رواية لأنني خادمة ( كاملة )

تذكير بمساهمة فاتح الموضوع :

رواية
لأنني خادمة !

♥ ♥

بسم الله الرحمن الرحيم ..
« لأنـــنـــي خــادمــة!! »
أي ليل / مظلم / معتم / ساكن / أليم سيجتاح مقلة فتاة كان الغدر أنيسها مذ كانت صغيرة ؟؟
أم أي شمس / منيرة / متوهجة / حارقة ستصرخ في دجى الآلام تحمل شمعة أنارت الكون ؟؟
أم أي ظلم / جبروت / جور / قسوة ألمت بحياة فتاة وجعلتها رفيقة لذئاب الغدر منذ الصغر ؟؟
كل ذلك تجيب عنه .. قصتي لليوم ..
« لأنـــنـــي خــادمــة!! »
***

الجزء الخامس عشر// الفصل الأول

منــوة : اميه الســـالفة وااايد طويـــله ..
منال : ونحن شو ورانا .. نركب السيـــارة وفي البيـــت اسمعج لين ما تتعبين وتقولين دخيلج يا اميه انتي اللي رمسي ..
منوة : هههههههههههه ان شــــــا الله ..
مشــــوا مع بعض باتجاه السيـــارة ..
وكل وحدة تفكر فـ شي معين ..
.
.
روت منــوة لأمهـا كل معاناتها اللي مرت بهـا ..
من ام أم فايز وبوفايز ..
ومن ذل فتحيـة .. لـ سجنها ..
ومن طيش راجو ومحمد ..
ومن تجربـة حب سيف وفضيحة العرس ..
ومن عمر وشهد .. والخيانة المفضوحة ..
و أخيراً لعايلة خالد .. ومواقف خالد وياهـا ..!
وسبب طيحتها .. وعايلة عبيد الدخيلة !!!
.
.
دخلت منوة البيت وهي مذهولة من كل هالفخامة الموجودة ..
ما كانت قادرة تستوعب ان مقدار الفخامة هذا كانت عايشتنه وهي صغيرة ..
تذكرت معاناتها فـ بيت بوفايز وفتحية ..
تنهدت على مصير فتحية المؤلم ... السجن !! ..
صدت أمها عليها بعد ما لاحظتها انها تسمرت فـ مكانها : شو بلاج يا منوة ؟
منوة بأسف : تدرين يا اميه .. احس ان كـل اللي انا أعيشه وهم × وهم ..
ام منوة : ليش انزين يا منوة ؟
منوة : انا جربت كل شتى أنواع العذاب يا اميه .. كل حياتي كانت مجرد شقى وتعب .. معقولة أحصل الراحة الحين ؟!
ام منوة دمعت عينها : حسبي الله ع اللي سوى كل ها فيج .. اللـه لا يـ ..
منوة تقاطعها : لا يا اميه .. مب زينه الدعاوي .. ع الاقل آخذ حقي بليا دعاوي ع الناس .. آخذ حقي بإيدي ..
قطـع رمستهم تـواجـد فارس ..
ام منوة صدت على فارس : هذي منوة يا فارس .. شفت ؟ خالد ما ظهر يقص علينا ..
منوة تصاصر أمها : اميه هذا ريلج ؟
ام منوة : هيه يا بنتي .. هذا ولد عمي و ريلي .. سيري سلمي عليه ..
نشت منوة له بكل حب ومدت يدها له : شحالك عمي ؟
طالعها فارس بنظرة حقد .. ومد يده لها : الحمدلله بخير ..
منوة تشنجت من مسكته ليدها ..
ليش يوم سلم عليها حست بطيف الماضي يعيد نفسه ؟!
يلس فارس .. وردت منوة ويلست حذال امها ..
كانت تتطالع فارس بربكة طول هاليلسة .. وما كانت تدري ليش ! ..
ام منوة بقهر : بنتي شقت وتعبت ف حياتها يا فارس .. لازم نبلغ الوجهات المختصة انهم ياخذون حق بنتي ..
فارس اللي كان مرتبك : وكيف بيصدقونج يعني ؟
ام منوة : جواز بنتي المزور .. وفتحية المسجونة عندهم .. كل ها وما بيصدقون ؟؟
صد فارس على منوة بذهول : بو فايز عطاج الجواز ؟
منوة طالعته بصدمة : وانته شدراك بـ بوفايز ؟
فارس بخوف : هـا .. منو بوفايز ؟
منوة بغيظ : انته قلت اسمه .. وانا سمعتك ..
ام منوة : يا جماعة بلاكم شو استوى ..
فارس طالع منوة بحقد : متأكدة ان هاي بنتج ؟ ماحيد تربيتج جيه ..
منوة وقفت وطالعته بتحدي : وهي لحقت تربيني بعد ما خطفني بو فايز ؟ بعدين
الزم حدودك فاهم ؟ وتعال انته اللي طريت اسمه ع لسانك .. شو دراك فيه ؟
فارس غيظ زيادة : ايه بلاج انتي يالبشكارة ؟
مـنوة طالعته بصدمة كبيرة ويلست وهي تحاول تداري دقات قلبها اللي تزايدت سرعتها ..
ام منوة طالعته بدهشة : وانته شدراك ؟
منوة وهي تتنافض : اقص ايديه اذا هذا ( تأشر على فارس ) ما كان له يد في السالفة اللي استوت بي .. حسبي الله عليـــــك ! ..
أم منوة بصدمة : اشوووه ؟؟؟ معقولة يا فارس ؟؟ تكلم ؟؟ انته اللي سويت كل ها بمنوة ؟
فارس تنفس بقوة وهو يطالع ام منوة ومنوة .. وبلا رد ..
ام منوة : انطق .. ولا مالك ويه تقول شي ؟
منوة دمعت عينها : انا شو ذنبي اني اعيش بذل كل ذيج المدة ؟
فارس كان ساكت .. لان ماله ويه يتكلم ..
ما كان متوقع ان لسانه بيزل وبينهزم من أول مواجهة مع منوة ..
وين كان إصراره انه يشكك في وجودها ؟؟ ويهدد ام منوة بالطلاق ؟؟ وييين !
تموا ساكتين لـ فترة .
الين ما نطق فارس بنفسه : هي نعم .. انا اللي خطفتج ..
منوة بلعت ريجها وطالعته بصدمة : انته ؟
فارس بتأثر : انا ما سويت هالشي عسب انتقم منج انتي .. ولا قصد مني اني
أبهدلج واخليج تتعذبين فـ حياتج .. ( رفع من درجة صوته ) انا كان قصدي ارد
خطيبتي لي من بعد ما ابوج صرقها مني .. وما كان في بالي غير الانتقام .. فـ
خطفتج ..
منوة طالعته بقهر : حرام عليك اللي سويته .. والله حرام ..
فارس ولأول مرة يبين عليه التأثر : لو كنت أبغي أحطمج ما كانت تكفلت بكل
مصاريف دراستج في المدرسة الخاصة .. انا .. انا فعلاً غلطت .. بس هذا ما
يمنع اني اكون نادم على غلطتي ..
ام منوة ودموعها تنزل بحرقة : وغلطتك ما دفع ثمنها غيري أنا وبنتي ..
منوة شهقت بألم : وابويه يالظالم .. ابوووويه ! ..
منال بقهر : اظهر من بيتي احسن لك .. ولا والله ما بتحصل شي زين مني ..
فارس بصدمة : بعد كل هالعمر تطرديني يا منال ؟؟
منال : وأي عمر عشته وياك يا الخاين ؟؟ عمري انتهى من غياب بنتي .. والحين بيبدى بعد فراقك ..
فارس بانتقام : انا بظهر يا ست الحسن والدلال .. بظهر .. بس والله بتندمـون ..
ظهر فارس من البيـت وسط صياح منوة وأمها ..
.
.
بدت منـال ( ام منوة ) تصلح كل اللي كان مفروض انه يتصلح ..
ودت بكل الأدلـة الكافية لقسم الشرطة .. مع حرصها على الخصوصية وكتمان السر ..
وهم ما قصروا ودلوها على الأماكن اللي ممكن تساندها فـ هالأزمة ..
وأكيد تم القبض على فارس .. والحكم كان السجن 15 سنة مع الأشغال الشاقة ..
أما منوة .. فتمت اجراءات رد الجواز والجنسية الإماراتية الها بعد شهور من هالسالفة ..
بحيث استوت منوة رسمياً .. مواطنة بجواز إماراتي ..
تم تبديل كل شهاداتها الدراسية من إسم صوفي لإسم منوة ..
.
.
وعـادت كل اشراقات الورد لـ مكانها ..
وعادت منوة لطبيعتها اللي نحن نجهلها ..
قررت منوة تدرس فـ معهد يقويها في الانجليزي لين بداية الكورس الدراسي .. عسب تدخل الجامعة بعد غياب سنتين ..
" حقاً تهللت أسايري بعد أن حُلّت طلاسم العقد البحتة .. إلا أن لغزاً واحداً لم أستطع حله حتى هذه اللحظة ! "
لغز منوة كـان خـالد نفسـه ..
بعد ما استشعرت الحب ... تنـاساها .. او حاول يتركها بصمت ..
وجود خالد هل لا زال له أي معنى ؟
/
\
/
\
يتبع //

الجزء الخامس عشر // الفصل الثاني

بخبث شديد : اميـه
ام منوة : هلا اميه شو تبين فديتج ؟؟
منوة : ممم .. اميه خلاص مب كل الأمور انحلت ؟
ام منوة : هيه فديتج خلاص .. شحقه هالسؤال ؟
منوة بتردد : أخاف اقولج شي وتغيظين عقب ..
ام منوة بشك : لا تحاتين ما بغيظ .. شو السالفة ..
منوة : اميه مب انتي وعدتيني نسير ونزور بيت خالد عقب ما تنحل الأمور ؟
ام منوة : وانتي يا منوة اشحقه تحبين المشاكل ..؟؟ خلاص نحن ما صدقنا محد درى عن اللي استوى بج ..
منوة : دخيلج يا اميه خلينا نسييير ..
ام منوة بحزم : منوة لا تحاولين ..
منوة : ليش انزين ؟
ام منوة : وشو يضمنج انه ما خبر هلـه عن سالفتج ؟
منوة : جان خبرهم يوم كنت اشتغل عندهم ..
ام منوة بغيظ : وليش تحبين تتذكرين اللي استوى بج ؟
منوة : يا اميه لانه ماضــي .. اوه تعالي اميه .. انزين وتليفونه ؟
ام منوة : اوووه تعالي نسيناه !! .. الله يهديج بس شحقه ما ذكرتيني نطرش الدريول يوديه له ؟
منوة بإصرار : اميه نحن اللي لازم نسير .. نسيتي ان نحن بنرد له فلوسه اللي صرفها علي ؟
ام منوة : والله صعبة نروح الهم .. بـ صفتنا شوه نروح ؟
منوة : بعطيج رقمها واتصليبها .. ولا جنه شي استوى ..
ام منوة : وشو اقولها ؟
منوة بحيرة : مادري ..
ام منوة : والله فشيلة !
تموا محتارين لفترة ..
ام منوة : لقيــتها !
منوة : ها بشري ..
ام منوة : بنتصل فـ ام عيسى ..
منوة باستغراب : منو هاي ؟؟
ام منوة : هاي اللي من استخبرت اني تطلقت يت و ركضت تعرفت علي ..
منوة : هيييه .. الرماسـة .. ؟ بلاها ..
ام منوة : بتصلبها وبخبرها اني ابا اتعرف على ام خالد .. وهي عاد بشطارتها بتدبر هالزيارة .. زين جيه ؟؟
منوة بفرحة : ازين من الزين يا اميييه .. فديتج والله ..
.
.
ومع مرور الوقـت ..
مشى اللي فـ بال ام منوة .. وام خالد على الرغم من انها ما تظهر من بيتها
الا انها اجتماعية وتحب ترحب بالناس .. فـ خبرتهم ايون متى ما بغوا ..
وقرروا يسيرون لهـا بعد كمن يوم ..
.
.
اليوم الموعود ..
دخلت ام منوة على بنتها ..
منال : خيبة خيييبة .. اشحقه كاشخة هالكثر ؟
منوة ببراءة : كلهن بنات خليني اكشخ امبينهن ..
منال زخت الكلينكس ويلست تمسح الجلوس و الجحال : ماشي .. ما عندنا بنات يتكشخن .. عقب يقولن عنج هب زينة ؟؟ لا بويه ..
منوة بوزت : حرام اميييييييه ..
منال بحزم : تبينا نهون عن السيرة يعني ؟
منوة : لالالالا بويه .. خلاص ..
وتمت الأمور ع طبيعتهـا ..
وساروا مع الدريول لـ بيت بو خالد ..
.
.
ام خالد : حيا الله ام منوة .. ( تطالع منوة بإعجاب ) ماشا الله عليها هاي بنتج ؟ ..
ام منوة : هيه هاي وحيدتي منوة ..
ام خالد : وانا اقول ام عيسى هب من طبايعها تمدح لي حد .. اكيد منوة قمر .. وما خاب ظني ..
ابتسمت لها منوة بحب : تسلمين خالو ..
ام عيسى : عاد ام منوة كانت مستحية تجوفج .. بس عاد البركة كلها فيه ..
ام منوة بكوميدية : لا هب مستحية بس اتغلى ههههههههه ..
ام خالد : ههههههههه عزيزة وغالية يا الغالية ..
دشت أسمـا الصالة وعينها على منوة : السلام عليكم
ردوا عليها السلام .. واشتغلت توايههم ..
وبجيـه تعرفت أسمـا على منوة ..
.
.
مع مرور الأيـام تأقلمت ام خالد ويا ام منوة .. وكانت امبينهم اتصالات وعلاقة صداقة تقوت مع الوقت ..
أما منوة فما كان صعب عليها التأقلم مع اسما لانها تعرف كل طبايعها وصفاتها
... وحتى تعرفت على عذبة بعد فترة .. و كانت علاقتها مع عذبة اقوى شوي من
اسما ..
.
.
فـي مرة من المرات .. وهم يرمسون ع التلفون ..
أسما : منوة دخيييلج تعالي براويج خطيبة اخويه خالد ..
منوة وجنه حد صاب ماي بارد عليها : هـــا !!! لالا ما فيه .. اميه ما بتطيع ..
اسما : عن الدلع .. انا برمس خالو .. وان شا الله بتطيع ..
منوة بضيج : بحاول ان شا الله .. تعالي منو خطيبة اخوج ؟
اسما : بنت خالتي .. اسمها روضـة ..
منوة بغصه : اها يعني في ملجة جريبة ؟
اسما : هههههههه اخويه كل يوم يأجل .. اونه مب مستعد ..
سكتت منوة .. وطفرت دمعة من عينها بالغصب : ايواا ..
اسما : تدرين عذبة اختي مهددتني ان ما قدرت اقنعج اتين يا ويلي..
منوة تنهدت : خلاص برمس اميه وبحاول اييكم ..
اسما : هيه فديتج .. يلا سيري الحين واستأذني منها ..
منوة : اسومة ..
اسما : آمري ..
منوة : بتكون عزيمة عودة .. ولا جيه بس انتوا متيمعين .
اسما : ممم نص نص .. بس اكشخي عسب أغايظ بنات خالو اني اعرفج ..
منوة : ههههههه انزين ..
.
.
نزلت اسما للصـالة ..
وهناك عذبة وخالد كانوا يالسين ..
عذبة : ها بشري بتيي ؟
اسما : يا رب اتيي .. بالغصب اقنعتها.. والحين بترمس امها ..
خالد باستغراب : منو ؟
عذبة : وحدة تهبل وتطيح الطيير من السما ..
اسما : اميه تباها حق أحمد ؟؟
عذبة تنرفزت : وشحقه مب لـ خالد ؟
اسما : الصراحة انا قلتلها تعالي جوفي خطيبة خالد ..
عذبة بغيظ : اتخسي رويضو تاخذ خالد ..
خالد : هههههههه ها الواقع عذبو .. انزين منو هاي ؟
عذبة : بنت يارتنا .. يا هي حلوة وخلووقة .. والله يا حظ اللي بياخذها ..
خالد : اوب اوب .. اونها عاد ..
عذبة : صدقني يوم بتجوفها بتطيح واقف ..
خالد : ههههههههه يالله ..
اسما : قلتلها تكشخ شرات ما خبرتيني..
خالد بملل : والله فاضيات ..اقوم واسير اجابل أشغالي أحسن ..
عذبة : وين وين .. والله ما تشبر برع البيت اليوم فاهم ؟؟
خالد : اتخبرج انتي ما عندج ريل ولا شو سالفتج ؟ 24 ساعة يالسة فـ بيتنا !
عذبة : مالت عليك .. حميد دوم الا في الشركة ..وما يخلص الا المسا ..
وبعدين تعال منو قال 24 ساعة .. ها يزايه ياية أملي عليكم البيت ؟!!
خالد : بس بس ولا تزعلين .. خلاص حياج الله .. انزين شحقه اتم في البيت ؟
عذبة : اباك بسالفة ( وبخبث ) لو تنطبق السما ع الأرض ما تاخذ رويض ..
.
.
وقـت العزيمة ..
البنات كانن كاشخات وشالات البيت شل بسوالفهن ..
منوة بعد محاولات كبيرة مع امها طاعت تخليها تسير وسارت وياها ..
من اول ما وصلت منوة على طووول سحبوها لـ فوق عند البنات ..
و امها تمت ويا الحريم ..
.
.
روضة : واشحقه ما كنتي تزورينهم قبل هالفترة ؟
منوة بإحراج : لان ريل امي كان مانعنا من الظهرة .. ومن اميه تطلقت منه بدينا نظهر للناس ..
روضـة بغيرة : انزين وشحقه مطولة شعرج ها ؟
عذبة : عوذ بالله انتي شو يخصج ؟
روضة : انزين عادي أنا أسأل بلاج انتي ؟
عذبة : يالله .. اسإلي شرات الأوادم .. شو ها !
منوة بكبرياء : عادي خليها ع راحتها ..
عذبة : فديتج الا انتي طيبة وع نياتج ..
روضة بغيظ : شو قصدج ؟
عذبة : اللبيب بالإشارة يفهم .
اسما : خلاص عاد بلاكم ..
رن تلفـون عذبة ..
جافت الاسم جان تبتسم بخبث : اقول منوة حبيبتي تعالي اباج بسالفة ..
روضة : وهالسالفة ما تنقال جدامنا ؟
عذبة : انتي ما يخصج يالرزة ..
وظهرن من الحجرة ..
يلست عذبة تمشيها الين الصالة اللي مجابلة قسم خالد ..
ومنوة قلبها يدق ..
ما تدري عذبة انها على علم بكل شبر فـ ارجاء هالبيت !
عذبة : منوة حبيبتي برد ع ريلي وبييج .. لا تتحركين ..
منوة بخوف : شو السالفة ؟
عذبة : ههههههه ماشي ماشي .. الحين بتعرفين ..
ومشت عذبة عنها وردت دشت حجرة اسما ..
تمت يالسة لدقايق جيه محتارة تتريى عذبة ..
الين ما انصدمت بصوت القفل ينفتح من حجرة خالد ..
خالد ظهر بكشخته اللي تخبـل ..
وانصدم بهالملاك الموجود ..
ما عرفها انها هي نفسها منوة لان فعلاً منوة تغيرت 180 درجة عن قبل ..
منوة شهقت : خالد ؟؟؟
خالد استغرب في البداية .. لكن من تأمل ملامحها عرفها ..
منــــــوة ..
.
.
فز الخفوق
فزّ الخفوق وقلت يالله عسى خير
أ ثر الليالي عاد غايب قمرها

مع شوفته نشوه و فزّه و تخدير
و عيون خلاّن(ن) تعانق نظرها

يفزّ له قلبي كما فزّة الطير
و الرجل كن اللي تحتها غدرها

ا صبح عمري يا صباح التباشير
نوره ملا قلبي و روحي غمرها

عقب الفراق اللي تعدّى المحاذير
يبّس غصون القلب جافي دهرها

ربّع بـروحي عقب ماهي معاسير
سحابة(ن) هلّت بقلبي مطرها

و اسقَى بها زرعة هوانا بتقدير
غرسة غرام(ن) بالمحبه بذرها

يا عاذلين العين والله مخاسير
و اللي درَى عن حال عيني عذرها

تشوم عيني عن جميع الغنادير
و إن ناظرت عيني فوادي نهرها

يا ناس احبه و المحبه مقادير
هذا هوَى نفسي و هذا قدرها

و الحب ماله يا اهل الحب تفسير
قلبين و الله بالمحبه امرها

لا جيت اصوّر حالة الحب تصوير
و أرد عن حالي لخلّي خبرها

لقيت وجدي فوق كل التعابير
كل الشعر قطره و شوقي بحرها
.
.
خالد بلهفة : منوووة شحالج وشخبارج ... شو مسوية ان شا الله تمام ؟
منوة ما رامت ترد عليه لانها كانت مرتبكة من الخاطر !
خالد : والله يا حظي فيييييج .. معقولة !! .. عذبة تباج لي ؟؟ يا سلام ..
منوة وهي شوي بتصيح : دخيلك اسكت .. ( تذكرت ) هاك خالد ( ظهرت ظرف من شنطتها فيه موبايله و مبلغ محترم ) .. بليز لا تردني ..
خالد باستغراب : شو هااا ؟؟
منوة مشت عنه بخوف : شكلي اليوم بنجتل بسبة عذبوووه .. انا براويها ..
ضحك خالد ع ردة فعلهـا ..
ويلس يجيك شو في الظرف ..
تضايج شوي ان منوة ردت له الفلوس ..
وف نفس الوقت كبرت بـ عينه يوم جافها غالقة الموبايل من تاريخ آخر لقاء امبينهم ..
و حصل فوق 30 مسج كلهم من روضة ( هدوني عليها خلني اقطعها ! )
والله انج كبرتي فـ عيني يا منوة ..
خلاص ما راح اتخلى عنج ..
انتي .. وبس ..
مشى عسب يدخل الظرف فـ حجرته ..
ويوم دخله دشت عذبة ..
عذبة بفضول : ها شو رايك فيها ؟
خالد تنهد بحب : ابـاها عذبو .. ومابا غيرها ..
.
.
بعد ما عدت العزيمـة ع خيـر ..
في الصالة..
عذبة وامها يالسات في الصالة ..
ام خالد : والله خاطري فيها ..
عذبة : فديتها والله تستاهل خالد ..
ام خالد : بس انا اباها لأحمد ..
عذبة : ويه ويه ويه .. شو قلتي اميه .. ليكون تبين رويض لخالد ؟
ام خالد : هيه .. ومنوة تاخذ احمد ..
أسما كانت يالسة تتصوخ الرمسة من عند امها وعذبة ..
وعلى طووول طيران واتصلت بمنوة تبشرها بالخبر التعيس ! ..
أسما : يالله اميه تباج لاخوووويه ..
منوة بحيا : ايواا ..
اسما : والله وناسة لو يستوي عرس خالد واحمد ف يوم واحد ..
منوة بحب : ان شا الله ..
اسما : وااااو .. روضة وخالد فـ قسم .. وانتي واحمد في القسم الثاني من الكوشة .. يـــس !
منوة بصدمة : اشوووه ؟ احمد !!
/
\
/
\
نهاية الجزء الخامس عشر ...

الجزء السادس عشر // الفصل الأول

اسما : وااااو .. روضة وخالد فـ قسم .. وانتي واحمد في القسم الثاني من الكوشة .. يـــس !
منوة بصدمة : اشوووه ؟ احمد !!
أسما باستغراب : شبلاج منوة ؟ احمد فيه شي ؟
منوة تضايجت من الخـــاطر : اسما هب جنه المفروض ما نرمس عن سوالف شرات هاي ؟
اسما : والله سوري منوة بس من وناستي قلت بخبرج ..
منوة بحزن : لا عادي فديتج ..
اسما انحرجت منها : منوة غناتي برايج انا بخليج الحينه .. بتصلبج باجر اوكيه ؟
منوة : اوكيـه مب مشكلة .. مع السلامة ..
.
.
سكرت عن أسما ولا إرادياً نزلت دموعها بقهـر ..
عيل ليش عذبة بغتني لـ خالد ؟
أنا مب فاهمة شي يا ناااس !
.
.
ما استوت دقايق الا وعذبة متصلتبها ..
تنهدت منوة بضيـج ومسحت دموعها ..
منوة بحزن : الـو ..
عذبة : هلا والله بالغالية .. شو وعيتج من الرقاد ؟
منوة : لا فديتج .. توني كنت ياية برقد بس ..
عذبة : انزيييين يا مرت اخويه ..
منوة تضايجت : مرت اخو مرة وحدة ؟
عذبة : هيه حبيبتي .. انتي مب شويه ..
منوة بدون نفس : مشكورة وما قصرتي .. بس بعد مرت اخوج شويه قويه ..
عذبة : لا والله ؟ تدرين ان خالد تخبـــل علييييييج ؟؟ لا بعد تم يقول
اباها عذبو .. ههههههههه يا بوج يننتي الريال .. بس تصدقين غريبة انه ما
سأل عن اسمج !! .
منوة ارتبكت وحبت تغير الموضوع : مـاشا الله انتي تبيني لخالد واسما تباني لـ احمد ..!!
عذبة تنرفزت : لا تقوليلي انها اتصلتبج وخبرتج عن سالفة اميه ؟
منوة بضيج : هيـه من شويه كانت ترمسني ..
عذبة بغيظ : هاي اسوم يبالها كف .. اصلاً نحن ما نتشرف ناخذ رويض السووووسة ! ..
منوة بفضول : أتخبرج عذبوو .. انتي شحقه مب طايجتنها ؟
عذبة صخت شويه عقب رمست بغيظ : لانها السوسة وراس الفتنه فهالعايلة ! ..
منوة باستغراب : ما فهمت ..
عذبة بقهر : روضة سوووسة وما ترتاح الا يوم تدمر الواحد .. اسإليني عنها والله اني فاهمتنها ..
منوة بصدمة : معقوولة ؟!
عذبة : والله صـدق .. روضة اذا خذت خالد بتحطمه .. وانا ما ارضـى لاخويه انه يتحطم واسكت لها ..
منوة : بس يا عذبة انا من شفتها ما حسيت انها جيه ..
عذبة : لانها حية وسوسة من تحت لين تحت .. مدام هيه ما فيه خير لأخوها تهقين يكون فيها خير لـ خالد ؟
منوة : والله ما فهمت ..
عذبة بصوت كله ألم : روضة كانت السبب في انه اخوها سيف يودرني .. انا كنت
محيرة له من صغرنا وكل الناس تعرف بهالشي .. ومرة من المرات انا تضاربت ويا
رويض .. اتخيلي عسب تنتقم مني سارت قالت عني اني هب زينة واني ألعب على
سيف ومن هالخرابيط .. ومن هاييج الحزة سيف كرهني ولا عاد ايي بيتنا الا
نااادر .. واتخيلي القهر انها يتني تقول انها هي بنفسها كرهت سيف فيـه لاني
ما أستاهله!
منوة بصدمة : معقـولة ؟!
عذبة بحزن : انتي ما تدرين كيف كانت حالتي صعبة عقب ما قالتلي .. بس الله
فوق وانقذني ويا حميد وخطبني .. والحمدلله ظهر حميد ريال والنعم فيه .. ولا
حتى سيف يوصل له بأخلاقه و طبايعه ..
منوة : انزين ما تتوقعين ان ممكن الله هداها الحين ؟
عذبة بغيظ : يمكن .. بس بعد ما بغيها لأخويـه ! ..
منوة : انزين وامج ؟ تراها تباها ..
عذبة تنهدت : اميه روحها سالفة .. تبا ترضي خواتها عسب يلتمون حولها على حساب مشاعر عيالها ..
منوة : والله حرام ! ..
عذبة : ما عليج انتي من هالسالفة .. ويلا خلج مستعدة .. بني نخطب فـ أي وقت .. المعرس مستعيل ويا ويهه ^^ ..
منوة بضيج : دخيلج عذبة .. هالسوالف انا ما حب ارمس عنها ..
عذبة : عاشت عااشت اللي تستحي .. ههههههههه عروس عروس ..
منوة بحزن : يلا عاد عذبووو ! ..
عذبة : انزيييين خلاص هههههههه .. يلا سيري ريحي الحييين وارقدي .. نوم العوافي يا رب ..
منوة : اللـه يعافيج ..
.
.
اليـوم الثـاني ..
و الكل يالس ع الغـدا فـ بيت بو خالد ..
عذبة وهي متعمدة ترمس جدام أبوهـا : ابويه حصلنا عروس حق خالد ..
ام خالد وقفت الأكل وتمت تطال عذبة بغيظ ..
بوخالد : ماشـا االله .. بنت منو ؟
عذبة : بنت المهندس محمد الله يرحمه .. اللي ساكنين فـ فريجنا ..
خالد : ماشـا الله ونعم الأخلاق .. والله انك عرفت تنقي يا خالد .. بالمبارك عليك ..
خالد شق الحلج : الله يبارج فـ حياتك يالغالي ..
ام خالد بغيظ : واشحقه مستانس ها ؟ هب جنه يا مدام عذبة انا قلت بنت محمد لاحمد ؟
احمد : بسـم الله ! .. شبلاج اميه خالد يباها .. حلال عليه ..
خالد يطالع احمد بفخر : تعجبني الصـراحة ..
ام خالد غيظت زيادة : خالد ما بياخذ الا رووووضة .. فاهمين ؟؟
خالد بعصبية : لو تنطبق السما ع الأرض مب ماخذنها .. يا تزوجيني بنت محمد .. يا اني ما اعرس ..
ام خالد : لا والله ؟ وروضـة ؟
عذبة باندفاع : الله يرزقها الريل الصالح .. بس هب خـالد ..
أحمد نش من على الكرسي وطالعهم بغيظ : اميه انا ابا روضـة .. والحين تسيرين
تخطبينها لي .. وان ما خطبتيها انسي ان عندج ولد اسمه أحمـد ..
ودز الكرسي بالقـو من غيظه .. وظهر من عندهم لـ حجرته ..
عذبة بدهشـة : ها بلاه ؟؟ ما صدقنا نفج لزقة رويض من خالد .. الحين هو يباها ؟؟!! ..

/
\
/
\
يتبع //

الجزء السادس عشر // الفصل الثاني

عذبة بدهشـة : ها بلاه ؟؟ ما صدقنا نفج لزقة رويض من خالد .. الحين هو يباها ؟؟!! ..
خالد : أي لزقة وأي خرابيط يا عذبة ؟ احمد هب طبيعي .. شو صابه ؟؟
ام خالد برعب : بو خالد الحق علينا بلاك ساكت جيه .. انطق .. تكلــــم !! ..
بوخالد قام من مكانه : في يوم تدخلت بينكم يوم ضاربت سيف على سالفة عذبة ..
واستوت قطيعة عودة مدتهـا شهور .. وهددتيني ما اتدخل مرة ثانية .. تذكرين
يا ام خالد ؟
ام خالد ارتبكت : بس هالسالفة تخص ولدك الحين ..
بو خالد : تراه يبا ياخذ بنت اختج .. زوجيه وفكينا من الصدعة ..
ام خالد بإصرار : أنا أباها لخالد !
بو خالد : والله كيفج .. تبينه يظيع من ايديج انتي حرة .. بعدين لا تقولين يا ليتني زوجته ! ..
مشى بو خـالد عنهم و سار فـوق ..
بينمـا اسما وعذبـة .. وخالد وامه .. تموا حيرانين ..
اسما : والحين شو بتسوون ؟
عذبة بغيظ : انتي تعالي شحقه رمستي منوة وقلتيلها ان اميه تباها لاحمد ؟
خالد تينن : احمـــــد ؟؟ ياخي شو سالفتكم انتووووا ؟؟
عذبة : لا تحاتي .. قول زين ان البنية قالت انها ما تحب ترمس فهالسوالف ولا جان رحنا فيها ..
اسما : وانا شدراني.. سمعتكم ترمسون وخبرتها ..
خالد بقهر : Cnn حشـى مب اسما ..
ام خالد : وليدي يهددني وبيروووح عني .. وانتوا مشغولين بام المشاكل منووووووووووه ؟؟؟
عذبة بقهر : اميييه .. منوة ما يخصها .. يالله عادة رويض النحسة موول ما سوت مشاكل .. ترى بسبتها أحمد غيظ علينا ..
ام خالد : لو هاييج منوة ما كانت موجودة جان على طول زوجنا خالد روضـة ..
عذبة : هيه ترى احمد كان بيخليكم .. اميه جيه احسن .. ع الأقل احمد هب حاقد على خالد ..
خالد بضيج : بسير أرمسـه ..
عذبة : الله يهديه ان شا الله ..
.
.
وسار خالد حجرة احمد ..
خالد دق الباب : ممكن أدش ؟
احمد كان متساند بإيديه بحيـرة ..
خالد يحاول يلطف الجو : ها ما جوفك يالس ع اللابتوب ؟؟!
احمد : اووه يا خالد .. اظني انته عارف اشحقه انا متضايج ..
خالد : اوكي ما اختلفنا .. بس ماله داعي انك تتضايج من الأساس .. ياخي خذها منو يودك ؟
احمد : ترى اميـه تباها لـك ..
خالد : كااااانت تباها لي لاني العود .. والحين يوم درت انك تباها رضت .. واستوى كل شي عادي ..
احمد تهلل ويهه : احلف ؟
خالد : لا اتمصخر عليك انا ويا هالويه ..!
أحمد : هههههههه ..
خالد بامتنان : مشكور يا احمد ..
احمد باستغراب : عـ شو ؟
خالد : على انك خطبت روضـة ..
احمد : انته ليش ما تباها ؟
خالد : لان قلبي تعلق بـ منوة .. ولا غيرها قدر يحتله ..
احمد بشك : جيه من متى انته تعرفها ؟
خالد ارتبك : ها .. جفتها مرة وحدة .. بس حسيت ان هالانسانة اللي تناسبني ..
احمد : اونك عاااااد .. خويلد .. تهقى اميه تسامحني ع الحركة البايخة اللي سويتها ؟
خالد : اكيد ما يبالها رمسة .. سير لها واستسمح منهـا ..
احمد : يالله انزين نش ويايه .. تراني ما عرف شو اقول فهالمناسبات خخ ..
خالد : ههههههههه مناسبة ها ؟؟
.
.
ونزلـوا لأمهم اللي تمت ويا عذبة بس ..
احمد يحب راسه امه : اميه اسمحيلي ع اللي سويته من شوي ..
ام خالد تطالعه بحزن : حرام عليك يا احمد .. جيه تسوي بأمك اللي تحبك وتحاتيك ؟؟ جان قلتلي من زمان كنت خطبتها لك ..
خالد وعذبة طالعوا بعض بغبـاء ..
احمد افتشل وصد على خالد وعذبة وطالعهم بعبط ..
خالد : هيه هيه .. كله احمد يدلعونه ..
عذبة : بسك خلّود اكثر واحد مدلع انته ..
خالد يسوي لها مالت : من زين ويهج يا الكريهة .. تعالي وينه حميد ؟
عذبة غيظت : هيه هب فاضي لنا .. تو الناس .. صباح الخير .. تراه الصبح يا وسلم على اميه وابويه ويابني هني لانه بيسافر ..
احمد : ويـن ؟؟
عذبة : افغانستـان ..
خالد بخبث : يا حيك يا حمييد .. اسميك بتطيح على الحسن كله .. العيون العسلية اللي جنها عيون المهـا .. ولا الحواجب .. رهييييبة ..
احمد ع نفس الموجة : ولا شعر الشنب الله يخليك ..
خالد : هههههههه ..
عذبة بقهر : عسب جييييه من طلبوه للدورة هناك طاع على طول .. ما عليه انا براويه ..
ام خالد : حشى هب صاحية انتي .. جوفي ويوههم وهم يستهبلون عليج ..
عذبة تطالعهم بإجرام : ويا هالويوه الغبرة خليتوني اشك فـ ريلي !! ..
خالد : ههههههههههههههههههههههه .. ( تذكر ) اوه تعالوا .. متى بتخطبون لي ولأحمد ؟
احمد : من الحين اقولكم ترى عرسي قبله ..
خالد : ايه ايه انا العود ..
احمد : ما يخصني .. مشكلتك ..
ام خالد بضيج : خلاص باجر ان شا الله ارمس اختي ام سيف واشاورها .. اقول خالد ما تبا شمـا ؟
عذبة بغيظ : اميييييه وبعدييين ..؟؟
رشود ظهر لهم : ايه انا ابا شما وان ما خطبتوها لي بنتحر ..
خالد بغباء : ايييه وين تبا ؟
راشد بعبط : اعيد فلم احمد يوم ع الغدا ههههههه ..
احمد بانتقام : انا براااويك يالهرم ..
عذبة : ههههه .. اميه باجر سيري واخطبي لاحمد ..
احمد باستغراب : جيه انتي ما بتسيرين وياها ؟
عذبة بخبث :افا عليك انا اول وحدة هناك .. ( فـ خاطرها ) عسب أغـايظ رويض هههههههه ..
.
.
وباليوم اللي عقبه .. اتصلت ام خالد وجست نبض ام سيف انهم يايين يخطبون ..
عاد منو يقول وناسة روضـة ذاك اليـوم !! ..
عنـد الرياييل كل شي روتيني وحسب الأصـول ..
أمـا عند الحريـم ..
عذبة بخبث : ان شا الله أحمـد يملج من صوب .. وخالد نخطب له من الصوب الثاني ..
روضة بغصة : وخالد بياخذ منو ؟
اسما بعفوية : بياخذ منوة .. هو اللي بغاها .. واحمد بغاج انتي ..
فجت روضـة عيونها ع الآخـر ..
صدمــة ما بعدها صـــدمة !! ..
ام خالد : زين يا ام سيف شو الشور الحينه .. متى تبون الملجة ؟
ام سيف روحها كانت متفاجأة : مادري والله .. الشور شو روضة ..
ام خالد : وانتي شو رايج يا روضة ؟؟
روضة بغيظ : مابا أملـج عليـه ..
عذبة وأم خالد بصدمة : اشوووه ؟؟ ما تبينه ؟؟؟

/
\
/
\
نهاية الجزء السادس عشر ...

الجزء السابع عشر // الفصل الأول

ام خالد : وانتي شو رايج يا روضة ؟؟
روضة بغيظ : مابا أملـج عليـه ..
عذبة وأم خالد بصدمة : اشوووه ؟؟ ما تبينه ؟؟؟
ام سيف تتدارك الموقف : لا لا ويه ويه .. قصدها ما تبا ملجة .. يعني الملجة والعرس فـ يوم واحد ..
روضة طالعت أمها بغيظ .. ونشت وسارت حجرتها ..
وشوي وامها سارت وراهـا ..
ام خالد : اشبلاها روضة ؟ بلاها هب ع بعضها ؟
عذبة ابتسمت : شكلها ما تبا احمد ..
ام خالد : وييييه ما تبا ولدي ؟ امنو قاال ؟
اسما : عذبو هي ما قالت شي ..
عذبة : صح ما قالت شي بس جوفن ويهها شقايل غدى يوم عرفت ان احمد هو اللي خطبها هب خالد .. ولا يوم نشت عنا جيه .. شو هالأدب ؟؟
ام خالد بحسرة : يا ويلي عليها .. خاطرها فـ خالد ..
عذبة تنرفزت : نشي وخبريهم انج تبين خالد ياخذها .. ( بمكر ) ولا تدرين سيري لهم صدق .. وجوفي احمد شو بيسوي ..
ام خالد برعب : سكتي انتي .. مب قايلة شي انا بلاج كلتيني ؟؟
.
.
فـ حجرة روضة ..
روضة بقهر : الحين انا ابا خالد .. احمدوه شو اللي رزه في السالفة ؟
ام سيف : اووه يا رويض .. اللي ما يباج لا تصيحين تبينه ..
روضة : الا بصيييح وبنقهر .. انتي ما جفتي ويه عذبو يوم انها ياية تتشمت
فيه ؟ فقتها الخايسة يعل ريلها يرد من سفرته وشال وياه درزن حريم معرس
عليهن عسب يحترق قلبها شرات ما حرقت لي قلبي اليووم ..
ام سيف بحزم : رويض صخي .. والله لو تسمعج بزوالج ..
شوي الا والباب يندق عليهم ..
ظهرت عذبة راسها من الباب : خالو ممكن ارمس روضة رواحنا ؟
تنرفزت روضة زيادة ..
ام سيف : خلاص خذوا راحتكم ..(تصاصر عذبة ) لا تلومينها ان قالت شي غلط لانها شالة فـ خاطرها ان احمد اللي خطبها هب خالد ..
عذبة بخبث : ولا يهمج خالو ..
ومشت ام سيف لبرع الحجرة .. وسكرت عذبة الباب : هـا بلاج ؟؟
روضة بقهر : لا تقوليلي انج انتي راعية هالفكرة السخييييفة ؟؟
عذبة : حشى عليه جيه جايفتني حقودة شراتج أخرب حياة اخويه ؟؟
روضة : يا سلاااام وانا الحين استويت خراب ها ؟
عذبة تطالعها باحتقار : سمي اللي بتسمينه .. يكون بعلمج ان احمد هو اللي
بغاج .. ولا انا كنت معارضة زواجج .. بس شو اسوي عنيد ومخه يابس .. قلت
لازم ارضى ..
روضة بحقد : واشحقه احمد يعرس قبل خالد ؟
عذبة وهي تبا تحرقها : قلنا حرام نزوجه وتتمين انتي مودرة والناس ترمس عليج
.. احسن ياخذج احمد من صوب .. وخالد ياخذ منوة فديت روحها من الصوب الثاني
..
روضة بقهر : الله ياخذ هالمنوة اللي مادري طلعت لي من وين !! ..
عذبة : اوه ما تدرين ان خالد يبااها وميييت عليها ؟؟ كان يبانا نسير نخطب
له اليوم .. بس قلنا ما يستوي .. نخطبج انتي .. وعقب نخطب له ..
روضة بقهر : جذابة انتي .. اصلاً خالد يباني بس أحمد أصـر علي ..
عذبة : هه .. وحليلج ما تدرين انه كان يبا الفكة منج .. والحين احمد
المسكين ابتلش فيـج .. بعدين تعالي ترى المسجات المايعة اللي كنتي تطرشينها
خالد ما جافها .. لان الموبايل كان عندي .. وخالد ما قرى الا مسج واحد .. .
روضة انقهرت : انزين خلاص .. سيري وقولي حق امج اني مابا ولا واحد من عيالج ..
عذبة : وييييه محلاها من ساعة .. بسير اخبرهم ..
ونشت عذبة عسب تسير الصالة .. بس روضة زختها وسبقتها عسب تخبرهم انها موافقة على احمد .. وهي مدعية السعادة كلها عسب تقهر عذبة ! ..
من جهتها عذبة كانت مسوتلها اكبر طاف .. لانها عارفة ان مستحيل احمد يتحملها .. كم يوم وبيكرهها .. هاي ما تنطاق ..
بس على الرغم من كل شي .. فـ روضة تمت تتشرط وطلبت انهم يسوون ملجة عودة ما في شراتها ..
وتحددت عقب شهـر..
.
.
خالد : خلاص اميه الحين أحمد وملجته عقب كم اسبوع .. يلا نشي واخطبيلي منوة ..
ام خالد بضيج : اوووه انته شبلااااك ؟؟ اصبر خلنا نخلص من عرس اخوك .. ومن عقبها الله كريم ؟
خالد : اوووف لين متى بتريى ؟؟
عذبة : ما عليه خويلد .. ان شا الله من تستوي ملجة احمد عقبها نسير نخطب لك منوة .. ايه اسمو بعد مب تخبرينها ؟؟
خالد : هيييه يا ويلج ان درت ..
اسمـا : حشى عوووذ بالله كلتوووني .. مب قايلة شي اوووف ..
.
.
بعـد شهـر // تحديداً ملجة أحمـد وروضـة ..
أم خـالد الفرحة كانت مب سايعتنها وهي تجوف روضة بتاخذ احمد ..
حتى يمكن كره منوة خف شوي عندها ..
روضة كانوا ملبسينها ثوب وكندورة .. وبكبرهـا لابسة ذهب ..
باختصـار كانت تراثيـة بمعنى الكلمة ! ..
كانت وايد محلوة ، خصوصاً بمكياجها النيلي واللي ضام وياه تدرجات الفوشي الجريء ..
حتى ان عذبة ما توقعتها بكل هالجمال ! ..
يابوا لهـا هدية الملجة واللي كانت عبارة عن مندوس عـود نسبياً وفيـه كم
قطعة ذهب على كمن كندورة على كمن عطور وهدايا متنوعة .. واللي كان شي فخم
وراهي انحط حذال الكوشـة ..
ودخلـوها من عقبها بين النـاس ..
وعاد روضة والثقـة ..
يلست ع الكراسي اللي في الكوشة نفسهـا ..
وما استوت الساعة 10 .. الا وأحمد يهدد ويتوعد اذا ما دخلوه ..!
.
.
عذبة : الووو .. وينج منوووو ؟؟
منوة : عذبوه ظيعنا البيت ! .. نحن الحين صوب شيشة البترول .. وين نروح عقب ..
عذبة : اقولج البيت مرة ورى الشيشة بالضبط .. لونه بيج رقـم 36 ..
منوة : اوكيه خلاص .. بخبر الدريول ويايين ان شـا الله ..
ما استوت ربع ساعـة ..
الا ومنوة داشـة بيـت روضـة ..
ما فصخت عباتها.. بس نزلت شيلتها وحطتها ع جتفها ..
وكانت فاتحة شعرها على طوله .. وحاطة ميك اب خفيف وااايد ..
عذبة بذهول : يا ويلي يا وييييلي ع الحسن كله .. منوو قريتي على عمرج ؟
منوة ابتسمت لها : فديتج والله عيونج الحـلوة ..
ام منوة توايه عذبة : وينها امج عيل ؟
عذبة : هني خالوه .. صبري بنسير كلنا رباعة .. (تغمر لمنوة ) عسب تجوف منوة بعد ..
طبعـاً المعنويات كانت عند منوة 100% .. من عرفت ان روضة اختفت عن طريجها وخذت أحمد ..
.
.
ام خالد وهي منبهرة بمنوة : ماشا الله عليج يا بنتي .. الله يحفظج ..
عذبة زاخة ايد منوة : يلا عيل نخليكم الحين بنسير فوووق ...
بس طبعاً قبل لا يسيرن فوق سارت منوة وسلمت ع روضة اللي ما شلت عيونها عن منوة من دشت ..
وروضـة نفسها انقهرت من وجود منوة ! ..
بس تظاهرت وغياضاً في عذبة ان مافي شي !! ..
.
.
عذبة بخبث : فديت خطيبة اخويه .. والله انه محظووظ فيـج ..
ابتسمت لها منوة بإحراج ..
ومشـوا لـ فوق ..
وروضـة معنوياتهـا ... زفت !! ..
.
.
عند البنات ..
عذبة : أقدم لكم منوة.. خطيبة اخويه خـالد ..
كل البنات طالعوهـا بذهول حتى منوة نفسها انحرجت من هالنظرة ! ..
منوة تصاصر عذبة : ايه عن الحركات !! ..
عذبة : جب جب .. اخويه خالد بيموت عليها وهي تقول حركات .. والله !! ..
ابتسمت منـوة بسعادة غـامرة ..
وردوا نـزلوا تحت ..
وحدة من البنات : عسب جيه هون عن رويض .. ماشا الله حلوة وشعرها عذااااب ..
.
.
مع مرور الوقـت ..
دخل أحمد وهو شاق الحلج انه خلااااص حقق امنيته وتزوج روضـة ..
قصـوا الكيكـة .. ولبسهـا الخـاتم ..
وسط دموع راعيات الأفلام الهندية (ام خالد & ام سيف) خخ ..
.
.
على آخـر الملجة ..
نش أحمد ووياه روضـة ..
وساروا يلسوهم فـ حجرة منفصـلة ..
بينما الرياييل دخلوا الصـالة .. >> يحبون الفوضى ..
ومنهم خـالد ..
منوة كانت على وشك انها تسير قبل ما احمد يدش ..
بس عذبة عاد وحبها حق الأفلام الهندية ..
اتريت لين ما خالد يا .. واتلصقت بمنوة ويلست تطالع خالد بخبث وتأشر على منوة ..
خالد كان فرحـان من كل خاطره فابتسم ابتسامة حلوة لمنوة ..
و أم خـالد لازالت شالة فـ خاطرها ولو القليـل ! ..
.
.
أحداث كثيرة ومواقف أكثـر استوت ..
منها روحة منوة لبيتهم ..
واهل العرس تصوروا وعقب ذلفوا لبيوتهم خخ ..
.
.
باليـوم الثـاني ..
خالد : الحينه مب انتوا قلتوا لي اصبر لين ملجة احمد ؟ هكوه ملج .. يلا سيروا خطبوا لي ..
عذبة : يااااا ربييييه منك انته ..
خالد : انتي اللي حرضتيني انزين ؟ ولا انا ما كنت حاط فـ بالي ..
عذبة : هههههههه ويا هالويه .. بعد لسانيييين !! ..
خالد : اميييه ليش ما تسيرون اليوم وتخطبون ؟
ما ردت ام خالد عليـه ..
عذبة وخالد طالعوا بعض باستغراب
عذبة : اميه شو رايج ؟ شبلاج صاخه ؟؟
ام خالد : لو تنطبق السمـا ع الأرض .. ما طبيت بيت هاللي يسمونها ( باستهزاء ) منـوة ..

/
\
/
\
يتبع //

الجزء السابع عشر // الفصل الثاني

عذبة : اميه شو رايج ؟ شبلاج صاخه ؟؟
ام خالد : لو تنطبق السمـا ع الأرض .. ما طبيت بيت هاللي يسمونها ( باستهزاء ) منـوة ..
خالد بصدمة : شو يعني ما تطبينه ؟؟ اميييييه تبيني أستخف ؟
عذبة بقلق : شحقه انزين ؟؟
ام خالد ضحكت بكوميدية : صادوه .. ( هب هينة العيوز ) ههههههه ..
خالد بإجرام : وانا قلبي وقف اتحسبج ترمسين جد يا امايه .. الله يهديج بس ..
عذبة : ههههههههههههه والله حركات اميه .. انزين متى نسير الهـم ؟
ام خالد : والله مادري .. بس صبروا شويه .. خله احمد ياخذ ع روضـة بالاول ..
وشوي ويطب عليـهم أحمد ..
كان كاشخ ومتوجه لـ باب الصالة وهو يرمس ع الموبايل
ام خالد : طالع اميه ؟
احمد : لحظة حياتي ( ينزل السماعة ) ها اميه بغيتي شي ؟
ام خالد : اقولك بتظهر ؟
احمد : هيه اميه تبين شي ؟
ام خالد : لا سلامتك .. تحمل ع الدرب ..
احمد : ان شا الله (رد ركب السماعة) حبيبتي الماركة اللي تبينها من غوتشي
ولا ديور ؟؟ انزين بكم ؟؟ اوف اوف وااايد .. انزين خلاص ولا يهمج .. ولا
يهمج انتي .. بشتريها وبيي عندج ..
وكمل رمسته وهو ظاهر من البيت ..
خالد كان متصنم بغباء وهو يحاول يستوعب شو السالفة ..
عذبة بغيظ : حشى بارحة مالجين .. مسرع بدت الطلبات !!
خالد بقهر : اميه خلاص تعودوا على بعض .. يلا نخطب ..
عذبة : مسرعهم والله ..
ام خالد : ويييه بلاكم انتوا .. قولوا ماشا الله .. الله يهنيهم يا رب ..
عذبة : وعقبال ما اييج احمد يبا فلوس حق هداياها .. اونها عاد استوت راعية ماركات ..
خالد : ايه بلاج .. هاي مرت اخوج ..
عذبة : اتخسي الا هي .. اصبر جان مـا .. ( خالد طالعها بنظرة عسب تسكت ) جان ما حبيتها !! ..
خالد : هههههههه .. يلا اميه وعذبو . شدوا الهمة .. دوركم الحينه اخطبوها ..
عذبة : امييييه بنتصل بيتهم انزين ؟؟ وبنقول لهم ان نحن يايينهم الحين ..
ام خالد : طاعوا هاي .. هب جنه لازم يكون عليهم ولي ولا شي ؟؟
خالد : لا والله ؟؟ الا يعني تدورون لي العلة ؟
ام خالد : لا من صدقي انا يا خالد .. الحين يوم ابوك بيسير يرمس بيرمّس منو ؟
خالد يفكـر : ما عرف ..
عذبة : عاد مب لهالدرجة هم يتامى .. منوة رمستني عن خال امهـا ..
خالد : هيه صح .. حمدان خال امهـا ايي لهم بين فترة وفترة ..
عذبة : وانته شدراك هـا ؟؟
خالد زاغ : سألت بعد شووو ؟؟
ام خالد : ما خلى شي فيها الا وسال عنهـا .. حشى !! ..
عذبة : هاي منوة بنت محمد ..
خالد لا إرادياً : فديتها والله ..
ام خالد : انطب يا مضيع المذهب .. قليل ادب !
عفس خالد ويهه .. وعذبة تمت تضحك عليه ..
.
.
مر اسبـوع كـامل .. وخالد يومياً يحن عليهم ..
عذبة من صوبها بردت وما تمت تآزر خالد ..
.
.
بعد فترة من الوقـت ..
خالد بغيظ : وانا شحقه ما خطبتي لي لين الحين ؟
ام خالد : اتخبرك انته .. هب جنك حاشرنا .. استهدي بالله واتريى ..
خالد : لا واللـه ؟؟ احمد على طوول من بغى ركضتوا وخطبتوله .. وانا ولد البطة السودة يعني مالي رب ؟؟ محد عاطني ويه ؟؟
ام خالد : لا حوووول .. اصبر لين عرس احمد .. والله كـريم ..
خالد غيظ : بـعد اصبر ؟؟ بـــعد ؟؟ اميـه عرسـه بعييييييد ..
ام خـالد : لانه نحنه مرتبشين بعرسه وما فينا ع الحشرة ..
خالد بقهر : انا حشرة هـا ؟؟
ام خالد : يا ربي عليك يا خالد .. اذيتني تراك ..
خالد : خلاص انزين زوجيني وبهدج فـ حالج ..
ام خالد : تراني قلتلك خذ روضة وما طعت .. دواك تم عزوبي الحين ..
خالد : طاعوا (غيظ من الخاطر) الحين انتي تبين تفهميني ان العرس ما تكون فيه فرحة الا اذا كانت العروس روضة ؟؟
ام خالد : لعوزتني تراك انته .. اذلف عن ويهي ..
خالد يصارخ بقوة : جيه انا مب ولدج ؟؟
ام خالد زاغت منه : هيه ولدي بس أحمـد ..
خالد قطع رمسة امه يوم فر الفـازا اللي حذاه بقوة وبغيييظ كبير : تبيني
اعيد مسلسل احمد يعني ها ؟؟ ما عليه يا اميه .. لا تلوموني ان سويت شي ما
يرضيكم بعد هاليوم ..
وظهر خالد بـكندورة البيت .. وعلى طول ركب سيارته ..
وما حلى الغيظ عنده الا يوم شخط بويل قوي على الانترلوك اللي فـ الحوش !! ..
ام خـالد من صدمتها باللي استوى : عذبة .. عذبة لحقي علي .. عذبووووه ..
يت عذبة وهي تراااكض .. وانصدمت بالزجاج المكسر : ويه ويه وييييه .. شو استوى ؟؟
أم خالد بخوف : قلت لـ خالد بنسير نخطب لك عقب عرس احمد .. غيظ من الخاطر وكسر الفازا وظهر ..
عذبة : حرام عليج يا اميه .. شحقه قلتيله جيه ؟
ام خالد : اووه وانا شدراني انه بيغيظ جيه ؟؟
عذبة : اميه مب ملاحظة ان معاملتج له تغيرت وايد بعد ملجة احمد ؟؟
ام خالد بتأنيب ضمير : بدال ما تلوميني سيري دوري عليييه .. اخاف يسوي شي بعمره ..
عذبة : يا ويلي عليك يا خالد .. دوم الا مغربلينك وما نشكر لك مـول !!..
حاولت عذبة تتصل به كم مرة .. بس ما كان يرد ..
و أثناء اتصالاتها . اتصلت بهـا منوة ..
.
.
عذبة : هلا منوة ..
منوة : هلا والله .. وييينج يالقاطعة .. حشى مول ما فيج خير تعالي واسإلي .. فجأة تختفين ؟؟
عذبة ظهرت من الصالة عسب تاخذ راحتها بعيد عن امها : اتغلى خخخ .. تدرين بعد عرس احمد ربشنا شويه ..
منوة : الله يهنيه يا رب ..
عذبة : ويهنيج وياه بعد ..
منوة استانست ع هالطاري : يلا عاد عن الحركات .. فهمتج تراني ..
عذبة : اونج عاد ..
منوة : فديتني والله خخخخ ..
عذبة : هيه والله .. مخبلة نااااس ..
منوة بحيا : عن الحركات عذبو ..
عذبة : ومن زود خبالهم كسروا الفازا وظهروا مغيظين من البيت .. هههههه ..
منوة بصدمة : حلفي انتي ؟؟
عذبة : والله ..
منوة بخوف : ليش انزين ؟؟
عذبة : اميه قالتله اصبر بنخطب لك عقب عرس احمد جان يغيظ ..
منوة قلبها يدق : وما اتصلتيله ؟
عذبة : عيزت من كثر ما اتصل .. ما يرد .. !! ..
منوة برعب : جربي تتصلين من كمن تلفون ..
عذبة : هي والله صدقج .. يبالي اجرب ..
منوة : انزين عيل عذوبة .. سيري اتصليبه .. وطمنينا ع المستجدات ..
عذبة : ان شـا الله ..
منوة : يلا مع السلامة
عذبة : مع السلامة ..
.
.
زخت منوة موبايلها وحاولت تتصل ..
بس بعد ما كـان يرد .. !
يا فـ بالها انها تطرش له مسج عسب يعرفها ..
( خالد انا منوة بليز رد علي )
بس حسته جاف .. فحبت تخليه بروح دعابة اكثر ..
( صوفي تسلم عليك وتقولك اتصل الحين ههههه )
هم كانوا كمن دقيقة ..
الا وخـالد .. يتصل على طـــول ..
قفلت الباب على عمرهـا عسب امها ما تدش ..
ويلست ع الكرسـي الهزاز ..
منوة بشوق : الو خالد ؟؟
خالد بلهفـة : منـــــوتي !! ..
منوة بفرحة : اشحالك خالد ؟
خالد : بخير دامج بخير يالغالية .. انتي شحالج ؟
منوة : والله الحمدلله زينه ..
خالد بصوت متفائل : والله زين ذكرتينا .. وأخيييراً ؟؟
منوة : مادري .. طرت ع بالي صوفي جان اتذكرك ههههههه ..
خالد : ههههههه .. يالله يا منوة لو تدرين كيف كنت محتاج هالاتصال ؟
منوة بحزن : ليــش ؟؟
خالد : كنت متضايج من الخاطر .. والحين ارتحــت ..
( لحــظات صمـت )
منوة : خـالد انته وييين ؟؟
خالد : احوط فـ الشارع ..
منوة : انزين طلبتك ..
خالد : آمري ..
منوة : رد البيت الحين ؟؟
خالد : تامرين أمر .. ها .. لفيت ع طريج بيتنا ..
منوة بغباء : تسلم والله .. تعال ..
خالد : وين ايي ؟؟
منوة : هههههه اقصد اتخبرك ..
خالد : آمري ..
منوة : استوى لي كذا مرة اني ييت بيتكم .. بس ما انتبهت لوجود كوماري ولا زوبا ولا روز .. جيه وينهم ؟
خالد : خبرج عتيييج .. بعد سيرتج انتي .. شجعتيهن ع الشردة .. روز وكوماري
شردن من البيت .. وكنسلنا اقامتهن والحين معمم عليهن .. وحصلنا كوماري بس
روز مختفية .. وزوبا خلى البيت عليها سارت صاحت عند اميه عسب تردها بلادها
.. عقبها بأسبوع يبنا 4 بشاكير يداد ..
منوة : وحليييلهن .. كله من روز راس الفتنه ..
خالد : هههههههه ترى روز اللي وصلت لي دفترج .. وكشفت حقيقتج ..
منوة بصدمة : احلف ؟؟
خالد : هههه والله ..
منوة : عيل خلاص فديتها ..
خالد تخبل : ههههههههههههههه ..
منوة : انزين عيل مستر خالد .. انا بخليك الحين ..
خالد : ليييش ؟؟
منوة : بس جيـه .. خخخ .. يلا مع السلامة ..
خالد : الله يحفظج ان شا الله ..
.
.
رد خالد البيت واعتذر لامه ..
وامه شكلها ما اتيي الا بالعين الحمرا ..
حزتها بس وعدته انها تسير تخطب له باليوم الثاني ..
وفعلاً .. استوى اللي تمناه خـال وساروا يخطبون ..
الريال كان حمدان خال ام منوة .. ريال وقور وله هيبة .. وبو خالد ارتاح له ..
منها جاف خـالد منوة ..
ومنها تحددت الملجة بعد اسبوع .. سكيتي بلا دق ولا خرابيط ..
.
.
على طريـج المحكمة ..
تـوجه خالد وابوه عسب يلحقون ويملجون بخالد ويفتكون من صدعته ..
الا ورقم غريب ايي خـالد ..
خالد : الو ؟؟
الريال : اذا شفتك صوب المحكمة بتجوف الويل منـي ..
خالد غيظ : منو انتــه ؟؟
سكر الريال فـ ويهه ..
وخـالد ارتبك ..
بو خالد : منو اللي متصل ؟
خالد : ها .. لا محد واحد شكله مغلط ..
وكملوا دربهم .. الين ما خالد نسى سالفة راعي الرقم موووليه ..
.
.
وصلوا للمحكمة ..
وفـ دربهم للبوابـة ..
مر حذاهم ريال متلثم ..
ما ايون الا والريال يغرز سجينه ( سكين ) ع قلب خـالد .. !!
وركض الريال على طول وركب سيارة بدون رقم وشـرد ..!
بوخالد ما عرف شو يسوي حزتها الا انه يصارخ بقوة ..
لين ما يوا السكيوريتي وطلبوا لـه الإسعاف ..
.
.
القهـر اكثر ان منوة وصلها الخبر وهي توها بتركب سيارتهم ..
ركضت لحجرتهـا بقهـر ..
ودموعها تغلب عيونها الحزينة ..
وكتبت فـ دفترهـا .
" لن أتـزوج خـالد .. لأننـي خادمة ! "

/
\
/
\
نهاية الجزء السابع عشر ...

الجزء الثامن عشر ( الأخير ) // بدمـج الفصليـن الأول & الثـاني

" لن أتـزوج خـالد .. لأننـي خادمة ! "
.
.
كلمة رددتهـا منـوة فـ حجرتها بحزن غريب ..
بينما هالحزن كان شبيه جداً بحزن هل خالد في المستشفى ..
كان مخيم جو الحزن والكآبة ع المستشـفى ..
.
.
ام خالد تصيح بقهر : حسبي الله على ابليس ( بكره ) كله من نحاسة هاي الـ منوة .. كله منها ..
بو خالد : لا حول ولا قوة الا بالله .. استهدي بالله يا مرة ..
ام خالد تصيح بقوة : لا اله الا الله .. محمد رسول الله .. بس ولدي بين
الحيا والموت (بقهر) حسبي الله عليها ان صاب خـالد شي .. والله لخليها تندم
..
عذبة وهي تمسح دموعها : اميه حراام عليج الحين البنية شو يخصها ؟؟
اسما : مسكينة تلقونها الحين تندب حظها ع اللي استوى .
.
.
مـع مـرور الوقـت ..
ين خوات ام خالد عسب يآزرنهـا فـ محنتها ..
وانقسموا لحزبين ..
الحريم فـ الانتظار ..
والرياييل صوب غرفة العمليات ..
روضة : حشى هب نحاسة عليـها .. مرة وحدة انطعن الريال ؟
عذبة بغيظ : البنية ما يخصها انزين ؟
روضة : هي مررة صدقتج الحينه .. جان مب هي اللي دبرت كل شي ..!
نشت اسمـا بغيظ وصفعتها ..
والكل تم يطالع اسما باندهاش ..
اسما اللي القوة لأول مرة تحتل جزء منها : بدال الحش و ظن السوء ادعيله
بدعوة صادقة .. ولو اني ماظن ان دعاويج مستجابة .. ومنوة ان طريتيها ع
لسانج مرة ثانية بتندمين فااااهمة ؟!!
روضة حزتها صخت .. وكانت تبا تسير .. الا ان امها يلستها بالغصب عسب ها واجبها كـ مرت اخو الهم ..
.
.
مع مرور الوقت ..
عذبة تهمس لأسما : شبلاج اسمو شحقه صفعتيها ؟
اسما بقهر : ما عرف حزتها قهرتني .. ما يحق لها ترمس عن منوة جييه ..
عذبة : عاد قلنا .. بس شو نسوي هاي لسـان بكبرها ..
اسما تصيح بقوة : منوة من ريحة خالد وما يحق لها تسبها ..
ما رامت عذبة تيود عمرها وهلـــكت من الصيـــاح !! ...
.
.
أمـا الوضـع عند منوة ..
فكان من سيء إلى أسوأ ..
وهي تندب حظها العاثر اللي بلشت خالد فيـه ..
ام منوة : اموت واعرف منو هاللي دبر هالجريمة الحقيرة !
منوة بألم : انا حاسة انه شخص يعرفنا .. وبغى ينتقم منا فـ خالد ..
ام منوة : فارس وانسجن .. ما تدرين شو الدافع .. بس والله بودي أسير لأم خالد .. بس عارفة انها ما بترحب فيه ..
منوة نشت من مكانها : كيفج يا اميه .. سوي اللي يريحج ..
ردت منوة وزخت دفترها ..
بعد ما توقعت ان خاتمة هالدفتر سعيدة !! ..
" لأنني خادمة،، حصل ما حصل، وخالد على فراش الموت، أشعر باني ألقيت عليه
نحساً لطالما راودني في السابق، كل ما حصل بسبب واحد ،، لأنني خادمة "
وتمت تصيـح وتصيح ..
على حظ عاثر كان حليفها بالدرجـة الأولـى ! ..
.
.
مر أسبوع ع الحادثة ..
ورجال الأمن مب رايمين يحققون فهالقضية لان المجني عليه خالد لازال في حالة فقدان وعي تامة ..
!
صحيح ان عملية خالد نجحت .. الا ان نبضه لازال قليل مقارنة بالسابق .. فاستلزم انهم يحطونه في غرفة العناية المركزة ..
ولا زالت الاوضاع متردية !! ...
هل خـالد بيمـوت ؟؟
وبتظل منوة بروحهـا ؟؟
واذا عـاش .. هل من الممكن انه يتزوجها بعد كــل اللي استوى ؟؟
ومنو صاحب الطعنة الإجرامية ؟؟
.
.
مر أسبـوع ثاني ..
وام منوة حزتها تشجعت انها تروح ..
وشرات ما توقعت ام خالد ما رحبت فيها !! ..
بل حست ان في حالة نفور من قبلها ..
لكنها مع ذلك داست ع كرامتها وأصرت انها تتم وياها ..
يومياً كانت تروح .. على عكس خوات ام خالد اللي بين كل يومين ايون ..
اليـن ما ردت ام خـالد تاخذ عليـها ..
وف مرة من المرات ..
أم خالد : عيل وينها منوة ليش ما يت وياج ؟
ام منوة ارتبكت : تدري بعد وضعها .. ويمكن .. يعني ..
ام خالد تنهدت : يا منال انا ادري ان كل اللي استوى كان قضاء وقدر ..
ومالها خص منوة في اللي استوى (دمعت عينها) والرمسة اللي كنت اقولها كانت
من غيظي وحرقة قلبي بس ..
ام منوة : معذورة يا الغالية .. الضنا غالي ..!
ام خالد : دخيلج باجر ييبيها .. ع الأقل عسب احس ان ودي بعده ( بألم) عـايش فهالدنيا ..
ام منوة تأثرت : ان شا الله بيظهر وبتفرحين فيه وبتزوجينه ..
ام خالد : والله ما ياخذ الا منوة ..
ام منوة بحنان : ان شـا الله ..
.
.
باليوم الثاني
يت ام منوة ووياها منوة اللي ويهها كان مصفر من الخـاطر ..
من أول لقاء بينها وبين أم خالد حضنوا بعض وتموا يصيحون ..
تموا على هالحـال ..
وكل وحدة فيهم تعبر عن شعور صعب عليها انها تعبر عنه في السابق ..
فراق خـالد .. هو المصير العالق في بال منوة و أم خـالد ..
الين ما نطقت منوة بألم : خالو جفتيه ؟؟
ام خالد صاحت بقوة : ما خلوني اجوفـه .. يقولون ممنووع ..
منوة تزخ ايدها بحنان : ما عليه خالو انا بسير ارمس الدكتور ..
وحاولت منوة مع الدكـتور لـ كذا مـرة ..
الين ما طاع الدكتور ..
بس شرط ان شخص واحد بس يدش لـه ..
فجدمت منوة ام خـالد انها تسير ..
لكن مع اصرار ام خالد سارن رباعة لـ حجرة خـالد ..
.
.
اول ما دشوا الحجـرة ..
ومنوة وام خالد عيونهم ع هالجثة الهامدة اللي طايحه ع السرير ..
خالد سماره متحول لسـواد ..
بالأحرى وكأن دمه اللي يسري في عروقه ازرق وعطاه هاللون ..
و اثنيناتهن يصيحن بكل الم على حاله ..
أم خـالد ما رامت تتحمل شوفته جيه .. فهرعت بسرعة لـ برع الغرفة .. عسب تدراي دموعها اللي نزلت لا إرادياً ..
أمـا منوة فت تجربت من خـالد ويلست تصيح بقهر : خاااالد دخيلك نش .. خالد
انته تدري ان مالي فهالدنيا غيرك .. ( بألم ) منو بيحميني من راجو ؟ من
محمد وسيف وعبيد ؟ من فاااارس .. ؟؟ دخيلك يا خالد لا تموت (تشهق) دخييييلك
.. انته تدري اني ماروم اعيش بليااااااك .. نش يا خالد نش .. انا منوة ..
دخيلك نش .. (نزلت دموعها بقوة) دخيييييييييلك !! ..
نزلت راسهـا وايديها لا زالت متمسكة بحديدة سريره ..
حست بضعف فظيع .. بوهـن .. بضيــج ! ..
يالله ما احقرج يا دنيـا ..
حتى اعز خلاني بتبعدينهم عني ؟؟
تمت على هالحـال لفترة طويلة تجاوزت الـ 10 دقايق المسموحة ..
الين ما يت السستر عسب تظهرها ..
طالعت خالد بحب مخلوط بحزن كبير ..
ومـدت ايدهـا لـه ..
وانصـدمــت !
خالد زخ ايدهــا .. خالد مسكهــا !! ..
صرخت منوة بفرحة : خالد نش .. نش خااااااالد (تطالع السستر) سيري ازقريهم .. سييييييييري !! ..
كان خالد بعده شبه نايم ..
يحرك عينه بشكل يدل على انه يحاول ينش بالغصب ..
تم يحرك راسه .. وشوي شوي تم يفتح عيونه ..
حزتها ام خالد وخواتها والبنات دشوا ..
منوة بفرحة : خالو نش .. نش خالد ..
ام خالد طالعتها وهي متفاجأة ومب مصدقة : الحمدللـــــــه .. الحمدلله .. عذبة سيري زقري ابووج .. سييري ..
ومن طلب ام خالد .. يوا الرياييل بعدها بدقايق ..
بوخالد اللي نظره كان منصب على منوة : نش خالد ؟؟
منوة دمعت عينها بفرح : هييه .. جوفه عمي زاخ ايــ ( انحرجت وحاولت تسحب ايدها ) ..
بس قبضـة خالد كانت قوية ..
بوخالد : هب هين خويلد .. حتى وهو في العناية ماصخ ..
الكل تم يضحك عدا روضة اللي حست بشوية غيظ على منوة ..
رد فتح خالد عيونه بكسل .. تم يتأمل الويوه اللي تحاصره ..
وركز على منوة بإبتسامة حب وامتنــان ..
منوة نفسها كانت منحرجة منه انه قابض ايدها جيه !! ..
أحمد بكوميدية : حمدلله ع السلامة يا روميو زمانك ..
خالد بصوت مبحوح موووليه : الله يسلمك جولييت ..
ام خالد : فدييييييت هالصوت علني ما انحرم منه .. والله لو اعرف ايبب جان يببت ..
بوخالد : لا زين ما تعرفين .. تبين يدار المستشفى يتشقق ؟؟
تم الكل يضحك ع بوخـالد وع تعليقه ..
منوة بغت تسحب ايدها من قبضة خالد القوية ..
خالد رص زيادة : بلاج انا مرتاح جيه شحقه تبين تودرين ايديه ؟؟
منوة ويهها قفط من الخـــاطر !! ..
عذبة : اونك عاد يالمستخف ..
منوة طالعت خالد بإجرام عسب يودرها ..
خالد : ترى اذا ودرتي ايديه برد اطيح مرة ثانية ..
ام خالد باندفاع : لالالالا بويه .. خلكم جيه ..(بخبث) لو ادري ان منوة هي دواك جان من اول يوم يبناها هنيه ..
خالد ابتسم : من زمان وهي دوايه الوحيد . بس انتوا ما تسمعون الرمسة ..
احمد : اسميك انته يا روميو ..
راشد : روميو معفن ..
احمد : شحقه يعني ؟
راشد : ما تجوفه راقد من سنة وحطبة هنيه ؟؟ اكيد مصنن الريال هههههه ..
خالد : ههههههههههههههههه ويا هالويه ..
.
.
مع مـرور الأيـام ..
تماثل خالد للشفاء ولله الحمد ..
وعن التحقيق .. أصـر خـالد انه ما يشك الا فـ يعقوب ..
خصوصاً ان ابوه وصف لهم نوعية السيارة ولونها يوم ركبها القاتل ..
فهالشي سهـل المهمة عليهم .. وتم القبض على يعقـوب ..
وبالفعل .. مع محاولات الضرب والكهربا .. اعترف بمحاولته ..
والسبب انه مطرش من فارس عسب ينتقم من منوة وامها لانهم سبب سجنه ..
انتقـام غريب !! ..
ولاول مرة فـ قصتنـا ..
يرجـع الحـق لصاحبـة الحـق ..
وبجيـه نتأكـد ان صفحـة ماضي منوة انطوت بسجن فارس وفتحية ويعقوب ..
أم فايز وبوفايز يدانون بعد بالجـرم ..
لكن من تأكدوا ان هالشخصين هاجروا لبلاد الله العالم بهـا سحبوا البـلاغ ..
وكل ها تم بسرية وخصوصيـة تــامة ..
.
.
مع إصرار خـالد ع نفس السـالفة ..
خالد : متى بتسيرون تخطبون ؟؟
ام خالد : ويييه يا خويلد .. ترانا خطبناها وخلاص .. بلاك انته ..
خالد بفرحة : يعني ما في خطبة مكررة ( انتبه لرمسته الملخبطة ) اوه اقصد اروم املج عليها اليوم ؟؟
ام خالد : هيـه ...
خالد بلهفة : خلاص اتصلي بهم ..
ام خالد : ياخي ريح شويه .. توك ظاهر من المستشفى ..
خالد : ان شـا الله .. تعالي اميه وينها عذبة ..؟
ام خالد : حميد بيرد من السفر اليوم .. وردت بيتها عسب تزهبه ..
خالد : ايواا ..
ام خالد : انزين اخبرك ..
خالد : ها اميه ..
ام خالد : عرسكم عقب عرس احمد انزين ؟
خالد : تااامرين أمر يالغالية .. بس ابا ملجة .. والعرس عقب عرس احمد ..
ام خالد : اسميك انته حركات .. تفرنا كلنا بـ صوب واحد ^^ ..
.
.
مـع مرور الأيـام ..
ملج خالد على منوة ..
وتحقق حلمه بالارتباط بهـا ..
من بـعد عرس أحمد وروضة بشهرين .. كان عرس خالد ومنوة ..
اللي الناس كلهـا رمست عنـه ..
عرس ما يليق الا بمقام منوة و خالد ^^ ..

بعـد العرس بشهـور طويلة ..
وعلى شاطىء بحر الخـليج ..
يلسوا أحلـى ثنائي مع بعض ..
♥ خالد و منوة ♥
خالد برومانسية : منوتـي ..!
منوة ابتسمت له بحب : هلا ..
خالد : ممم بسألج سؤال ! ..
منوة طالعته باستغراب : سؤال بس ؟؟ انته اسأل مليون سؤال ولا يهمك ..
خالد : حبيبتي .. دفترج الذهبي ..
منوة تغيرت تعابير ويهها : شبلاه ؟ ..
خالد : عطيني اياه بقـراه ..
منوة : بس اول شي اوعدني انك ما تضحك ع اللي كتبته ..
خالد : فالج طيب غناتي ما طلبتي ..
عطته منوة الدفتر بابتسامة حلوة .. وهو بدوره بدى يتصفحه ..
قرى خالد آخر مذكرات منوة ..
خالد باستنكـار : لأنني خـادمة ؟
منوة ابتسمت : مب حلـو ؟؟
خالد : الا رووعة .. بس نسيتي شي مهم ..
منوة : شوو ؟؟
خالد : ظهري قلمج واكتبي ..
منوة زخت قلمها بكوميدية : شو اكتب ؟؟
خالد حنى نفسه لها وجثى ع ركبتيه بحيث انه كان مجابلنها :
" لأنني خادمة تزوجني من أحب،، ولأنني خادمة فإنني حامل الآن وأنتظر مولودي
بعد 4 أشهـر ،، ولأنني كنت خادمة فمصير هذا الدفتر النسيان،، لأن مذكرات
كهذه لا يمكن أن تعود من جديد "
بعد ما خلصت منوة من الكتابة : بس ؟؟
خالد : عطيني الدفتر ..
منوة بحيرة : يعني لازم نفره ؟؟
خالد : مب أي شخص ممكن يتحمل صدمة سالفة شرات هاي .. صح حبيبتي ؟؟
منوة هزت راسها بإيجاب : خـلاص .. سو اللي تبـاه ..
.
.
مسك خالد الدفتر بإيديـه ورفعهم ..
وفر الدفتر لأبعد نقطة قدر يجوفهـا في البحـر ..
هالمرة خلاص .. سر منوة اندفن مع باقي مذكراتها ..
بدون ما يكون في احتمال انها تنكشف ولا تنفضح ..
منوة تمر بتجربة أمومة الحين .. وصعب على الطفل اللي بيي عقب انه يكتشف انه امه كانت مجرد "خدامة" !.
خالد ومنوة عصفت في حياتهم شتى العواصف ..
وأبرقت دنياهم بعد ليالي حارة خالية من أي نسمة هـوا ..
ما نقول مثل البعض انهم عاشوا في العسل ..
انما هم كأي زوجين .. وأبوين ..
تحكم عليهم الظروف انهم يختلفون ..
منوة تستحمل عصبية خالد ،، وخالد يستحمل طيش منوة ..
المهم ان كل شخص فيهم كبر فـ عين الثاني لمزاياه بغض النظر عن عيوبه .. لأن الحب شرات ما يقولون أعمى ^^ ..
.
.
روضة وأحمد ،، اقتدوا بمنوة وخالد على الرغم من مشاكلهم المتراكمة ..
وصغر عقل روضة .. وغيرة أحمد الكبيرة ..
إلا أن المسيرة تتواصل عسب يبقون لبعض ،، عنـــاد في كل اللي تكهنوا في مصير هالزواج .. واللي هو الفشـل .. ! ..
.
.
عذبة وحميد كانوا أحلى مثال ينضرب في الحب بعد الزواج،، ولا توقف للعطاء ..
.
.
أم خالد وبوخالد هم الشيبة والعيوز ،، اللي بعد كل هالعمر وصلوا لمرحلة
المناقر والضرايب على شي ما يسوى، بس على الرغم من كل ها فالعشـرة أبد ما
تهون ^^ ..
.
.
بس باقي الشخصيات اللي أدوا أدوار ثانوية في القصـة ؟؟
أكيـد ما ننسـاهم أبـداً ..
محمد / سيف / مزون / ريم / شهد / عمر / روز / زوبا / كوماري ..
ونشهـد على دورهم في إحداث متغيرات في القصة ^^ ..
.
.
بعد كل هالأيام اللي مــرت ..
وبعد كل الأفكار اللي انحطت وما تنفذت ..
خلصت القصة .. بحمد الله تعالى ..
12- سبتمبر-2007 م

/
\
/
\
نهاية لأنــني خــادمـة

خلآص تــــم تكملةةة الروآيـــة . .

وآسسفة يآصاحبة الموضوع ع التدخل وككدا بس ماحبيت الروآيةة تروح ع الفآضي بسبب انك مآكملتيهآ !

+ آسسفةة ع ككل الردود إلي انحذفت بس عشآن يصير الموضوع اسههل ف القرآءة

ودمتـــم ^_^

» روايـة لأنني خادمة ! للكـاتبة ♥ قلب دبي ♥ ♥ ♥
» رواية اتحداك واتحدى ابو الرجوله / كاملة
» رواية فارس احلامي / كاملة
» رواية ذهب مع الريح ((تحميل)) كاملة
» رواية روبي امانه برقبتك يانواف / كاملة