصوا ولبسها الخاتم آخر شي ..
رفع يدها لفمه وحبها وعيونه تطالعها ..
عبدالله ::/ مبروك يالريم ..
استحت ريم من تصرفه وسحبت يدها على طول وهي مستحية ::/ الله يبارك فيك ...
استانست عذا من اللي سواه عبدالله .. لكن سارة ماعجبها الوضع ... وما استساغت الفكرة ولازم الا تعلق ..
سارة بقرف ::/ يعني لازم بوسة اليد هذي ..؟
ضربتها لمياء::/ سويرة ؟؟
ضحك عبدالله::/ نشوف الفارس المغوار بكرة وش يسوي بك ؟؟
سارة باستهزاء ::/ اتحداه يحاول يقرب مني ؟؟ هالدور تبيه يحب يدي .. مستحيل .
ابتسم لها عبدالله وهو يطالع الريم ... منبهر في البنت اللي قدامه ...
فجأة ومن خطبوها له حس بأنه يحبها وكأنه يعرفها من زمان ... واليوم لما شافها حس ان روحه تعلقت فيها ... وانه خلاص غرق في حبها وما احد بينقذه منه ...
اما ريم فمن شافته داخل ومقبل عليها بكشخته وهي خلاص تحس بعضلة قلبها مرهقة و ما عاد قادرة تتحرك .. صدق ان جسمه نحيف وبياضه خفيف ... لكنه جذاب .. وقدر يجذبها ويسيطر على مشاعرها ....
------------------------------------------------------------------------------
بعد مانتهوا العالم من احتفالهم .. وتضيفوا وتعشوا .. تفرق الجميع والساعة وقتها كان قريب من منتصف الليل ...
التفتت ام عبدالله على بناتها ::/يالله نمشي ؟؟
وقفت لمياء وعذا ::/ يالله حتى أسامة متصل يقول انه ينتظرنا ..
لفت لهم سارة اللي كانت تسولف مع ندى وأريج ::/ يمه خلونا نقعد شوي ..
ام عبدالله وهي تطالع الساعة ::/خلاص يمه ماعاد الا خير الوقت تأخر ولازم نمشي عيب عند الناس ...
تنهدت سارة من الطفش وابتسمت لها ندى ::/ سارونة أصلا حتى انا بطلع الحين وأريج اكيد الحين بتروح فلا تكتأبين ..
ضحكت سارة ::/ شكرا لأنكم فاهميني ..
قاموا البنات مع أمهم وسلموا على الريم وأمها وودعوهم .. وبعدها لبسوا عباياتهم وطلعوا وكانت معهم ندى اللي ينتظرها زياد برا البيت ..
لما طلعت ام عبدالله قابلها زياد عند الباب يسلم عليها ويبارك لها في الشارع .. وقفت ام عبدالله والبنات ومعهم أسامة ينتظرونه يخلص سلاماته ..
زياد وهو يحب راس عمته ::/ مبروك يا عمه ما سويتوا لعبدالله .. وعقبال هالدلخ اللي على يمينك ..
صرخ عليه اسامة ::/ أول دورك انت يالشايب وعقب يجي دور الدلوخ ...
ضحكت ام عبدالله ::/عقبالكم كلكم .. واشوف عيالكم اجمعين ...
تنهد زياد :/ آمين ان شاء الله ويارب يكون باب الإجابة مفتوح في هالليلة ..
ردت عليه لمياء مبتسمة::/كان تطنزت على عبدالله علشان تلحقك الطنزة وتخطب قريب ..
ابتسم زياد ::/ حتى لو ماتطنزت انا ان شاء الله خاطب خاطب ..
حبت سارة تبدد شكوكها ::/ ومن هي اللي انت مصر على خطبتها بهالشكل ..
امتقع لون وجه عذا من الصدمة ؟؟ كيف تجرأت سارة تسأل هالسؤال وهي موجودة ؟؟ وعلى طول مشت تركب السيارة من دون وعي منها وكأنها مسيرة ...
اما زياد فتلعثم وعيونه على عذا اللي مشت وتركتهم لكنه تدارك الموقف ::/ لا عاد هذي خليها مفاجئة لكم ... مثل ما فاجأكم عبدالله أنا بفاجئكم ...
سكتت سارة لما خزتها أمها بنظرة نارية ... والا هي كان ودها تتمادى معه علشان يوضح موقفه ؟؟ هو يبي عذا والا صرف نظر عنها ويبي سحر ..؟
بعد سلامهم توادع الجميع ومشوا البنات يركبون السيارة وندى راحت لسيارتهم .. لكن ام عبدالله قبل لاتمشي وقفت زياد ومسكته ...
ام عبدالله ::/ وش صار عليكم ؟؟ قلت لأختك ؟؟
تنهد زياد مبتسم ::/ لا ماقلت لها شي للحين ؟؟
ام عبدالله ::/ وش تنتظر ؟؟
زياد ::/ مشاري نفسه قايل لنا لانقول لها شي ... يخاف لاتحسب أني رفضت طلال لأنه هو خطبها وبعدين تكرهه زود وماتوافق عليه أو توافق وهي مغصوبة ..
تنهدت ام عبدالله ::/ الله يقدم اللي فيه الخير .. يالله تصبح على خير ..
ابتسم زياد ::/ وانتي من اهل الخير .. لكن لاتنسين ترى مشاري موصينا ما نقول لها شي ..
هزت ام عبدالله راسها بالإيجاب ومشت رايحة للسيارة ...
لف زياد وراح يركب هو بعد السيارة وفي قلبه فرحة ما يقدر يوصفها ,, وحماس مشتعل غير عن كل مرة .. لأن عبدالله صديق طفولته تملك اليوم .. وهذا الشي عطاه دافع زيادة انه يستعجل على عمره ويخطبها ويرتاح باقي عمره من هالشوق اللي ذبحه ..
ركب السيارة وانقلبت معالم وجهه 180 درجة وصارت جدية لأبعد الحدود ... عقب اللي صار وهو يتعامل مع ندى بكل رسمية وما يتكلم معها الا في الشي الضروري ...
وهذا ماجاء الا بعد ماقدرت ندى تقنعه بقصتها الوهمية اللي حفظتها لها لمياء ووصتها تقولها له علشان تبعد الشكوك عن نفسها ومايظن فيها زياد ظن السوء ... ولا يظن في طلال وتكبر السالفة ...
فراحت له ندى بعد الموقف ووضحت له ان الهدايا كانت توصلها من معجبات في المدرسة .. وشرحت له تفاهتهم وحقارة تفكيرهم بس انها كانت تأخذها منهم اتقاء لشرهم وتحتفظ بالحلو منهم والشين ترميه .. وحلفت ان الخاتم استلمته من سحر .. وهذا هو الواقع انها فعلا مستلمته من سحر مو من طلال ...
ولما استفسر عن الصور ... تلعثمت وانحاست لأنها ماكانت تعرف عن هالسالفة ولاعملت حسابها وماتدري عن هالشخص اللي فعلا اتصل على زياد وقال له هالأقاويل ..في نفسها خافت بس قدرت تتماسك وتثبت قدامه و اقسمت له انها ماتدري عن اللي يصير ... ولا تعرف شي عن هالشاب واللي يمكن يكون بنت من المعجبات بس هي صدتها وما عطتها وجه فحبت تنتقم منها؟؟ وقالت له لو هو صادق خله يرسل لك الصور ؟؟ أصلا انا ما اعطي صوري أحد أبد ... إلا المقربين واللي اثق فيهم ..! وان كنت مصر خله يرد عليك وتأكد انه شاب ؟؟؟؟
انطلت اللعبة على زياد .. لكن لازال شايل بخاطره عليها ويحس بالقلق من الإتصال والكلام اللي وصله ؟؟؟ مو سهلة عليه احد يتكلم في عرضه ؟؟؟... لكن مصيبته هانت لما عرف انها مو من النوع الخربان اللي يواعد شباب ... زعل عليها فترة لابأس فيها لأنه ماكان يدري عن اللي يصير من وراه وأنها أصلا كانت تقبل هدايا من ناس مثل هالأشكال ؟؟؟ وسمحت للناس انها تطلع عليها حكي ..؟
طالعته ندى أول ماركب وحست ان العبرة خانقتها .. ماتعودت هالمعاملة القاسية من زياد ... معودها انه يكون لها الصديق اللي تفضفض له وتسولف عليه بكل شي ...
وخصوصا انه معودها بعد كل حفلة فيها عذا لازم يسأل بشكل غير مباشر عنها ..
ندى مبتسمة ::/ اليوم الحفلة كانت روعة .. الله يوفقهم ..
زياد باقتضاب ::/ آمين ..
تفشلت ندى لكنها ما يئست ::/ عقبالك ..
سكت زياد ومارد عليها ..
هنا ندى حست بوجهها طاح من الفشيلة لكن مع ذلك ماوقفت ...
ندى ::/ بنات عمتي اليوم ماشاء الله ماعليهم كلام ...
ابتسم زياد ::/ طول عمرهم ماعليهم كلام (( وطالعها بنظرات غريبة ))
ماحبت ندى نظراته ... حست انه يقصد بكلامه شي ثاني ... ومن هنا ماقدرت تتحمل ونزلت دمعتها غصب عنها ... لكن مسحتها على طول .. ومارضت بهالهزيمة ..
ندى ::/ تصدق ... اليوم عذا طالعة حركة كأنها عروس لو انك عاقد عليها وزافينكم كان ريحتونا من حفلة ثانية ...
ابتسم زياد ومارد عليها ..
ندى وهي مستمرة ::/ على بالك ماقلت لها هالكلام قلت لها ولايفوتك شكلها ...
سكتت ندى وماكملت ... وكأنها قاصدتها ...
وفعلا زياد اشتعل قلبه نار ووده يعرف وش كان ردها .. لكن مكابرته ماخلته يسأل ..
وندى تنتظر ردة فعله لكن لاحياة لمن تنادي ... وعلشان تأدبه سكتت وماكملت سالفتها لحد ماوصلوا للبيت .. ونزلت وعلى وجهها ابتسامة نصر خصوصا لما شافت نظرات زياد المتلهفة ..
لفت ندى لزياد وهي تبتسم ::/ تصبح على خير .. وعقبال ملكتك ...
زياد ::/ وانتي من اهل الخير ..
وطلعت درج غرفتها .. اما زياد دخل غرفته وعلى طول انسدح على سريره حتى من دون ما يبدل تارك لنفسه العنان انه على الأقل يتخيل ليلة ملكته .........
-----------------------------------------------------------------------------

بعد أسبوع من هالأحداث ... العائلة كلها كانت في المطار تودع ولدها اللي جلس عندهم مايقارب الشهرين ... الفراق صعب ووداع شخص غالي عليك يعني انتزاع روحك ،، فكيف إذا كان هالشخص هو ولدك ... أو أخوك ... أو زوجك ؟؟؟
الكل مجتمع ومسوين حفلة في صالة المطار ... اللي يصيح لكن من دون صوت واللي يعلق واللي بالموت قادر يسمك دموعه ...
كانت ام عبدالله تصيح بشكل يقطع القلب ... ومتمسكة في يد ولدها ومو راضية تفكه ... حتى عبدالله نفسه مو هاين عليه يترك امه . ولاهاين عليه دموعها اللي تذرفها على فراقه .. وفي لحظة يأس قرر أنه يتراجع عن السفر .. لكن تفكيره العقلاني منعه في آخر لحظة وذكره أن هذا مستقبله ... وانه بإذن الله راجع لهم قريبا ,,
اعلنوا عن فتح البوابات للرحلة المتوجهه لكندا ... ومع هالإعلان زادت دموع ا م عبدالله ومن وراها عذا ... اما لمياء فحاولت تتماسك علشان اخوها ونفس الشي سوت معها سارونة ...
ام عبدالله ::/ عبدالله طلبتك ..
عبدالله بابتسامة حزن ::/ عيوني اطلبيها يالغالية ..
ام عبدالله ::/ اول ماتوصل تكلمني بالتليفون .. حتى لو كان الوقت عندنا متأخر معليش اتصل انا انتظرك ...
حب عبدالله راس امه ::/ ابشري يمه .. ماطلبتي
ام عبدالله ::/ وانتبه لعمرك ... واحرص على نفسك وعلى دينك ...
هز عبدالله راسه بالإيجاب وهو مبتسم ... ::/ تربيتك يا الغالية ,, مايحتاج توصين ..
ترك عبدالله امه والحزن يمزق قلبه ,,, توجه لأبوه اللي حابس دمعته في محاولة منه انه ما يضعف قدام ولده ...
عبدالله وهو يحب يد ابوه ::/ يالله يبه .. في امان الله اشوفك على خير ..
ابو عبدالله ::/ الله يحفظك يابوي ... بس لاتبطي علينا بالإتصال ... وننتظر جيتك لنا المرة الثانية (( وابتسم له))
ابتسم عبدالله لأبوه ::/ الله يقدم اللي فيه الخير ...
تقدم لأخوانه يودعهم ... حضن أسامة بقوة وأسامة بادله نفس الشي ... صعب على الأخوان يتفارقون ,, واللي مصعبها أكثر أن هالأثنين مالهم غير بعض في هالدنيا ..
أسامة ::/ يالله عاد لاتسوي لنا فلم هندي .. رح توكل على الله ...
ضربه عبدالله بوكس في وجهه بخفيف ::/ مالت على اللي يودعك مو عليك انت ؟؟
سارة أول ماشافت هالمشهد راحت لأبوها وامتنعت تودع عبدالله وغطت عيونها بيدها ودموعها نزلت غصب ... أما لمياء في اللحظة الأخيرة ما قدرت تتماسك وغصب عنها صاحت وهي تسلم عليه وتودعه ... حاول فهد يهديها لكن لاحياة لمن تنادي .. إذا لمياء صاحت من يسكتها ..؟؟
أما عذا فطاحت في حضنه وهي منهارة .. كانت الرحلة على وشك انها تفوته لولا ان اسامة تقدم منها وسحبها غصب وحاول يهديها ويمسح دموعها وهو ماسكها من كتوفها... مهما يكون أسامة دفش في تعامله مع اخواته لكن يبقى قلبه حنون عليهم بزيادة ...
لما شاف عبدالله أسامة وعذا في هالمشهد .. قرب لأسامة وحط يده على كتفه ::/ انتبه لهم يا أسامة .. وحط بالك عليهم زين ... ولاتبهذلها (( وغمز له ))
ابتسم له اسامة بعبط ::/ وش تبي انت الحين ؟؟ ترى مهما صار هذولا أهلي واخواتي ,,, يعني عيوني .. انت بس ارقد وآمن ,,,
ابتسم عبدالله وودعهم جميعا وقلبه يتقطع على فراق أهله وديرته ... وعطاهم ظهره ومشى من دون ما يلتفت ... ولما تأكد انهم مايشوفونه نزلت دمعة من زاوية عينه قدر أنه يسيطر عليها ويمسحها قبل لايجتمعون اخواتها وبعدين من يمنعهم ...
رن جواله وصحاه من سرحانه ... و بدأ يدور عليه في جيوبه قبل لاينقطع .. ولقاه في الجيب الخلفي ... أول ماطالع أسمها ابتسم غصب عنه وحاول يتماسك أكثر من قبل ... خصوصا في هاللحظة محتاج انه يكون قوي ومتفائل علشان يشجعها ,,, لأنها مليون في المية بتكون منهارة .. إذا هي من يومين ماتقدر تكلمه بدون ماتصيح .. وش حال الحين وهي عارفة انه بيسافر ...
رد عبدالله بصوت حنون ::/ هلا والله وغلا ...
ريم ::/ هلا فيك ... وينك الحين عبادي ؟؟
عبدالله بهمس ::/ في قلبك ...!!
استحت ريم منه وماقدرت تحبس دموعها ::/ انت دائم في قلبي .. بس الحين انت وين على الأرض ؟؟
ابتسم عبدالله ::/ أول شي لاتصيحين .. لأني ما اقدر اسافر وانا آخر شي سمعته منك شهقاتك ...
مسكت ريم نفسها بصعوبة ::/ خلاص سكتّ .. يالله قول ؟؟ وينك ؟؟
عبدالله وهو واقف عند الجوازات ::/ أخلص اموري لأني بطلع الطيارة الحين ...
شهقت ريم بصدمة وزاد صياحها::/خـ ـ ـ ـلاص بـ ـ ـ ـ تـ ـ ـروح
تنهد عبدالله ::/ لاحول ولاقوة الا بالله .. ريماني وش قلت لك ؟؟؟ الله يخليك بدون دموع ...
ريم وهي تصيح ::/ عبدالله معليش تحملني .. ما اقدر امسك نفسي عن الصياح ...
خلص عبدالله إجراءات سفره وخلاص جاء وقت يركب الطيارة ...
عبدالله بصوت حنون ::/ الريم .. خلاص انا الحين بطلع الطيارة وبتوجه لكندا ... لكن هذا لايعني إنه ماراح يكون بيننا اتصال .. وبعدين ولايهمك كل يوم بتلقيني على المسنجر انتظرك ... وإذا تبين كل يوم أكلمك. أنا حاضر .!! هاه وش تبين بعد ؟؟
ابتسمت ريم وسط دموعها ::/ ابي سلامتك ... وتوصل بالسلامة وتنجح وتتخرج وترجع بالسلامة ...
عبدالله بخبث ::/ لا انا برجع قبل لااتخرج .. وقت التخرج انتي بتكونين معي ..
استحت ريم ::/ أوكي ... وبكون معك على طول بعد ..
حس عبدالله انه لازم يسكر لأنه مو قادر يمسك نفسه ودموعه ::/ يالله عاد يا بعدهم مضطر اسكر الحين لأني ركبت الطيارة .. توصين شي ..؟
ريم ورجعت تصيح ::/ لاتنساني عبادي .
ضحك عبدالله ::/ انسى نفسي ولا أنساك ... يالله مع السلامة ,,
ريم ::/ مع السلامة ...
سكت عبدالله شوي وسكتت ريم .. لكن ولا واحد منهم سكر السماعة ... كل واحد ضايع بأحلامه وأفكاره ,,
همس لها عبدالله :::/ اليوم أحبك اكثر من أمس ..؟
زادت شهقات الريم ::/ وأنا أكثر ...
سكر عبدالله السماعة من دون مايعقب او يعيد السلامات .. قفل جواله ورجعه لجيبه وجلس في كرسيه و الهم اللي في قلبه خف عن قبل بعد ما سمع صوتها ... وبعد ما ركب الطيارة واختفوا احبابه عن عيونه ... لكن مكانهم في قلبه موجود ومستحيل يتغير .............................!

وبعد هذا كله ...
خلصت اجازة الصيف وخلص معها الكسل والخمول والراحة الجسدية ... وبدت الدراسة من أول وجديد .لكن هالسنة مختلفة أكيد عن اللي قبلها .. والكل انتقل لمرحلة جديدة في سلمه التعليمي ... اللي انتقل للجامعة واللي وصل آخر سنة له في الثانوي واللي توه ينتقل لمرحلة الثانوي ... وهكذا .........
بدت أسابيع الدراسة تمشي من دون أي شي جديد يذكر .. غير انهم كل يوم يصحون الصبح بدري ويرجعون بعد الظهر ... لكن اللي جد في الموضوع أن أسامة صارت عنده سيارته المستقلة كونه بدأ يدرس في الجامعة وصار ضروري يكون عنده سيارة خاصة ... وسوراج رجع من إجازته السنوية وفرحوا به البنات موت لأنه هو الوحيد اللي يقضي مشاوريهم من دون ملل أو كلل أو حتى يمنّ عليهم مثل ماسوى بهم أسامة ... وعذا مجهده عمرها ومتحمسة للدراسة بقوة لأنها آخر سنة لها في الثانوي يعني السنة المصيرية ... أما سارة فكانت ساعة تجتهد وساعات عند حيواناتها والا عند التلفزيون .. مع ان اهلها محرصينها ومفهمينها ان اولى ثانوي اصعب مرحلة ولازم تنتبه لعمرها .. لكن ثقتها العمياء في قدراتها الروحية على النجاح مخليتها تطنش وتوسع صدرها ...
ندى وسحر وشلتهم ماعدا غادة اللي مأجلة فكرة الدراسة بعد زواجها دخلوا كلهم نفس الجامعة ونفس التخصص ... كانوا مستانسين ومبسوطين لأن الأجواء تغيرت عليهم عقب الثانوية والنظام المدرسي الممل ..
بعد ما استمرت الدراسة .. ودخل عليهم الشهر الكريم شهر رمضان وفي ثاني أسبوع منه اللي هو وقت الإختبارات الشهرية ...
كانت سحر جالسة على وحده من الطاولات وبيدها الكتاب تراجع أجوبتها وإذا كان فيه شي غلط عليها والا لا ؟؟ مادرت الا وأريج جايه لها تركض ... عقدت سحر حواجبها ونزلت كتابها ... وما تطمنت لملامح أريج المعفوسة ..
أريج وهي تلهث ::/ سحر قومي بسرعة ...
سحر ::/ ليش وش فيك ؟؟
أريج ::/ ندى طاحت عليهم بالقاعة وخذوها للطبيبة .. قومي نشوف وش فيها ؟؟
قامت سحر مفزوعة من كرسيها ::/ وانت من قال لك ؟؟
أريج وهي تمشي مع سحر ويهرولون ::/ رحاب تو اتصلت علي وانا توني طالعة من قاعة الإختبار وقالت لي انها خذتها للطبيبة ...
سحر بخوف ::/ الله يستر ...
مشوا الثنتين على عجالة وهم يهرولون لحد ماوصلوا المبنى اللي فيه طبيبة الجامعة ... دخلوا على طول للغرفة من دون مايدقون الباب وشافوا ندى متمددة على واحد من الأسرة ومعها رحاب جالسة جنبها ...
راحت سحر تركض لندى وقربت من سريرها ومسكت يدها ::/ ندى بسم الله عليك وش فيك ؟؟
ندى كانت مسكرة عيونها ومو قادرة تفتح ::/ تعبانة شوي يا سحر..
خافت سحر على بنت عمها لما شافت وجهها مصفر وعيونها ذبلانة . وعلى طول طلعت جوالها واتصلت على البيت ...
سحر ::/ السلام عليكم ،، مين ؟؟ سونيا ...؟
سونيا ::/ يس مادام ..
سحر ::/ سونيا تعالي الحين انتي وعبدالرزاق للجامعة بسرعة ..؟؟
سونيا ::/ ايوه مدام بس عبدالرزاق مو موجود ؟؟
لوت سحر بوزها ::/ و سليم ؟؟
ابتسمت سونيا ::/ آآ مدام موجود ؟؟
قاطعتها ندى ::/ سحر اتصلي على زياد ... لاتخلين السواق يجي ..
طالعتها سحر::/ أي زياد الله يعافيك متى بيوصلنا من جامعته ؟؟
بلعت ندى ريقها بوهن ::/ ماعليش انتي اتصلي عليه وخلاص ..
تنهدت سحر بقهر ::/ طيب ..
ورجعت تكلم سونيا ::/ خلاص سونيا لا تجين ... يالله باي ..
سكرت سحر السماعة من البيت وراحت تدور رقم زياد علشان تتصل عليه ..
رحاب مبتسمة ::/ إلى الحين وأخوك على ماهو عليه ؟؟ ماتغير ..؟
ضحكت سحر ::/ إلى بكرة .. وماراح يتغير خذيها مني ..
خنقتها العبرة ندى ::/ معليش انا راضية بأسلوبه ..
ضحكت رحاب ::/ هههههههههههههههههههههه يا حليلك وراك عاد متأثرة .. خلاص حبيبتي مادامه يعجبك فهو يعجبنا .. ولاتزعلين وتصيحين علينا ...
أشرت لهم سحر علشان يسكتون ...
سحر وهي مستحية ::/ السلام عليكم ...
زياد بصوت واطي ::/ هلا وعليكم السلام ..
سحر ::/ زياد انت وينك فيه ؟؟ (( استسخفت نفسها على السؤال ؟؟ يعني من متى الميانه أسأله ؟؟))
زياد مستغرب ::/ في المحاضرة الحين ..؟؟ تبون شي ؟
بلعت سحر ريقها وحاولت ماتخوفه زيادة ::/ سلامتك .. بس ندى شوي تعبانة وياليتك تجي علشان نوديها للمستشفى ؟؟
جمد الدم في وجه زياد ::/ وش تقولين ؟؟ وش فيها وش اللي خلاها تتعب ؟؟
سكتت سحر شوي وبعدين قالت ::/ مادري بس طاحت علينا بالقاعة والحين هي عند الطبيبة ...
قاطعها زياد ::/ خلاص تجهزوا ربع ساعة بالكثير وانا عندكم ..
سكر منها زياد من دون مايقول مع السلامة ...
---------------------------------------------------------------------------

طالعت سحر الجوال متفاجئة من تصرفه ولفت على رحاب ..
سحر ::/ لا ولا يفوتك ... مؤدب بعد ،، يسكر السماعة من دون مايقول مع السلامة ..
ماتوا رحاب وأريج من الضحك على شكل سحر .. أما ندى فيبدوا انها ماكانت معهم ومسكرة عيونها وبس ..
جلسوا البنات بغرفة الطبيبة لحد ما حسوا ان زياد قرب يوصل ... وفعلا خمس دقائق وبعدها اتصل زياد على جوال سحر يقول لهم انه ينتظرهم عند البوابة ..
قامت سحر اللي كانت لابسة عبايتها وخالصة ... وتساعدت مع أريج ورحاب ووقفوا ندى على رجولها ولبسوها عبايتها وهي مو معهم وكأنها قطعة قماش يودونه ويجيبونه بين يديهم ...
بعد مجهود مضني لبسوا البنات ندى عبايتها وشالت سحر شنطة ندى ومشوا لحد ما وصلوا البوابة اللي عندها زياد .. تركت أريج ندى ومسكتها سحر بقوة ومشت هي و اياها طالعين ..
أول ما شافهم زياد وتعرف عليهم تقدم منهم وحاول يمسك ندى عن سحر اللي باين ان شكلها متبهذله من حوسة عبايتها .. ولأنها مو حمل تمسك ندى وتسندها ..
مسك زياد ندى مع خصرها ومسك يدها بيده ..
زياد ::/ اتركيها عنك سحر وانتي روحي اركبي ...
هزت سحر راسها وتركت ندى بين يدين زياد القوية وراحت تركب السيارة ... بس وهي في طريقها لمحت بنتين يطالعون جهة ندى وزياد .. وساعتها حست بقلبها يغلي ... ودها لو تروح وتشيل لهم عيونهم هاللي يطالعون فيها .. توقعت انهم مستغربين هالبنت اللي طايحة بس مع ذلك مالهم حق يطالعون زياد ... ؟؟ خل يطالعون ندى وبس ...!!
ضحكت على نفسها وراحت تركب ..
أما زياد فحاول يمشي بشوي شوي علشان ندى ماتقدر تمشي كثير ..
زياد بنبرة حنونة ::/ يالله شوي ونوصل للسيارة ..
طالعته ندى ::/ مشكور زياد ...
سكت زياد عنها وما رد عليها لأنه حس انها تهلوس عليه .. وصلوا للسيارة وساعد زياد ندى تركب في المقعد الأمامي وهو على طول لف من الجهة الثانية وركب ..
حاول ينزل المرتبة حقتها لتحت شوي علشان ترتاح .. لكن هي رفضت وقالت ماله داعي ..
زياد ::/ وش فيك وش حسيتي فيه فجأة ..؟؟
بلعت ندى ريقها ::/ مادري والله .. فجأة وانا بسلم ورقتي اسودت الدنيا بعيوني وماعاد اسمع شي الا صوت طنين .. وماصحيت الا وانا بغرفة الطبيبة ..
زياد ::/ يعني حاسة انتي بهالدوخة من قبل والا هذي أول مرة ؟؟
ندى وهي تمسد جبهتها ::/ لا اول مرة ..
سكت زياد عنها ولا حب يرهقها بالكلام الكثير ...
أما تصرفاته فكانت تحت المجهر من قبل سحر اللي تراقب كل كلمه يقولها ,, وكل تصرف يتخذه تجاه ندى ...
رن جوال ندى وطلعته سحر من شنطتها تشوف مين ..
ندى ::/ من اللي يتصل سحر ؟؟
سحر مستغربة::/ مكتوب دلوعتهم ...
ندى ::/ ردي عليها وقولي لها اني نايمة ..؟
زياد مستغرب ::/ من هي ؟؟
لفت له ندى بنظرة جانبية ::/ عذا بنت عمتي ؟؟
مغصه قلبه زياد ::/ وليش ماتردين عليها ؟؟
ندى ::/ بتقول وش فيك؟؟؟ وراه صوتك متغير وبعدين بتخوّف عمتي علينا ؟؟.. عارفتها لازم بتقول لها ...
سكتوا كلهم علشان سحر تكلم عذا ...
سحر ::/ معليش ندى الحين نايمة ... ولما تقوم بقولها عن اتصالك ...
ابتسمت عذا ::/ خلاص يعطيك العافية .. وفرصة سعيدة سمعت صوتك سحر ..
ابتسمت سحر ::/ أنا أسعد .. يالله مع السلامة ..
عذا ::/ مع السلامة ..
سكرت سحر وعلى طول سألتها ندى ::/ وش قالت لك ؟؟
سحر بصوت واطي ::/ ماقالت شي .. قالت تبيك وقلت لها نايمة ..
زياد بعتاب ::/ كان رديتي عليها وحاولتي انها ماتدري عنك .. يمكن تبغاك في شي ضروري ؟؟
سكتت ندى شوي وبعدين ردت ::/ إذا وصلت الحين اتصل عليها ...
التفت عليها زياد ::/ الحين بنروح المستشفى ..
ندى بتوسل::/ لا الله يخليك مافيني شي .. بروح للبيت الحين وارتاح وصدقني المغرب مابيكون فيني الا العافية ..
زياد بحزم ::/ بنروح للمستشفى ...!
سكتت ندى عنه وما قدرت تناقشه لأنه إذا قال قال .. وبعدين هي ماتبي تناقشه زيادة .. بتسوي بالها انها شايلة في خاطرها عليه عقب اللي سواه ,, واللي سمعته منه ...
سكتوا كلهم وخذوا طريقهم للمستشفى وندى ساكته ما اعترضت ...
رن جوال زياد وعلى طول رفعه يشوف مين ولقاها عمته .. ابتسم و في خاطره (( متوقع انك بتروحين تقولين لها هي تتصل علي مو انتي ))
زياد ::/ هلا والله براعية هالصوت ... تبارك يومي بسماع صوتك
ضحكت ام عبدالله ::/ السلام عليكم ..
زياد ::/ وعليكم السلام والرحمة ...
ام عبدالله ::/ وش اخبارك زياد وش علومك ؟؟ وأختك كيف صحتها ؟؟
زياد ::/ بصحة وعافية انتي بشريني عنك ؟
ام عبدالله ::/ انا بصحة وسلامة ... وينك شكلك تمشي في الشارع ؟؟
ضحك زياد ::/ لايكون راكبة معي ؟؟
ام عبدالله ::/ لا بس صوت الهواء عندك شق طبلتي ..
زياد ::/ ايه والله تو اني طالع من الجامعة ..
ام عبدالله ::/ زين أجل ... ترى متصله عليك ابأكد عليكم ترى الفطور عندي اليوم .
تلعثم زياد ولف على ندى وبعدين قال ::/ لا ياعمة مو اليوم خليها وقت ثاني ؟
ام عبدالله باصرار ::/ لا اليوم تجون .. وش عندكم ماتبونها اليوم ؟؟ يعني مرتبطين ؟؟
زياد بسرعة ::/ لالا والله ماعندنا شي بس مانبي نكلف عليك ..
ام عبدالله ::/ لا كلافة ولا شي ... وبعدين اليوم بالذات انا مسويت لكم كل الي تحبونه ..
ابتسم زياد ::/ خلاص أنا ماعندي مشكلة بس اشوف ندى وش عندها و ارد عليكم ..
ام عبدالله ::/ ايه اتصلنا عليها من شوي وقالوا لنا نايمة ؟؟
زياد بخبث ::/ من انتم ؟؟
ام عبدالله ::/ احنا وبس .. ماعليك ؟؟
ضحك زياد وبصوت واطي همس لها ::/ ايه هذا انتي اذا جت علي اتصلتي انتي واذا جت على ندى خليتيها هي تتصل .. آخ منك بس ..
ضحكت ام عبدالله ::/ حلو يوم انك فاهمني ..
زياد ::/ افا عليك انا فاهمك دائما ..
ام عبدالله بمزح ::/ تجي نتزوج ؟؟
مات زياد من الضحك ::/ ياليت والله .. صدقيني مابلقى أحسن منك تفهمني وافهمها ..
ضحكت ام عبدالله بخجل ::/ المهم بسوي نفسي ماسمعت كلامك الأخير علشان ما أقوله لعمك محمد ويعصب ... وترانا ننتظركم على الفطور زين ؟؟
زياد ::/ خلاص انا مثل ماقلت لك اول ما اشوف ندى ارد عليك ..
اام عبدالله ::/ خلاص انتظرك ... يالله مع السلامة
زياد ::/ في امان الله ..
سكر زياد وعلى طول سألته ندى ..::/ وش تبي فيك عمتي؟؟
زياد وهو ينزل جواله ::/ تعزمنا على الفطور ؟؟
ندى مستغربة ::/ اجل خلاص ماله داعي المستشفى ..
زياد :/ لا المستشفى بنروح له وان شفتك بتتأخرين عندهم اتصلت عليها واعتذرت منها ..
رضخت ندى لأخوها وسكتت لما وصلوا للمستشفى قسم الطوارئ ... وقف زياد سيارته قريب من البوابة و نزل .. فتحت ندى الباب في محاولة منها تثبت لزياد ان مافيها شي وتقدر تمشي عادي وان اللي صار لها عارض صحي ليس إلا ..
لكن من نزلت وسكرت باب السيارة وراها وجربت تمشي خطوة الا والدنيا غشت عليها مرة ثانية حاولت تتماسك لكن ماقدرت حتى رجولها ماعاد قدرت تشيلها
صرخت سحر وهي تمسك ندى ::/ زياد ..
ركض زياد من وراء السيارة ومسك ندى قبل لاتطيح هي وسحر على الأرض .. مسكت ندى في يد زياد بكل قوتها ... تحس انها غرقانة في قاع البحر ومو قادرة ترد حتى نفسها ..مسكت في يد زياد وكأنها خشبة النجاة .. شد زياد يده حولها ورفعها بكل قوته علشان تنتصب في وقفتها ...
زياد ::/ ندى تقدرين تمشين والا اجيب لك كرسي ؟؟
سكتت ندى وما ردت عليه .. لكنها طالعته بنظره وكأنها تقول له ما اقدر افتح فمي بكلمة ...
هز زياد راسه ومشى هو وسحروهم ماسكين ندى لحد ما دخلوا و خذوها لغرفة الفحص وجاها الدكتور المناوب والممرضة ... طلب الدكتور من زياد يطلع علشان يكشف على ندى .. وامتثل زياد للدكتور لكن على مضض .. مايبي يطلع ويترك اخته مع الدكتور بروحها ... (( الغيرة تقتله ))
طلع هو وسحر وجلسوا على كراسي الإنتظار ... كان في خاطر سحر انها تستلذ بهالدقائق و هي جنبه ومعه ... لكن الظرف مايسمح بهالشي .. وتفكيرها ما تعدى حدود ان ندى تكون بخير ومافيها الا العافية ...
لفت على يمينها وشافته يهز رجله بتوتر وهو متسند باكواعه على ركبه ... كانت شفايفه تتحرك والظاهر انه يدعي ...
ابتسمت من خاطرها وهي تشوفه خايف على أخته وعلى طول جاء في بالها مشاري أخوها لما يتوتر من مواعيدها ...
طلع الدكتور وهو يتكلم مع الممرضة .. وبعدها مشت عنه الممرضة راجعة للغرفة ,,
هب زياد واقف وقامت وراه سحر وتوجهوا على طول للدكتور ,,,
زياد بلهفة ::/ هاه يا دكتور طمني ؟؟
طالعه الدكتور ::/ أنت زوجها ؟؟
زياد ::/ لا أنا أخوها ؟؟ خير ان شاء الله ..
ابتسم الدكتور ::/ مافيها الا العافية .. واللي صار لها نتيجة تعب وارهاق وفقر دم حاد جداً ... انا كتبت لها شوي تحاليل علشان أتأكد .. و طول هالفترة بتجلس عندنا علشان المغذي ؟؟
زياد ::/ بيآخذ وقت المغذي ؟؟
الدكتور وهو بيمشي ::/ ساعتين بالكثير ... أو أقل ..
زياد ::/ طيب مايصلح نرجع لك بعد الفطور ؟؟ يعني تعرف علشانها صايمه ؟؟
الدكتور ::/ أصلا حتى لو ماعطينها المغذي ورجعتوا للبيت لازم تفطر لأنها ماراح تتحمل الوهن والتعب .. حالتها ماتسمح تكمل صيامها أبدا ..
صافح زياد الدكتور ::/ زين مشكور دكتور.
الدكتور ::/ لا شكر على واجب ... بس انتم انتبهوا لهالشي وانتبهوا لأكلها لأن فقر الدم مو زين علشانها ...
هز زياد راسه مبتسم ومشى الدكتور عنهم يكمل دورته على باقي المرضى ...
سحر كانت منزلة راسها ودها تروح لندى لكن تنتظر زياد يمشي .. تفاجأت لما لف عليها زياد ..
زياد ::/ سحر أنتي ملاحظة انها ما تاكل ؟؟
تلعثمت سحر من انه يكلمها وعينه عليها مباشرة ::/ لها فترة ماتأكل .. يعني طول وقتها إما تذاكر والا نايمة وكل ماقلت لها تعالي نتسحر والا نآكل شي قالت مااشتهي ..
زياد وهو عاقد حواجبه ::/ من متى هالكلام ؟؟
بلعت سحر ريقها اللي تحسه نشف ::/ يمكن من بدء رمضان ؟؟
زياد بنبرة تفكير ::/ يعني من عرفت بخطبة مشاري ؟؟
سكتت سحر وهي تطالعه وقبل لاتسرح في ملامحه قالت ::/ شي من هالقبيل ..
ابتسم زياد ::/طيب يالله ارجعك للبيت . مو معقولة بتنتظرين معنا ساعتين وانتي تعبانة من الجامعة ..
حست بقشعريرة من كلامه ... ومن نظرة الإصرار في عينه ..::/ لا ماعليه انت خلك مع ندى وانا بتصل عليهم في البيت يجون يآخذوني ؟؟
عقد زياد حاجبه زياد ::/ من فيه يجي يآخذك ؟؟
سحر مبتسمة من اهتمامه ::/ بشوف السواق ووحده من الشغالات ..
ابتسم لها زياد ::/ خلاص بس احرصي ان الشغالة تكون معه .. والا خليني أوصلك ؟؟
سحر ::/ لا ماله داعي اكيد بتجي الخدامة .. بس عاد قبل بدخل أشوف ندى الحين ,,,
دخلت سحر على ندى وقلبها يدق طبول يسمعه اللي في آخرالسيب ؟؟؟ زياد يكلمها مباشرة ويقول لها بوصلك ؟؟؟ ليتها تهورت ووافقت يوصلها ؟؟؟ لكن يالله ماتبي ندى تجلس بروحها في المستشفى ...!
أما زياد فـ ماكن في باله ان اللي سواه شي كبير بالنسبة لسحر ؟؟؟ وحتى ما اهتم . وكل اللي يشغله ندى وبس ...!! وعلى هالحال راح يحاسب المستشفى علشان التحاليل والكشف ...
----------------------------------------------------------------------------
وصلت أريج للبيت وقلبها مهموم على ندى واللي صار لها ... من خلال كلام ندى لها متأكدة مليون بالمية ان اللي فيها بسبب خطبة مشاري ... لأن ندى عمرها ماتخيلت نفسها تكون زوجه لواحد من عيال عمها .. لأن مشاري باختصار ماتحب تسلطه ودكتاتوريته .. ومصعب تعتبره مثل زياد ... ومسألة ان مشاري يخطبها من بعد طلال اللي تحبه فهي اللي سببت لها أزمة .. وإصرار زياد عليها انها توافق خلى شهيتها تتسكر وماعاد تطيق تآكل أو حتى تسولف ...
وعت من سرحانها لما سمعت صوت شي كأنه انكسر .. راحت تركض من على الدرج تشوف وش صاير لكن فجأة طلع في وجهها راكان اخوها وشكله يرثى له ... هاليومين متغير بزيادة .. صاير عصبي أكثر من قبل ولا أحد يقدر يكلمه أو يحاكيه ..
كان معصب وعيونه تطلق شرار ... وجسمه ينتفض كله من فوق لتحت ..
أول ما تواجه مع أريج دزها من قدامه ولو أنها ماتمسكت في الترابزين زين كان طاحت وتكسرت ... مشى وكأنه ما سوى شي وطلع من البيت ..
أما اريج فتنهدت بقهر ... ودخلت للبيت تركض ... شافت الصالة ومالقت فيها أحد ..
مشت للمطبخ وشافت عبير أختها جالسة على الطاولة وماسكة يدها وهي تنزف ...
أريج بخوف ::/ عبورة وش فيك ؟؟
رفعت عبير راسها والدمعه بعينها ::/ من غيره أخوك ...
قربت أريج لأختها وشافت الجرح اللي بيدها ... شهقت أريج ::/ وش منه هالجرح ؟
عبير وهي تصيح ::/ راكان حسبي الله عليه بغى يذبحني ..
شهقت أريج وهي رايحة للصيدليه تجيب ضماد ومطهر ::/ وش اللي صار له .. وأمي والبنات وينهم ؟؟
عبير وسط دموعها ورعشة خوفها ::/ أمي نايمة فوق والصغار في بيت ام علي أما هالوحش فدخل علي المطبخ معصب ومنتهي .. سألني عن حبوب له في غرفته قلت له ما أدري عنها .. سفهني وقال ان ربعه بيجونه اليوم .. بس انا عارضته وقلت له ماعندنا شي نضيفهم به ..
أريج وهي تمسح الجرح ::/ ليه عارضتيه كان خليتيهم يجون وخلاص ..؟
عبير ::/ مجنونة انتي يجون ... الحين انا ما انام بالليل مرتاحة وهم مو عندنا ولانعرف عنهم شي .. بعد الحين تبينهم يدخلون البيت مستحيل وأنا عارفة العينة اللي يخالطهم ..
طالعتها أريج شوي وبعدين قالت ::/ طيب وش سالفة هالجرح ..
عبير ::/ خذ السكينة اللي بيدي وهو معصب .. عاد انا خفت يسوي فيني شي وبقيت ماسكتها .. هو يشد وانا اشد لحد ما انجرحت ... وهو ضعف في الأخير وماقدر يقاوم ومالقى قدامه غير الصحن ورماه وتكسر ...
أريج ::/ الله يآخذه عنا ونفتك .. هذا اخو بالله عليك ..؟ مالت عليه لو يجي يشوف اخو ندى وش سوى يوم درى انها تعبانة .. وذا المتخلف يبي يذبحك ..
سكتت عبير وحرقتها في قلبها تزيد ... مو من الجرح بس من الكلام والتهديد اللي سمعته من راكان اخوها ... عز عليها يكون هذا هو اخوها وعضيدها في هالدنيا اللي مالهم فيها أحد غير رب العالمين ..

خلص زياد إجراءات المستشفى وبعدها رجع لغرفة ندى يتطمن عليها ... فتح الباب وكانت في وجهه سحر بتطلع ،، ولو انه ماقدر يمسك نفسه كان طاحت البنت عليه .. لكن الحمدلله جت سليمة وقدر يبعد شوي عنها ... أما سحر فـ بغت تموت من الفشيلة لما ضرب كتفها صدر زياد ... ماتوقعت انها ببتلاقى معه عند الباب ؟؟ ولا توقعت منه انه يفتح على اخته الباب من دون ما يتنحنح أو يصدر أي صوت ...
زياد بإحراج ::/ بتروحين الحين سحر ؟؟
رفعت راسها سحر ::/ إيه السواق عند الباب ... (( والتفتت على ندى)) ندوش تبين شي أرسله لك .. والا لا؟؟
ابتسمت لها ندى ::/ لا سلامتك ..
زياد ::/ بس اذا وصلتي للبيت اتصلي علينا او ارسلي مسج ... زين ؟
سحر ماتت في مكانها أو بالأحرى ذابت من مجرد هالكلمة ؟؟ حست ان في اهتمام من ناحيته تجاهها ... بلعت ريقها ::/ إن شاء الله .. يالله عن أذنكم ..
طلعت سحر وسكر زياد الباب من وراها وتقدم لسرير ندى ..
ندى من طلعت سحر رفعت راسها وغمضت عيونها وكأن زياد مو موجود ... تنهد زياد وسكت شوي .. بعدها كتف يديه وأطال النظر فيها يبيها تتكلم والا تفتح عيونها لكن لاحياة لمن تنادي ...؟
زياد بحاجب مرفوع ::/ يعني تعاقبيني ؟؟
فتحت ندى عينها ببرود وطالعته بعباطة ::/ نعم ؟؟؟
ابتسم زياد وهو يأشر عليها ::/ الحين انتي تعاقبيني أنا ؟؟ (( واشر على نفسه ))
ندى ::/ ليش ..؟؟ انت سويت شي يسوى أعاقبك عليه ؟؟ وبعدين وين العقاب ؟؟ ما أتذكر اني سويت لك شي ؟؟
قرّب زياد أكثر لحد ماوقف عند نهاية السرير ::/ وهالمغذي اللي في يدك ؟؟ واللي صار لك اليوم ماتسمينه عقاب لي ؟؟
ابتسمت ندى ::/ من قال ؟؟؟
جلس زياد على طرف السرير وكفوفه بحضنه ::/ أنا أقول ...!! لأن الدكتور يقول انك ما تآكلين ,, وسحر أكدت لي هالشي ؟؟؟
تنهدت ندى بألم ::/ شهيتي هاليومين مو مفتوحة ؟؟
زياد ::/ من سالفة مشاري ؟؟
ارتبكت ندى ::/ يمكن إيه ويمكن لا ؟؟ ما أدري ..
ابتسم زياد شوي وبعدين بدت الجدية في عيونه وهو يقول ::/ اسمعيني زين يا ندى .. أنا لما قلت لك اني أبغاك تتزوجين مشاري لايعني اني افرضه عليك وإنما اوضح لك انه انسان مايتفوت أبدا وقد الثقة . ولما يكون هو زوجك بكون انا متطمن عليك ماحييت .. لكن القرار في النهاية راجع لك .. وانتي ادرى بمصلحتك ..
ندى بابتسامة سخرية ::/ طيب ومن اللي قال لي ... ((( ما راح أرد عمي مرة ثانية لو وش ما صار ؟؟)))
ابتسم ::/ أنا قلت لك لأني فعلا أبي أأثر عليك ... عمي خطبني لبنته وانا رفضت
قاطعته ندى ::/ ليه رفضت كان وافقت علشان انا ما اتورط مع هالمشاري ...
طالعها زياد بتعجب ::/ ويهون عليك أخوك مايآخذ اللي يبيها من وهو صغير ؟؟؟
سكتت ندى وماردت عليه ...
كمل زياد ::/ أنا لما رفضت عمي رفضته لأني اعتبر نفسي خاطب ... وعمتي الحين يعتبروني حاجز بنتهم .. فهل من العدل اني اقبل بخطبة وانا خاطب ؟؟ لكن انتي لما طلبك مشاري ماكان فيه احد خاطبك او حاجزك او متقدم لك ... وهذا اللي خلاني أقرب بهم ... بالإضافة إلى أني ما أشوف شي مو كويس في شخصية مشاري تخليني ارفضه ؟؟؟ بالعكس انا من زمان كنت اتمنى انك تآخذينه ... وعموما انا لايمكن أحط مشاري وطلال في مقارنة لأن مشاري هو اللي يغلب وانا ارتاح لمشاري واثق فيه أكثر ...
تنهدت ندى ::/ ولو قلت لك اني مو موافقة ؟؟
سكت زياد شوي وبعدين طالعها ::/ جيبي لي سبب مقنع وانا ارفضه ..
ندى ::/ أنا ما ارتاح له ...
زياد ::/ انتي اللي مقنعة نفسك بهالكلام ... لكن حاولي تقنعين نفسك انه رجال والنعم وما يتفوت ... وبعدين هو وعمي كلهم طلبوك مني ... يعني شارينك ... وانا عطيتهم الموافقة المبدئية ...
ندى ::/ يعني انا مو مهم رايي .. الأهم انك انت وافقت ؟؟
تنهد زياد ::/ لاحول ولاقوة الا بالله .
تعدل في جلسته وبعدين كمل ::/ ندى صدقيني مشاري ماينعاب وانا أثق فيه اكثر من نفسي ... وضامن انه هو اللي بيسعدك وبيحفظك أكثر من نفسه .. وبعدين أخلاقه أخلاق رجال ... وصدقيني لو فيه شي واحد مو مضبوط كنت برفضه حتى قبل لاأشاورك ... لكن شوفي انتي استخيري وفكري ... وعقبها يحلها ربك ... لكن لاتجين تقولين لي ما ارتحت له ... بليز لأني مااقتنع بهالأشياء ...
ضحكت ندى بسخرية :: زياد أنت موافق ومنتهي ... بس جاي تشاورني شكليات ؟؟
سكت زياد وما عقب على كلامها ...
سكتت ندى وهزت راسها لكن حبت تغير الموضوع ::/ الحين بنروح بيت عمتي ؟؟
ابتسم زياد لها بحب ::/ إن شاء الله .. باقي وقت على الآذان يعني يمديك تخلصين من هالمغذي ونطلع ونروح لهم ...
لوت ندى بوزها ::/ عاجبك الحين ؟؟ خليتني افطر وانا ما ابغى ..
ضحك زياد ::/ معليش هاليوم يهون علشاني ...
قطعت علهم الممرضة داخلة ومعها عدتها علشان تسوي تحليل لندى وتآخذ منها عينات دم .......................
-----------------------------------------------------------------------------
دخلت لمياء البيت وبيدها صينيه مغلفة .. لقت ابوها في الصالة يقرأ القرآن بصوته الأجش وبترتيله اللي يخليك تخشع غصب ... كانت جنبه سارة وقطوتها في حضنها وهي مغمضة عيونها وتتسمع أبوها ...
لمياء ::/ السلام عليكم ,,, (( وقربت لأبوها تحب راسه ..)
ابو عبدالله مبتسم بحب ::/ هلا والله وغلا وعليكم السلام .. نوّر البيت ..
سار بقهر ::/ يبه لو سمحت لاتعطيها حقوقي ؟؟ وبعدين انتي كان دخلتي بسكات الا لازم تخربين علينا روحانيتنا ؟؟
طالعتها لمياء بحاجب مرفوع ::/ وانتي حضرتك وش تسوين قاعده هنا ؟؟ ليه ماتروحين مع امي للمطبخ تساعدينها ؟؟؟
لوت سارة بوزها ::/ هي طردتني تقول ما ابي مساعدتك بس فكينا من شرك ..
ضحك ابوها عليها ::/ أكيد هالبلوى داخله معك صح ؟؟ (( ومسح على القطوة ))
ضحكت سارة ::/ إيه وهي تقدر تتخلى عني (( وحضنتها ))
لمياء بقرف ::/ الحمدلله والشكر ...
أبو عبدالله وهو يقوم ::/ تعرفين امك ماتحب القطاوة ليش مدخلتها معك المطبخ ؟؟
سارة ببراءة ::/ يبه هي اللي تلحقني مو انا اللي أجيبها ..
ابو عبدالله ::/ المهم صرفيها قبل لاتنزل عذا وتزيدينها ترى اللي فيها كافيها ... (( التفت على لمياء)) فهد دخل ؟؟
ابتسمت لمياء ::/ ايه في المجلس معه أسامة ومهند ..
هز ابو عبدالله راسه ومشى رايح للمجلس ...
التفتت لمياء على سارة ::/ وش فيها عذا ؟؟
طالعتها سارة بحزن ::/ ماتت لولي ؟؟
شهقت لمياء ::/ كذااااااااااااااااااااااااابة ؟؟ متى؟؟
تسندت سارة على الكنب ::/ اليوم بعد صلاة العصر ... طلعت عذا لهم وشافتها في القفص تعبانة خذتها في حضنها حاولت تمسح عليها وتأكلها لكن فجأة بدت تطلع أصوات وماتت ...!!
جلست لمياء جنب سارة ::/ في حضن عذا ماتت ؟؟
هزت سارة راسها بالإيجاب ..
لمياء ::/ وش سوت عذا طيب ..
سارة ::/ نزلت لنا تركض وهي تصيح ولولي بين يديها .. راحت لأبوي تبيه يوديها للمستشفى لكن يوم شافها أبوي لقاها ميته ...
لمياء ::/ طيب وبعدين ..
سارة :/ ايه بس الحين هي تصيح بغرفتها وتقول ابوي هو السبب ماوداها للمستشفى وتركها تموت ...
ضربتها لمياء على كتفها ::/ وانتي جالسة هنا مع هالخراب اللي معك وامي ياحياتي في المطبخ بروحها وانا على بالي معها عذا .. لا وفوق كل هذا مارحتي عند عذا تحاكينها ..
سارة بدفاع ::/ أقول لك مقفلة الباب على نفسها وماترد علينا ... وامي طردتني من المطبخ ...
تنفست لمياء بعمق ::/ طيب انا بروح لأمي الحين .. وانتي اطلعي شوفي هالخبلة اللي فوق قولي لها الحين بيأذن وتخلي عنها هالخرابيط ..
شهقت سارة تتطنز ::/ الحيــــــــــــــــــن هذا كله خرابيط ؟؟ إن لولي تموت في حضنها ويتيتمون عيالها المواليد هذا خرابيط ؟؟؟ وان ابوي مايوديها للمشتسفى خرابيط .. آآآآخ منك بس يالمياء ياعديمة الإحساس ..
ضحكت لمياء من كل قلبها ::/ سويرة عيب عليك .. لاتتطنزين ترى الطنزة تلحق راعيها ... وبعدين وش تسوين اذا صارت أختك من هالنوعية ؟؟ نكبها في الزبالة مثلا ؟؟
سارة ::/ لاماتوصل هالمواصيل .. بس عاد تجمد شوي موكأنها جيلي ... عجزت وانا اقول لها أن كنق مات بين يديني انا بعد وماسويت شي ،، كل اللي سويته اني عطيته ابوي وقلت له يبه لو سمحت ادفنه ...
عطتها لمياء ظهرها وهي للمطبخ ::/ بس الناس مو مثلك عديمي الإحساس ؟؟
سفهتها سارة ومشت لمياء رايحة لأمها في المطبخ ..
.
.
.
.
.
قبل آذان المغرب بوقت قصير تقابل زياد وندى الى توهم وصلوا لبيت عمتهم مع ام عبدالرحمن وابو عبدالرحمن عند باب البيت ... استانس زياد من قلبه لما شاف ابو عبدالرحمن .. مايدري ليش يحس بالراحة تجاه هالشايب التقي اللي نور الطاعة يشع من وجهه ... وزايده حشمة ووقار هالشيب اللي غازي لحيته وشعره ...
زياد ::/ هلا والله يا عمي ...
ابو عبدالرحمن مبتسم ::/ هلا ومرحبا بولد سلطان ... وشلونكم يابوي ؟؟ وش علومكم ؟؟
زياد وهو يحب راسه ::/ بخير ونعمة .. أنت اللي طمنا على صحتك وسكرك ؟؟
ابو عبدالرحمن ::/ لله الحمد والمنة ... عطانا وماشكرنا ... وفوق هذا نستزيده من فضله وحنا ماعطيناه حقه ...
ابتسم زياد ::/ الله يتوب علينا اجمعين
ابو عبدالرحمن وهو يربت على يد زياد::/ آمين ...
فتح أسامة الباب بعد ما دقته ندى وتقابل معهم وسلم عليهم ... ودخلوا كلهم وبقت ام عبدالرحمن هي آخر وحده ...
أسامة يمزح::/ يالله يمه ادخلي بسرعة والا ترى بسكر الباب عليك ..
ام عبدالرحمن ::/ هذا من كرم اخلاقك تسكر الباب بوجهي ؟؟
أسامة وهو ماسك الباب ::/ وش اسوي الحين بيأذن وانا بروح ادعي ربي مو فاضي لك اقعد انتظرك ..
ضربه زياد على كتفه ::/ استح على وجهك ...
ام عبدالرحمن تكلم زياد::/ هذا بايع الحياء من يوم انولد ... وانا ما أواخذه على فعايله وانا خالتك ..
دخلت ام عبدالرحمن ومسكتها ندى ودخلت هي واياها للصالة الداخلية ..كانت سارة ولمياء يجهزون السفرة ... وأول ماشافوا جدتهم وندى داخلين الصالة تركوا كل شي من يديهم وقربوا لهم يسلمون عليهم و يقلطونهم ...
طلعت ام عبدالله من المطبخ ومعها صينية في يدها بتوديها للرجال ... بس يوم شافت خالتها نزلت الصينية وسلمت عليها ...
ام عبدالرحمن ::/ اجل وين الغزال ؟؟
ضحكت ام عبدالله لما شافت تعابير وجه سارة المنقهرة ::/ بتنزل الحين ياخالة ...
التفتت ندى على سارة تستفهم ::/ من تقصد جدتك ؟؟
طالعتها سارة بنظرة غرور ::/ من تقصد ؟؟ أكيد انا حبيبتي ..
طالعتها لمياء بنص عين ::/ متأكدة انها مو عذا ..؟
ضحكت ندى ::/ أغير منك ماشفت يا سويرة....................!
اجتمعوا البنات مع ام عبدالرحمن حول السفرة اما ام عبدالله فـ شالت صينيتها وطلعت للمجلس تسلم على عمها ابو زوجها وتحط الصينية عندهم ...
أول مادخلت فز زياد يسلم عليها لأنه توه واصل وتقدمت ام عبدالله وسلمت على ابو عبدالرحمن ... وقررت تجلس شوي معهم لحد ما يأذن وتروح تفطر مع البنات ..
ابو عبدالله ::/ الجوهرة مانزلت عذا ؟؟؟
طالعته ام عبدالله ::/ لا يوم اجيكم وهي ما نزلت ... يمكن تنزل الحين ؟؟
ابو عبدالله ::/ وشلون ماتنزل والحين بيأذن ؟؟
أسامة ::/ يبه إذا أذن وقرصها الجوع بتنزل من نفسها صدقني ...
تنهد أبو عبدالله لأن الوضع مو عاجبه ... وحبستها فوق في غرفتها مالها داعي ..
التفت فهد لأسامة ::/ وش فيها ؟؟ وش انتي مسوي فيها بعد هالمرة ... والله يخليك لاتقول لي لمياء مشاركتك ..!
ضحك أسامة بعنف ::/ لالا ارقد وآمن هالمرة انا مالي يد فيها .. كل اللوم على ابوي ؟؟
طالعه ابوه بنظرة غضب ::/ لايكون انا اللي ذابحها ؟؟
أسامة يتطنز ::/ لالا وش دعوى بس انت ما أخذتها للمستشفى ..
زياد مستغرب ::/ من اللي تعبانة ولا خذتوها للمستشفى ؟؟
أم عبدالله بابتسامة خفيفة ::/ أرنبها لولي ... اليوم العصر ماتت
انصدم فهد ::/ لولي ما غيرها ؟؟
أسامة بحزن مصطنع ::/ شفت عاد .. ويتقبل العزاء في منزلهم الكائن عندنا ..
تفاجأ زياد من شهرة هاللولي ::/ طيب ماتت الله يرحمها وش فيها هي متأثرة لهالدرجة ؟
ام عبدالله ::/ هي متعودة عليها و من زمان وهي عندنا وبالزود ماتت وهي معها و توها والدة فـ جابتها لأبوها يوديها للمستشفى بس عمك الله يهديه صدمها وقال لها انها ماتت ولا له داعي يآخذها للمستشفى ...؟
ابو عبدالرحمن ::/ والحين هي زعلانة من هالشي ؟؟
هزت ام عبدالله راسها بالإيجاب وعلى وجهها ابتسامة خفيفة ..
هز ابو عبدالرحمن راسه ::/ لاحول ولا قوة الا بالله .. هالبنت رخوة ...!! مادري وش بتسوي باقي حياتها ... ؟
ابو عبدالله ::/ يبه تراها مقيولة .. تخيروا لنطفكم فإن العرق دساس . وانا عاد ماتخيرت لنطفي زين وبلاني ربي بهالبنت لا ومعها اخوها بعد ...
طالعته ام عبدالله بنظرة نارية ::/ لايكون متحسف على زواجك ؟؟
ضحك أسامة ::/ هههههههههه والله وشبت بينهم ؟؟؟
قام ابو عبدالله من مكانه ::/ لا من قال ؟؟ المهم انا بطلع اشوفها عساها ترضى تنزل معي ...
أسامة ::/ لابتنزل معك .. يوم انك انت السبب وانت اللي جيتها تراضيها بتنزل معك ..
ابو عبدالله :/ والله مادري عن هفات أختك ... إن مامسكت معها ورفضت تحاكيني .
ابو عبدالرحمن ::/ لالا مايكون الا خير انت رح بس ...
دخل ابو عبدالله الصالة بعد ماتنحنح وسلم على أمه قبل كل شي وبعدها استأذن منهم وطلع الدرج ... بس استوقفته امه لما نادته ..
ام عبدالرحمن ::/ كان حاس قلبي ان فيها شي وانتم السبب ... قل هالمرة وش مسوين فيها ؟
ضحك ابو عبدالله ووهو واقف على الدرج ::/ والله يمه مالنا ذنب .. بعد بنتذمر من قضاء ربي ..
وشرحت لها سارة اللي صار من البداية للنهاية ..
ام عبدالرحمن وهي تضرب كف بكف ::/ حسبي الله على بليسكم كل هالفترة تاركينها بروحها فوق ولا احد منكم طلع لها يشوف وش صار عليها ..
سارة ::/ يمه انا رحت لها ولا كلمتني . الله يقلع بليسها فشلتني حتى ماردت علي ..(( ولوت بوزها))
قامت ام عبدالرحمن ::/ اصبر يا محمد ابطلع معك ....
ابتسم ابو عبدالله وانتظر امه علشان يمسكها مع يدها ويساعدها تطلع الدرج .. اختفوا من عيون اللي جالسين بالصالة طالعين فوق ... ودخلت ام عبدالله على البنات وجلست على السفرة جنب ندى وقدامها سارة أما لمياء فكانت تنوم ولدها بالمجلس الثاني ..
ام عبدالله وهي تصب القهوة وفقدت خالتها::/ وين جدتك ؟؟
سارة ::/ راحت مع ابوي لشهريار ..
رفعت ام عبدالله عينها لها تستفسر مستغربة ...!!
ابتسمت ندى ::/ راحوا لعذا ...
فتحت ام عبدالله عيونها مستغربة وبعدين ضحكت بخفيف ::/ يا حبي لبنتي خذت مكاني .. أيام بداية زواجي كنت اسوي سواتها ولا أرضى الا اذا طلع لي ابوك وأحيانا تجي معه أمك نورة ...
سارة بقهر ::/ والله زمن ...!!أنتي معليش يعني زوجته ومن حقه يراضيك بس الحين هذي الدوبا بنته .. لا وفوق هذا ليته غلطان عليها كان قلنا معليش ..؟؟
ام عبدالله ::/ بس انا كنت كذا قبل .. لو يجي واحد من الشارع ويقول لي انتي مو حلوة أزعل ولا أرضى الا لما يجي ابوك ويقول لي كم كلمة ...
تنهدت سارة وهي تضرب على صدرها ::/ يا ويل حالي عليك يايبه ... مبهذلين فيك هالبنات الدلوعات ...
ضحكت ندى بحزن ::/ خليها تتدلع على أبوها انتي وش لك بينهم ؟؟
سارة بصراخ ::/ مقهورة على ابوي اللي ضاع بينهم ...
ام عبدالله ::/ هذا هو معنا لاضاع ولاشي إلا زادت مكانته ..
سكتت سارة وماعلقت وسكتوا كلهم في جو هادئ يدعون ربي يتقبل منهم .. لأن للصائم دعوة لاترد عند فطره ...
جت لمياء وشاركتهم الجلسة .. وبعد دقائق نزل ابو عبدالله ووراه ام عبدالرحمن وعذا ماسكتها ...
ابتسمت ام عبدالله ولفت لندى اللي جالسة جنبها :::/ هذا هو شريطي في الماضي .. كأنه ينعاد قدامي ...
ابتسمت ندى لعمتها ::/ يا خوفي انك تغارين منها ...
ضحكت ام عبدالله على تعليق ندى وطالعت في عذا اللي عيونها متنفخة من الصياح .. ووجهها تحول للون الوردي كله من كثر ما تصيح بروحها في غرفتها .. وكأنها حست بقلبها أن عذا ماكانت تصيح بس على لولو .. لا كانت تصيح بعد زيادة لأن ابوها ما عبرها ولا جاء لها طول ماهي جالسة بغرفتها ...
أذن عليهم المغرب وسموا بسم الله وابتدوا فطورهم .. الله يتقبل منا ومنهم ...
-------------------------------------------------------------------------------

» رواية علمني حبك ان احزن
» رواية نهاية جنون \ رواية حجازية للكاتبة قطعة شوكلاتة
» رواية وش جاه محبوبي مشى وخلآني مابين نيراني وبين احزني / رواية جريئة رومانسية
» رواية نام في حضني ياحبيبي اول رواية بقلمي
» رواية أطباء في الحب \ رواية حجازية